Ram Rahim News: ਡੇਰਾ ਸੱਚਾ ਸੌਦਾ ਦੇ ਮੁਖੀ ਗੁਰਮੀਤ ਰਾਮ ਰਹੀਮ ਨੂੰ ਇੱਕ ਵਾਰ ਫਿਰ ਜੇਲ੍ਹ ਤੋਂ ਛੁੱਟੀ ਮਿਲੀ ਹੈ। ਰੋਹਤਕ ਦੀ ਸੁਨਾਰੀਆ ਜੇਲ੍ਹ ਵਿੱਚ ਬੰਦ ਰਾਮ ਰਹੀਮ ਨੂੰ 40 ਦਿਨ ਦੀ ਪੈਰੋਲ ਮਿਲੀ ਹੈ। ਮੰਗਲਵਾਰ ਸਵੇਰੇ ਉਹ ਸਿਰਸਾ ਸਥਿਤ ਡੇਰੇ ਵੱਲ ਰਵਾਨਾ ਹੋ ਗਿਆ।
ਇਹ 2017 ਵਿੱਚ ਸਜ਼ਾ ਹੋਣ ਤੋਂ ਬਾਅਦ 14ਵੀਂ ਵਾਰ ਹੈ ਜਦ ਰਾਮ ਰਹੀਮ ਜੇਲ੍ਹ ਤੋਂ ਬਾਹਰ ਆਇਆ ਹੈ।
ਰੇਪ ਅਤੇ ਕਤਲ ਦੇ ਮਾਮਲੇ ‘ਚ ਕੱਟ ਰਿਹਾ ਹੈ 20 ਸਾਲ ਦੀ ਸਜ਼ਾ
ਗੁਰਮੀਤ ਰਾਮ ਰਹੀਮ ਨੂੰ 2017 ਵਿੱਚ ਦੋ ਬਲਾਤਕਾਰ ਮਾਮਲਿਆਂ ਅਤੇ ਦੋਹਾਂ ਦੀ ਕਤਲ ਸਾਜ਼ਿਸ਼ ਵਿੱਚ ਦੋਸ਼ੀ ਠਹਿਰਾਇਆ ਗਿਆ ਸੀ। ਉਹ ਇਸ ਸਮੇਂ 20 ਸਾਲ ਦੀ ਸਜ਼ਾ ਭੁਗਤ ਰਿਹਾ ਹੈ।
ਇਸ ਤੋਂ ਪਹਿਲਾਂ 9 ਅਪਰੈਲ 2025 ਨੂੰ ਮਿਲੀ ਸੀ ਫਰਲੋ
ਇਸ ਤੋਂ ਪਹਿਲਾਂ 9 ਅਪਰੈਲ 2025 ਨੂੰ ਰਾਮ ਰਹੀਮ ਨੂੰ 21 ਦਿਨ ਦੀ ਫਰਲੋ ਮਿਲੀ ਸੀ, ਜਿਸ ਦੌਰਾਨ ਉਹ ਸਿਰਸਾ ਡੇਰੇ ਵਿੱਚ ਹੀ ਰਿਹਾ ਸੀ। ਉਸ ਸਮੇਂ ਡੇਰੇ ਦੀ ਸਥਾਪਨਾ ਦਿਵਸ ਮਨਾਇਆ ਗਿਆ ਅਤੇ ਉਨ੍ਹਾਂ ਨੇ ਅਨੁਯਾਇੀਆਂ ਨਾਲ ਮੁਲਾਕਾਤਾਂ ਵੀ ਕੀਤੀਆਂ।
ਸੁਖ-ਸਵਿਧਾ ਨਾਲ ਰਵਾਨਗੀ, ਬੁਲੇਟ ਪ੍ਰੂਫ ਗੱਡੀਆਂ ਦਾ ਕਾਫ਼ਿਲਾ
5 ਅਗਸਤ ਦੀ ਸਵੇਰੇ 6:30 ਵਜੇ ਦੇ ਕਰੀਬ ਕੜੀ ਸੁਰੱਖਿਆ ਹੇਠ ਰਾਮ ਰਹੀਮ ਨੂੰ ਸੁਨਾਰੀਆ ਜੇਲ੍ਹ ਤੋਂ ਚੁੱਪਚਾਪ ਤਰੀਕੇ ਨਾਲ ਸਿਰਸਾ ਵੱਲ ਭੇਜਿਆ ਗਿਆ।
ਉਨ੍ਹਾਂ ਨਾਲ ਗੱਡੀਆਂ ਦਾ ਲਗਜ਼ਰੀ ਕਾਫ਼ਿਲਾ ਰਵਾਨਾ ਹੋਇਆ, ਜਿਸ ਵਿੱਚ
- 2 ਬੁਲੇਟ ਪ੍ਰੂਫ ਲੈਂਡ ਕਰੂਜ਼ਰ,
- 2 ਫਾਰਚੂਨਰ,
- ਅਤੇ ਹੋਰ 2 ਵਿਸ਼ੇਸ਼ ਗੱਡੀਆਂ ਸ਼ਾਮਲ ਰਹੀਆਂ।
ਇਹੀ ਕਾਫ਼ਿਲਾ ਹੁਣ 40 ਦਿਨਾਂ ਬਾਅਦ ਰਾਮ ਰਹੀਮ ਨੂੰ ਵਾਪਸ ਸੁਨਾਰੀਆ ਜੇਲ੍ਹ ਵਿੱਚ ਲਿਆਵੇਗਾ।ਪਿਛਲੇ ਕਈ ਦੌਰਿਆਂ ‘ਚ ਰਾਮ ਰਹੀਮ ਉੱਤਰ ਪ੍ਰਦੇਸ਼ ਦੇ ਬਾਗਪਤ ਜ਼ਿਲ੍ਹੇ ਦੇ ਬਰਨਾਵਾ ਅਸ਼ਰਮ ‘ਚ ਜਾ ਰਹੇ ਸਨ, ਪਰ ਇਸ ਵਾਰ ਉਹ ਸਿੱਧਾ ਸਿਰਸਾ ਡੇਰੇ ਵਿੱਚ ਹੀ ਰਹਿਣਗੇ।
ਭਾਰਤ ਵਿੱਚ ਕਈ ਵਾਰ ਵਿਵਾਦਾਂ ਦਾ ਕੇਂਦਰ ਬਣੇ ਗੁਰਮੀਤ ਰਾਮ ਰਹੀਮ ਨੂੰ ਵਾਰ-ਵਾਰ ਮਿਲ ਰਹੀ ਪੈਰੋਲ ਅਤੇ ਫਰਲੋ ’ਤੇ ਵੱਡੇ ਸਵਾਲ ਖੜੇ ਹੋ ਰਹੇ ਹਨ। ਆਲੋਚਕ ਇਸਨੂੰ ਸਿਸਟਮ ਦੀ ਦੋਹਰੀ ਨੀਤੀ ਅਤੇ ਵਿਸ਼ੇਸ਼ ਵਿਵਹਾਰ ਵਜੋਂ ਵੇਖ ਰਹੇ ਹਨ।
