‘ਬਾਬਾ ਬੌਕਸਰ’ ਤੋਂ ‘ਪਰਵਿੰਦਰ ਝੋਟਾ’ ਤੱਕ ਦਾ ਸਫ਼ਰ: ਰਿੰਗ ਦਾ ਚੈਂਪੀਅਨ, ਨਸ਼ਿਆਂ ਖ਼ਿਲਾਫ਼ ਲੜਦਿਆਂ ਹੋਇਆ ਗੋਲੀਆਂ ਦਾ ਸ਼ਿਕਾਰ

• ਹੈਵੀਵੇਟ ਮੁੱਕੇਬਾਜ਼ੀ ਵਿੱਚ ਚਾਰ ਵਾਰ ਇੰਟਰ ਕਾਲਜ ਗੋਲਡ ਮੈਡਲ ਜਿੱਤਿਆ

Journey from ‘Baba Boxer’ to ‘Parvinder Jhota’: ਮਾਨਸਾ: ਪਰਵਿੰਦਰ ਸਿੰਘ ਝੋਟਾ ਦੀ ਪਛਾਣ ਸਿਰਫ਼ ਇੱਕ ਨਸ਼ਾ ਵਿਰੋਧੀ ਸਮਾਜ ਸੇਵੀ ਵੱਜੋਂ ਹੀ ਨਹੀਂ ਸੀ। ਕਿਸੇ ਵੇਲੇ ਉਹ ਜਲੰਧਰ ਵਿੱਚ ‘ਬਾਬਾ ਬੌਕਸਰ’ ਦੇ ਨਾਂ ਨਾਲ ਜਾਣਿਆ ਜਾਂਦਾ ਸੀ, ਪਰ ਜਦੋਂ ਉਸ ਨੇ ਮਾਲਵੇ ਵਿੱਚ ਨਸ਼ਿਆਂ ਦੇ ਕਾਰੋਬਾਰ ਖ਼ਿਲਾਫ਼ ਆਵਾਜ਼ ਉਠਾਈ ਤਾਂ ਉਸ ਦੀ ਪਛਾਣ ‘ਪਰਵਿੰਦਰ ਝੋਟਾ’ ਵਜੋਂ ਹੋਰ ਚਰਚਿਤ ਹੋ ਗਈ। ਸਾਦਗੀ ਭਰੀ ਜ਼ਿੰਦਗੀ ਜਿਊਣ ਵਾਲਾ ਝੋਟਾ ਅਕਸਰ ਚੱਪਲਾਂ ਵਿੱਚ ਹੀ ਘੁੰਮਦਾ ਸੀ। ਮਾਨਸਾ ਵਿੱਚ ਬੀਤੇ ਦਿਨ 13 ਅਕਤੂਬਰ ਨੂੰ ਉਸ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ।

ਇਸ਼ਤਿਹਾਰ

ਗਾਮੀਵਾਲਾ ਤੋਂ ਸ਼ੁਰੂ ਹੋਇਆ ਸਫ਼ਰ
ਪਰਵਿੰਦਰ ਝੋਟਾ ਦਾ ਜੱਦੀ ਪਿੰਡ ਗਾਮੀਵਾਲਾ ਸੀ ਅਤੇ ਉਹ ਐਂਟੀ ਡਰੱਗ ਟਾਸਕ ਗਰੁੱਪ ਦਾ ਮੈਂਬਰ ਸੀ। ਉਸ ਦਾ ਪਰਿਵਾਰ ਗੁਰਸਿੱਖੀ ਨਾਲ ਜੁੜਿਆ ਹੋਇਆ ਹੈ। ਪਿਤਾ ਭੀਮ ਸਿੰਘ ਸਾਬਕਾ ਫ਼ੌਜੀ ਹਨ ਅਤੇ ਡੇਅਰੀ ਦਾ ਕਾਰੋਬਾਰ ਕਰਦੇ ਹਨ, ਜਦਕਿ ਮਾਤਾ ਅਮਰਜੀਤ ਕੌਰ ਧਾਰਮਿਕ ਜੀਵਨ ਨਾਲ ਜੁੜੇ ਹੋਏ ਹਨ। ਉਸ ਦੀ ਪਤਨੀ ਮਨਜੀਤ ਕੌਰ ਜਵਾਹਰ ਕੇ ਦੀ ਅਕਾਲ ਅਕੈਡਮੀ ਵਿੱਚ ਅਧਿਆਪਕਾ ਹੈ। ਪਰਵਿੰਦਰ ਆਪਣੇ ਮਾਪਿਆਂ ਦਾ ਇਕਲੌਤਾ ਪੁੱਤਰ ਸੀ। ਉਸ ਦੇ ਦੋ ਬੱਚੇ ਹਨ, ਜਿਨ੍ਹਾਂ ਦੀ ਉਮਰ 9 ਅਤੇ 6 ਸਾਲ ਦੱਸੀ ਜਾ ਰਹੀ ਹੈ। ਘਰ ਵਿੱਚ ਦੁੱਧ ਦੀ ਭਰੀ ਬਾਲਟੀ ਉਸ ਦੀ ਖ਼ੁਰਾਕ ਦਾ ਹਿੱਸਾ ਹੁੰਦੀ ਸੀ। ਉਸ ਦੇ ਮਜ਼ਬੂਤ ਸਰੀਰ ਅਤੇ ਖ਼ੁਰਾਕ ਕਾਰਨ ਹੀ ਉਸ ਦਾ ਨਾਂ ‘ਝੋਟਾ’ ਪੈ ਗਿਆ।

