ਰਾਜਨੀਤੀ ਛੱਡ ਸੰਤਾਂ ਦੀ ਸੇਵਾ ਹੀ ਬਹੁਤ ਹੈ… ਰਾਮਪਾਲ ਦੇ ਆਸ਼ਰਮ ‘ਚ ਬੋਲੇ ਮੈਡਮ ਸਿੱਧੂ
ਨਵਜੋਤ ਕੌਰ ਸਿੱਧੂ ਆਪਣੇ ਬਿਆਨਾਂ ਕਰਕੇ ਚਰਚਾ ‘ਚ ਬਣੇ ਰਹਿੰਦੇ ਹਨ। ਹੁਣ, ਇਕ ਵਾਰ ਫਿਰ ਉਹ ਆਪਣੇ ਇੱਕ ਬਿਆਨ ਕਰਕੇ ਮੀਡੀਆ ‘ਚ ਸੁਰਖੀਆਂ ਬਟੋਰ ਰਹੇ ਹਨ। ਉਨ੍ਹਾਂ ਨੇ ਇਸ ਬਿਆਨ ‘ਚ ਕਿਸੇ ‘ਤੇ ਨਿਸ਼ਾਨਾ ਨਹੀਂ ਸਾਧਿਆ ਹੈ, ਸਗੋਂ ਉਨ੍ਹਾਂ ਦਾ ਕਹਿਣਾ ਹੈ ਕਿ ਰਾਜਨੀਤੀ ਛੱਡ ਕੇ ਸੰਤਾਂ ਦੀ ਸੇਵਾ ਹੀ ਬਹੁਤ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਜੇਕਰ ਰਾਜਨੀਤਿਕ ਲੋਕ ਦੂਰ ਹੋਣ ਜਾਣ ਤਾਂ ਸੰਤ ਰਾਮਪਾਲ ਵਰਗੇ ਲੋਕ ਇਸ ਧਰਤੀ ਨੂੰ ਸੰਭਾਲ ਲੈਣਗੇ।
ਦੱਸ ਦੇਈਏ ਕਿ ਨਵਜੋਤ ਕੌਰ ਸਿੱਧੂ ਫਤਿਹਗੜ੍ਹ ਸਾਹਿਬ ਵਿਖੇ ਸਤਲੋਕ ਅਸ਼ਰਾਮ ਗਏ ਹੋਏ ਸਨ। ਉਨ੍ਹਾਂ ਨੇ ਕਿਹਾ ਕਿ ਅੱਜ ਜੋ ਰਾਜਨੀਤਿਕ ਲੋਕ ਕੁਰਸੀਆਂ ‘ਤੇ ਬੈਠ ਜਾਂਦੇ ਹਨ ਤੇ ਸੋਚਦੇ ਹਨ ਕਿ ਸ਼ਾਇਦ ਅਸੀਂ ਹੀ ਕੁਝ ਬਣ ਗਏ ਹਾਂ। ਭਗਵਾਨ ਕਿਸੇ ਨੂੰ ਕੁਰਸੀ ਦਿੰਦਾ ਹੈ ਤਾਂ ਕੰਮ ਕਰਨ ਲਈ ਦਿੰਦਾ ਹੈ ਕਿ ਤੁਸੀਂ ਕਿਸ ਤਰ੍ਹਾਂ ਦਾ ਕੰਮ ਕਰ ਰਹੇ ਹੋ।
ਉਨ੍ਹਾਂ ਨੇ ਕਿਹਾ ਕਿ ਜੇਕਰ ਸੰਤਾਂ ਦੀ ਸ਼ਰਨ ‘ਚ ਰਹੀਏ ਤਾਂ ਕਿਤੇ ਨਾ ਕਿਤੇ ਲੱਗਦਾ ਹੈ ਕਿ ਬਾਹਰੀ ਦੁਨੀਆ ਤੋਂ ਬਚਕੇ ਤੇ ਹਟਕੇ ਇੱਕ ਦੁਨੀਆ ਹੈ, ਜੋ ਕਿ ਸਾਡੇ ਸੁਪਨਿਆਂ ਦੀ ਦੁਨੀਆਂ ਹੈ। ਉਨ੍ਹਾਂ ਨੇ ਕਿਹਾ ਕਿ ਅਸੀਂ ਇੱਥੋਂ ਕੁਝ ਵੀ ਨਹੀਂ ਲੈ ਕੇ ਜਾਣਾ ਹੈ, ਬਸ ਸੇਵਾ ਤੇ ਸਿਮਰਨ ਹੀ ਦੋ ਚੀਜ਼ਾਂ ਹਨ ਜੋ ਸਾਡੇ ਨਾਲ ਜਾਣੀਆਂ ਹਨ, ਇਸ ਲਈ ਸਾਰਿਆਂ ਨੂੰ ਇਹ ਕਰਨਾ ਚਾਹੀਦਾ ਹੈ।
ਆਸ਼ਰਮ ਪਹੁੰਚਣ ਤੇ ਉਨ੍ਹਾਂ ਨੇ ਕਿਹਾ ਕਿ ਮੈਂ ਤਾਂ ਕਲਯੁਗ ‘ਚ ਹੀ ਸਤਯੁਗ ਦੇਖ ਲਿਆ ਹੈ। ਅਜਿਹੀ ਜਗ੍ਹਾ ਨੂੰ ਦੇਖ ਅਜਿਹਾ ਲੱਗਦਾ ਹੈ ਕਿ ਜਿਸ ਸਵਰਗ ਦੀ ਅਸੀਂ ਗੱਲ ਕਰਦੇ ਹਾਂ, ਉਹ ਧਰਤੀ ‘ਤੇ ਹੀ ਦੇਖ ਲਿਆ ਹੈ।
ਉਨ੍ਹਾਂ ਨੇ ਕਿਹਾ ਮੈਂ ਚਾਹੁੰਦੀ ਹਾਂ ਕਿ ਮੇਰੇ ਕੋਲੋਂ ਕੋਈ ਗਲਤੀ ਨਾ ਹੋਵੇ, ਜਿੰਨੀ ਸੇਵਾ ਹੋ ਸਕੇ ਉਹ ਕਰਾਂ। ਮੈਂ ਤੇ ਮੇਰੇ ਪਤੀ ਨੇ ਆਪਣਾ ਸਰੀਰ ਦਾਨ ਕੀਤਾ ਹੋਇਆ ਹੈ ਤੇ ਅਸੀਂ ਲਕੜੀ ਵੀ ਬਰਬਾਦ ਨਹੀਂ ਕਰਨੀ ਤੇ ਇਲੈਕਟ੍ਰਿਕ ਕ੍ਰਿਮੈਟੋਰੀਅਸ ਜਾਣਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਜਦੋਂ ਮੈਨੂੰ ਬ੍ਰੈਸਟ ਕੈਂਸਰ ਹੋਇਆ ਤਾਂ ਮੈਂ ਰੱਬ ਦਾ ਧੰਨਵਾਦ ਕੀਤਾ। ਲੋਕਾਂ ਨੇ ਪੁੱਛਿਆ ਕਿ ਰੱਬ ਦਾ ਧੰਨਵਾਦ ਕਿਉਂ ਕਰ ਰਹੀ ਹੈ ਤਾਂ ਮੈ ਕਿਹਾ ਕਿ ਬ੍ਰੈਸਟ ਕੈਂਸਰ ਹੋਇਆ, ਕਿਉਂਕਿ ਬ੍ਰੈਸਟ ਦੀ ਵੈਸੇ ਵੀ ਜ਼ਰੂਰਤ ਨਹੀਂ ਹੁੰਦੀ ਤੇ ਮੇਰੇ ਪੂਰੇ ਸਰੀਰ ‘ਚ ਹੋਰ ਕਿਤੇ ਵੀ ਕੈਂਸਰ ਸੈੱਲ ਨਹੀਂ ਹੈ। ਬਾਕੀ ਅੰਗ ਜੋ ਲੋਕਾਂ ਲਈ ਰੱਖੇ ਹਨ, ਉਹ ਰੱਬ ਨੇ ਸੁਰੱਖਿਅਤ ਰੱਖੇ ਹਨ।
