CBSE ਨੇ ਦਿੱਤਾ ਸਪੱਸ਼ਟੀਕਰਨ, 2025-26 ‘ਚ ਪੰਜਾਬੀ ਭਾਸ਼ਾ ਸ਼ਾਮਲ ਹੋਵੇਗੀ
CBSE gives clarification : CBSE ਦੇ ਬੋਰਡ ਪ੍ਰੀਖਿਆਵਾਂ ਵਿੱਚੋਂ ਪੰਜਾਬੀ ਭਾਸ਼ਾ ਨੂੰ ਹਟਾਉਣ ਦੇ ਸੰਭਾਵਿਤ ਫੈਸਲੇ ਨੂੰ ਲੈ ਕੇ ਚੱਲ ਰਹੇ ਵਿਰੋਧ ‘ਤੇ ਹੁਣ ਕੇਂਦਰੀ ਸੈਕੰਡਰੀ ਸਿੱਖਿਆ ਬੋਰਡ ਨੇ ਸਪੱਸ਼ਟੀਕਰਨ ਜਾਰੀ ਕੀਤਾ ਹੈ। CBSE ਨੇ ਸਾਫ਼ ਕੀਤਾ ਹੈ ਕਿ 2025-26 ਦੀ ਨਵੀਂ ਪ੍ਰੀਖਿਆ ਯੋਜਨਾ ਵਿੱਚ ਪੰਜਾਬੀ ਭਾਸ਼ਾ ਸ਼ਾਮਲ ਰਹੇਗੀ।
CBSE ਅਧਿਕਾਰੀਆਂ ਦਾ ਬਿਆਨ
CBSE ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ, “ਅੱਜ ਪੇਸ਼ ਕੀਤੀ ਗਈ ਵਿਸ਼ਿਆਂ ਦੀ ਸੂਚੀ ਸੰਕੇਤਕ ਹੈ। ਇਸ ਵਿੱਚ ਕੋਈ ਹਟਾਉਣ ਜਾਂ ਬਦਲਾਅ ਨਹੀਂ ਕੀਤਾ ਗਿਆ। 2025-26 ਦੀ ਦੋ-ਪਰੀਖਿਆ ਯੋਜਨਾ ਤਹਿਤ ਪੰਜਾਬੀ ਭਾਸ਼ਾ ਇੱਕ ਖੇਤਰੀ ਅਤੇ ਵਿਦੇਸ਼ੀ ਭਾਸ਼ਾ ਵਜੋਂ ਸ਼ਾਮਲ ਹੋਵੇਗੀ।”
ਪੰਜਾਬ ‘ਚ ਉੱਠਿਆ ਵਿਰੋਧ
CBSE ਦੀ ਡਰਾਫਟ ਯੋਜਨਾ ਵਿੱਚੋਂ ਪੰਜਾਬੀ ਨੂੰ ਕਥਿਤ ਤੌਰ ‘ਤੇ ਹਟਾਉਣ ਦੇ ਮਾਮਲੇ ‘ਤੇ ਪੰਜਾਬ ‘ਚ ਵੱਡਾ ਵਿਰੋਧ ਹੋਇਆ। ਪੰਜਾਬ ਦੇ ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਨੇ CBSE ਦੇ ਇਸ ਫੈਸਲੇ ਦੀ ਸਖ਼ਤ ਨਿੰਦਾ ਕਰਦੇ ਹੋਏ ਕਿਹਾ, “ਅਸੀਂ ਪੰਜਾਬੀ ਭਾਸ਼ਾ ਨੂੰ ਹਟਾਉਣ ਦੀ ਕੋਸ਼ਿਸ਼ ਨੂੰ ਕਦੇ ਵੀ ਬਰਦਾਸ਼ਤ ਨਹੀਂ ਕਰਾਂਗੇ। ਪੰਜਾਬੀ ਸਿਰਫ ਪੰਜਾਬ ਦੀ ਨਹੀਂ, ਬਲਕਿ ਕਈ ਹੋਰ ਰਾਜਾਂ ਅਤੇ ਵਿਦੇਸ਼ਾਂ ਵਿੱਚ ਵੀ ਪੜ੍ਹੀ ਜਾਂਦੀ ਹੈ।”
