ਵਿਧਾਇਕ ਮੋਹਿੰਦਰ ਭਗਤ ਦੇ ਭਤੀਜੇ ਦੀ IPL ‘ਚ ਹੋਈ ਐਂਟਰੀ, ਮੁੰਬਈ ਇੰਡੀਅਨਜ਼ ਵੱਲੋ ਖੇਡਣਗੇ ਮੈਚ
ਇੰਡੀਅਨ ਪ੍ਰੀਮੀਅਰ ਲੀਗ 2026 ਦੇ ਵਿਚਕਾਰ ਜਲੰਧਰ ਦੇ ਕ੍ਰਿਕਟ ਪ੍ਰੇਮੀਆਂ ਲਈ ਇੱਕ ਬਹੁਤ ਹੀ ਖੁਸ਼ੀ ਦੀ ਖ਼ਬਰ ਸਾਹਮਣੇ ਆਈ ਹੈ। ਜਲੰਧਰ ਦੇ ਉਭਰਦੇ ਹੋਏ ਤੇਜ਼ ਗੇਂਦਬਾਜ਼ ਕ੍ਰਿਸ਼ ਭਗਤ ਜੋ ਵਿਧਾਇਕ ਮੋਹਿੰਦਰ ਭਗਤ ਦੇ ਭਤੀਜੇ ਹਨ ਦੀ ਆਈਪੀਐਲ ਦੀ ਸਭ ਤੋਂ ਸਫਲ ਟੀਮਾਂ ਵਿੱਚੋਂ ਇੱਕ, ਮੁੰਬਈ ਇੰਡੀਅਨਜ਼ ਵਿੱਚ ਚੋਣ ਹੋ ਗਈ ਹੈ। ਪੰਜ ਵਾਰ ਦੀ ਚੈਂਪੀਅਨ ਰਹਿ ਚੁੱਕੀ ਮੁੰਬਈ ਇੰਡੀਅਨਜ਼ ਨੇ ਆਪਣੇ ਅਧਿਕਾਰਤ ਸੋਸ਼ਲ ਮੀਡੀਆ ਹੈਂਡਲ ਰਾਹੀਂ ਟੀਮ ਵਿੱਚ ਕੀਤੇ ਗਏ ਇਸ ਅਹਿਮ ਬਦਲਾਅ ਦੀ ਜਾਣਕਾਰੀ ਸਾਂਝੀ ਕੀਤੀ ਹੈ। ਦਰਅਸਲ, ਟੀਮ ਦੇ ਸਪਿਨ ਆਲਰਾਊਂਡਰ ਅਥਰਵ ਅੰਕੋਲੇਕਰ ਸੱਟ ਲੱਗਣ ਕਾਰਨ ਟੂਰਨਾਮੈਂਟ ਤੋਂ ਬਾਹਰ ਹੋ ਗਏ ਹਨ ਅਤੇ ਉਨ੍ਹਾਂ ਦੀ ਥਾਂ ‘ਤੇ ਹੁਣ ਕ੍ਰਿਸ਼ ਭਗਤ ਮੁੰਬਈ ਦੀ ਜਰਸੀ ਵਿੱਚ ਨਜ਼ਰ ਆਉਣਗੇ।
30 ਲੱਖ ਰੁਪਏ ਦੇ ਬੇਸ ਪ੍ਰਾਈਸ ‘ਤੇ ਹੋਇਆ ਕਰਾਰ
ਆਈਪੀਐਲ ਵੱਲੋਂ ਜਾਰੀ ਕੀਤੇ ਗਏ ਅਧਿਕਾਰਤ ਬਿਆਨ ਮੁਤਾਬਕ, 21 ਸਾਲਾ ਕ੍ਰਿਸ਼ ਭਗਤ ਨੂੰ ਉਨ੍ਹਾਂ ਦੇ 30 ਲੱਖ ਰੁਪਏ ਦੇ ਬੇਸ ਪ੍ਰਾਈਸ (ਅਧਾਰ ਮੁੱਲ) ‘ਤੇ ਟੀਮ ਨਾਲ ਜੋੜਿਆ ਗਿਆ ਹੈ। ਸੱਜੇ ਹੱਥ ਦੇ ਮੱਧਮ ਤੇਜ਼ ਗੇਂਦਬਾਜ਼ ਕ੍ਰਿਸ਼ ਭਗਤ ਨੇ ਪੰਜਾਬ ਲਈ ਘਰੇਲੂ ਕ੍ਰਿਕਟ ਵਿੱਚ ਲਗਾਤਾਰ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। ਉਨ੍ਹਾਂ ਦੇ ਹੁਣ ਤੱਕ ਦੇ ਕਰੀਅਰ ਦੀ ਗੱਲ ਕਰੀਏ ਤਾਂ ਉਹ 7 ਫਰਸਟ ਕਲਾਸ (ਪ੍ਰਥਮ ਸ਼੍ਰੇਣੀ) ਅਤੇ 9 ਲਿਸਟ-ਏ ਮੁਕਾਬਲੇ ਖੇਡ ਚੁੱਕੇ ਹਨ, ਜਿੱਥੇ ਉਨ੍ਹਾਂ ਨੇ ਆਪਣੀ ਗੇਂਦਬਾਜ਼ੀ ਨਾਲ ਸਾਰਿਆਂ ਨੂੰ ਪ੍ਰਭਾਵਿਤ ਕੀਤਾ ਹੈ।
ਟਰਾਇਲ ਦੌਰਾਨ ਪ੍ਰਦਰਸ਼ਨ ਨੇ ਦਿਵਾਈ ਟੀਮ ਵਿੱਚ ਜਗ੍ਹਾ
ਕ੍ਰਿਸ਼ ਭਗਤ ਪਿਛਲੇ ਦੋ ਸਾਲਾਂ ਤੋਂ ਮੁੰਬਈ ਇੰਡੀਅਨਜ਼ ਦੀ ਤਲਾਸ਼ੀ ਸੂਚੀ (ਰਾਡਾਰ) ‘ਤੇ ਸਨ। ਉਹ ਲਗਾਤਾਰ ਟੀਮ ਦੇ ਟਰਾਇਲ ਕੈਂਪਾਂ ਵਿੱਚ ਸ਼ਾਮਲ ਹੁੰਦੇ ਰਹੇ ਹਨ। ਸਾਲ 2026 ਦੇ ਡੀਵਾਈ ਪਾਟਿਲ ਟੀ-20 ਕੱਪ ਵਿੱਚ ਉਨ੍ਹਾਂ ਨੇ ਰਿਲਾਇੰਸ ਦੀ ਟੀਮ ਵੱਲੋਂ ਖੇਡਦਿਆਂ ਬੇਹੱਦ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨ ਕੀਤਾ ਸੀ, ਜਿਸ ਤੋਂ ਬਾਅਦ ਉਨ੍ਹਾਂ ਦਾ ਰਸਤਾ ਸਾਫ਼ ਹੋ ਗਿਆ। ਇੰਨਾ ਹੀ ਨਹੀਂ, ਉਹ ਪ੍ਰੀ-ਸੀਜ਼ਨ ਦੌਰਾਨ ਵੀ ਇੱਕ ਸਪੋਰਟ ਬੌਲਰ (ਨੈੱਟ ਬੌਲਰ) ਵਜੋਂ ਟੀਮ ਦੇ ਨਾਲ ਜੁੜੇ ਹੋਏ ਸਨ। ਅਥਰਵ ਅੰਕੋਲੇਕਰ ਦੀ ਸੱਟ ਨੇ ਕ੍ਰਿਸ਼ ਲਈ ਮੌਕੇ ਦਾ ਬੂਹਾ ਖੋਲ੍ਹ ਦਿੱਤਾ ਹੈ।
