WPL 2025: ਅੱਜ ਤੋਂ ਸ਼ੁਰੂ ਹੋ ਰਹ ਮਹਿਲਾ ਪ੍ਰੀਮੀਅਰ ਲੀਗ, ਗੁਜਰਾਤ-ਬੈਂਗਲੁਰੂ ਵਿਚਕਾਰ ਪਹਿਲਾ ਮੈਚ, ਜਾਣੋ ਕੀ ਰਹੇਗਾ ਖਾਸ
Women’s Premier League 2025: ਮਹਿਲਾ ਪ੍ਰੀਮੀਅਰ ਲੀਗ ਦੇ ਤੀਜੇ ਸੀਜ਼ਨ ਦੀ ਸ਼ੁਰੂਆਤ ਸ਼ੁੱਕਰਵਾਰ ਤੋਂ ਮੌਜੂਦਾ ਚੈਂਪੀਅਨ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਅਤੇ ਗੁਜਰਾਤ ਜਾਇੰਟਸ ਵਿਚਾਲੇ ਹੋਣ ਵਾਲੇ ਮੈਚ ਨਾਲ ਹੋਵੇਗੀ।
Gujarat Giants vs Royal Challengers Bengaluru: ਮਹਿਲਾ ਪ੍ਰੀਮੀਅਰ ਲੀਗ 2025 ਦਾ ਤੀਜਾ ਸੀਜ਼ਨ ਸ਼ੁੱਕਰਵਾਰ ਤੋਂ ਸ਼ੁਰੂ ਹੋ ਰਿਹਾ ਹੈ। ਇਸ ਵਾਰ ਮਹਿਲਾ ਟੀ-20 ਲੀਗ ਦੀ ਸ਼ੁਰੂਆਤ ਰਾਇਲ ਚੈਲੰਜਰਜ਼ ਬੈਂਗਲੁਰੂ (RCB) ਤੇ ਗੁਜਰਾਤ ਜਾਇੰਟਸ ਵੂਮੈਨ ਵਿਚਾਲੇ ਹੋਣ ਵਾਲੇ ਮੈਚ ਨਾਲ ਹੋਵੇਗੀ। ਪਹਿਲੀ ਵਾਰ ਇਹ ਟੂਰਨਾਮੈਂਟ ਚਾਰ ਸ਼ਹਿਰਾਂ ਵਡੋਦਰਾ, ਬੈਂਗਲੁਰੂ, ਲਖਨਊ ਅਤੇ ਮੁੰਬਈ ਵਿੱਚ ਆਯੋਜਿਤ ਕੀਤਾ ਜਾਵੇਗਾ।
ਹਰਮਨਪ੍ਰੀਤ ਕੌਰ, ਸਮ੍ਰਿਤੀ ਮੰਧਾਨਾ, ਦੀਪਤੀ ਸ਼ਰਮਾ, ਜੇਮੀਮਾ ਰੌਡਰਿਗਜ਼, ਮਾਰੀਜੇਨ ਕਪ, ਮੇਗ ਲੈਨਿੰਗ ਵਰਗੇ ਅੰਤਰਰਾਸ਼ਟਰੀ ਸਿਤਾਰਿਆਂ ਦੇ ਨਾਲ, ਕਸ਼ਵੀ ਗੌਤਮ ਅਤੇ ਪਰੂਣਿਕਾ ਸਿਸੋਦੀਆ ਵਰਗੇ ਨੌਜਵਾਨ ਸਿਤਾਰੇ ਵੀ ਸੁਰਖੀਆਂ ਵਿੱਚ ਰਹਿਣਗੇ। ਅੰਤਰਰਾਸ਼ਟਰੀ ਸਿਤਾਰਿਆਂ ਦੇ ਨਾਲ-ਨਾਲ ਲੀਗ ਦੀ ਅਸਲ ਸਫਲਤਾ ਘਰੇਲੂ ਖਿਡਾਰੀਆਂ ਦੇ ਪ੍ਰਦਰਸ਼ਨ ‘ਤੇ ਵੀ ਨਿਰਭਰ ਕਰਦੀ ਹੈ। ਪਹਿਲੇ ਦੋ ਸੈਸ਼ਨਾਂ ਵਿੱਚ ਸ਼੍ਰੇਅੰਕਾ ਪਾਟਿਲ ਅਤੇ ਸਾਈਕਾ ਇਸ਼ਾਕ ਵਰਗੀਆਂ ਖਿਡਾਰਨਾਂ ਨੇ ਦਬਾਅ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਅਤੇ ਭਾਰਤੀ ਟੀਮ ਵਿੱਚ ਵੀ ਜਗ੍ਹਾ ਬਣਾਈ।
ਇਥੇ ਦੇਖ ਸਕਦੇ ਹੋ ਲਾਈਵ ਸਟ੍ਰੀਮਿੰਗ
ਗੁਜਰਾਤ ਜਾਇੰਟਸ ਅਤੇ ਆਰਸੀਬੀ ਵਿਚਾਲੇ ਖੇਡੇ ਜਾਣ ਵਾਲੇ ਮੈਚ ਦਾ ਸਪੋਰਟਸ ਨੈੱਟਵਰਕ 18 ਰਾਹੀਂ ਭਾਰਤ ਵਿੱਚ ਟੀਵੀ ‘ਤੇ ਸਿੱਧਾ ਪ੍ਰਸਾਰਣ ਕੀਤਾ ਜਾਵੇਗਾ। ਇਸ ਤੋਂ ਇਲਾਵਾ ਮੈਚਾਂ ਦੀ ਲਾਈਵ ਸਟ੍ਰੀਮਿੰਗ ਜੀਓ ਸਿਨੇਮਾ ‘ਤੇ ਹੋਵੇਗੀ।
ਆਰਸੀਬੀ ਤੇ ਗੁਜਰਾਤ ਹੋਣਗੇ ਆਹਮੋ-ਸਾਹਮਣੇ
ਗੁਜਰਾਤ ਜਾਇੰਟਸ ਅਤੇ ਆਰਸੀਬੀ ਵਿਚਾਲੇ ਹੁਣ ਤੱਕ ਕੁੱਲ 4 ਮੈਚ ਖੇਡੇ ਗਏ ਹਨ। ਇਨ੍ਹਾਂ ਮੈਚਾਂ ‘ਚ ਦੋਵਾਂ ਟੀਮਾਂ ਨੇ 2-2 ਮੈਚ ਜਿੱਤੇ ਹਨ।
