ਏਸ਼ੀਅਨ ਖੇਡਾਂ 2026 ਵਿੱਚ ਪਹਿਲਾ ਡੋਪਿੰਗ ਮਾਮਲਾ ਆਇਆ ਸਾਹਮਣੇ, ਐਥਲੀਟ ਸਸਪੈਂਡ
First doping case of the 2026 Asian Games: ਨਵੀਂ ਦਿੱਲੀ: ਏਸ਼ੀਆਈ ਖੇਡਾਂ ਆਈਚੀ-ਨਾਗੋਯਾ 2026 ਵਿੱਚ ਡੋਪਿੰਗ ਦਾ ਪਹਿਲਾ ਮਾਮਲਾ ਸਾਹਮਣੇ ਆਇਆ ਹੈ। ਥਾਈਲੈਂਡ ਦੀ ਮਹਿਲਾ ਬੈਡਮਿੰਟਨ ਖਿਡਾਰਨ ਪਿਚਾਮੋਨ ਓਪਾਤਨਿਪੁਥ ਦੇ ਡੋਪਿੰਗ ਸੈਂਪਲ ਵਿੱਚ ਪਾਬੰਦੀਸ਼ੁਦਾ ਪਦਾਰਥ ਫਿਊਰੋਸੇਮਾਈਡ (Furosemide) ਮਿਲਣ ਤੋਂ ਬਾਅਦ ਉਨ੍ਹਾਂ ਨੂੰ ਤੁਰੰਤ ਪ੍ਰਭਾਵ ਨਾਲ ਅਸਥਾਈ ਤੌਰ ’ਤੇ ਸਸਪੈਂਡ ਕਰ ਦਿੱਤਾ ਗਿਆ ਹੈ। ਓਲੰਪਿਕ ਕੌਂਸਲ ਆਫ ਏਸ਼ੀਆ (OCA) ਨੇ ਸੋਮਵਾਰ ਨੂੰ ਇਸ ਮਾਮਲੇ ਦੀ ਪੁਸ਼ਟੀ ਕੀਤੀ। OCA ਮੁਤਾਬਕ ਖਿਡਾਰਨ ਦਾ ਸੈਂਪਲ 17 ਸਤੰਬਰ ਨੂੰ ਨਾਗੋਯਾ ਵਿੱਚ ਮੁਕਾਬਲੇ ਤੋਂ ਬਾਹਰ ਡੋਪਿੰਗ ਕੰਟਰੋਲ ਦੌਰਾਨ ਲਿਆ ਗਿਆ ਸੀ। ਖਿਡਾਰਨ ਨੇ ਅਜੇ ਤੱਕ ਏਸ਼ੀਆਈ ਖੇਡਾਂ ਵਿੱਚ ਕਿਸੇ ਮੁਕਾਬਲੇ ਵਿੱਚ ਹਿੱਸਾ ਨਹੀਂ ਲਿਆ ਸੀ।
ਕੀ ਹੈ ਫਿਊਰੋਸੇਮਾਈਡ ?
ਫਿਊਰੋਸੇਮਾਈਡ ਨੂੰ ਵਿਸ਼ਵ ਐਂਟੀ-ਡੋਪਿੰਗ ਏਜੰਸੀ (WADA) ਦੀ ਪਾਬੰਦੀਸ਼ੁਦਾ ਸੂਚੀ ਵਿੱਚ S5 ਡਾਇਯੂਰੇਟਿਕਸ ਅਤੇ ਮਾਸਕਿੰਗ ਏਜੰਟ ਵਜੋਂ ਸ਼ਾਮਲ ਕੀਤਾ ਗਿਆ ਹੈ। ਇਹ ਪਦਾਰਥ ਮੁਕਾਬਲੇ ਦੌਰਾਨ ਅਤੇ ਮੁਕਾਬਲੇ ਤੋਂ ਬਾਹਰ ਦੋਵਾਂ ਸਮੇਂ ਪਾਬੰਦੀਸ਼ੁਦਾ ਹੈ। ਇਸ ਦੀ ਵਰਤੋਂ ਸਰੀਰ ਵਿੱਚੋਂ ਪਾਣੀ ਕੱਢਣ ਅਤੇ ਤੇਜ਼ੀ ਨਾਲ ਭਾਰ ਘਟਾਉਣ ਲਈ ਕੀਤੀ ਜਾ ਸਕਦੀ ਹੈ।
ਟੀਮ ਮੁਕਾਬਲੇ ’ਚ ਨਹੀਂ ਲੈ ਸਕੇਗੀ ਹਿੱਸਾ
OCA ਨੇ ਕਿਹਾ ਕਿ ਮਾਮਲੇ ਦਾ ਨਿਪਟਾਰਾ ਹੋਣ ਤੱਕ ਖਿਡਾਰਨ ਏਸ਼ੀਆਈ ਖੇਡਾਂ ਦੌਰਾਨ ਕਿਸੇ ਵੀ ਮੁਕਾਬਲੇ, ਟ੍ਰੇਨਿੰਗ, ਕੋਚਿੰਗ ਜਾਂ ਹੋਰ ਖੇਡ ਗਤੀਵਿਧੀ ਵਿੱਚ ਹਿੱਸਾ ਨਹੀਂ ਲੈ ਸਕੇਗੀ। ਮੰਗਲਵਾਰ ਨੂੰ ਮਹਿਲਾ ਟੀਮ ਦੇ ਕੁਆਰਟਰ ਫਾਈਨਲ ਵਿੱਚ ਉਸ ਦਾ ਮੁਕਾਬਲਾ ਹੋਣਾ ਸੀ। ਖਿਡਾਰਨ ਨੂੰ ਕੋਰਟ ਆਫ ਆਰਬਿਟ੍ਰੇਸ਼ਨ ਫਾਰ ਸਪੋਰਟ (CAS) ਦੇ ਐਂਟੀ-ਡੋਪਿੰਗ ਡਿਵੀਜ਼ਨ ਸਾਹਮਣੇ ਅਸਥਾਈ ਸਸਪੈਂਸ਼ਨ ਨੂੰ ਚੁਣੌਤੀ ਦੇਣ ਦਾ ਅਧਿਕਾਰ ਹੈ। ਇਸ ਤੋਂ ਇਲਾਵਾ ਉਹ ਆਪਣੇ B-ਸੈਂਪਲ ਦੀ ਜਾਂਚ ਕਰਵਾਉਣ ਦੀ ਵੀ ਮੰਗ ਕਰ ਸਕਦੀ ਹੈ।
