ਚੰਡੀਗੜ੍ਹ PGI ‘ਚ ਹੋਵੇਗੀ CAR-T ਸੈੱਲ ਥੈਰੇਪੀ ਰਿਸਰਚ: IISc ਨਾਲ ਸਮਝੌਤਾ, ਮੈਡੀਕਲ ਖੋਜ ‘ਚ ਹੋਵੇਗਾ ਵੱਡਾ ਬਦਲਾਅ, ਦੇਸ਼ ਦਾ ਇਕਲੌਤਾ ਹਸਪਤਾਲ ਬਣਿਆ

CAR-T cell therapy research will be done in PGI: ਚੰਡੀਗੜ੍ਹ ਪੀਜੀਆਈ (ਪੋਸਟ ਗ੍ਰੈਜੂਏਟ ਇੰਸਟੀਚਿਊਟ ਆਫ਼ ਮੈਡੀਕਲ ਐਜੂਕੇਸ਼ਨ ਐਂਡ ਰਿਸਰਚ) ਅਤੇ ਬੈਂਗਲੁਰੂ ਦੇ ਆਈਆਈਐਸਸੀ (ਇੰਡੀਅਨ ਇੰਸਟੀਚਿਊਟ ਆਫ਼ ਸਾਇੰਸ) ਨੇ ਮੈਡੀਕਲ ਖੋਜ ਨੂੰ ਅੱਗੇ ਵਧਾਉਣ ਲਈ ਇੱਕ ਵੱਡਾ ਸਮਝੌਤਾ ਕੀਤਾ ਹੈ। ਹੁਣ CAR-T ਸੈੱਲ ਥੈਰੇਪੀ ਦੀ ਖੋਜ ਪੀਜੀਆਈ ਵਿੱਚ ਕੀਤੀ ਜਾਵੇਗੀ।

ਇਸ਼ਤਿਹਾਰ

ਇਸ ਸਾਂਝੇਦਾਰੀ ਦਾ ਮਕਸਦ ਨਵੀਂ ਤਕਨੀਕ ਅਤੇ ਵਿਗਿਆਨਕ ਖੋਜਾਂ ਰਾਹੀਂ ਬਿਮਾਰੀਆਂ ਦਾ ਬਿਹਤਰ ਇਲਾਜ ਲੱਭਣਾ ਹੈ। ਪੀਜੀਆਈ ਦੇ ਡਾਇਰੈਕਟਰ ਪ੍ਰੋ. ਵਿਵੇਕ ਲਾਲ ਅਤੇ ਆਈਆਈਐਸਸੀ ਦੇ ਪ੍ਰੋ. ਸੁੰਦਰ ਸਵਾਮੀਨਾਥਨ ਨੇ ਇਸ ਸਮਝੌਤੇ ‘ਤੇ ਦਸਤਖਤ ਕੀਤੇ।

ਮਰੀਜ਼ਾਂ ਨੂੰ ਫਾਇਦਾ ਹੋਵੇਗਾ

ਇਸ ਸਮਝੌਤੇ ਨਾਲ ਮੈਡੀਕਲ ਤਕਨੀਕ, ਨਵੀਆਂ ਦਵਾਈਆਂ ਅਤੇ ਇਲਾਜ ਦੇ ਨਵੇਂ ਤਰੀਕੇ ਵਿਕਸਿਤ ਕੀਤੇ ਜਾਣਗੇ। ਨਾਲ ਹੀ, ਡਾਕਟਰਾਂ ਅਤੇ ਵਿਗਿਆਨੀਆਂ ਨੂੰ ਸਿਖਲਾਈ ਅਤੇ ਖੋਜ ਦੇ ਨਵੇਂ ਮੌਕੇ ਮਿਲਣਗੇ।

ਪ੍ਰੋ. ਵਿਵੇਕ ਲਾਲ ਨੇ ਕਿਹਾ, “ਪੀਜੀਆਈਐਮਈਆਰ ਦੇਸ਼ ਦਾ ਇਕਲੌਤਾ ਸਰਕਾਰੀ ਹਸਪਤਾਲ ਹੈ ਜਿਸ ਨੂੰ ਸੀਏਆਰ-ਟੀ ਸੈੱਲ ਥੈਰੇਪੀ ਖੋਜ ਲਈ ਚੁਣਿਆ ਗਿਆ ਹੈ। ਇਹ ਨਵੀਂ ਤਕਨੀਕ ਕੈਂਸਰ ਦੇ ਇਲਾਜ ਵਿੱਚ ਕ੍ਰਾਂਤੀਕਾਰੀ ਬਦਲਾਅ ਲਿਆ ਸਕਦੀ ਹੈ। ਪੀਜੀਆਈਐਮਈਆਰ ਟਾਟਾ ਮੈਮੋਰੀਅਲ ਹਸਪਤਾਲ ਦੇ ਸਹਿਯੋਗ ਨਾਲ ਇਸ ਖੋਜ ਨੂੰ ਅੱਗੇ ਵਧਾਏਗਾ।

ਭਾਰਤ ਨੂੰ ਖੋਜ ਵਿੱਚ ਅੱਗੇ ਵਧਾਉਣ ਦੀ ਪਹਿਲਕਦਮੀ

ਪੀਜੀਆਈ ਅਤੇ ਆਈਆਈਐਸਸੀ ਦੇ ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਕੋਈ ਵੀ ਸੰਸਥਾ ਇਕੱਲੀ ਵੱਡੀ ਤਬਦੀਲੀ ਨਹੀਂ ਲਿਆ ਸਕਦੀ। ਇਹ ਸਹਿਯੋਗ ਦੇਸ਼ ਨੂੰ ਮੈਡੀਕਲ ਖੋਜ ਵਿੱਚ ਅੱਗੇ ਵਧਣ ਵਿੱਚ ਮਦਦ ਕਰੇਗਾ।

ਇਸ ਸਮਝੌਤੇ ਦੇ ਤਹਿਤ, ਇੱਕ ਨਵਾਂ ਟਾਟਾ ਆਈਆਈਐਸਸੀ ਮੈਡੀਕਲ ਸਕੂਲ ਵੀ ਛੇਤੀ ਹੀ ਸ਼ੁਰੂ ਹੋਵੇਗਾ, ਜਿੱਥੇ ਡਾਕਟਰਾਂ ਅਤੇ ਵਿਗਿਆਨੀਆਂ ਲਈ ਐਮਡੀ-ਪੀਐਚਡੀ, ਡੀਐਮ-ਪੀਐਚਡੀ ਅਤੇ ਐਮਸੀਐਚ-ਪੀਐਚਡੀ ਵਰਗੇ ਕੋਰਸ ਹੋਣਗੇ। ਇਸ ਨਾਲ ਮੈਡੀਕਲ ਖੇਤਰ ਵਿੱਚ ਨਵੀਆਂ ਕਾਢਾਂ ਅਤੇ ਖੋਜਾਂ ਨੂੰ ਉਤਸ਼ਾਹਿਤ ਕੀਤਾ ਜਾਵੇਗਾ।