ਪੀਵੀ ਸਿੰਧੂ ਵਿਸ਼ਵ ਬੈਡਮਿੰਟਨ ਚੈਂਪੀਅਨਸ਼ਿਪ ਤੋਂ ਬਾਹਰ, ਚੀਨੀ ਖਿਡਾਰਨ ਹੱਥੋਂ ਮਿਲੀ ਹਾਰ
PV Sindhu out of World Badminton Championship: ਨਵੀਂ ਦਿੱਲੀ: ਭਾਰਤ ਦੀ ਸਟਾਰ ਬੈਡਮਿੰਟਨ ਖਿਡਾਰਨ ਪੀਵੀ ਸਿੰਧੂ 2026 ਵਿਸ਼ਵ ਬੈਡਮਿੰਟਨ ਚੈਂਪੀਅਨਸ਼ਿਪ ਤੋਂ ਬਾਹਰ ਹੋ ਗਈ ਹੈ। ਨਵੀਂ ਦਿੱਲੀ ਦੇ ਇੰਦਰਾ ਗਾਂਧੀ ਇੰਡੋਰ ਸਟੇਡੀਅਮ ਵਿੱਚ ਖੇਡੇ ਗਏ ਮਹਿਲਾ ਸਿੰਗਲਜ਼ ਦੇ ਰਾਊਂਡ ਆਫ-16 ਮੁਕਾਬਲੇ ਵਿੱਚ ਚੀਨ ਦੀ ਵਾਂਗ ਝੀ ਯੀ ਨੇ ਸਿੰਧੂ ਨੂੰ 21-11, 15-21, 21-17 ਨਾਲ ਹਰਾਇਆ। ਇਸ ਹਾਰ ਨਾਲ ਸਿੰਧੂ ਦਾ ਵਿਸ਼ਵ ਚੈਂਪੀਅਨਸ਼ਿਪ ਵਿੱਚ ਛੇਵਾਂ ਤਮਗਾ ਜਿੱਤਣ ਦਾ ਸੁਪਨਾ ਵੀ ਟੁੱਟ ਗਿਆ। ਸਿੰਧੂ ਨੇ ਇਸ ਤੋਂ ਪਹਿਲਾਂ ਵਿਸ਼ਵ ਚੈਂਪੀਅਨਸ਼ਿਪ ਵਿੱਚ ਚੀਨੀ ਖਿਡਾਰਨਾਂ ਖ਼ਿਲਾਫ਼ ਆਪਣਾ ਹਰ ਮੁਕਾਬਲਾ ਜਿੱਤਿਆ ਸੀ, ਪਰ ਵਾਂਗ ਝੀ ਯੀ ਨੇ ਇਹ ਰਿਕਾਰਡ ਤੋੜ ਦਿੱਤਾ।
ਪਹਿਲਾ ਸੈੱਟ ਹਾਰੀ, ਦੂਜੇ ’ਚ ਕੀਤੀ ਜ਼ਬਰਦਸਤ ਵਾਪਸੀ
ਸਿੰਧੂ ਨੇ ਪਹਿਲਾ ਸੈੱਟ 11-21 ਨਾਲ ਗੁਆ ਦਿੱਤਾ। ਹਾਲਾਂਕਿ, ਦੂਜੇ ਸੈੱਟ ਵਿੱਚ ਭਾਰਤੀ ਖਿਡਾਰਨ ਨੇ ਸ਼ਾਨਦਾਰ ਵਾਪਸੀ ਕਰਦਿਆਂ 21-15 ਨਾਲ ਸੈੱਟ ਆਪਣੇ ਨਾਮ ਕਰ ਲਿਆ। ਇਸ ਤੋਂ ਬਾਅਦ ਫੈਸਲਾਕੁੰਨ ਤੀਜੇ ਸੈੱਟ ਵਿੱਚ ਸਿੰਧੂ ਨੇ ਸ਼ੁਰੂਆਤ ਬਹੁਤ ਵਧੀਆ ਕੀਤੀ। ਉਹ ਇੱਕ ਸਮੇਂ 3-0 ਅਤੇ ਫਿਰ 8-4 ਨਾਲ ਅੱਗੇ ਸੀ। ਇੰਟਰਵਲ ਤੱਕ ਵੀ ਸਿੰਧੂ ਨੇ 11-10 ਦੀ ਬੜ੍ਹਤ ਬਣਾਈ ਹੋਈ ਸੀ। ਪਰ ਇਸ ਤੋਂ ਬਾਅਦ ਵਾਂਗ ਝੀ ਯੀ ਨੇ ਜ਼ਬਰਦਸਤ ਵਾਪਸੀ ਕੀਤੀ ਅਤੇ ਤੀਜਾ ਸੈੱਟ 21-17 ਨਾਲ ਜਿੱਤ ਕੇ ਕੁਆਰਟਰ ਫਾਈਨਲ ਵਿੱਚ ਜਗ੍ਹਾ ਬਣਾ ਲਈ। ਤੀਜੇ ਸੈੱਟ ਦੌਰਾਨ ਵਾਂਗ ਝੀ ਯੀ ਨੂੰ ਪੈਰਾਂ ਵਿੱਚ ਗੰਭੀਰ ਪੇਸ਼ੀਆਂ ਦੇ ਖਿਚਾਅ ਦੀ ਸਮੱਸਿਆ ਵੀ ਹੋਈ ਅਤੇ ਉਸ ਨੇ ਮੈਡੀਕਲ ਟਾਈਮਆਊਟ ਲਿਆ। ਇਸ ਦੇ ਬਾਵਜੂਦ ਚੀਨੀ ਖਿਡਾਰਨ ਨੇ ਮੁਕਾਬਲਾ ਜਿੱਤ ਲਿਆ।
ਵਾਂਗ ਝੀ ਯੀ ਕੁਆਰਟਰ ਫਾਈਨਲ ਵਿੱਚ
ਵਾਂਗ ਝੀ ਯੀ ਹੁਣ ਕੁਆਰਟਰ ਫਾਈਨਲ ਵਿੱਚ ਡੈਨਮਾਰਕ ਦੀ ਲਾਈਨ ਕ੍ਰਿਸਟੋਫਰਸਨ ਨਾਲ ਭਿੜੇਗੀ। ਕ੍ਰਿਸਟੋਫਰਸਨ ਨੇ ਰਾਊਂਡ ਆਫ-16 ਵਿੱਚ ਇੰਡੋਨੇਸ਼ੀਆ ਦੀ ਪੀ.ਕੇ. ਵਰਦਾਨੀ ਨੂੰ 21-18, 21-17 ਨਾਲ ਹਰਾਇਆ ਸੀ। ਇਸ ਹਾਰ ਨਾਲ ਮਹਿਲਾ ਸਿੰਗਲਜ਼ ਵਿੱਚ ਭਾਰਤ ਦੀ ਵਿਸ਼ਵ ਚੈਂਪੀਅਨਸ਼ਿਪ ਮੁਹਿੰਮ ਨੂੰ ਵੱਡਾ ਝਟਕਾ ਲੱਗਿਆ ਹੈ। ਹਾਲਾਂਕਿ ਸਤਵਿਕਸਾਈਰਾਜ ਰੰਕੀਰੈੱਡੀ-ਚਿਰਾਗ ਸ਼ੈੱਟੀ ਅਤੇ ਟ੍ਰੀਸਾ ਜੌਲੀ-ਗਾਇਤਰੀ ਗੋਪੀਚੰਦ ਦੀਆਂ ਭਾਰਤੀ ਜੋੜੀਆਂ ਕੁਆਰਟਰ ਫਾਈਨਲ ਵਿੱਚ ਪਹੁੰਚ ਚੁੱਕੀਆਂ ਹਨ।
