ਜਨਵਰੀ 2026 ਵਿੱਚ ਦਿੱਲੀ ਦੀ ਹਵਾ ਦੀ ਗੁਣਵੱਤਾ ਵਿਗੜੀ, CREA ਦੀ ਰਿਪੋਰਟ ਵਿੱਚ ਦਿਖਾਈ ਮਾਮੂਲੀ ਗਿਰਾਵਟ
Delhi Air Pollution: ਸੈਂਟਰ ਫਾਰ ਰਿਸਰਚ ਆਨ ਐਨਰਜੀ ਐਂਡ ਕਲੀਨ ਏਅਰ (CREA) ਵੱਲੋਂ ਜਾਰੀ ਕੀਤੇ ਗਏ ਤਾਜ਼ਾ ਵਿਸ਼ਲੇਸ਼ਣ ਮੁਤਾਬਕ, ਜਨਵਰੀ 2026 ਦੌਰਾਨ ਦਿੱਲੀ ਦੀ ਹਵਾ ਦੀ ਗੁਣਵੱਤਾ ਵਿੱਚ ਪਿਛਲੇ ਸਾਲ ਦੇ ਮੁਕਾਬਲੇ ਹਲਕੀ ਗਿਰਾਵਟ ਦਰਜ ਕੀਤੀ ਗਈ ਹੈ। 30 ਜਨਵਰੀ ਤੱਕ ਦਿੱਲੀ ਦਾ ਔਸਤ ਏਅਰ ਕੁਆਲਿਟੀ ਇੰਡੈਕਸ (AQI) 307 ਰਿਹਾ, ਜਦਕਿ ਜਨਵਰੀ 2025 ਵਿੱਚ ਇਸੇ ਅਵਧੀ ਦੌਰਾਨ ਇਹ ਅੰਕੜਾ 306 ਸੀ।
CREA ਦੇ ਅਧਿਐਨ ਤੋਂ ਪਤਾ ਲੱਗਾ ਹੈ ਕਿ 306 ਦੇ ਔਸਤ AQI ਨਾਲ ਜਨਵਰੀ 2025, ਸਾਲ 2022 ਤੋਂ ਬਾਅਦ ਹਵਾ ਪ੍ਰਦੂਸ਼ਣ ਦੇ ਮਾਮਲੇ ਵਿੱਚ ਸਭ ਤੋਂ ਵਧੀਆ ਜਨਵਰੀ ਰਿਹਾ ਸੀ, ਜਦੋਂ ਮਹੀਨਾਵਾਰ ਔਸਤ AQI 279 ਸੀ; ਇਸ ਹਿਸਾਬ ਨਾਲ ਜਨਵਰੀ 2026 ਹੁਣ ਉਦੋਂ ਤੋਂ ਦੂਜਾ ਸਭ ਤੋਂ ਵਧੀਆ ਜਨਵਰੀ ਬਣ ਗਿਆ ਹੈ।
ਵਿਸ਼ਲੇਸ਼ਣ ਦੱਸਦਾ ਹੈ ਕਿ ਜਨਵਰੀ 2026 ਵਿੱਚ ਹੁਣ ਤੱਕ ਦਿੱਲੀ ਵਿੱਚ ਦੋ ਦਿਨ ਦਰਮਿਆਨੀ (moderate), 12 ਦਿਨ ਖਰਾਬ (poor), 14 ਦਿਨ ਬਹੁਤ ਖਰਾਬ (very poor) ਅਤੇ ਦੋ ਦਿਨ “ਗੰਭੀਰ” (severe) ਹਵਾ ਦੀ ਗੁਣਵੱਤਾ ਦਰਜ ਕੀਤੀ ਗਈ ਹੈ। ਇਸਦੇ ਉਲਟ, ਜਨਵਰੀ 2025 ਵਿੱਚ ਦੋ ਦਰਮਿਆਨੇ, 13 ਖਰਾਬ ਅਤੇ 16 ਬਹੁਤ ਖਰਾਬ ਦਿਨ ਦਰਜ ਕੀਤੇ ਗਏ ਸਨ, ਜਦੋਂ ਕਿ ਉਸ ਮਹੀਨੇ ਦੌਰਾਨ ਕੋਈ ਵੀ ਦਿਨ ਗੰਭੀਰ ਸ਼੍ਰੇਣੀ ਵਿੱਚ ਨਹੀਂ ਆਇਆ ਸੀ।
ਅਧਿਐਨ ਮੁਤਾਬਕ ਪਿਛਲੇ ਸਾਲ ਇੱਕ ਵੀ ਗੰਭੀਰ ਦਿਨ ਨਾ ਹੋਣਾ ਅਤੇ ਇਸ ਸਾਲ ਦੋ ਅਜਿਹੇ ਦਿਨਾਂ ਦੀ ਮੌਜੂਦਗੀ 2026 ਦੇ ਔਸਤ AQI ਵਿੱਚ ਮਾਮੂਲੀ ਵਾਧੇ ਦਾ ਕਾਰਨ ਹੋ ਸਕਦੀ ਹੈ। ਹਵਾ ਦੀ ਗੁਣਵੱਤਾ ਬਾਰੇ ਅਗਾਊਂ ਚੇਤਾਵਨੀ ਪ੍ਰਣਾਲੀ ਨੇ 31 ਜਨਵਰੀ ਲਈ ਵੀ ਬਹੁਤ ਖਰਾਬ ਹਵਾ ਦੀ ਭਵਿੱਖਬਾਣੀ ਕੀਤੀ ਹੈ।
