ਗੁਰੂਗ੍ਰਾਮ ‘ਚ ਦਰਜ FIR ‘ਚ ਸਨਸਨੀਖੇਜ਼ ਖ਼ੁਲਾਸੇ, ਪੰਜਾਬ ਪੁਲਿਸ ਦੇ ‘ਵੱਡੇ ਸਾਹਿਬ’ ‘ਤੇ ਫ਼ਰਜ਼ੀ AI ਰਿਪੋਰਟ ਬਣਾਉਣ ਲਈ ਧਮਕਾਉਣ ਦੇ ਆਰੋਪ

ਗੁਰੂਗ੍ਰਾਮ: ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨਾਲ ਜੁੜੇ ਇੱਕ ਵਿਵਾਦਿਤ ਵੀਡੀਓ ਦੀ ਫ਼ਰਜ਼ੀ ਫੋਰੈਂਸਿਕ ਰਿਪੋਰਟ ਤਿਆਰ ਕਰਨ ਦੇ ਮਾਮਲੇ ਵਿੱਚ ਗੁਰੂਗ੍ਰਾਮ ਦੇ ਥਾਣਾ ਡੀ.ਐਲ.ਐਫ. (DLF Phase-29) ਵਿਖੇ ਦਰਜ ਹੋਈ ਐਫ.ਆਈ.ਆਰ. (FIR No. 0263) ਵਿੱਚ ਬੇਹੱਦ ਸਨਸਨੀਖੇਜ਼ ਅਤੇ ਵੱਡੇ ਖ਼ੁਲਾਸੇ ਹੋਏ ਹਨ। ਇਹ ਮਾਮਲਾ ਕਿਸੇ ਆਮ ਧੋਖਾਧੜੀ ਦਾ ਨਹੀਂ, ਬਲਕਿ ਪੰਜਾਬ ਪੁਲਿਸ ਅਤੇ ਸਰਕਾਰ ਦੇ ਉੱਚ ਅਧਿਕਾਰੀਆਂ ਦੀ ਕਥਿਤ ਮਿਲੀਭੁਗਤ ਨਾਲ ਰਚੀ ਗਈ ਇੱਕ ਵੱਡੀ ਸਾਜ਼ਿਸ਼ ਵੱਲ ਇਸ਼ਾਰਾ ਕਰਦਾ ਹੈ।

ਸ਼ਿਕਾਇਤਕਰਤਾ ਜਸਪ੍ਰੀਤ ਸਿੰਘ ਉਰਫ਼ ਜੱਸੀ (ਵਾਸੀ ਸਿਰਸਾ, ਹਰਿਆਣਾ) ਦੀ ਸ਼ਿਕਾਇਤ ‘ਤੇ ਗੁਰੂਗ੍ਰਾਮ ਪੁਲਿਸ ਨੇ ਅੰਕਿਤ (ਵਾਸੀ ਜੀਂਦ) ਅਤੇ ਅਰੁਣ ਮਹਿੰਦਰੂ (ਵਾਸੀ ਸਿਰਸਾ) ਖ਼ਿਲਾਫ਼ ਭਾਰਤੀ ਧਾਰਾ 318(2), 319, 336(2), 336(3), 340, 111(2)(a) BNS ਅਤੇ ਆਈ.ਟੀ. ਐਕਟ ਦੀਆਂ ਧਾਰਾਵਾਂ 65, 66(D) ਤਹਿਤ ਮੁਕੱਦਮਾ ਦਰਜ ਕਰਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।

ਗੁਰੂਗ੍ਰਾਮ ਦੇ ਹੋਟਲ ‘ਚ ਪੰਜਾਬ ਪੁਲਿਸ ਦੇ ‘ਵੱਡੇ ਸਾਹਿਬ’ ਨਾਲ ਹੋਈ ਸੀ ਮੀਟਿੰਗ

ਐਫ.ਆਈ.ਆਰ. ਵਿੱਚ ਦਰਜ ਸ਼ਿਕਾਇਤ ਮੁਤਾਬਕ, 15 ਜੂਨ 2026 ਨੂੰ ਰਾਤ ਲਗਭਗ 10:00 ਵਜੇ ਸ਼ਿਕਾਇਤਕਰਤਾ ਜਸਪ੍ਰੀਤ ਸਿੰਘ ਨੂੰ ਗੁਰੂਗ੍ਰਾਮ ਦੇ ਪ੍ਰਸਿੱਧ ‘ਹੋਟਲ ਕਰਾਊਨ ਪਲਾਜ਼ਾ’ (Crown Plaza, Near IFFCO Chowk) ਵਿਖੇ ਇੱਕ ਬੈਠਕ ਲਈ ਬੁਲਾਇਆ ਗਿਆ ਸੀ। ਇਸ ਬੈਠਕ ਵਿੱਚ ਇੱਕ ਵਿਅਕਤੀ ਮੌਜੂਦ ਸੀ ਜਿਸ ਨੇ ਖ਼ੁਦ ਨੂੰ ਪੰਜਾਬ ਸਰਕਾਰ ਦਾ ਸੀਨੀਅਰ ਅਧਿਕਾਰੀ ਦੱਸਿਆ। ਉਸ ਦੇ ਨਾਲ ਇੱਕ ਹੋਰ ਬਹੁਤ ਹੀ ਉੱਚ ਅਧਿਕਾਰੀ ਮੌਜੂਦ ਸੀ, ਜਿਸ ਨੂੰ ਉੱਥੇ ਹਾਜ਼ਰ ਲੋਕ ਬਾਰ-ਬਾਰ “ਵੱਡੇ ਸਾਹਿਬ” ਕਹਿ ਕੇ ਸੰਬੋਧਨ ਕਰ ਰਹੇ ਸਨ।

ਇਸ ਮੀਟਿੰਗ ਦੌਰਾਨ ਜਸਪ੍ਰੀਤ ਨੂੰ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੇ ਪੰਜਾਬ ਦੇ ਮੁੱਖ ਮੰਤਰੀ ਨਾਲ ਸਬੰਧਤ ਇੱਕ ਵਿਵਾਦਿਤ ਵੀਡੀਓ ਦਿਖਾਇਆ ਗਿਆ। ਅਧਿਕਾਰੀਆਂ ਨੇ ਜਸਪ੍ਰੀਤ ‘ਤੇ ਦਬਾਅ ਪਾਇਆ ਕਿ ਉਹ ਇਸ ਵੀਡੀਓ ਦੀ ਇੱਕ ਅਜਿਹੀ ਫੋਰੈਂਸਿਕ ਰਿਪੋਰਟ ਤਿਆਰ ਕਰਕੇ ਦੇਵੇ, ਜਿਸ ਵਿੱਚ ਇਹ ਸਾਬਿਤ ਕੀਤਾ ਜਾ ਸਕੇ ਕਿ ਵੀਡੀਓ ਵਿੱਚ ਦਿਖਾਈ ਦੇ ਰਿਹਾ ਵਿਅਕਤੀ ਪੰਜਾਬ ਦਾ ਮੁੱਖ ਮੰਤਰੀ ਨਹੀਂ ਹੈ, ਬਲਕਿ ਇਹ ਵੀਡੀਓ Artificial Intelligence (AI) ਯਾਨੀ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਰਾਹੀਂ ਤਿਆਰ ਕੀਤਾ ਗਿਆ ਇੱਕ ਫ਼ਰਜ਼ੀ (Manipulated) ਵੀਡੀਓ ਹੈ।

