NEET ਧਾਂਦਲੀ ਖਿਲਾਫ਼ ਅਨਸ਼ਨ ‘ਤੇ ਬੈਠੇ ਸੋਨਮ ਵਾਂਗਚੁੱਕ ਦੀ ਵਿਗੜੀ ਤਬੀਅਤ
ਨਵੀਂ ਦਿੱਲੀ: NEET ਪ੍ਰੀਖਿਆ ਵਿੱਚ ਹੋਈਆਂ ਕਥਿਤ ਗੜਬੜੀਆਂ ਅਤੇ ਧਾਂਦਲੀਆਂ ਦੇ ਖ਼ਿਲਾਫ਼ ਦਿੱਲੀ ਦੇ ਜੰਤਰ-ਮੰਤਰ ‘ਤੇ ਡਟੇ ਦੇਸ਼ ਦੇ ਮਸ਼ਹੂਰ ਸਿੱਖਿਆ ਸੁਧਾਰਕ ਅਤੇ ਵਾਤਾਵਰਣ ਵਿਗਿਆਨੀ ਸੋਨਮ ਵਾਂਗਚੁੱਕ ਦੀ ਤਬੀਅਤ ਲਗਾਤਾਰ ਵਿਗੜਨ ਤੋਂ ਬਾਅਦ ਦਿੱਲੀ ਪੁਲਿਸ ਉਨ੍ਹਾਂ ਨੂੰ ਹਸਪਤਾਲ ਲੈ ਗਈ ਹੈ। ਸੂਤਰਾਂ ਮੁਤਾਬਕ ਉਨ੍ਹਾਂ ਨੂੰ ਦਿੱਲੀ ਦੇ ਸਫ਼ਦਰਜੰਗ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ। ਵਾਂਗਚੁੱਕ ਪਿਛਲੇ 20 ਦਿਨਾਂ ਤੋਂ ਭੁੱਖ ਹੜਤਾਲ ‘ਤੇ ਬੈਠੇ ਹੋਏ ਸਨ।
‘ਮੇਰੇ ਸਰੀਰ ਦਾ 20% ਹਿੱਸਾ ਖ਼ਤਮ ਹੋ ਚੁੱਕਾ ਹੈ’ – ਵਾਂਗਚੁੱਕ ਦਾ ਭਾਵੁਕ ਸੰਦੇਸ਼
ਹਸਪਤਾਲ ਲਿਜਾਣ ਤੋਂ ਪਹਿਲਾਂ, ਸ਼ੁੱਕਰਵਾਰ ਰਾਤ ਨੂੰ ਸੋਨਮ ਵਾਂਗਚੁੱਕ ਨੇ ਅਨਸ਼ਨ ਦੇ 20ਵੇਂ ਦਿਨ ਇੱਕ ਬਹੁਤ ਹੀ ਭਾਵੁਕ ਅਤੇ ਤਿੱਖਾ ਵੀਡੀਓ ਸੰਦੇਸ਼ ਜਾਰੀ ਕੀਤਾ। ਉਨ੍ਹਾਂ ਕਿਹਾ, “ਹਾਂ, ਮੈਂ ਅਜੇ ਵੀ ਜ਼ਿੰਦਾ ਹਾਂ, ਪਰ ਮੇਰੇ ਸਰੀਰ ਦਾ ਲਗਭਗ 20% ਹਿੱਸਾ ਚਲਿਆ ਗਿਆ ਹੈ। ਸਰੀਰ ਦੀ ਚਰਬੀ (Fat) ਤੋਂ ਬਾਅਦ ਹੁਣ ਮਾਸਪੇਸ਼ੀਆਂ (Muscles) ਵੀ ਖ਼ਤਮ ਹੋ ਚੁੱਕੀਆਂ ਹਨ। ਇਸ ਤੋਂ ਬਾਅਦ ਅੰਦਰੂਨੀ ਅੰਗ ਪ੍ਰਭਾਵਿਤ ਹੋਣਗੇ ਅਤੇ ਅਖੀਰ ਵਿੱਚ ਦਿਮਾਗ… ਪਰ ਅਜੇ ਉਹ ਨੌਬਤ ਨਹੀਂ ਆਈ। ਅੱਜ 20ਵਾਂ ਦਿਨ ਖ਼ਤਮ ਹੋ ਰਿਹਾ ਹੈ ਅਤੇ ਮੈਂ ਸਾਬਤ ਕਰ ਸਕਦਾ ਹਾਂ ਕਿ ਮੇਰਾ ਦਿਮਾਗ ਅਜੇ ਵੀ ਬਿਲਕੁਲ ਠੀਕ ਕੰਮ ਕਰ ਰਿਹਾ ਹੈ।”
ਪਿਆਜ਼ ਅੰਦੋਲਨ ਦਾ ਹਵਾਲਾ ਦੇ ਕੇ ਸਰਕਾਰ ਨੂੰ ਘੇਰਿਆ
