Mohali Cyber Crime Action; ਮੋਹਾਲੀ ਸਾਈਬਰ ਵਿੰਗ ਨੇ ਇੱਕ ਵੱਡੀ ਕਾਰਵਾਈ ਕਰਦਿਆਂ ਇੱਕ ਅੰਤਰਰਾਸ਼ਟਰੀ ਠੱਗੀ ਗੈਂਗ ਦਾ ਪਰਦਾਫਾਸ਼ ਕੀਤਾ ਹੈ। ਪੁਲਿਸ ਨੇ 7 ਅਫਰੀਕਨ ਨਾਗਰਿਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਨ੍ਹਾਂ ਦੀ ਉਮਰ 25 ਤੋਂ 35 ਸਾਲ ਦੇ ਦਰਮਿਆਨ ਹੈ। ਇਹ ਸਾਰੇ ਪੜ੍ਹੇ-ਲਿਖੇ ਵਿਅਕਤੀ ਹਨ ਅਤੇ ਆਨਲਾਈਨ ਠੱਗੀ ਦੀਆਂ ਗਤੀਵਿਧੀਆਂ ‘ਚ ਲਿਪਤ ਸਨ।
ਇਹ ਗੈਂਗ ਪਹਿਲਾਂ ਲੋਕਾਂ ਨਾਲ ਸੋਸ਼ਲ ਮੀਡੀਆ ਰਾਹੀਂ ਦੋਸਤੀ ਕਰਕੇ ਵਿਸ਼ਵਾਸ ਬਣਾਉਂਦੀ ਸੀ। ਫਿਰ ਉਨ੍ਹਾਂ ਨੂੰ ਕਿਹਾ ਜਾਂਦਾ ਸੀ ਕਿ ਵਿਦੇਸ਼ ਤੋਂ ਉਨ੍ਹਾਂ ਲਈ ਤੋਹਫ਼ੇ ਭੇਜੇ ਜਾ ਰਹੇ ਹਨ। ਬਾਅਦ ਵਿੱਚ ਠੱਗ ਇਹ ਦਲੀਲ ਦਿੰਦੇ ਕਿ ਕਸਟਮ ਵੱਲੋਂ ਤੋਹਫ਼ਾ ਰੋਕ ਲਿਆ ਗਿਆ ਹੈ ਅਤੇ ਇਸਨੂੰ ਛੁਡਵਾਉਣ ਲਈ ਪੈਸੇ ਭੇਜਣੇ ਪੈਣਗੇ।
ਇਹ ਗੈਂਗ ਨੋਏਡਾ ਦੀ ਇੱਕ ਕੋਠੀ ‘ਚੋਂ ਆਪਣੀ ਠੱਗੀ ਦੀ ਕਾਲ ਸੈਂਟਰ ਤਰ੍ਹਾਂ ਚਲਾ ਰਹੀ ਸੀ। ਪੁਲਿਸ ਨੇ ਉਨ੍ਹਾਂ ਕੋਲੋਂ 79 ਮੋਬਾਇਲ ਫੋਨ, 4 ਲੈਪਟਾਪ ਅਤੇ 31 ਬੈਂਕ ਅਕਾਊਂਟ ਬਰਾਮਦ ਕੀਤੇ ਹਨ। ਹੁਣ ਤੱਕ ਲਗਭਗ 15 ਕਰੋੜ ਰੁਪਏ ਦੇ ਟ੍ਰਾਂਜ਼ੈਕਸ਼ਨ ਹੋ ਚੁੱਕੇ ਹਨ। ਗੈਂਗ ਦਾ ਇੱਕ ਓਪਰੇਟਰ ਨਾਈਜੀਰੀਆ ਤੋਂ ਵੀ ਇਹ ਠੱਗੀ ਚਲਾ ਰਿਹਾ ਸੀ।
