ਕੌਣ ਹੈ ਪੂਨਮ ਗੁਪਤਾ, ਜਿਸ ਨੂੰ ਬਣਾਇਆ ਗਿਆ ਹੈ RBI ਦੀ ਨਵੀਂ ਡਿਪਟੀ ਗਵਰਨਰ

Poonam Gupta RBI new governor ; ਕੇਂਦਰ ਸਰਕਾਰ ਨੇ ਪੂਨਮ ਗੁਪਤਾ ਨੂੰ ਭਾਰਤੀ ਰਿਜ਼ਰਵ ਬੈਂਕ (ਆਰਬੀਆਈ) ਦੀ ਨਵੀਂ ਡਿਪਟੀ ਗਵਰਨਰ ਨਿਯੁਕਤ ਕੀਤਾ ਹੈ। ਉਨ੍ਹਾਂ ਦਾ ਕਾਰਜਕਾਲ ਤਿੰਨ ਸਾਲ ਦਾ ਹੋਵੇਗਾ। ਉਹ ਮਾਈਕਲ ਡੀ ਪਾਤਰਾ ਦੀ ਥਾਂ ਲਵੇਗੀ, ਜੋ ਇਸ ਸਾਲ ਜਨਵਰੀ ਵਿੱਚ ਅਹੁਦੇ ਤੋਂ ਸੇਵਾਮੁਕਤ ਹੋਏ ਸਨ। ਪੂਨਮ ਗੁਪਤਾ ਦੀ ਨਿਯੁਕਤੀ ਅਜਿਹੇ ਸਮੇਂ ਹੋਈ ਹੈ ਜਦੋਂ 7 ਤੋਂ 9 ਅਪ੍ਰੈਲ ਨੂੰ ਮੁਦਰਾ ਨੀਤੀ ਕਮੇਟੀ (ਐੱਮਪੀਸੀ) ਦੀ ਬੈਠਕ ਹੋਣੀ ਹੈ।

ਉਨ੍ਹਾਂ ਦੀ ਨਿਯੁਕਤੀ ਨੂੰ ਕੈਬਨਿਟ ਦੀ ਨਿਯੁਕਤੀ ਕਮੇਟੀ ਨੇ ਮਨਜ਼ੂਰੀ ਦੇ ਦਿੱਤੀ ਹੈ। ਪੂਨਮ ਗੁਪਤਾ ਦੀ ਨਿਯੁਕਤੀ ਭਾਰਤੀ ਅਰਥਚਾਰੇ ਅਤੇ ਮੁਦਰਾ ਨੀਤੀ ਦੇ ਸੰਚਾਲਨ ਵਿੱਚ ਅਹਿਮ ਭੂਮਿਕਾ ਨਿਭਾਏਗੀ। ਉਸਦੀ ਮੁਹਾਰਤ ਅਤੇ ਤਜਰਬਾ ਆਰਬੀਆਈ ਦੇ ਕੰਮਕਾਜ ਨੂੰ ਹੋਰ ਪ੍ਰਭਾਵਸ਼ਾਲੀ ਬਣਾਏਗਾ।

ਪੂਨਮ ਗੁਪਤਾ ਵਰਤਮਾਨ ਵਿੱਚ ਨੈਸ਼ਨਲ ਕੌਂਸਲ ਆਫ ਅਪਲਾਈਡ ਇਕਨਾਮਿਕ ਰਿਸਰਚ (NCAER) ਵਿੱਚ ਡਾਇਰੈਕਟਰ ਜਨਰਲ ਹੈ। ਇਸ ਤੋਂ ਇਲਾਵਾ, ਉਹ ਪ੍ਰਧਾਨ ਮੰਤਰੀ ਦੀ ਆਰਥਿਕ ਸਲਾਹਕਾਰ ਕੌਂਸਲ ਅਤੇ 16ਵੇਂ ਵਿੱਤ ਕਮਿਸ਼ਨ ਦੀ ਸਲਾਹਕਾਰ ਕੌਂਸਲ ਦੀ ਮੈਂਬਰ ਵੀ ਹੈ। ਉਹ ਨੀਤੀ ਆਯੋਗ ਦੀ ਵਿਕਾਸ ਸਲਾਹਕਾਰ ਕਮੇਟੀ ਦਾ ਵੀ ਹਿੱਸਾ ਰਹੀ ਹੈ ਅਤੇ ਭਾਰਤ ਦੀ ਜੀ-20 ਪ੍ਰਧਾਨਗੀ ਦੌਰਾਨ ਮੈਕਰੋਇਕਨਾਮਿਕਸ ਅਤੇ ਵਪਾਰ ‘ਤੇ ਟਾਸਕ ਫੋਰਸ ਦੀ ਪ੍ਰਧਾਨਗੀ ਕੀਤੀ ਹੈ।

ਸਿੱਖਿਆ ਅਤੇ ਪ੍ਰਾਪਤੀਆਂ

ਪੂਨਮ ਗੁਪਤਾ ਨੇ ਯੂਨੀਵਰਸਿਟੀ ਆਫ ਮੈਰੀਲੈਂਡ, ਅਮਰੀਕਾ ਤੋਂ ਪੀਐਚਡੀ ਅਤੇ ਮਾਸਟਰਜ਼ ਕੀਤੀ ਹੈ।
ਉਸਨੇ ਦਿੱਲੀ ਸਕੂਲ ਆਫ਼ ਇਕਨਾਮਿਕਸ ਤੋਂ ਅਰਥ ਸ਼ਾਸਤਰ ਵਿੱਚ ਮਾਸਟਰ ਡਿਗਰੀ ਵੀ ਪ੍ਰਾਪਤ ਕੀਤੀ ਹੈ।
ਅੰਤਰਰਾਸ਼ਟਰੀ ਅਰਥ ਸ਼ਾਸਤਰ ਵਿੱਚ ਉਸਦੀ ਖੋਜ ਲਈ ਉਸਨੂੰ 1998 ਵਿੱਚ EXIM ਬੈਂਕ ਅਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ ਸੀ।

RBI ਵਿੱਚ ਭੂਮਿਕਾ

ਭਾਰਤੀ ਰਿਜ਼ਰਵ ਬੈਂਕ ਵਿੱਚ ਚਾਰ ਡਿਪਟੀ ਗਵਰਨਰ ਹਨ। ਇਨ੍ਹਾਂ ਵਿੱਚੋਂ ਦੋ ਕੇਂਦਰੀ ਬੈਂਕ ਦੇ ਸੀਨੀਅਰ ਅਧਿਕਾਰੀ ਹਨ, ਇੱਕ ਮੁਦਰਾ ਨੀਤੀ ਵਿਭਾਗ ਦੀ ਨਿਗਰਾਨੀ ਲਈ ਇੱਕ ਅਰਥ ਸ਼ਾਸਤਰੀ ਹੈ ਅਤੇ ਇੱਕ ਵਪਾਰਕ ਬੈਂਕ ਤੋਂ ਚੁਣਿਆ ਗਿਆ ਹੈ। ਗੁਪਤਾ ਜੋ ਅਹੁਦਾ ਸੰਭਾਲਣਗੇ, ਉਹ ਮਾਈਕਲ ਡੀ. ਪਾਤਰਾ ਦੀ ਸੇਵਾਮੁਕਤੀ ਤੋਂ ਬਾਅਦ ਦੋ ਮਹੀਨਿਆਂ ਲਈ ਖਾਲੀ ਸੀ।