ਜਦੋਂ ਅੰਦੋਲਨਕਾਰੀਆਂ ਨੇ ਸੋਨਮ ਵਾਂਗਚੁੱਕ ਨੂੰ ਪੁੱਛਿਆ ਕਿ ਕੀ ਇਸ ਪ੍ਰਦਰਸ਼ਨ ਨਾਲ ਕੇਂਦਰੀ ਸਿੱਖਿਆ ਮੰਤਰੀ ਧਰਮਿੰਦਰ ਪ੍ਰਧਾਨ ਦਾ ਅਸਤੀਫਾ ਹੋਵੇਗਾ ਜਾਂ ਕੋਈ ਜਵਾਬਦੇਹੀ ਤੈਅ ਹੋਵੇਗੀ? ਤਾਂ ਉਨ੍ਹਾਂ ਇਤਿਹਾਸ ਯਾਦ ਦਿਵਾਉਂਦੇ ਹੋਏ ਕਿਹਾ, “ਮੈਂ ਭਾਰਤ ਦੀ ਜਨਤਾ ਨੂੰ ਪੁੱਛਦਾ ਹਾਂ, ਕੀ ਤੁਹਾਨੂੰ ਆਪਣੇ ਬੱਚਿਆਂ ਦੀ ਜਾਨ ਅਤੇ ਸਿੱਖਿਆ ਜ਼ਿਆਦਾ ਪਿਆਰੀ ਹੈ ਜਾਂ ਪਿਆਜ਼? ਭਾਰਤ ਵਿੱਚ ਜਨਤਾ ਦੇ ਅੰਦੋਲਨ ਦੀ ਤਾਕਤ ਨਾਲ ਤਿੰਨ ਵਾਰ ਸਰਕਾਰਾਂ ਡਿੱਗੀਆਂ ਹਨ। 1980 ਵਿੱਚ ਕੇਂਦਰ ਸਰਕਾਰ ਡਿੱਗੀ, ਜਦਕਿ 1998 ਵਿੱਚ ਦਿੱਲੀ ਅਤੇ ਰਾਜਸਥਾਨ ਦੀਆਂ ਸਰਕਾਰਾਂ ਡਿੱਗੀਆਂ। ਉਹ ਅੰਦੋਲਨ ਸਿਰਫ਼ ਪਿਆਜ਼ ਦੀਆਂ ਕੀਮਤਾਂ ਨੂੰ ਲੈ ਕੇ ਸੀ। ਇੱਥੇ ਅਸੀਂ ਕਰੋੜਾਂ ਬੱਚਿਆਂ ਦੇ ਭਵਿੱਖ ਦੀ ਗੱਲ ਕਰ ਰਹੇ ਹਾਂ। ਇਸ ਸਾਲ NEET ਗੜਬੜੀ ਕਾਰਨ 20 ਤੋਂ ਵੱਧ ਵਿਦਿਆਰਥੀ ਖ਼ੁਦਕੁਸ਼ੀ ਕਰ ਚੁੱਕੇ ਹਨ। ਕੀ ਇਸ ‘ਤੇ ਵੀ ਸਿੱਖਿਆ ਮੰਤਰੀ ਦਾ ਅਸਤੀਫਾ ਨਹੀਂ ਹੋਵੇਗਾ?”
20 ਜੁਲਾਈ ਨੂੰ ‘ਚਲੋ ਸੰਸਦ’ ਮਾਰਚ ਦੀ ਵੱਡੀ ਅਪੀਲ
‘ਕਲੈਕਟਿਵ ਜਸਟਿਸ ਪ੍ਰੋਗਰਾਮ’ (CJP) ਦੇ ਬੈਨਰ ਹੇਠ ਪਿਛਲੇ 28 ਜੂਨ ਤੋਂ ਅਨਸ਼ਨ ‘ਤੇ ਬੈਠੇ ਸੋਨਮ ਵਾਂਗਚੁੱਕ ਨੇ ਦੇਸ਼ ਵਾਸੀਆਂ ਨੂੰ 20 ਜੁਲਾਈ ਨੂੰ ਹੋਣ ਵਾਲੇ ‘ਸੰਸਦ ਚਲੋ’ ਮਾਰਚ ਵਿੱਚ ਰਿਕਾਰਡ ਗਿਣਤੀ ਵਿੱਚ ਪਹੁੰਚਣ ਦੀ ਅਪੀਲ ਕੀਤੀ ਹੈ। ਉਨ੍ਹਾਂ ਕਿਹਾ, “20 ਜੁਲਾਈ ਨੂੰ ਮੇਰੇ ਨਾਲ ਸੰਸਦ ਵੱਲ ਮਾਰਚ ਕਰੋ। ਸਾਡੀ ਅਸਲੀ ਤਾਕਤ ਤੁਹਾਡੀ ਗਿਣਤੀ ਹੈ। ਮੈਂ ਤਾਂ ਇੱਕ ਇਕੱਲਾ, ਭੁੱਖਾ ਅਤੇ ਨਿਮਾਣਾ ਜਿਹਾ ਇਨਸਾਨ ਹਾਂ। ਤੁਸੀਂ ਲੋਕ ਹੀ ਉਹ ਤਾਕਤ ਹੋ ਜਿਸ ਨੇ ਪਿਆਜ਼ ਲਈ ਸਰਕਾਰਾਂ ਨੂੰ ਡੇਗਿਆ ਹੈ, ਅਸੀਂ ਤਾਂ ਸਿਰਫ਼ ਵਿਦਿਆਰਥੀਆਂ ਦੇ ਭਵਿੱਖ ਲਈ ਜਵਾਬਦੇਹੀ ਮੰਗ ਰਹੇ ਹਾਂ।”
