Google new QR code – Google ਆਪਣੇ ਯੂਜ਼ਰਾਂ ਦੀ ਸੁਰੱਖਿਆ ਨੂੰ ਹੋਰ ਮਜ਼ਬੂਤ ਬਣਾਉਣ ਲਈ ਇੱਕ ਵੱਡਾ ਬਦਲਾਅ ਕਰਨ ਜਾ ਰਿਹਾ ਹੈ। ਹੁਣ Gmail ਵਿੱਚ OTP (One-Time Password) ਦੀ ਬਜਾਏ QR ਕੋਡ ਬੇਸਡ ਆਥੈਂਟੀਕੇਸ਼ਨ ਲਾਗੂ ਕੀਤਾ ਜਾਵੇਗਾ। Forbes ਦੀ ਰਿਪੋਰਟ ਅਨੁਸਾਰ, Google ਨੇ SMS ਦੁਆਰਾ ਭੇਜੇ ਜਾਣ ਵਾਲੇ ਛੇ ਅੰਕਾਂ ਦੇ ਕੋਡ ਨੂੰ ਹਟਾਉਣ ਦਾ ਫੈਸਲਾ ਕੀਤਾ ਹੈ ਕਿਉਂਕਿ ਇਹ ਫਿਸ਼ਿੰਗ ਹਮਲਿਆਂ ਅਤੇ SIM-ਸਵੈਪਿੰਗ ਜੈਸੀ ਠੱਗੀ ਦੀਆਂ ਤਕਨੀਕਾਂ ਨਾਲ ਆਸਾਨੀ ਨਾਲ ਹੈਕ ਹੋ ਸਕਦੇ ਹਨ।
Gmail ਨੇ ਕੀਤੀ ਪੁਸ਼ਟੀ
Google ਦੇ Gmail ਵਿਭਾਗ ਦੇ ਪ੍ਰਵਕਤਾ ਰੌਸ ਰਿਚੇਂਡਰਫਰ ਨੇ ਇਸ ਨਵੇਂ QR ਕੋਡ ਆਧਾਰਿਤ ਸਿਸਟਮ ਦੀ ਪੁਸ਼ਟੀ ਕੀਤੀ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਹੁਣ ਯੂਜ਼ਰਾਂ ਨੂੰ ਆਪਣੇ ਫੋਨ ਨੰਬਰ ’ਤੇ ਕੋਡ ਪ੍ਰਾਪਤ ਕਰਨ ਦੀ ਲੋੜ ਨਹੀਂ ਪਵੇਗੀ। ਇਸ ਦੀ ਬਜਾਏ, Gmail ਲੌਗਇਨ ਕਰਦੇ ਸਮੇਂ ਸਕ੍ਰੀਨ ’ਤੇ ਇੱਕ QR ਕੋਡ ਦਿਖਾਇਆ ਜਾਵੇਗਾ, ਜਿਸ ਨੂੰ ਯੂਜ਼ਰ ਆਪਣੇ ਮੋਬਾਈਲ ਦੇ ਕੈਮਰੇ ਨਾਲ ਸਕੈਨ ਕਰਕੇ ਲੌਗਇਨ ਕਰ ਸਕਣਗੇ।
SMS ਆਧਾਰਤ ਵੈਰੀਫਿਕੇਸ਼ਨ ਕਿਉਂ ਨਹੀਂ ਸੀ ਸੁਰੱਖਿਅਤ?
