ਹਰਿਆਣਾ ’ਚ 12ਵੀਂ ਬੋਰਡ ਇਮਤਿਹਾਨ: ਨੂਹ ਅਤੇ ਪੁਨਹਾਨਾ ’ਚ ਪਹਲੇ ਦਿਨ ਹੀ ਪੇਪਰ ਲੀਕ
Haryana Papers leake : ਹਰਿਆਣਾ ’ਚ ਅੱਜ (27 ਫਰਵਰੀ) ਤੋਂ 12ਵੀਂ ਬੋਰਡ ਦੀ ਪ੍ਰੀਖਿਆ ਸ਼ੁਰੂ ਹੋਈ, ਪਰ ਪਹਿਲੇ ਹੀ ਦਿਨ ਨੂਹ ਅਤੇ ਪੁਨਹਾਨਾ ’ਚ ਇੰਗਲਿਸ਼ ਦਾ ਪੇਪਰ ਲੀਕ ਹੋਣ ਦੀ ਖ਼ਬਰ ਸਾਹਮਣੇ ਆਈ। ਨੂਹ ’ਚ ਇਮਤਿਹਾਨ ਸ਼ੁਰੂ ਹੋਣ ਦੇ ਅੱਧੇ ਘੰਟੇ ਵਿੱਚ ਹੀ ਪ੍ਰਸ਼ਨ-ਪੱਤਰ ਬਾਹਰ ਆ ਗਿਆ।
ਇੱਕ ਵੀਡੀਓ ਵੀ ਵਾਇਰਲ ਹੋ ਰਹੀ ਹੈ, ਜਿਸ ’ਚ ਸਪੱਸ਼ਟ ਦਿਖ ਰਿਹਾ ਹੈ ਕਿ ਕਿਸੇ ਵਿਅਕਤੀ ਨੇ ਸੈਂਟਰ ਦੇ ਅੰਦਰੋਂ ਪੇਪਰ ਬਾਹਰ ਸੁੱਟਿਆ, ਫਿਰ ਬਾਹਰ ਖੜ੍ਹੇ ਵਿਅਕਤੀ ਨੇ ਉਸ ਦੀ ਤਸਵੀਰ ਕੈਪਚਰ ਕਰਕੇ ਹੋਰ ਵਾਇਰਲ ਕਰ ਦਿੱਤੀ। ਇਸ ਨਾਲ ਨਕਲ ਕਰਨ ਵਾਲਿਆਂ ਨੂੰ ਵੱਡੀ ਸਹੂਲਤ ਮਿਲੀ।
ਪੁਨਹਾਨਾ ’ਚ ਵੀ ਇਮਤਿਹਾਨ ਕੇਂਦਰਾਂ ਬਾਹਰ ਵਿਦਿਆਰਥੀਆਂ ਦੇ ਰਿਸ਼ਤੇਦਾਰਾਂ ਦੀ ਭੀੜ ਦੇਖਣ ਨੂੰ ਮਿਲੀ। ਪੁਨਹਾਨਾ ਦੇ ਮੌਡਰਨ ਸਕੂਲ ਅਤੇ ਗਰਲਜ਼ ਸਕੂਲ ਸਣੇ ਨੂਹ ਦੇ ਹੋਰ ਸਕੂਲਾਂ ’ਚ ਵੀ ਲੋਕਾਂ ਨੇ ਨਕਲ ਕਰਵਾਉਣ ਲਈ ਹਰ ਹਦ ਪਾਰ ਕਰ ਦਿੱਤੀ। ਪੁਲਿਸ ਨੇ ਕੁਝ ਥਾਵਾਂ ’ਤੇ ਨਕਲਚੀਆਂ ਨੂੰ ਭਗਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਬਹੁਤੇ ਕੇਂਦਰਾਂ ’ਚ ਨਕਲ ਆਮ ਦਿੱਖੀ।
ਨਕਲ ਕਰਵਾਉਣ ਲਈ ਲੋਕ ਇਮਤਿਹਾਨ ਕੇਂਦਰਾਂ ਦੀਆਂ ਕੰਧਾਂ ’ਤੇ ਚੜ੍ਹ ਗਏ। ਇਹ ਸਭ ਦੱਸਦਾ ਹੈ ਕਿ ਪ੍ਰਸ਼ਾਸਨ ਵੱਲੋਂ ਸੁਰੱਖਿਆ ਦੇ ਪੱਕੇ ਪ੍ਰਬੰਧ ਨਹੀਂ ਕੀਤੇ ਗਏ ਸਨ। ਪੇਪਰ ਦੁਪਹਿਰ 12:30 ਵਜੇ ਸ਼ੁਰੂ ਹੋਇਆ ਸੀ ਅਤੇ 3:30 ਵਜੇ ਤੱਕ ਚਲਿਆ।