ਕ੍ਰਿਕਟ ਤੋਂ ਮੁੱਕੇਬਾਜ਼ੀ ਤੱਕ
ਮੁੱਢਲੇ ਦੌਰ ਵਿੱਚ ਪਰਵਿੰਦਰ ਦੀ ਦਿਲਚਸਪੀ ਕ੍ਰਿਕਟ ਵਿੱਚ ਸੀ, ਪਰ ਬਾਅਦ ਵਿੱਚ ਉਸ ਨੇ ਮੁੱਕੇਬਾਜ਼ੀ ਨੂੰ ਆਪਣਾ ਕਰੀਅਰ ਬਣਾਇਆ। ਉਸ ਨੇ ਮਾਨਸਾ ਦੇ ਵਿਦਿਆ ਭਾਰਤੀ ਸਕੂਲ ਤੋਂ ਮੁੱਢਲੀ ਪੜ੍ਹਾਈ ਕੀਤੀ। ਇਸ ਤੋਂ ਬਾਅਦ ਬਠਿੰਡਾ ਦੇ ਡੀਏਵੀ ਕਾਲਜ ਅਤੇ ਫਿਰ ਜਲੰਧਰ ਦੇ ਲਾਇਲਪੁਰ ਖ਼ਾਲਸਾ ਕਾਲਜ ਵਿੱਚ ਪੜ੍ਹਾਈ ਕੀਤੀ। ਸਾਲ 2004-05 ਤੋਂ 2008-09 ਦੌਰਾਨ ਉਸ ਨੇ ਹੈਵੀਵੇਟ ਮੁੱਕੇਬਾਜ਼ੀ ਵਿੱਚ ਚਾਰ ਵਾਰ ਇੰਟਰ ਕਾਲਜ ਮੁਕਾਬਲਿਆਂ ਵਿੱਚ ਸੋਨ ਤਗ਼ਮੇ ਜਿੱਤੇ। ਉਹ ਚਾਰ ਵਾਰ ਇੰਟਰ ਯੂਨੀਵਰਸਿਟੀ ਮੁਕਾਬਲਿਆਂ ਵਿੱਚ ਵੀ ਸ਼ਾਮਲ ਹੋਇਆ ਅਤੇ ਦੋ ਵਾਰ ਤਗ਼ਮਾ ਹਾਸਲ ਕੀਤਾ।

ਉਸ ਦੇ ਕਾਲਜ ਦੇ ਜੂਨੀਅਰ ਅਤੇ ਹੁਣ ਕੌਮਾਂਤਰੀ ਮੁੱਕੇਬਾਜ਼ੀ ਕੋਚ ਹਰਪ੍ਰੀਤ ਸਿੰਘ ਹੈਰੀ ਮੁਤਾਬਕ, ਪਰਵਿੰਦਰ ਆਪਣੇ ਸਾਥੀ ਖਿਡਾਰੀਆਂ ਨੂੰ ਪੁੱਤਰਾਂ ਵਾਂਗ ਰੱਖਦਾ ਸੀ। ਉਹ ਲੋੜਵੰਦ ਖਿਡਾਰੀਆਂ ਨੂੰ ਆਪਣੀ ਕਿੱਟ ਅਤੇ ਬੂਟ ਤੱਕ ਦੇ ਦਿੰਦਾ ਸੀ। ਉਹ ਖ਼ਾਲਸਾ ਕਾਲਜ ਦੀ ਵਿਦਿਆਰਥੀ ਯੂਨੀਅਨ ਦਾ ਪ੍ਰਧਾਨ ਵੀ ਰਿਹਾ। ਉਸ ਦੇ ਕੋਚ ਵਰਿੰਦਰ ਥਾਪਰ ਅਨੁਸਾਰ, ਜਲੰਧਰ ਵਿੱਚ ਉਹ ‘ਬਾਬਾ ਬੌਕਸਰ’ ਵਜੋਂ ਮਸ਼ਹੂਰ ਸੀ।

