ਸੁਹਾਗਰਾਤ ਆਨ ਵ੍ਹੀਲਜ਼… ਟ੍ਰੇਨ ਦਾ ਫਰਸਟ ਏਸੀ ਕੂਪੇ ਬਣਿਆ ‘ਹਨੀਮੂਨ ਸੂਟ

ਇੱਕ ਯਾਤਰੀ ਨੇ ਆਪਣੀ ਨਵ-ਵਿਆਹੀ ਪਤਨੀ ਨੂੰ ਸਰਪ੍ਰਾਈਜ਼ ਦੇਣ ਲਈ ਫੁੱਲਾਂ ਤੇ ਗੁਬਾਰਿਆਂ ਨਾਲ ਸਜਾਇਆ ਪੂਰਾ ਕੂਪੇ

ਰੇਲਵੇ ਨੇ ਨਿਯਮਾਂ ਨੂੰ ਲੈ ਕੇ ਸਥਿਤੀ ਕੀਤੀ ਸਪੱਸ਼ਟ; ਦੱਸਿਆ ਅਜਿਹੀ ਸਜਾਵਟ ਕਦੋਂ ਹੈ ਜਾਇਜ਼ ਅਤੇ ਕਦੋਂ ਹੋ ਸਕਦੀ ਹੈ ਕਾਰਵਾਈ

ਨਵੀਂ ਦਿੱਲੀ (09 ਜੁਲਾਈ, 2026):

ਤੁਸੀਂ ਹੋਟਲਾਂ ਅਤੇ ਲਗਜ਼ਰੀ ਰਿਜ਼ੋਰਟਾਂ ਵਿੱਚ ਸਜੇ-ਧਜੇ ਹਨੀਮੂਨ ਸੂਟ ਤਾਂ ਕਈ ਵਾਰ ਦੇਖੇ ਹੋਣਗੇ, ਪਰ ਇਨੀਂ ਦਿਨੀਂ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀ ਇੱਕ ਵੀਡੀਓ ਨੇ ਸਭ ਦਾ ਧਿਆਨ ਆਪਣੇ ਵੱਲ ਖਿੱਚਿਆ ਹੈ। ਵੀਡੀਓ ਵਿੱਚ ਭਾਰਤੀ ਰੇਲਵੇ (Indian Railways) ਦੇ ਫਰਸਟ ਏਸੀ (1AC) ਕੂਪੇ ਨੂੰ ਫੁੱਲਾਂ, ਗੁਬਾਰਿਆਂ ਅਤੇ ਸਜਾਵਟੀ ਲਾਈਟਾਂ ਨਾਲ ਇਸ ਤਰ੍ਹਾਂ ਸ਼ਾਨਦਾਰ ਤਰੀਕੇ ਨਾਲ ਸਜਾਇਆ ਗਿਆ ਹੈ ਕਿ ਉਹ ਬਿਲਕੁਲ ਕਿਸੇ ਆਲੀਸ਼ਾਨ ਹਨੀਮੂਨ ਸੂਟ ਵਰਗਾ ਦਿਖਾਈ ਦੇ ਰਿਹਾ ਹੈ।