ਇਹ ਗੈਂਗ ਸਿਰਫ ਭਾਰਤੀਆਂ ਨੂੰ ਹੀ ਨਹੀਂ, ਬਲਕਿ ਵਿਦੇਸ਼ੀਆਂ ਨੂੰ ਵੀ ਨਿਸ਼ਾਨਾ ਬਣਾਉਂਦੀ ਸੀ। ਮੋਹਾਲੀ ਵਿੱਚੋਂ ਇਸ ਕਿਸਮ ਦੀ ਠੱਗੀ ਦੀਆਂ 3 ਸ਼ਿਕਾਇਤਾਂ ਦਰਜ ਕੀਤੀਆਂ ਗਈਆਂ ਸਨ। ਹੁਣ ਉਨ੍ਹਾਂ ਨੂੰ 2 ਦਿਨਾਂ ਦਾ ਪੁਲਿਸ ਰਿਮਾਂਡ ਮਿਲ ਚੁੱਕਾ ਹੈ।
ਡੀ.ਐੱਸ.ਪੀ. ਰੂਪਿੰਦਰਦੀਪ ਸੋਹੀ ਨੇ ਕੀਤੀ ਅਪੀਲ
ਸਾਈਬਰ ਵਿਂਗ ਦੀ ਡੀਐੱਸਪੀ ਰੂਪਿੰਦਰਦੀਪ ਸੋਹੀ ਨੇ ਕਿਹਾ ਕਿ ਜਿਹੜੇ ਲੋਕ ਐਸੀ ਠੱਗੀ ਦਾ ਸ਼ਿਕਾਰ ਹੋਏ ਹਨ, ਉਹਨਾਂ ਨੂੰ ਆਪਣੇ ਆਪ ਨੂੰ ਛੁਪਾਉਣ ਦੀ ਥਾਂ ਅੱਗੇ ਆਉਣਾ ਚਾਹੀਦਾ ਹੈ, ਤਾਂ ਜੋ ਮਨੀ ਟ੍ਰੇਲ ਅਤੇ ਬੈਂਕ ਅਕਾਊਂਟ ਟ੍ਰੇਲ ਰਾਹੀਂ ਇਨ੍ਹਾਂ ਨੂੰ ਕਾਬੂ ਕੀਤਾ ਜਾ ਸਕੇ।
ਉਨ੍ਹਾਂ ਇਹ ਵੀ ਕਿਹਾ ਕਿ ਜੇ ਕਿਸੇ ਨੂੰ ਆਪਣੀ ਪਛਾਣ ਗੁਪਤ ਰੱਖਣੀ ਹੋਵੇ ਤਾਂ ਉਹ ਅਨੋਨਿਮਸ ਤਰੀਕੇ ਨਾਲ ਵੀ ਅਰਜ਼ੀ ਦੇ ਸਕਦੇ ਹਨ ਜਾਂ ਆਨਲਾਈਨ ਸ਼ਿਕਾਇਤ ਦਰਜ ਕਰਵਾ ਸਕਦੇ ਹਨ।
ਸੋਹੀ ਨੇ ਲੋਕਾਂ ਨੂੰ ਸਾਵਧਾਨ ਕਰਦਿਆਂ ਸਲਾਹ ਦਿੱਤੀ ਕਿ ਜਦੋਂ ਵੀ ਕੋਈ ਵਿਅਕਤੀ ਜਾਂ ਕਾਲ ਤੁਹਾਨੂੰ ਇਸ ਤਰ੍ਹਾਂ ਦੇ ਲਾਲਚ ਦੇਵੇ, ਤਾਂ ਇੱਕ ਵਾਰ ਆਪਣੇ ਆਪ ਤੋਂ ਸਵਾਲ ਜ਼ਰੂਰ ਪੁੱਛੋ — “ਕੀ ਇਹ ਸੰਭਵ ਹੈ ਕਿ ਕੋਈ ਤੁਹਾਡੇ ਤੋਂ ਕੁਝ ਲਏ ਬਿਨਾਂ ਤੁਹਾਨੂੰ ਕੁਝ ਦੇਵੇ?”
ਇਹ ਮਾਮਲਾ ਸਾਈਬਰ ਠੱਗੀ ਦੀ ਗੰਭੀਰਤਾ ਅਤੇ ਫੈਲਾਅ ਨੂੰ ਦਰਸਾਉਂਦਾ ਹੈ। ਪੁਲਿਸ ਵੱਲੋਂ ਲੋਕਾਂ ਨੂੰ ਜਾਗਰੂਕ ਹੋਣ ਅਤੇ ਸੰਭਲ ਕੇ ਰਹਿਣ ਦੀ ਅਪੀਲ ਕੀਤੀ ਗਈ ਹੈ।
ਮੋਹਾਲੀ ਤੋਂ ਅਨੂਜਾ ਸ਼ਰਮਾ ਦੀ ਰਿਪੋਰਟ
