Akshay-Katrina also took a bath in mahakumbh : ਮਹਾਕੁੰਭ ਦਾ ਅੱਜ 43ਵਾਂ ਦਿਨ ਹੈ, ਅਤੇ ਮੇਲਾ ਸਮਾਪਤ ਹੋਣ ਵਿੱਚ ਹੁਣ ਸਿਰਫ਼ 2 ਦਿਨ ਬਾਕੀ ਹਨ। ਦੁਪਹਿਰ 12 ਵਜੇ ਤੱਕ 74 ਲੱਖ ਤੋਂ ਵੱਧ ਸ਼ਰਧਾਲੂ ਗੰਗਾ-ਯਮੁਨਾ ਤੇ ਸਰਸਵਤੀ ਦੇ ਤ੍ਰਿਵੇਣੀ ਸੰਗਮ ’ਚ ਪਵਿੱਤਰ ਸਨਾਨ ਕਰ ਚੁੱਕੇ ਹਨ। 13 ਜਨਵਰੀ ਤੋਂ ਹੁਣ ਤੱਕ 62.80 ਕਰੋੜ ਲੋਕ ਇਥੇ ਡੁਬਕੀ ਲਾ ਚੁੱਕੇ ਹਨ।
ਬਾਲੀਵੁੱਡ ਸਿਤਾਰੇ ਵੀ ਪਹੁੰਚੇ ਮਹਾਕੁੰਭ
ਬਾਲੀਵੁੱਡ ਅਦਾਕਾਰ ਅਕਸ਼ੈ ਕੁਮਾਰ ਅਤੇ ਅਦਾਕਾਰਾ ਕੈਟਰੀਨਾ ਕੈਫ ਨੇ ਵੀ ਸੰਗਮ ’ਚ ਸਨਾਨ ਕੀਤਾ। ਦੋਵਾਂ ਨੇ ਪਰਮਾਰਥ ਨਿਕੇਤਨ ਸ਼ਿਵਿਰ ’ਚ ਸਵਾਮੀ ਚਿਦਾਨੰਦ ਸਰਸਵਤੀ ਅਤੇ ਸਾਧਵੀ ਭਗਵਤੀ ਸਰਸਵਤੀ ਤੋਂ ਆਸ਼ੀਰਵਾਦ ਲਿਆ।
ਟਰੈਫਿਕ ਅਤੇ ਪਾਰਕਿੰਗ ਬਣੀ ਮੁਸੀਬਤ
ਪ੍ਰਯਾਗਰਾਜ ’ਚ ਪ੍ਰਵੇਸ਼ ਦੇ ਮੁੱਖ ਬਿੰਦੂਆਂ ’ਤੇ ਵਾਹਨਾਂ ਦੀ ਭਾਰੀ ਭੀੜ ਕਾਰਨ ਜਾਮ ਲੱਗਿਆ ਹੋਇਆ ਹੈ। ਸੰਗਮ ਤੋਂ 10 ਕਿਮੀ ਪਹਿਲਾਂ ਵਾਹਨਾਂ ਨੂੰ ਪਾਰਕਿੰਗ ’ਚ ਰੋਕਿਆ ਜਾ ਰਿਹਾ ਹੈ, ਜਿਸ ਤੋਂ ਬਾਅਦ ਸ਼ਰਧਾਲੂ ਸ਼ਟਲ ਬੱਸ, ਈ-ਰਿਕਸ਼ਾ ਜਾਂ ਆਟੋ ਰਾਹੀਂ ਮੈਲਾ ਖੇਤਰ ਤੱਕ ਪਹੁੰਚ ਸਕਦੇ ਹਨ। ਪਰ, ਇਹ ਸਹੂਲਤਾਂ ਭੀੜ ਦੇ ਮੁਕਾਬਲੇ ਬਹੁਤ ਘੱਟ ਹਨ, ਜਿਸ ਕਾਰਨ ਕਈ ਲੋਕ 10 ਕਿਲੋਮੀਟਰ ਤੱਕ ਪੈਦਲ ਤੁਰਨ ਲਈ ਮਜਬੂਰ ਹਨ।
ਆਟੋ-ਰਿਕਸ਼ਾ ਚਾਲਕ 10 ਕਿਲੋਮੀਟਰ ਦੀ ਸਵਾਰੀ ਲਈ 1000 ਰੁਪਏ ਤੱਕ ਵਸੂਲ ਰਹੇ ਹਨ, ਜਿਸ ਕਰਕੇ ਸ਼ਰਧਾਲੂਆਂ ਵਿੱਚ ਨਾਰਾਜ਼ਗੀ ਹੈ।
ਮਹਾਂ ਸ਼ਿਵਰਾਤਰੀ ’ਤੇ ਸ਼ੋਭਾ-ਯਾਤਰਾ ਰੱਦ
ਮਹਾਂਸ਼ਿਵਰਾਤਰੀ ਮੌਕੇ ਪ੍ਰਯਾਗਰਾਜ ਸ਼ਹਿਰ ’ਚ 16 ਕਿਮੀ ਲੰਬੀ ਸ਼ੋਭਾ-ਯਾਤਰਾ ਕੱਢੀ ਜਾਂਦੀ ਸੀ, ਪਰ ਜਾਮ ਦੀ ਗੰਭੀਰ ਸਥਿਤੀ ਨੂੰ ਵੇਖਦੇ ਹੋਏ ਪੁਲਿਸ ਨੇ ਆਯੋਜਕ ਕਮੇਟੀ ਨਾਲ ਗੱਲਬਾਤ ਕਰਕੇ ਇਸਨੂੰ ਰੱਦ ਕਰਵਾ ਦਿੱਤਾ ਹੈ।
10ਵੀਂ-12ਵੀਂ ਦੀਆਂ ਪ੍ਰੀਖਿਆਵਾਂ 9 ਮਾਰਚ ਨੂੰ ਹੋਣਗੀਆਂ
ਸ਼ਹਿਰ ’ਚ ਭਾਰੀ ਭੀੜ ਅਤੇ ਯਾਤਰਾ ਦੀ ਸਥਿਤੀ ਨੂੰ ਦੇਖਦੇ ਹੋਏ ਪ੍ਰਸ਼ਾਸਨ ਨੇ 24 ਫਰਵਰੀ ਨੂੰ ਹੋਣ ਵਾਲੀਆਂ 10ਵੀਂ ਅਤੇ 12ਵੀਂ ਬੋਰਡ ਦੀਆਂ ਪ੍ਰੀਖਿਆਵਾਂ ਮੁਲਤਵੀ ਕਰ ਦਿੱਤੀਆਂ ਹਨ। ਹੁਣ ਇਹ ਪ੍ਰੀਖਿਆਵਾਂ 9 ਮਾਰਚ ਨੂੰ ਕਰਵਾਈਆਂ ਜਾਣਗੀਆਂ।