ਜਸਪ੍ਰੀਤ ਨੇ ਨਾਂਹ ਕੀਤੀ ਤਾਂ ਦਿੱਤੀ ਜਾਨੋਂ ਮਾਰਨ ਦੀ ਧਮਕੀ, ਗੱਡੀ ‘ਚ ਰੱਖੇ 10 ਲੱਖ ਰੁਪਏ

ਜਸਪ੍ਰੀਤ, ਜੋ ਕਿ ਫੋਰੈਂਸਿਕ ਅਤੇ ਸਾਈਬਰ ਸੁਰੱਖਿਆ ਦੇ ਖੇਤਰ ਵਿੱਚ ਕੰਮ ਕਰਦਾ ਹੈ, ਨੇ ਵੀਡੀਓ ਦੀ ਗੁਣਵੱਤਾ ਅਤੇ ਸਰੋਤਾਂ ਦੀ ਜਾਂਚ ਕਰਨ ਤੋਂ ਬਾਅਦ ਅਧਿਕਾਰੀਆਂ ਨੂੰ ਸਾਫ਼ ਕਹਿ ਦਿੱਤਾ ਕਿ ਉਪਲਬਧ ਸਮੱਗਰੀ ਦੇ ਅਧਾਰ ‘ਤੇ ਕੋਈ ਵੀ ਭਰੋਸੇਯੋਗ ਵਿਗਿਆਨਕ ਨਤੀਜਾ ਨਹੀਂ ਕੱਢਿਆ ਜਾ ਸਕਦਾ ਅਤੇ ਨਾ ਹੀ ਇਸ ਨੂੰ AI ਜਨਰੇਟਿਡ ਕਿਹਾ ਜਾ ਸਕਦਾ ਹੈ।

ਜਸਪ੍ਰੀਤ ਵੱਲੋਂ ਮਨਾ ਕਰਨ ‘ਤੇ 16 ਜੂਨ 2026 ਨੂੰ ਦੁਬਾਰਾ ਬੈਠਕ ਕੀਤੀ ਗਈ, ਜਿੱਥੇ ਪੰਜਾਬ ਪੁਲਿਸ ਦੇ ਉਕਤ ਅਧਿਕਾਰੀਆਂ ਨੇ ਉਸ ਨੂੰ ਗੰਭੀਰ ਪਰਿਣਾਮ ਭੁਗਤਣ ਅਤੇ ਉਸ ਦੇ ਪਰਿਵਾਰ ਦੀ ਜਾਨ ਨੂੰ ਖ਼ਤਰੇ ਵਿੱਚ ਪਾਉਣ ਦੀਆਂ ਸਿੱਧੀਆਂ ਧਮਕੀਆਂ ਦਿੱਤੀਆਂ। ਜਸਪ੍ਰੀਤ ‘ਤੇ ਦਬਾਅ ਪਾਉਣ ਲਈ ਉਸ ਦੀ ਗੱਡੀ ਦੇ ਅੰਦਰ 10,00,000 ਰੁਪਏ (10 ਲੱਖ ਰੁਪਏ) ਦੀ ਨਕਦੀ ਜ਼ਬਰਦਸਤੀ ਰੱਖ ਦਿੱਤੀ ਗਈ, ਤਾਂ ਜੋ ਉਹ ਡਰ ਅਤੇ ਲਾਲਚ ਦੇ ਮਾਰੇ ਫ਼ਰਜ਼ੀ ਰਿਪੋਰਟ ਤਿਆਰ ਕਰ ਦੇਵੇ।

ਅੰਕਿਤ ਅਤੇ ਅਰੁਣ ਮਹਿੰਦਰੂ ਨੇ ਬਣਾਈਆਂ ‘Cipher Sentinel’ ਤੇ ‘Cyberan Labs’ ਦੀਆਂ ਫ਼ਰਜ਼ੀ ਰਿਪੋਰਟਾਂ

