ਮੁੰਬਈ ਏਅਰਪੋਰਟ ‘ਤੇ ਵੱਡਾ ਹਾਦਸਾ ਟਲਿਆ, ਏਅਰ ਇੰਡੀਆ ਤੇ ਇੰਡਿਗੋ ਦੇ ਜਹਾਜ਼ਾਂ ਦੇ ਖੰਭ ਆਪਸ ਵਿੱਚ ਟਕਰਾਏ
Air India–IndiGo Planes Wing Clash: ਮੁੰਬਈ ਦੇ ਛਤਰਪਤੀ ਸ਼ਿਵਾਜੀ ਮਹਾਰਾਜ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਮੰਗਲਵਾਰ ਸ਼ਾਮ ਇੱਕ ਵੱਡਾ ਹਾਦਸਾ ਹੋਣ ਤੋਂ ਬਚ ਗਿਆ। ਏਅਰ ਇੰਡੀਆ ਅਤੇ ਇੰਡਿਗੋ ਦੀਆਂ ਦੋ ਉਡਾਣਾਂ ਦੇ ਪੱਖ ਆਪਸ ਵਿੱਚ ਟਕਰਾ ਗਏ। ਇਹ ਘਟਨਾ ਉਸ ਵੇਲੇ ਵਾਪਰੀ, ਜਦੋਂ ਏਅਰ ਇੰਡੀਆ ਦੀ ਫਲਾਈਟ AI 2732 (ਮੁੰਬਈ ਤੋਂ ਕੋਇੰਬਟੂਰ) ਉਡਾਣ ਲਈ ਪਿੱਛੇ ਵੱਲ ਜਾ ਰਹੀ ਸੀ ਅਤੇ ਇੰਡਿਗੋ ਦੀ ਫਲਾਈਟ 6E 791 (ਹੈਦਰਾਬਾਦ ਤੋਂ ਮੁੰਬਈ) ਲੈਂਡਿੰਗ ਤੋਂ ਬਾਅਦ ਰਨਵੇ ‘ਤੇ ਹੌਲੀ-ਹੌਲੀ ਅੱਗੇ ਵੱਧ ਰਹੀ ਸੀ।
ਹਾਦਸਾ ਕਿਵੇਂ ਵਾਪਰਿਆ
ਮੰਗਲਵਾਰ ਸ਼ਾਮ ਕਰੀਬ 7:30 ਵਜੇ ਦੋਹਾਂ ਵਿਮਾਨਾਂ ਦੇ ਸੱਜੇ ਖੰਭ ਦੇ ਸਿਰੇ ਆਪਸ ਵਿੱਚ ਛੂਹ ਗਏ। ਦੋਵੇਂ ਹੀ ਜਹਾਜ਼ ਇੱਕੋ ਕਿਸਮ ਦੇ ਸਨ। ਉਸ ਸਮੇਂ ਏਅਰ ਇੰਡੀਆ ਦਾ ਜਹਾਜ਼ ਬਾਹਰ ਵੱਲ ਜਾ ਰਿਹਾ ਸੀ, ਜਦਕਿ ਇੰਡਿਗੋ ਦਾ ਜਹਾਜ਼ ਅੰਦਰ ਵੱਲ ਆ ਰਿਹਾ ਸੀ। ਟਕਰਾਅ ਤੋਂ ਬਾਅਦ ਦੋਹਾਂ ਜਹਾਜ਼ਾਂ ਨੂੰ ਜਾਂਚ ਲਈ ਵਾਪਸ ਖੜ੍ਹਾ ਕਰ ਦਿੱਤਾ ਗਿਆ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਹਵਾਬਾਜ਼ੀ ਵਿਭਾਗ ਦੇ ਅਧਿਕਾਰੀ ਮੌਕੇ ‘ਤੇ ਪਹੁੰਚੇ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ।