ਲੋੜਵੰਦਾਂ ਦੀ ਮਦਦ ਲਈ ਰਹਿੰਦਾ ਸੀ ਅੱਗੇ
ਪਰਵਿੰਦਰ ਦੇ ਦੋਸਤ ਗਗਨਦੀਪ ਸਿੰਘ ਮੁਤਾਬਕ, ਉਸ ਨੂੰ ਨਾ ਸਿਆਸਤ ਵਿੱਚ ਜਾਣ ਦੀ ਇੱਛਾ ਸੀ ਅਤੇ ਨਾ ਹੀ ਆਗੂ ਬਣਨ ਦੀ। ਉਹ ਆਪਣੇ ਅੰਦਾਜ਼ ਵਿੱਚ ਜ਼ਿੰਦਗੀ ਜਿਊਂਦਾ ਸੀ ਅਤੇ ਮੁਸ਼ਕਲ ਵਿੱਚ ਫਸੇ ਲੋਕਾਂ ਦੀ ਮਦਦ ਲਈ ਅੱਗੇ ਆਉਂਦਾ ਸੀ। ਉਸ ਦੇ ਜਾਣਕਾਰਾਂ ਮੁਤਾਬਕ, ਉਹ ਬੇਬਾਕ ਸੁਭਾਅ ਦਾ ਮਾਲਕ ਸੀ ਅਤੇ ਕਿਸੇ ਨਾਲ ਧੱਕਾ ਹੁੰਦਾ ਦੇਖ ਕੇ ਚੁੱਪ ਨਹੀਂ ਰਹਿੰਦਾ ਸੀ। ਹਾਲਾਂਕਿ, ਉਸ ਦੀ ਜ਼ਿੰਦਗੀ ਵਿੱਚ ਅਜਿਹਾ ਦੌਰ ਵੀ ਆਇਆ ਜਦੋਂ ਉਹ ਖ਼ੁਦ ਨਸ਼ਿਆਂ ਦੇ ਰਾਹ ਪੈ ਗਿਆ ਸੀ। ਪਰ ਉਹ ਛੇਤੀ ਹੀ ਸੰਭਲ ਗਿਆ।

ਦੋ ਨੌਜਵਾਨਾਂ ਦੀ ਮੌਤ ਨੇ ਬਦਲ ਦਿੱਤੀ ਜ਼ਿੰਦਗੀ
ਪਰਵਿੰਦਰ ਦੇ ਮੁਹੱਲੇ ਦੇ ਦੋ ਨੌਜਵਾਨਾਂ ਦੀ ਨਸ਼ੇ ਦੀ ਓਵਰਡੋਜ਼ ਕਾਰਨ ਮੌਤ ਹੋ ਗਈ। ਇਸ ਘਟਨਾ ਨੇ ਉਸ ਨੂੰ ਝੰਜੋੜ ਕੇ ਰੱਖ ਦਿੱਤਾ ਅਤੇ ਉਸ ਨੇ 2021-22 ਵਿੱਚ ਨਸ਼ਿਆਂ ਖ਼ਿਲਾਫ਼ ਮੁਹਿੰਮ ਸ਼ੁਰੂ ਕਰ ਦਿੱਤੀ। ਇਸ ਤੋਂ ਬਾਅਦ ਉਹ ਨਸ਼ਾ ਵੇਚਣ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਮੈਡੀਕਲ ਸਟੋਰਾਂ ਖ਼ਿਲਾਫ਼ ਆਵਾਜ਼ ਉਠਾਉਣ ਲੱਗਾ। ਜੁਲਾਈ 2023 ਵਿੱਚ ਇੱਕ ਮੈਡੀਕਲ ਸਟੋਰ ਨਾਲ ਜੁੜੇ ਵਿਵਾਦ ਦੌਰਾਨ ਉਸ ਵੱਲੋਂ ਦੁਕਾਨਦਾਰ ਨੂੰ ਜੁੱਤੀਆਂ ਦਾ ਹਾਰ ਪਾਉਣ ਦੀ ਘਟਨਾ ਵੀ ਚਰਚਾ ਵਿੱਚ ਆਈ ਸੀ।

