ਅਮਰੀਕਾ ਤੋਂ ਡਿਪੋਰਟ ਹੋਏ ਭਾਰਤੀ, ਪੰਜਾਬੀਆਂ ਦੇ ਪਰਿਵਾਰਾਂ ਦੀਆਂ ਕਹਾਣੀਆਂ ਸੁਣ ਖੜ੍ਹੇ ਹੋ ਜਾਣਗੇ ਰੌਂਗਟੇ

Punjabis Deport from America: ਡੰਕੀ ਲਾ ਕੇ ਵਿਦੇਸ਼ ਜਾਣ ਲਈ ਉਨ੍ਹਾਂ ਨੇ 40 ਤੋਂ 50 ਲੱਖ ਰੁਪਏ ਖ਼ਰਚ ਕੀਤੇ। ਕਈਆਂ ਨੇ ਜ਼ਮੀਨ ਤੇ ਗਹਿਣੇ ਵੇਚ ਦਿੱਤੇ ਤੇ ਕਈਆਂ ਨੇ ਭਾਰੀ ਵਿਆਜ ‘ਤੇ ਲੱਖਾਂ ਰੁਪਏ ਦਾ ਕਰਜ਼ਾ ਲਿਆ।

Donald Trump’s action against Illegal Immigrants: ਆਪਣੇ ਚੰਗੇ ਭਵਿੱਖ ਲਈ ਹਰ ਸਾਲ ਲੱਖਾਂ ਲੋਕ ਦੇਸ਼ ਤੋਂ ਵਿਦੇਸ਼ ਜਾਣ ਦਾ ਸਫ਼ਰ ਪੂਰਾ ਕਰਦੇ ਹਨ। ਇਨ੍ਹਾਂ ‘ਚ ਕਈ ਲੋਕ ਇਸ ਦਾ ਸੁਫ਼ਨਾ ਦੇਖਦੇ ਹਨ ਅਤੇ ਬਾਹਰ ਜਾਣ ਦੀਆਂ ਕੋਸ਼ਿਸ਼ਾਂ ‘ਚ ਲੱਗ ਜਾਂਦੇ ਹਨ। ਸਾਲਾਂ ਤੋਂ ਆਪਣੇ ਵਲੋਂ ਦੇਖੇ ਸੁਫ਼ਨੇ ਨੂੰ ਪੂਰਾ ਕਰਨ ਲਈ ਕਈ ਤਾਂ ਕੋਸ਼ਿਸ਼ਾਂ ਕਰਦੇ ਹਨ ਜੋ ਕਾਨੂੰਨ ਦੇ ਦਾਇਰੇ ‘ਚ ਆਉਂਦੇ ਹਨ। ਪਰ ਕਈ ਸ਼ਾਰਟ ਕੱਟ ਅਤੇ ਗੈਰ ਕਾਨੂੰਨੀ ਤਰੀਕੇ ਨਾਲ ਵਿਦੇਸ਼ਾਂ ਦਾ ਰੁਖ ਕਰਦੇ ਹਨ।

ਇਸ ਸਭ ਦੌਰਾਨ ਅਮਰੀਕਾ ਦੇ ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਐਕਸ਼ਨ ‘ਚ ਆਏ ਡੋਨਲਡ ਟਰੰਪ ਦੇ ਗੈਰ ਕਾਨੂੰਨੀ ਪ੍ਰਵਾਸੀਆਂ ਖਿਲਾਫ਼ ਐਕਸ਼ਨ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਟਰੰਪ ਦੇ ਐਲਾਨ ਤੋਂ ਬਾਅਦ ਬੀਤੇ ਕੱਲ੍ਹ (5 ਫਰਵਰੀ) ਨੂੰ ਅਮਰੀਕਾ ਤੋਂ ਡਿਪੋਰਟ ਕੀਤੇ ਗਏ ਗਈ ਕਈਂ ਭਾਰਤੀਆਂ ‘ਚ 30 ਪੰਜਾਬੀ ਡੰਕੀ ਰਸਤੇ ਅਮਰੀਕਾ ਪਹੁੰਚੇ ਸੀ, ਉਨ੍ਹਾਂ ਨੂੰ ਡਿਪੋਰਟ ਕਰਕ ਵਾਪਸ ਭੇਜ ਦਿੱਤਾ ਗਿਆ ਹੈ। ਸਿਰਫ ਪੰਜਾਬ ਹੀ ਨਹੀਂ ਵਾਪਸ ਭੇਜੇ ਭਾਰਤੀਆਂ ‘ਚ ਸਭ ਤੋਂ ਵੱਧ ਗਿਣਤੀ ਗੁਜਰਾਤ ਅਤੇ ਫਿਰ ਹਰਿਆਣਾ ਦੇ ਨੌਜਵਾਨਾਂ ਦੀ ਹੈ। ਜਿਸ ‘ਚ ਮਹਿਲਾਵਾਂ-ਬੱਚੇ ਵੀ ਸ਼ਾਮਲ ਹਨ।

