ਡਾਬਰ ਨੂੰ ਦਿੱਲੀ ਹਾਈ ਕੋਰਟ ਤੋਂ ਵੱਡੀ ਰਾਹਤ, FSSAI ਦੇ ‘100%’ ਦਾਅਵਿਆਂ ਵਾਲੇ ਹੁਕਮ ’ਤੇ ਰੋਕ
Dabur gets relief from Delhi High Court: ਨਵੀਂ ਦਿੱਲੀ: ਦਿੱਲੀ ਹਾਈ ਕੋਰਟ ਨੇ ਡਾਬਰ ਨੂੰ ਅੰਤਰਿਮ ਰਾਹਤ ਦਿੰਦਿਆਂ FSSAI ਦੇ ਉਸ ਹੁਕਮ ’ਤੇ ਰੋਕ ਲਗਾ ਦਿੱਤੀ ਹੈ, ਜਿਸ ਤਹਿਤ ‘100% ਸ਼ੁੱਧ’, ‘100% ਕੁਦਰਤੀ’ ਅਤੇ ‘100% ਜੈਵਿਕ’ ਵਰਗੇ ਦਾਅਵਿਆਂ ਵਾਲੇ ਉਤਪਾਦਾਂ ਦੀ ਵਿਕਰੀ ਤੁਰੰਤ ਰੋਕਣ ਲਈ ਕਿਹਾ ਗਿਆ ਸੀ। ਜਸਟਿਸ ਅਮਿਤ ਮਹਾਜਨ ਦੀ ਬੈਂਚ ਨੇ ਕੇਂਦਰ ਸਰਕਾਰ ਅਤੇ FSSAI ਨੂੰ ਨੋਟਿਸ ਜਾਰੀ ਕਰਕੇ ਜਵਾਬ ਮੰਗਿਆ ਹੈ। ਅਦਾਲਤ ਦੇ ਅਗਲੇ ਹੁਕਮ ਤੱਕ FSSAI ਦਾ ਪਾਬੰਦੀ ਵਾਲਾ ਆਦੇਸ਼ ਮੁਅੱਤਲ ਰਹੇਗਾ।
FSSAI ਨੇ ਆਪਣੇ ਹੁਕਮ ਵਿੱਚ ਦਲੀਲ ਦਿੱਤੀ ਸੀ ਕਿ ਉਤਪਾਦਾਂ ਦੇ ਲੇਬਲ ’ਤੇ ‘100%’ ਵਰਗੇ ਦਾਅਵੇ ਅਸਪਸ਼ਟ ਅਤੇ ਖਪਤਕਾਰਾਂ ਨੂੰ ਉਲਝਾਉਣ ਵਾਲੇ ਹੋ ਸਕਦੇ ਹਨ। ਰੈਗੂਲੇਟਰ ਮੁਤਾਬਕ ਅਜਿਹੇ ਦਾਅਵਿਆਂ ਦੀ ਪੂਰੀ ਤਰ੍ਹਾਂ ਪੁਸ਼ਟੀ ਕਰਨਾ ਸੰਭਵ ਨਹੀਂ ਅਤੇ ਇਸ ਨਾਲ ਖਪਤਕਾਰਾਂ ਨੂੰ ਉਤਪਾਦ ਬਾਰੇ ਗਲਤ ਜਾਂ ਭਰਮਿਤ ਕਰਨ ਵਾਲੀ ਜਾਣਕਾਰੀ ਮਿਲ ਸਕਦੀ ਹੈ। ਹੁਣ ਹਾਈ ਕੋਰਟ ਦੇ ਅੰਤਰਿਮ ਆਦੇਸ਼ ਤੋਂ ਬਾਅਦ ਡਾਬਰ ਨੂੰ ਇਨ੍ਹਾਂ ਦਾਅਵਿਆਂ ਵਾਲੇ ਉਤਪਾਦਾਂ ਦੀ ਵਿਕਰੀ ’ਤੇ ਤੁਰੰਤ ਪਾਬੰਦੀ ਤੋਂ ਰਾਹਤ ਮਿਲ ਗਈ ਹੈ।
