ਪੁਲਿਸ ਛਾਪੇਮਾਰੀ ਦੌਰਾਨ ਕੈਦੀਆਂ ਨੂੰ ਜਾਅਲੀ ਸਿਮ ਦੇਣ ਵਾਲੇ ਗਿਰੋਹ ਦਾ ਪਰਦਾਫਾਸ਼
CIA staff police action; ਸਥਾਨਕ ਸੀਆਈਏ ਸਟਾਫ਼ ਦੀ ਪੁਲਿਸ ਨੇ ਕੇਂਦਰੀ ਜੇਲ੍ਹ ਗੋਇੰਦਵਾਲ ਸਾਹਿਬ ਦੇ ਕੈਦੀਆਂ ਤੇ ਹਵਾਲਾਤੀਆਂ ਨੂੰ ਨਕਲੀ ਆਧਾਰ ਕਾਰਡਾਂ ਰਾਹੀਂ ਸਿਮ ਕਾਰਡ ਐਕਟੀਵੇਟ ਕਰਕੇ ਵੱਡੇ ਪੱਧਰ ‘ਤੇ ਸਪਲਾਈ ਕਰਨ ਵਾਲੇ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਹੈ।
ਇਸ ਮਾਮਲੇ ‘ਚ ਪੁਲਿਸ ਨੇ ਵੈਰੋਵਾਲ ਬਾਵਿਆਂ ਦੇ ਦੁਕਾਨਦਾਰ ਬਲਜੀਤ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਸ ਕੋਲੋਂ ਫਰਜ਼ੀ ਆਧਾਰ ਕਾਰਡਾਂ ਨਾਲ ਐਕਟੀਵੇਟ ਕੀਤੇ 15 ਦੇ ਕਰੀਬ ਸਿਮ ਵੀ ਮਿਲੇ ਹਨ। ਪੁਲਿਸ ਨੇ ਗਿਰੋਹ ਵਿੱਚ ਸ਼ਾਮਲ ਇਕ ਔਰਤ ਦੀ ਵੀ ਸਰਗਰਮ ਭੂਮਿਕਾ ਦਾ ਪਤਾ ਕੀਤਾ ਹੈ, ਜਿਸ ਨੂੰ ਕਾਬੂ ਕਰਨ ਲਈ ਛਾਪੇਮਾਰੀ ਕੀਤੀ ਜਾ ਰਹੀ ਹੈ। ਵੈਰੋਵਾਲ ਦੇ ਅੱਡੇ ’ਤੇ ‘ਬਲਜੀਤ ਟੈਲੀਕੌਮ’ ਨਾਂ ਦੀ ਦੁਕਾਨ ਕਰਦੇ ਬਲਜੀਤ ਸਿੰਘ ਆਪਣੇ ਕੋਲ ਆਉਂਦੇ ਲੋਕਾਂ ਤੋਂ ਆਧਾਰ ਕਾਰਡ ਦੀਆਂ ਕਾਪੀਆਂ ਲੈ ਕੇ ਉਨ੍ਹਾਂ ਦੇ ਆਧਾਰ ਕਾਰਡਾਂ ਦੇ ਨਾਵਾਂ ਅਤੇ ਪਤਿਆਂ ਨਾਲ ਛੇੜਛਾੜ (ਟੈਪਰਿੰਗ) ਕਰਕੇ ਫਰਜ਼ੀ ਆਧਾਰ ਕਾਰਡਾਂ ਰਾਹੀਂ ਸਿਮ ਕਾਰਡ ਐਕਟੀਵੇਟ ਕਰਦਾ ਸੀ ਜਿਨ੍ਹਾਂ ਨੂੰ ਉਹ ਭਾਰੀ ਰਕਮਾਂ ਲੈ ਕੇ ਅੱਗੇ ਕੇਂਦਰੀ ਜੇਲ੍ਹ ਗੋਇੰਦਵਾਲ ਸਾਹਿਬ ਦੇ ਕੈਦੀਆਂ ਨੂੰ ਵੇਚ ਦਿੰਦਾ ਸੀ। ਫ਼ਿਲਹਾਲ ਇਸ ਗਿਰੋਹ ਵਿੱਚ ਬਲਜੀਤ ਸਿੰਘ ਤੋਂ ਇਲਾਵਾ ਹੋਰਨਾਂ ਦੀਆਂ ਗ੍ਰਿਫ਼ਤਾਰੀਆਂ ਹੋਣ ਦੀ ਵੀ ਸੰਭਾਵਨਾ ਜਤਾਈ ਜਾ ਰਹੀ ਹੈ।