ਸਿਆਸੀ ਗਰਮਾਹਟ, ਵੱਡੇ ਨੇਤਾਵਾਂ ਨੇ CBSE ਨੂੰ ਘੇਰਿਆ
ਸ਼੍ਰੋਮਣੀ ਅਕਾਲੀ ਦਲ ਨੇ ਵੀ CBSE ਦੇ ਖ਼ਿਲਾਫ਼ ਮੋਰਚਾ ਖੋਲ੍ਹ ਦਿੱਤਾ। ਸੁਖਬੀਰ ਬਾਦਲ ਨੇ ਕਿਹਾ, “CBSE ਵੱਲੋਂ ਪੰਜਾਬੀ ਨੂੰ ਹਟਾਉਣ ਦਾ ਕੋਈ ਵੀ ਫੈਸਲਾ ਕਦੇ ਵੀ ਸਵੀਕਾਰਯੋਗ ਨਹੀਂ ਹੋ ਸਕਦਾ। ਅਸੀਂ ਤੁਰੰਤ ਇਸਦੀ ਬਹਾਲੀ ਦੀ ਮੰਗ ਕਰਦੇ ਹਾਂ।”
ਇਸੇ ਦੌਰਾਨ, ਮੁੱਖ ਮੰਤਰੀ ਭਗਵੰਤ ਮਾਨ ‘ਤੇ ਵੀ ਵਿਰੋਧੀ ਧਿਰ ਵੱਲੋਂ ਉੰਗਲੀਆਂ ਚੁੱਕੀਆਂ ਗਈਆਂ। ਅਕਾਲੀ ਦਲ ਨੇ ਤੰਜ ਕੱਸਦੇ ਹੋਏ ਕਿਹਾ, “ਤੁਸੀਂ ਪੰਜਾਬ ਦੇ ਹੱਕਾਂ ਲਈ ਕਦੋਂ ਆਵਾਜ਼ ਉਠਾਉਗੇ? ਤੇਲੰਗਾਨਾ ਸਰਕਾਰ ਦੀ ਤਰ੍ਹਾਂ ਤੁਸੀਂ ਵੀ CBSE ਸਕੂਲਾਂ ਵਿੱਚ ਪੰਜਾਬੀ ਨੂੰ ਲਾਜ਼ਮੀ ਕਰਦੇ?”
CBSE ਨੇ ਦਿੱਤਾ ਭਰੋਸਾ, ਪੰਜਾਬੀ ਭਾਸ਼ਾ ਰਹੇਗੀ ਜਾਰੀ
ਹੁਣ CBSE ਨੇ ਸਪੱਸ਼ਟੀਕਰਨ ਦਿੰਦਿਆਂ ਕਿਹਾ ਹੈ ਕਿ 2025-26 ਦੀ ਨਵੀਂ ਯੋਜਨਾ ‘ਚ ਪੰਜਾਬੀ ਨੂੰ ਸ਼ਾਮਲ ਕੀਤਾ ਜਾਵੇਗਾ। ਹਾਲਾਂਕਿ, ਇਹ ਮਾਮਲਾ ਹੁਣ ਵੀ ਸਿਆਸੀ ਅਤੇ ਲੋਕ ਭਾਵਨਾਵਾਂ ਨਾਲ ਜੁੜਿਆ ਹੋਇਆ ਹੈ। ਪੰਜਾਬੀ ਭਾਸ਼ਾ ਦੀ ਮਹੱਤਤਾ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਲੋਕਾਂ ਦੀ ਨਿਗਾਹ ਹੁਣ CBSE ਦੇ ਅਗਲੇ ਕਦਮ ‘ਤੇ ਟਿਕੀ ਹੋਈ ਹੈ ।