ਡੰਕੀ ਲਾ ਕੇ ਵਿਦੇਸ਼ ਜਾਣ ਲਈ ਉਨ੍ਹਾਂ ਨੇ 40 ਤੋਂ 50 ਲੱਖ ਰੁਪਏ ਖ਼ਰਚ ਕੀਤੇ। ਕਈਆਂ ਨੇ ਜ਼ਮੀਨ ਤੇ ਗਹਿਣੇ ਵੇਚ ਦਿੱਤੇ ਤੇ ਕਈਆਂ ਨੇ ਭਾਰੀ ਵਿਆਜ ‘ਤੇ ਲੱਖਾਂ ਰੁਪਏ ਦਾ ਕਰਜ਼ਾ ਲਿਆ। ਪਰਿਵਾਰਾਂ ਨੂੰ ਉਮੀਦਾਂ ਸੀ ਕਿ ਅਮਰੀਕਾ ਪਹੁੰਚ ਕੇ ਉਨ੍ਹਾਂ ਦੇ ਹਾਲਾਤ ਬਦਲ ਜਾਣਗੇ, ਕਰਜ਼ਾ ਵੀ ਮੋੜ ਦੇਣਗੇ ਅਤੇ ਜ਼ਮੀਨ ਵੀ ਖਰੀਦ ਲੈਣਗੇ।

ਪਰ ਅਚਾਨਕ ਅਮਰੀਕੀ ਸਰਕਾਰ ਨੇ ਉਸ ਨੂੰ ਦੇਸ਼ ਨਿਕਾਲਾ ਦੇ ਦਿੱਤਾ। ਹਾਲਾਂਕਿ ਪਰਿਵਾਰਕ ਮੈਂਬਰਾਂ ਨੂੰ ਇਸ ਗੱਲ ਦਾ ਤਸੱਲੀ ਹੈ ਕਿ ਬੱਚੇ ਆਪਣੇ ਘਰਾਂ ਨੂੰ ਪਰਤ ਗਏ ਹਨ। ਪਰ, ਹੁਣ ਅਸੀਂ ਕੀ ਖਾਵਾਂਗੇ, ਕਰਜ਼ਾ ਕਿਵੇਂ ਮੋੜਾਂਗੇ? ਅਜਿਹੀਆਂ ਕਈ ਚਿੰਤਾਵਾਂ ਪਰਿਵਾਰਕ ਮੈਂਬਰਾਂ ਨੂੰ ਖਾ ਰਹੀਆਂ ਹਨ।

ਡਿਪੋਰਟ ਕੀਤੇ ਗਏ ਪੰਜਾਬੀਆਂ ਦੇ ਪਰਿਵਾਰਾਂ ਦੀਆਂ ਕਹਾਣੀਆਂ

ਮੋਹਾਲੀ ਦੇ ਡੇਰਾਬੱਸੀ ਪਿੰਡ ਜਡੌਤ ਦਾ ਰਹਿਣ ਵਾਲਾ ਹੈ ਪ੍ਰਦੀਪ। ਉਹ ਡੰਕੀ ਦੇ ਰਸਤੇ ਅਮਰੀਕਾ ਗਿਆ ਸੀ। ਮਾਂ ਨਰਿੰਦਰ ਕੌਰ ਕਹਿੰਦੀ ਹੈ- 41 ਲੱਖ ਰੁਪਏ ਖਰਚ ਆਏ। ਇੱਕ ਏਕੜ ਜ਼ਮੀਨ ਵੇਚ ਦਿੱਤੀ, ਕੁਝ ਕਰਜ਼ਾ ਲਿਆ ਤੇ ਉਹ ਸਿਰਫ਼ 15 ਦਿਨ ਪਹਿਲਾਂ ਅਮਰੀਕਾ ਪਹੁੰਚਿਆ ਸੀ। ਏਜੰਟ ਨੇ ਕਿਹਾ ਸੀ, ਸਭ ਕੁਝ ਕਾਨੂੰਨੀ ਹੈ। ਪ੍ਰਦੀਪ ਕਹਿੰਦਾ ਸੀ- ਅਸੀਂ ਘਰ ਬਣਾਵਾਂਗੇ, ਵੱਡੀ ਕਾਰ ਲਵਾਂਗੇ। ਪਰ ਹੁਣ ਹਾਲਤ ਇਹ ਹੋ ਗਈ ਹੈ ਕਿ ਲੂਣ ਨਾਲ ਵੀ ਖਾਣਾ ਨਹੀਂ ਖਾ ਸਕਦੇ। ਇਹ ਪਤਾ ਨਹੀਂ ਲੱਗ ਰਿਹਾ ਕਿ ਪਰਿਵਾਰ ਕਰਜ਼ਾ ਕਿਵੇਂ ਮੋੜੇਗਾ। ਇਸਦੇ ਨਾਲ ਹੀ ਪਰਿਵਾਰ ਨੇ CM ਭਗਵੰਤ ਮਾਨ ਤੋਂ ਮਦਦ ਦੀ ਗੁਹਾਰ ਲਾਈ ਹੈ।