ਏਅਰ ਇੰਡੀਆ ਦਾ ਬਿਆਨ
ਏਅਰ ਇੰਡੀਆ ਦੇ ਪ੍ਰਵਕਤਾ ਨੇ ਦੱਸਿਆ ਕਿ ਮੁੰਬਈ ਤੋਂ ਕੋਇੰਬਟੂਰ ਜਾਣ ਵਾਲੀ ਫਲਾਈਟ AI 2732 ਵਿੱਚ ਦੇਰੀ ਹੋਈ ਕਿਉਂਕਿ ਟੇਕਆਫ਼ ਤੋਂ ਪਹਿਲਾਂ ਖੜ੍ਹੇ-ਖੜ੍ਹੇ ਉਹਨਾਂ ਦਾ ਜਹਾਜ਼ ਦੂਜੀ ਏਅਰਲਾਈਨ ਦੇ ਜਹਾਜ਼ ਨਾਲ ਛੂਹ ਗਿਆ। ਉਨ੍ਹਾਂ ਕਿਹਾ ਕਿ ਦੋਹਾਂ ਜਹਾਜ਼ਾਂ ਦੇ ਖੰਭ ਦੇ ਸਿਰੇ ਟਕਰਾਏ, ਜਿਸ ਕਾਰਨ ਉਹਨਾਂ ਦੇ ਜਹਾਜ਼ ਦੇ ਖੰਭ ਨੂੰ ਨੁਕਸਾਨ ਪਹੁੰਚਿਆ।
ਸਾਵਧਾਨੀ ਵਜੋਂ ਉਸ ਜਹਾਜ਼ ਨੂੰ ਅੱਗੇ ਦੀ ਜਾਂਚ ਲਈ ਰੋਕ ਲਿਆ ਗਿਆ ਹੈ। ਪ੍ਰਵਕਤਾ ਨੇ ਇਹ ਵੀ ਕਿਹਾ ਕਿ ਸਾਰੇ ਯਾਤਰੀਆਂ ਨੂੰ ਸੁਰੱਖਿਅਤ ਤੌਰ ‘ਤੇ ਉਤਾਰ ਲਿਆ ਗਿਆ ਹੈ ਅਤੇ ਉਨ੍ਹਾਂ ਨੂੰ ਜਲਦੀ ਤੋਂ ਜਲਦੀ ਉਹਨਾਂ ਦੇ ਮੰਜ਼ਿਲੀ ਸਥਾਨ ਤੱਕ ਪਹੁੰਚਾਉਣ ਦੇ ਪ੍ਰਬੰਧ ਕੀਤੇ ਜਾ ਰਹੇ ਹਨ। ਇਸ ਘਟਨਾ ਬਾਰੇ ਸਬੰਧਤ ਅਧਿਕਾਰੀਆਂ ਨੂੰ ਜਾਣਕਾਰੀ ਦੇ ਦਿੱਤੀ ਗਈ ਹੈ।
ਇੰਡਿਗੋ ਦਾ ਰਿਐਕਸ਼ਨ
ਇੰਡਿਗੋ ਦੇ ਪ੍ਰਵਕਤਾ ਨੇ ਵੀ ਇਸ ਘਟਨਾ ਦੀ ਪੁਸ਼ਟੀ ਕੀਤੀ। ਉਨ੍ਹਾਂ ਕਿਹਾ ਕਿ ਸਾਰੇ ਯਾਤਰੀ ਸੁਰੱਖਿਅਤ ਹਨ ਅਤੇ ਜਹਾਜ਼ ਖੜ੍ਹਾ ਕਰਨ ਤੋਂ ਬਾਅਦ ਉਨ੍ਹਾਂ ਨੂੰ ਉਤਾਰ ਲਿਆ ਗਿਆ। ਇਸ ਸਮੇਂ ਜਹਾਜ਼ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਨਿਰਧਾਰਤ ਨਿਯਮਾਂ ਅਨੁਸਾਰ ਅਧਿਕਾਰੀਆਂ ਨੂੰ ਜਾਣਕਾਰੀ ਦੇ ਦਿੱਤੀ ਗਈ ਹੈ।