ਹੁਣ ਤੱਕ, Google SMS ਰਾਹੀਂ OTP ਭੇਜ ਕੇ ਯੂਜ਼ਰਾਂ ਦੀ ਪਛਾਣ ਪੱਕੀ ਕਰਦਾ ਸੀ। ਪਰ ਇਸ ਤਰੀਕੇ ਵਿੱਚ ਕਈ ਖਾਮੀਆਂ ਸਾਹਮਣੇ ਆਈਆਂ।
• ਫਿਸ਼ਿੰਗ ਹਮਲੇ – ਹੈਕਰਜ਼ ਵਲੋਂ ਠੱਗੀ ਕਰਕੇ ਯੂਜ਼ਰਾਂ ਨੂੰ ਉਨ੍ਹਾਂ ਦੇ ਕੋਡ ਸਾਂਝੇ ਕਰਾਉਣ ਲਈ ਉਕਸਾਇਆ ਜਾ ਸਕਦਾ ਸੀ।
• SIM-ਸਵੈਪਿੰਗ ਹਮਲੇ – ਸਾਈਬਰ ਅਪਰਾਧੀ ਕਿਸੇ ਦਾ ਮੋਬਾਈਲ ਨੰਬਰ ਕੰਟਰੋਲ ਕਰਕੇ ਉਸਦੇ Gmail ਅਤੇ ਹੋਰ ਖਾਤਿਆਂ ਤੱਕ ਪਹੁੰਚ ਸਕਦੇ ਹਨ।
• ਟਰੈਫਿਕ ਪੰਪਿੰਗ ਜਾਂ ਟੋਲ ਫਰੌਡ – ਕੁਝ ਸਾਈਬਰ ਅਪਰਾਧੀ ਨਕਲੀ ਨੰਬਰਾਂ ’ਤੇ OTP ਭੇਜ ਕੇ Google ਤੋਂ ਪੈਸੇ ਕਮਾਉਣ ਦੀ ਕੋਸ਼ਿਸ਼ ਕਰਦੇ ਹਨ।
QR ਕੋਡ ਵਿਧੀ ਹੋਵੇਗੀ ਹੋਰ ਵਧੀਆ ਅਤੇ ਸੁਰੱਖਿਅਤ
Google ਨੇ ਦੱਸਿਆ ਕਿ ਨਵਾਂ QR ਕੋਡ ਆਧਾਰਤ ਪ੍ਰਣਾਲੀ ਯੂਜ਼ਰ ਅਤੇ Google ਦੇ ਸਰਵਰ ਵਿਚਲਾ ਸਿੱਧਾ ਸੰਪਰਕ ਬਣਾਏਗੀ, ਜਿਸ ਨਾਲ ਫਿਸ਼ਿੰਗ ਅਤੇ SIM-ਸਵੈਪਿੰਗ ਹਮਲਿਆਂ ਦੇ ਖਤਰੇ ਘੱਟ ਹੋ ਜਾਣਗੇ।
ਕਦੋਂ ਲਾਗੂ ਹੋਵੇਗਾ ਇਹ ਨਵਾਂ ਸਿਸਟਮ?
ਹਾਲਾਂਕਿ Google ਨੇ ਹਾਲੇ ਨਵੀਨਤਮ QR ਕੋਡ ਆਧਾਰਿਤ ਲੌਗਇਨ ਪ੍ਰਣਾਲੀ ਦੀ ਅਧਿਕਾਰਿਕ ਲਾਂਚ ਤਾਰੀਖ਼ ਦਾ ਐਲਾਨ ਨਹੀਂ ਕੀਤਾ, ਪਰ ਇਹ ਆਉਣ ਵਾਲੇ ਕੁਝ ਮਹੀਨਿਆਂ ਵਿੱਚ ਲਾਗੂ ਕੀਤਾ ਜਾ ਸਕਦਾ ਹੈ। Google ਨੇ ਇਹ ਵੀ ਕਿਹਾ ਕਿ ਉਹ ਯੂਜ਼ਰਾਂ ਦੀ ਸੁਰੱਖਿਆ ਵਧਾਉਣ ਲਈ ਆਪਣੇ ਸਿਸਟਮ ਵਿੱਚ ਲਗਾਤਾਰ ਸੁਧਾਰ ਕਰ ਰਿਹਾ ਹੈ।
ਇਸ ਬਦਲਾਅ ਨਾਲ Google ਦੇ ਯੂਜ਼ਰ ਹੁਣ ਹੋਰ ਵੀ ਵਿਅਕਤੀਗਤ ਡਾਟਾ ਸੁਰੱਖਿਅਤ ਮਹਿਸੂਸ ਕਰਨਗੇ ਅਤੇ ਠੱਗੀ ਦੇ ਮਾਮਲੇ ਵੀ ਘੱਟ ਹੋਣ ਦੀ ਉਮੀਦ ਹੈ।