ਅਜਿਹਾ ਹੀ ਹਾਲ ਹੁਸ਼ਿਆਰਪੁਰ ਦੇ ਹਰਵਿੰਦਰ ਸਿੰਘ ਦਾ ਹੈ। ਜੋ ਪਿੰਡ ਵਿੱਚ ਖੇਤੀ ਕਰਦਾ ਸੀ। ਥੋੜ੍ਹੀ ਜ਼ਮੀਨ ਸੀ। ਦੋ ਭਰਾਵਾਂ ਦਾ ਪਰਿਵਾਰ ਉਸ ਦਾ ਸਹਾਰਾ ਸੀ। ਬੱਚੇ ਵੱਡੇ ਹੋ ਰਹੇ ਸੀ। ਖਰਚੇ ਵਧਦੇ ਜਾ ਰਹੇ ਸੀ। ਅਜਿਹੇ ‘ਚ ਹਰਵਿੰਦਰ ਨੇ ਅਮਰੀਕਾ ਜਾਣ ਲਈ ਡੰਕੀ ਦਾ ਰਸਤਾ ਚੁਣਿਆ। ਪਤਨੀ ਕੁਲਵਿੰਦਰ ਕੌਰ ਕਹਿੰਦੀ ਹੈ- 10 ਮਹੀਨੇ ਪਹਿਲਾਂ ਅਸੀਂ ਡੰਕੀ ਰਾਹੀਂ ਅਮਰੀਕਾ ਲਈ ਰਵਾਨਾ ਹੋਏ ਸੀ। 42 ਲੱਖ ਦਾ ਕਰਜ਼ਾ ਲਿਆ ਸੀ।

ਅਮਰੀਕਾ ਪਹੁੰਚਣ ਤੱਕ ਹਰ ਰੋਜ਼ ਫੋਨ ਕਰਦਾ ਸੀ। ਉਹ 15 ਜਨਵਰੀ ਤੋਂ ਸੰਪਰਕ ਵਿੱਚ ਨਹੀਂ ਸੀ। ਕਦੇ ਸੋਚਿਆ ਵੀ ਨਹੀਂ ਸੀ ਕਿ ਮੈਨੂੰ ਇਸ ਤਰ੍ਹਾਂ ਵਾਪਸ ਭੇਜ ਦਿੱਤਾ ਜਾਵੇਗਾ। ਏਜੰਟ ਹੁਣ ਫੋਨ ਨਹੀਂ ਚੁੱਕ ਰਹੇ। ਘਰ ਵਿੱਚ ਇੱਕ 12 ਸਾਲ ਦੀ ਬੇਟੀ ਅਤੇ 13 ਸਾਲ ਦਾ ਬੇਟਾ ਹੈ। ਅਸੀਂ ਹੁਣ ਕੀ ਕਰੀਏ?

ਗੁਰਦਾਸਪੁਰ ਦੇ ਫਤਿਹਗੜ੍ਹ ਚੂੜੀਆਂ ਦਾ ਜਸਪਾਲ ਸਿੰਘ 6 ਮਹੀਨੇ ਪਹਿਲਾਂ ਡੰਕੀ ਰੂਟ ਰਾਹੀਂ ਅਮਰੀਕਾ ਲਈ ਰਵਾਨਾ ਹੋਇਆ ਸੀ। ਉਹ 13 ਦਿਨ ਪਹਿਲਾਂ ਹੀ ਅਮਰੀਕਾ ਵਿੱਚ ਦਾਖ਼ਲ ਹੋਇਆ ਸੀ। ਪਰਿਵਾਰ ਨੇ ਉਸ ਨੂੰ ਅਮਰੀਕਾ ਲਿਜਾਣ ਲਈ ਲੱਖਾਂ ਰੁਪਏ ਖਰਚ ਕੀਤੇ। ਪਰ ਹੁਣ ਪਰਿਵਾਰ ‘ਤੇ ਮੁਸੀਬਤਾਂ ਦਾ ਪਹਾੜ ਆ ਗਿਆ। ਘਰ ਵਿੱਚ ਪਤਨੀ ਅਤੇ 2 ਛੋਟੇ ਬੱਚੇ ਹਨ। ਜਸਪਾਲ ਦੇ ਪਿਤਾ ਦਾ ਕੁਝ ਸਮਾਂ ਪਹਿਲਾਂ ਦਿਹਾਂਤ ਹੋ ਗਿਆ ਸੀ। ਬੇਟਾ ਸਹੀ-ਸਲਾਮਤ ਪਹੁੰਚ ਗਿਆ, ਪਰ ਹੁਣ ਅੱਗੇ ਕੀ ਹੋਵੇਗਾ ਇਸ ਦਾ ਕੋਈ ਜਵਾਬ ਨਹੀਂ ਹੈ।