ADM ਦੇ ਘਰ ਵਿਜੀਲੈਂਸ ਦੀ ਛਾਪੇਮਾਰੀ, 70 ਲੱਖ ਨਕਦ ਤੇ ਮਹਿੰਗੀਆਂ ਘੜੀਆਂ ਬਰਾਮਦ
Vigilance raids ADM’s residence: ਪਟਨਾ: ਬਿਹਾਰ ਦੇ ਪਟਨਾ ਵਿੱਚ ADM (ਸਪਲਾਈ) ਰਵਿੰਦਰ ਕੁਮਾਰ ਦਿਵਾਕਰ ਅਤੇ ਦਾਨਾਪੁਰ ਦੀ ਜ਼ਿਲ੍ਹਾ ਸਬ-ਰਜਿਸਟਰਾਰ ਉਨ੍ਹਾਂ ਦੀ ਪਤਨੀ ਕੁਮਾਰੀ ਸਵਿਟੀ ਦੇ ਟਿਕਾਣਿਆਂ ’ਤੇ ਨਿਗਰਾਨੀ ਅਨੁਸੰਧਾਨ ਬਿਊਰੋ ਨੇ ਛਾਪੇਮਾਰੀ ਕੀਤੀ। ਦੋਵਾਂ ’ਤੇ ਆਮਦਨ ਤੋਂ ਵੱਧ ਜਾਇਦਾਦ ਇਕੱਠੀ ਕਰਨ ਦੇ ਦੋਸ਼ ਹਨ।
ਵਿਜੀਲੈਂਸ ਟੀਮ ਨੇ ਪਟਨਾ ਦੇ ਦਾਨਾਪੁਰ ਸਥਿਤ ਕਸ਼ਯਪ ਗ੍ਰੀਨ ਸਿਟੀ ਅਪਾਰਟਮੈਂਟ ਦੇ ਫਲੈਟ ਨੰਬਰ 304 ਵਿੱਚ ਤਲਾਸ਼ੀ ਲਈ। ਅਧਿਕਾਰੀਆਂ ਮੁਤਾਬਕ ਇੱਥੋਂ 70 ਲੱਖ ਰੁਪਏ ਨਕਦ ਅਤੇ ਕਰੀਬ 6 ਲੱਖ ਰੁਪਏ ਮੁੱਲ ਦੀਆਂ 48 ਮਹਿੰਗੀਆਂ ਘੜੀਆਂ ਬਰਾਮਦ ਹੋਈਆਂ।
ਤਲਾਸ਼ੀ ਦੌਰਾਨ ਕਰੀਬ 3 ਕਰੋੜ ਰੁਪਏ ਦੀ ਜਾਇਦਾਦ ਨਾਲ ਸਬੰਧਤ ਦਸਤਾਵੇਜ਼ ਵੀ ਮਿਲਣ ਦੀ ਗੱਲ ਕਹੀ ਗਈ ਹੈ। ਇਸ ਤੋਂ ਇਲਾਵਾ ਲਗਭਗ 250 ਗ੍ਰਾਮ ਸੋਨੇ-ਚਾਂਦੀ ਦੇ ਗਹਿਣੇ ਵੀ ਮਿਲੇ ਹਨ। ਟੀਮ ਵੱਲੋਂ ਪਟਨਾ ਅਤੇ ਬੇਗੂਸਰਾਏ ਸਥਿਤ ਹੋਰ ਟਿਕਾਣਿਆਂ ’ਤੇ ਵੀ ਜਾਂਚ ਕੀਤੀ ਗਈ।
ਪਟਨਾ ਵਿੱਚ ਵਿਜੀਲੈਂਸ ਟੀਮ ਦੇ ਡੀਐਸਪੀ ਮਿਥਿਲੇਸ਼ ਕੁਮਾਰ ਨੇ ਦੱਸਿਆ ਕਿ ਪਤੀ-ਪਤਨੀ ਦੋਵਾਂ ਖ਼ਿਲਾਫ਼ ਮਾਮਲਾ ਦਰਜ ਹੈ ਅਤੇ ਜਾਂਚ ਜਾਰੀ ਹੈ। ਰਵਿੰਦਰ ਕੁਮਾਰ ਪਹਿਲਾਂ ਗਯਾ ਵਿੱਚ SDM ਅਤੇ ਸਾਰਣ ਵਿੱਚ DPRO ਦੇ ਅਹੁਦੇ ’ਤੇ ਵੀ ਤਾਇਨਾਤ ਰਹਿ ਚੁੱਕੇ ਹਨ।