ਨਸ਼ਿਆਂ ਤੋਂ ਪੀੜਤ ਲੋਕਾਂ ਦੇ ਪਰਿਵਾਰ ਵੀ ਉਸ ਕੋਲ ਆਪਣੀਆਂ ਸ਼ਿਕਾਇਤਾਂ ਲੈ ਕੇ ਆਉਣ ਲੱਗੇ। ਉਸ ਦੇ ਇਸ ਤਿੱਖੇ ਅਤੇ ਟਕਰਾਅ ਵਾਲੇ ਅੰਦਾਜ਼ ਕਾਰਨ ਕਈ ਵਿਵਾਦ ਵੀ ਪੈਦਾ ਹੋਏ। ਉਪਲਬਧ ਜਾਣਕਾਰੀ ਮੁਤਾਬਕ, 2009 ਤੋਂ 2024 ਦਰਮਿਆਨ ਉਸ ਖ਼ਿਲਾਫ਼ ਕੁੱਲ ਨੌਂ ਪੁਲਿਸ ਕੇਸ ਦਰਜ ਹੋਏ ਸਨ, ਜਿਨ੍ਹਾਂ ਵਿੱਚੋਂ ਪੰਜ ਉਸ ਸਮੇਂ ਦਰਜ ਹੋਏ ਜਦੋਂ ਉਹ ਨਸ਼ਿਆਂ ਵਿਰੁੱਧ ਮੁਹਿੰਮ ਵਿੱਚ ਸਰਗਰਮ ਸੀ।

ਮਾਨਸਾ ਨੇ ਥੋੜ੍ਹੇ ਸਮੇਂ ਵਿੱਚ ਗੁਆਏ ਦੋ ਚਰਚਿਤ ਨਾਂ
ਮਾਨਸਾ ਜ਼ਿਲ੍ਹੇ ਦੇ ਗਾਇਕ ਸਿੱਧੂ ਮੂਸੇਵਾਲਾ ਦੀ 29 ਮਈ 2022 ਨੂੰ ਹੱਤਿਆ ਕਰ ਦਿੱਤੀ ਗਈ ਸੀ। ਸਿੱਧੂ ਮੂਸੇਵਾਲਾ ਅਤੇ ਪਰਵਿੰਦਰ ਝੋਟਾ ਦੋਵਾਂ ਨੇ ਮਾਨਸਾ ਦੇ ਇੱਕ ਹੀ ਵਿਦਿਆ ਭਾਰਤੀ ਸਕੂਲ ਤੋਂ ਪੜ੍ਹਾਈ ਕੀਤੀ ਸੀ। ਇਲਾਕੇ ਦੇ ਲੋਕ ਦੋਵਾਂ ਦੀ ਮੌਤ ਨੂੰ ਮਾਨਸਾ ਲਈ ਵੱਡਾ ਘਾਟਾ ਮੰਨ ਰਹੇ ਹਨ। ਇੱਕ ਨੇ ਆਪਣੇ ਗੀਤਾਂ ਰਾਹੀਂ ਪਛਾਣ ਬਣਾਈ, ਜਦਕਿ ਦੂਜਾ ਮੁੱਕੇਬਾਜ਼ੀ ਤੋਂ ਨਸ਼ਿਆਂ ਵਿਰੁੱਧ ਮੁਹਿੰਮ ਤੱਕ ਦੇ ਸਫ਼ਰ ਕਰਕੇ ਚਰਚਾ ਵਿੱਚ ਰਿਹਾ।

ਪਰਵਿੰਦਰ ਝੋਟਾ ਦੀ ਮੌਤ ਨੇ ਉਸ ਦੇ ਪਰਿਵਾਰ, ਖੇਡ ਜਗਤ ਅਤੇ ਨਸ਼ਿਆਂ ਵਿਰੁੱਧ ਮੁਹਿੰਮ ਨਾਲ ਜੁੜੇ ਲੋਕਾਂ ਨੂੰ ਸਦਮੇ ਵਿੱਚ ਪਾ ਦਿੱਤਾ ਹੈ। ਉਸ ਦੀ ਜ਼ਿੰਦਗੀ ਦਾ ਸਫ਼ਰ ਮੁੱਕੇਬਾਜ਼ੀ ਦੇ ਤਗ਼ਮਿਆਂ ਤੋਂ ਲੈ ਕੇ ਨਸ਼ਿਆਂ ਖ਼ਿਲਾਫ਼ ਸੰਘਰਸ਼ ਤੱਕ ਫੈਲਿਆ ਹੋਇਆ ਸੀ।