10% ਕਟੌਤੀ, ਰਿਫੰਡ ਵਿਚ ਤੇਜ਼ੀ ਅਤੇ ਬੈਗੇਜ ਸੰਭਾਲ ‘ਤੇ ਸਖ਼ਤੀ — ਸਰਕਾਰ ਦੀ ਕਾਰਵਾਈ ਤੋਂ ਬਾਅਦ ਇੰਡੀਗੋ ਮੰਨ ਗਈ

Indigo flight Crises Update: ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਰਾਮ ਮੋਹਨ ਨਾਇਡੂ ਵੱਲੋਂ ਜਾਰੀ ਸਖ਼ਤ ਨਿਰਦੇਸ਼ਾਂ ਤੋਂ ਬਾਅਦ ਇੰਡੀਗੋ ਏਅਰਲਾਈਨ ਨੇ ਆਪਣੇ ਸੰਚਾਲਨ ਵਿੱਚ 10% ਦੀ ਕਟੌਤੀ ਕਰਨ ਦਾ ਫ਼ੈਸਲਾ ਮੰਨ ਲਿਆ ਹੈ। ਇਹ ਕਦਮ ਹਾਲ ਹੀ ਵਿੱਚ ਵਧ ਰਹੀਆਂ ਉਡਾਣਾਂ ਦੀ ਰੱਦਗੀ ਨੂੰ ਘਟਾਉਣ ਅਤੇ ਸੇਵਾਵਾਂ ਨੂੰ ਸਥਿਰ ਕਰਨ ਲਈ ਚੁੱਕਿਆ ਗਿਆ।

ਸਰਕਾਰੀ ਹੁਕਮਾਂ ਅਨੁਸਾਰ, ਹੁਣ ਇੰਡੀਗੋ ਨੂੰ ਰੋਜ਼ਾਨਾ ਲਗਭਗ 215 ਉਡਾਣਾਂ ਘਟਾਉਣੀਆਂ ਪੈਣਗੀਆਂ।

ਸੀਈਓ ਨੂੰ ਤਲਬ ਕੀਤੇ ਜਾਣ ਤੋਂ ਬਾਅਦ ਆਇਆ ਆਦੇਸ਼

ਹਵਾਬਾਜ਼ੀ ਮੰਤਰਾਲੇ ਨੇ ਇੰਡੀਗੋ ਦੇ ਸੀਈਓ ਪੀਟਰ ਐਲਬਰਸ ਨੂੰ ਤੁਰੰਤ ਤਲਬ ਕਰਕੇ ਵਧ ਰਹੀਆਂ ਸ਼ਿਕਾਇਤਾਂ ‘ਤੇ ਸਪੱਸ਼ਟੀਕਰਣ ਮੰਗਿਆ। ਮੀਟਿੰਗ ਦੌਰਾਨ ਐਲਬਰਸ ਨੇ ਦੱਸਿਆ ਕਿ 6 ਦਸੰਬਰ ਤੱਕ ਦੀਆਂ ਰੱਦ ਉਡਾਣਾਂ ਦੇ 100% ਰਿਫੰਡ ਜਾਰੀ ਕਰ ਦਿੱਤੇ ਗਏ ਹਨ।

ਮੰਤਰੀ ਨੇ ਕਿਹਾ ਕਿ ਬਾਕੀ ਰਹਿ ਗਏ ਰਿਫੰਡ ਅਤੇ ਬੈਗੇਜ ਸੌਂਪਣ ਦੀ ਪ੍ਰਕਿਰਿਆ ਤੇਜ਼ ਕਰਨ ਲਈ ਸਖ਼ਤ ਨਿਰਦੇਸ਼ ਦਿੱਤੇ ਗਏ ਹਨ।

ਇੰਡੀਗੋ ਦੇ ਸਾਰੇ ਰੂਟ ਚਲਦੇ ਰਹਿਣਗੇ, ਪਰ ਗਿਣਤੀ ਘਟੇਗੀ

ਮੰਤਰੀ ਨਾਇਡੂ ਨੇ X ‘ਤੇ ਪੋਸਟ ਕਰਕੇ ਕਿਹਾ ਕਿ ਇੰਡੀਗੋ ਦੇ ਸਾਰੇ ਮੌਜੂਦਾ ਰੂਟ ਜਾਰੀ ਰਹਿਣਗੇ, ਪਰ 10% ਸੰਚਾਲਨ ਕਟੌਤੀ ਨਾਲ ਉਡਾਣਾਂ ਦੀ ਗਿਣਤੀ ਘਟੇਗੀ।
ਏਅਰਲਾਈਨ ਨੂੰ ਪਹਿਲਾਂ ਸਰਦੀਆਂ ਦੇ ਸ਼ਡਿਊਲ ਤਹਿਤ 2,145 ਉਡਾਣਾਂ ਪ੍ਰਤੀ ਦਿਨ ਚਲਾਉਣ ਦੀ ਮਨਜ਼ੂਰੀ ਸੀ।

ਯਾਤਰੀ ਸਹੂਲਤ ਅਤੇ ਕਿਰਾਏ ਦੀ ਨੀਤੀ ‘ਤੇ ਵੀ ਸਖ਼ਤੀ

ਮੰਤਰਾਲੇ ਨੇ ਇੰਡੀਗੋ ਨੂੰ ਹਦਾਇਤ ਕੀਤੀ ਹੈ ਕਿ ਉਹ ਯਾਤਰੀ ਸਹੂਲਤਾ ਉਪਾਅ ਅਤੇ ਕਿਰਾਏ ਦੀ ਰਿਆਇਤੀ ਸੀਮਾਵਾਂ ਨਾਲ ਸੰਬੰਧਤ ਸਾਰੇ ਨਿਰਦੇਸ਼ਾਂ ਦੀ ਪੂਰੀ ਪਾਲਣਾ ਯਕੀਨੀ ਬਣਾਏ।