ਭਾਰੀ ਦਬਾਅ ਹੇਠ ਆ ਕੇ ਜਸਪ੍ਰੀਤ ਨੇ ਆਪਣੇ ਜਾਣਕਾਰ ਅਰੁਣ ਮਹਿੰਦਰੂ (ਵਾਸੀ ਸਿਰਸਾ) ਨਾਲ ਸੰਪਰਕ ਕੀਤਾ। ਅਰੁਣ ਨੇ ਅੱਗੇ ਅੰਕਿਤ (ਵਾਸੀ ਜੀਂਦ) ਨਾਲ ਮਿਲ ਕੇ ‘Cipher Sentinel Lab’ ਅਤੇ ‘Cyberan Labs’ ਨਾਮਕ ਕਥਿਤ ਫੋਰੈਂਸਿਕ ਸੰਸਥਾਵਾਂ ਦੇ ਨਾਮ ‘ਤੇ ਦੋ ਵੱਖ-ਵੱਖ ਫ਼ਰਜ਼ੀ ਰਿਪੋਰਟਾਂ (Drafts) ਤਿਆਰ ਕਰ ਦਿੱਤੀਆਂ। ਜਾਂਚ ਵਿੱਚ ਪਤਾ ਲੱਗਿਆ ਕਿ ਇਹ ਦੋਵੇਂ ਲੈਬਾਂ ਕਿਸੇ ਵੀ ਸਰਕਾਰੀ ਸੰਸਥਾ ਦੁਆਰਾ ਮਾਨਤਾ ਪ੍ਰਾਪਤ ਨਹੀਂ ਹਨ ਅਤੇ ਪੂਰੀ ਤਰ੍ਹਾਂ ਫ਼ਰਜ਼ੀ ਹਨ।

ਇਹ ਫ਼ਰਜ਼ੀ ਰਿਪੋਰਟਾਂ ਪੰਜਾਬ ਪੁਲਿਸ ਦੇ ਅਧਿਕਾਰੀਆਂ ਦੇ ਵਟਸਐਪ (WhatsApp) ਨੰਬਰਾਂ ‘ਤੇ ਸਾਂਝੀਆਂ ਕੀਤੀਆਂ ਗਈਆਂ। ਅਧਿਕਾਰੀ ਲਗਾਤਾਰ ਇਨ੍ਹਾਂ ਰਿਪੋਰਟਾਂ ਦੀ ਸਮੀਖਿਆ ਕਰ ਰਹੇ ਸਨ ਅਤੇ ਆਪਣੀ ਸਹੂਲਤ ਅਨੁਸਾਰ ਇਸ ਵਿੱਚ ਬਦਲਾਅ (Modifications) ਅਤੇ ਹੋਰ ਸਮੱਗਰੀ ਜੋੜਨ ਦੇ ਨਿਰਦੇਸ਼ ਦੇ ਰਹੇ ਸਨ, ਤਾਂ ਜੋ ਜਨਤਾ ਅਤੇ ਮੀਡੀਆ ਦੇ ਸਾਹਮਣੇ ਮੁੱਖ ਮੰਤਰੀ ਦੇ ਵੀਡੀਓ ਨੂੰ ਝੂਠਾ ਸਾਬਿਤ ਕੀਤਾ ਜਾ ਸਕੇ।

ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਕੋਲ ਪਹੁੰਚਿਆ ਸੀ ਮਾਮਲਾ

ਦੱਸ ਦੇਈਏ ਕਿ ਇਹ ਵਿਵਾਦਿਤ ਵੀਡੀਓ ਧਾਰਮਿਕ ਬੇਅਦਬੀ ਨਾਲ ਜੁੜਿਆ ਹੋਇਆ ਸੀ, ਜਿਸ ਕਾਰਨ ਸਿੱਖ ਸੰਗਤਾਂ ਵਿੱਚ ਭਾਰੀ ਰੋਸ ਸੀ। ਇਸ ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਨੇ ਵੀ ਇਸ ਦੀ ਜਾਂਚ ਕਰਵਾਈ ਸੀ ਅਤੇ 15 ਜੂਨ ਨੂੰ ਇਸ ਵੀਡੀਓ ਨੂੰ ਸਹੀ (Authentic) ਕਰਾਰ ਦਿੱਤਾ ਸੀ। ਇਸੇ ਕਾਰਨ ਪੰਜਾਬ ਪੁਲਿਸ ਦੇ ਉੱਚ ਅਧਿਕਾਰੀ ਕਿਸੇ ਵੀ ਹਾਲਤ ਵਿੱਚ ਇੱਕ ਅਜਿਹੀ ਫ਼ਰਜ਼ੀ ਲੈਬ ਰਿਪੋਰਟ ਚਾਹੁੰਦੇ ਸਨ ਜੋ ਅਕਾਲ ਤਖ਼ਤ ਸਾਹਿਬ ਦੇ ਫ਼ੈਸਲੇ ਅਤੇ ਜਨਤਕ ਰੋਸ ਨੂੰ ਠੰਢਾ ਕਰ ਸਕੇ।