ਪਤਨੀ ਨੂੰ ਸਰਪ੍ਰਾਈਜ਼ ਦੇਣ ਲਈ ਕੀਤਾ ਅਨੋਖਾ ਉਪਰਾਲਾ

ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਹ ਸਜਾਵਟ ਇੱਕ ਯਾਤਰੀ ਨੇ ਆਪਣੇ ਨਵ-ਵਿਆਹੇ ਪਾਰਟਨਰ (ਜੀਵਨ ਸਾਥੀ) ਨੂੰ ਇੱਕ ਯਾਦਗਾਰ ਸਰਪ੍ਰਾਈਜ਼ ਦੇਣ ਲਈ ਕਰਵਾਈ ਸੀ। ਵਾਇਰਲ ਵੀਡੀਓ ਵਿੱਚ ਦੇਖਿਆ ਜਾ ਸਕਦਾ ਹੈ ਕਿ ਕੂਪੇ ਦੀਆਂ ਦੀਵਾਰਾਂ ‘ਤੇ ਗੁਲਾਬ ਦੇ ਫੁੱਲ ਲਗਾਏ ਗਏ ਹਨ, ਸੀਟ (ਬੱਥ) ਉੱਤੇ ਫੁੱਲਾਂ ਨਾਲ ਦਿਲ (Heart Shape) ਬਣਾਇਆ ਗਿਆ ਹੈ, ਫਰਸ਼ ‘ਤੇ ਫੁੱਲਾਂ ਦੀਆਂ ਪੱਤੀਆਂ ਬਿਖਰੀਆਂ ਹੋਈਆਂ ਹਨ ਅਤੇ ‘I Love You’ ਲਿਖਿਆ ਦਿਖਾਈ ਦੇ ਰਿਹਾ ਹੈ। ਹਾਲਾਂਕਿ, ਇਹ ਵੀਡੀਓ ਕਿਸ ਰੇਲਗੱਡੀ ਅਤੇ ਕਿਸ ਰੂਟ ਦੀ ਹੈ, ਇਸ ਬਾਰੇ ਅਜੇ ਤੱਕ ਕੋਈ ਅਧਿਕਾਰਤ ਪੁਸ਼ਟੀ ਨਹੀਂ ਹੋਈ।

ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਇੰਟਰਨੈੱਟ ‘ਤੇ ਲੋਕਾਂ ਦੀਆਂ ਵੱਖ-ਵੱਖ ਪ੍ਰਤੀਕਿਰਿਆਵਾਂ ਆ ਰਹੀਆਂ ਹਨ। ਕੁਝ ਯੂਜ਼ਰਸ ਨੇ ਇਸ ਨੂੰ ਸਫ਼ਰ ਨੂੰ ਯਾਦਗਾਰ ਬਣਾਉਣ ਦਾ ਬਹੁਤ ਹੀ ਰੋਮਾਂਟਿਕ ਅਤੇ ਸ਼ਾਨਦਾਰ ਤਰੀਕਾ ਦੱਸਿਆ, ਜਦੋਂ ਕਿ ਕਈ ਲੋਕਾਂ ਨੇ ਮਜ਼ਾਕੀਆ ਅੰਦਾਜ਼ ਵਿੱਚ ਸਵਾਲ ਉਠਾਇਆ ਕਿ “ਕੀ ਹੁਣ ਰੇਲਵੇ ਵੀ ਹਨੀਮੂਨ ਪੈਕੇਜ ਦੇਣ ਲੱਗ ਪਿਆ ਹੈ?” ਇਸ ਦੇ ਨਾਲ ਹੀ ਕੁਝ ਯੂਜ਼ਰਸ ਨੇ ਇਸ ਨੂੰ ਰੇਲਵੇ ਦੇ ਨਿਯਮਾਂ ਦੇ ਵਿਰੁੱਧ ਦੱਸਦਿਆਂ ਸੁਰੱਖਿਆ ‘ਤੇ ਵੀ ਸਵਾਲ ਖੜ੍ਹੇ ਕੀਤੇ।

ਕੀ ਕਹਿੰਦੇ ਹਨ ਰੇਲਵੇ ਦੇ ਨਿਯਮ?

ਵਾਇਰਲ ਵੀਡੀਓ ‘ਤੇ ਚੱਲ ਰਹੀ ਬਹਿਸ ਦਰਮਿਆਨ ਰੇਲਵੇ ਵੱਲੋਂ ਇਸ ਸਬੰਧੀ ਨਿਯਮ ਸਪੱਸ਼ਟ ਕੀਤੇ ਗਏ ਹਨ:

