ਵਿਨੇਸ਼ ਫੋਗਾਟ ਦਾ WFI ਨੂੰ ਕਰਾਰਾ ਜਵਾਬ:”ਮੈਂ ਕਿਸੇ ਨਿਯਮ ਦੀ ਉਲੰਘਣਾ ਨਹੀਂ ਕੀਤੀ, 1 ਜਨਵਰੀ ਤੋਂ ਹੀ ਮੈਨੂੰ ਮਿਲੀ ਸੀ ਮੁਕਾਬਲੇ ਦੀ ਇਜਾਜ਼ਤ”
WFI Notice Response: ਭਾਰਤੀ ਕੁਸ਼ਤੀ ਸੰਘ (WFI) ਵੱਲੋਂ ਜਾਰੀ ‘ਕਾਰਨ ਦੱਸੋ’ ਨੋਟਿਸ ‘ਤੇ ਸਟਾਰ ਪਹਿਲਵਾਨ ਵਿਨੇਸ਼ ਫੋਗਾਟ ਨੇ ਆਪਣੀ ਚੁੱਪੀ ਤੋੜੀ ਹੈ। ਸੋਸ਼ਲ ਮੀਡੀਆ ਰਾਹੀਂ ਆਪਣਾ ਪੱਖ ਰੱਖਦਿਆਂ ਵਿਨੇਸ਼ ਨੇ ਫੈਡਰੇਸ਼ਨ ਦੇ ਦਾਅਵਿਆਂ ਨੂੰ ਸਿਰੇ ਤੋਂ ਨਕਾਰ ਦਿੱਤਾ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਉਹ ਉੱਤਰ ਪ੍ਰਦੇਸ਼ ਦੇ ਗੋਂਡਾ ਵਿੱਚ ਹੋ ਰਹੇ ਓਪਨ ਰੈਂਕਿੰਗ ਟੂਰਨਾਮੈਂਟ ਵਿੱਚ ਹਿੱਸਾ ਲੈਣ ਲਈ ਪੂਰੀ ਤਰ੍ਹਾਂ ਯੋਗ ਹੈ ਅਤੇ ਫੈਡਰੇਸ਼ਨ ਤਾਰੀਖਾਂ ਦੀ ਗਲਤ ਵਿਆਖਿਆ ਕਰ ਰਹੀ ਹੈ।
ਤਾਰੀਖਾਂ ‘ਤੇ ਤਕਰਾਰ: 26 ਜੂਨ ਨਹੀਂ, 1 ਜਨਵਰੀ ਹੈ ਅਸਲ ਤਾਰੀਖ
ਵਿਨੇਸ਼ ਨੇ ਦਲੀਲ ਦਿੱਤੀ ਕਿ WFI ਦਾ ਇਹ ਦਾਅਵਾ ਗਲਤ ਹੈ ਕਿ ਉਹ 26 ਜੂਨ 2026 ਤੱਕ ਨਹੀਂ ਖੇਡ ਸਕਦੀ। ਉਨ੍ਹਾਂ ਕਿਹਾ, “ਮੈਨੂੰ 1 ਜਨਵਰੀ, 2026 ਤੋਂ ਹੀ ਮੁਕਾਬਲੇ ਸ਼ੁਰੂ ਕਰਨ ਦੀ ਇਜਾਜ਼ਤ ਮਿਲ ਚੁੱਕੀ ਸੀ। ਮੇਰੇ ਕੋਲ ਅੰਤਰਰਾਸ਼ਟਰੀ ਟੈਸਟਿੰਗ ਏਜੰਸੀ (ITA) ਦੇ ਦਸਤਾਵੇਜ਼ੀ ਸਬੂਤ ਹਨ, ਜੋ ਸਿੱਧੇ ਤੌਰ ‘ਤੇ ਯੂਨਾਈਟਿਡ ਵਰਲਡ ਰੈਸਲਿੰਗ (UWW) ਦੇ ਨਿਯਮਾਂ ਅਧੀਨ ਆਉਂਦੇ ਹਨ।”
ਡੋਪਿੰਗ ਅਤੇ ਅਨੁਸ਼ਾਸਨਹੀਣਤਾ ਦੇ ਦੋਸ਼ਾਂ ‘ਤੇ ਸਫਾਈ:
ਡੋਪਿੰਗ ਪ੍ਰੋਟੋਕੋਲ ਦੀ ਉਲੰਘਣਾ ਦੇ ਦੋਸ਼ਾਂ ‘ਤੇ ਵਿਨੇਸ਼ ਨੇ ਕਿਹਾ:
- ਮੈਂ ਕਿਸੇ ਵੀ ਡੋਪਿੰਗ ਵਿਰੋਧੀ ਨਿਯਮ ਨੂੰ ਨਹੀਂ ਤੋੜਿਆ।
- ਟੈਸਟ ਲਈ ਹਾਜ਼ਰ ਨਾ ਹੋ ਸਕਣ ਦੇ ਕਾਰਨਾਂ ਬਾਰੇ ਅਧਿਕਾਰੀਆਂ ਨੂੰ ਪਹਿਲਾਂ ਹੀ ਜਾਣਕਾਰੀ ਦੇ ਦਿੱਤੀ ਗਈ ਸੀ।
- ਸਤੰਬਰ 2024 ਅਤੇ ਦਸੰਬਰ 2025 ਦੇ ਘਟਨਾਕ੍ਰਮ ਬਾਰੇ ਵਿਸਤ੍ਰਿਤ ਜਾਣਕਾਰੀ ਪਹਿਲਾਂ ਹੀ ਸਾਂਝੀ ਕੀਤੀ ਜਾ ਚੁੱਕੀ ਹੈ।
ਨਿਸ਼ਾਨੇ ‘ਤੇ 2026 ਏਸ਼ੀਆਈ ਖੇਡਾਂ:
ਵਿਨੇਸ਼ ਨੇ NIS ਪਟਿਆਲਾ ਟਰਾਇਲਾਂ ਦੌਰਾਨ ਵੱਖ-ਵੱਖ ਭਾਰ ਵਰਗਾਂ ਵਿੱਚ ਹਿੱਸਾ ਲੈਣ ਦੇ ਦੋਸ਼ ਨੂੰ ਵੀ ਨਕਾਰਿਆ। ਉਨ੍ਹਾਂ ਕਿਹਾ ਕਿ ਉਸ ਸਮੇਂ ਫੈਡਰੇਸ਼ਨ ਦੀ ਕਮੇਟੀ ਸਭ ਜਾਣਦੀ ਸੀ, ਪਰ ਕੋਈ ਇਤਰਾਜ਼ ਨਹੀਂ ਜਤਾਇਆ ਗਿਆ। ਵਿਨੇਸ਼ ਨੇ ਐਲਾਨ ਕੀਤਾ ਕਿ ਉਹ ਅਗਲੇ 14 ਦਿਨਾਂ ਵਿੱਚ ਸਬੂਤਾਂ ਸਮੇਤ ਵਿਸਤ੍ਰਿਤ ਜਵਾਬ ਦਾਇਰ ਕਰੇਗੀ। ਉਨ੍ਹਾਂ ਦਾ ਅਗਲਾ ਟੀਚਾ 2026 ਦੀਆਂ ਏਸ਼ੀਆਈ ਖੇਡਾਂ ਵਿੱਚ ਭਾਰਤ ਲਈ ਮੈਡਲ ਜਿੱਤਣਾ ਹੈ।
