ਦਿੱਲੀ ਏਅਰਪੋਰਟ ’ਤੇ 10 ਚੀਨੀ ਡਰੋਨ ਜ਼ਬਤ, 3 ਭਾਰਤੀ ਯਾਤਰੀ ਕਾਬੂ
10 Chinese drones seized at Delhi Airport: ਨਵੀਂ ਦਿੱਲੀ: ਦਿੱਲੀ ਦੇ ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ’ਤੇ ਕਸਟਮ ਵਿਭਾਗ ਨੇ ਤਿੰਨ ਭਾਰਤੀ ਯਾਤਰੀਆਂ ਕੋਲੋਂ ਕਰੀਬ ₹1.03 ਕਰੋੜ ਦੀ ਕੀਮਤ ਦੇ 10 ਡਰੋਨ ਜ਼ਬਤ ਕੀਤੇ ਹਨ। ਤਿੰਨੇ ਯਾਤਰੀ 25 ਸਤੰਬਰ ਨੂੰ ਹਾਂਗਕਾਂਗ ਤੋਂ ਵੀਅਤਨਾਮ ਰਾਹੀਂ ਟਰਮੀਨਲ-3 ਪਹੁੰਚੇ ਸਨ। ਖੁਫੀਆ ਸੂਚਨਾ ਦੇ ਆਧਾਰ ’ਤੇ ਉਨ੍ਹਾਂ ਨੂੰ ਗ੍ਰੀਨ ਚੈਨਲ ਪਾਰ ਕਰਦੇ ਸਮੇਂ ਰੋਕਿਆ ਗਿਆ।
ਤਲਾਸ਼ੀ ਦੌਰਾਨ ਚੀਨੀ ਕੰਪਨੀ Autel Robotics ਦੇ 10 MDX-1 ਡਰੋਨ, 11 ਕੰਟਰੋਲਰ, 10 ਕੈਮਰਾ ਗਿੰਬਲ, 60 ਪ੍ਰੋਪੈਲਰ, 20 ਐਂਟੀਨਾ ਅਤੇ 40 ਜੌਇਸਟਿਕ ਬਰਾਮਦ ਹੋਏ। ਇਸ ਤੋਂ ਇਲਾਵਾ ਇੱਕ iPhone 18 Pro Max ਵੀ ਮਿਲਿਆ। ਕਸਟਮ ਅਧਿਕਾਰੀਆਂ ਮੁਤਾਬਕ, ਇੱਕ ਯਾਤਰੀ ਨੇ ਪੁੱਛਗਿੱਛ ਦੌਰਾਨ ਮੰਨਿਆ ਕਿ ਇਹ ਸਾਮਾਨ ਉਹ ਆਪਣੇ ਇੱਕ ਦੋਸਤ ਲਈ ਲੈ ਕੇ ਆਇਆ ਸੀ ਅਤੇ ਕਸਟਮ ’ਚ ਇਸ ਦੀ ਘੋਸ਼ਣਾ ਨਹੀਂ ਕੀਤੀ ਗਈ ਸੀ। ਭਾਰਤ ਵਿੱਚ ਵਿਦੇਸ਼ੀ ਡਰੋਨਾਂ ਦੀ ਦਰਾਮਦ ’ਤੇ ਪਾਬੰਦੀ ਹੈ।
15 ਕਿਲੋਮੀਟਰ ਤੱਕ ਆਪਰੇਟ ਹੋ ਸਕਦੇ ਹਨ ਡਰੋਨ
ਰਿਪੋਰਟ ਮੁਤਾਬਕ ਬਰਾਮਦ ਕੀਤੇ ਗਏ ਡਰੋਨ ਥਰਮਲ ਕੈਮਰਾ ਅਤੇ ਲੇਜ਼ਰ ਰੇਂਜ ਫਾਈਂਡਰ ਵਰਗੀਆਂ ਤਕਨੀਕੀ ਸਮਰੱਥਾਵਾਂ ਨਾਲ ਲੈਸ ਹਨ। ਇਹ GPS ਸਿਗਨਲ ਤੋਂ ਬਿਨਾਂ ਵੀ ਉਡਾਣ ਭਰਨ ਦੇ ਸਮਰੱਥ ਦੱਸੇ ਗਏ ਹਨ।
MDX-1 ਦੇ 4T ਵਰਜ਼ਨ ਦੀ ਉਡਾਣ ਸਮਰੱਥਾ 42 ਮਿੰਟ ਤੱਕ ਅਤੇ ਆਪਰੇਸ਼ਨ ਰੇਂਜ 15 ਕਿਲੋਮੀਟਰ ਤੱਕ ਦੱਸੀ ਗਈ ਹੈ। ਇਸ ਵਿੱਚ ਲੇਜ਼ਰ ਰੇਂਜ ਫਾਈਂਡਰ ਰਾਹੀਂ 1.2 ਕਿਲੋਮੀਟਰ ਤੱਕ ਦੀ ਦੂਰੀ ਮਾਪਣ ਦੀ ਸਮਰੱਥਾ ਵੀ ਦੱਸੀ ਗਈ ਹੈ। ਮਾਮਲੇ ਸਬੰਧੀ ਕਸਟਮ ਵਿਭਾਗ ਵੱਲੋਂ ਅਗਲੀ ਜਾਂਚ ਕੀਤੀ ਜਾ ਰਹੀ ਹੈ।