• ਨਿੱਜੀ ਵਰਤੋਂ ਲਈ ਛੋਟ: ਰੇਲਵੇ ਮੁਤਾਬਕ ਜੇਕਰ ਕਿਸੇ ਯਾਤਰੀ ਨੇ ਫਰਸਟ ਏਸੀ (1AC) ਦਾ ਪੂਰਾ ਕੂਪੇ (ਜਿਸ ਵਿੱਚ ਦੋ ਬਰਥਾਂ ਹੁੰਦੀਆਂ ਹਨ ਅਤੇ ਦਰਵਾਜ਼ਾ ਅੰਦਰੋਂ ਲਾਕ ਹੋ ਸਕਦਾ ਹੈ) ਬੁੱਕ ਕਰਵਾਇਆ ਹੈ, ਤਾਂ ਯਾਤਰਾ ਦੌਰਾਨ ਉਹ ਆਪਣੀ ਨਿੱਜੀ ਵਰਤੋਂ ਲਈ ਸੀਮਤ ਸਜਾਵਟ ਕਰ ਸਕਦਾ ਹੈ। ਇਹ ਪੂਰੀ ਤਰ੍ਹਾਂ ਯਾਤਰੀ ਦਾ ਆਪਣਾ ਫੈਸਲਾ ਹੁੰਦਾ ਹੈ, ਇਸ ਵਿੱਚ ਰੇਲਵੇ ਦੀ ਕੋਈ ਭੂਮਿਕਾ ਨਹੀਂ ਹੁੰਦੀ।
• ਰੇਲਵੇ ਦੀ ਸੰਪਤੀ ਨੂੰ ਨੁਕਸਾਨ ਨਹੀਂ: ਰੇਲਵੇ ਨੇ ਸਖ਼ਤ ਸ਼ਬਦਾਂ ਵਿੱਚ ਸਪੱਸ਼ਟ ਕੀਤਾ ਹੈ ਕਿ ਸਜਾਵਟ ਦੌਰਾਨ ਕੋਚ ਜਾਂ ਰੇਲਵੇ ਦੀ ਕਿਸੇ ਵੀ ਸੰਪਤੀ ਨੂੰ ਕੋਈ ਨੁਕਸਾਨ (ਜਿਵੇਂ ਕਿ ਕੰਧਾਂ ‘ਤੇ ਪੱਕੀ ਗੂੰਦ ਲਗਾਉਣਾ ਜਾਂ ਤੋੜ-ਭੰਨ ਕਰਨਾ) ਨਹੀਂ ਪਹੁੰਚਣਾ ਚਾਹੀਦਾ।
• ਸੁਰੱਖਿਆ ਅਤੇ ਸਫ਼ਾਈ ਸਭ ਤੋਂ ਜ਼ਰੂਰੀ: ਸਜਾਵਟ ਵਿੱਚ ਅਜਿਹੀ ਕਿਸੇ ਚੀਜ਼ ਦੀ ਵਰਤੋਂ ਨਹੀਂ ਹੋਣੀ ਚਾਹੀਦੀ ਜਿਸ ਨਾਲ ਅੱਗ ਲੱਗਣ ਦਾ ਖ਼ਤਰਾ ਹੋਵੇ (ਜਿਵੇਂ ਮੋਮਬੱਤੀਆਂ)। ਇਸ ਦੇ ਨਾਲ ਹੀ, ਸਫ਼ਾਈ ਦਾ ਪੂਰਾ ਧਿਆਨ ਰੱਖਣਾ ਲਾਜ਼ਮੀ ਹੈ ਅਤੇ ਦੂਜੇ ਯਾਤਰੀਆਂ ਨੂੰ ਕੋਈ ਪਰੇਸ਼ਾਨੀ ਨਹੀਂ ਹੋਣੀ ਚਾਹੀਦੀ।

ਰੇਲਵੇ ਅਧਿਕਾਰੀਆਂ ਅਨੁਸਾਰ ਜੇਕਰ ਇਨ੍ਹਾਂ ਸਾਰੀਆਂ ਸ਼ਰਤਾਂ ਦੀ ਪਾਲਣਾ ਕੀਤੀ ਜਾਂਦੀ ਹੈ, ਤਾਂ ਅਜਿਹੀ ਸਜਾਵਟ ਨੂੰ ਰੇਲਵੇ ਨਿਯਮਾਂ ਦੀ ਉਲੰਘਣਾ ਨਹੀਂ ਮੰਨਿਆ ਜਾਵੇਗਾ।