ਗੁਰੂਗ੍ਰਾਮ ਪੁਲਿਸ ਨੇ ਸ਼ੁਰੂ ਕੀਤੀ ਡੂੰਘਾਈ ਨਾਲ ਜਾਂਚ, ਮੋਬਾਈਲ ਤੇ ਲੈਪਟਾਪ ਜਬਤ ਕਰਨ ਦੇ ਆਦੇਸ਼

ਜਦੋਂ ਜਸਪ੍ਰੀਤ ਸਿੰਘ ਨੂੰ ਇਹ ਅਹਿਸਾਸ ਹੋਇਆ ਕਿ ਉਸ ਦੀ ਵਰਤੋਂ ਇੱਕ ਬਹੁਤ ਵੱਡੀ ਸਿਆਸੀ ਅਤੇ ਧਾਰਮਿਕ ਸਾਜ਼ਿਸ਼ ਲਈ ਕੀਤੀ ਜਾ ਰਹੀ ਹੈ ਅਤੇ ਉਸ ਦੀ ਜਾਨ ਨੂੰ ਖ਼ਤਰਾ ਹੈ, ਤਾਂ ਉਸ ਨੇ ਖ਼ੁਦ ਗੁਰੂਗ੍ਰਾਮ ਪੁਲਿਸ ਕੋਲ ਪਹੁੰਚ ਕੇ ਸਾਰੀ ਹਕੀਕਤ ਬਿਆਨ ਕੀਤੀ।

ਗੁਰੂਗ੍ਰਾਮ ਪੁਲਿਸ ਦੇ ਏ.ਸੀ.ਪੀ. ਕ੍ਰਾਈਮ-1 (ACP Crime-1) ਦੀ ਸ਼ੁਰੂਆਤੀ ਜਾਂਚ ਤੋਂ ਬਾਅਦ ਮਾਮਲਾ ਸਹੀ ਪਾਇਆ ਗਿਆ ਅਤੇ ਤੁਰੰਤ ਪਰਚਾ ਦਰਜ ਕੀਤਾ ਗਿਆ। ਪੁਲਿਸ ਨੇ ਮੁਲਜ਼ਮ ਅੰਕਿਤ ਅਤੇ ਅਰੁਣ ਮਹਿੰਦਰੂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਐਫ.ਆਈ.ਆਰ. ਵਿੱਚ ਸਪੱਸ਼ਟ ਲਿਖਿਆ ਗਿਆ ਹੈ ਕਿ ਇਸ ਸਾਜ਼ਿਸ਼ ਵਿੱਚ ਸ਼ਾਮਲ ਪੰਜਾਬ ਪੁਲਿਸ ਦੇ ਅਧਿਕਾਰੀਆਂ ਦੇ ਮੋਬਾਈਲ ਫ਼ੋਨ, ਲੈਪਟਾਪ, ਹਾਰਡ ਡਿਸਕ, ਸੀ.ਸੀ.ਟੀ.ਵੀ. ਫੁਟੇਜ ਅਤੇ ਹੋਰ ਡਿਜੀਟਲ ਦਸਤਾਵੇਜ਼ਾਂ ਨੂੰ ਤੁਰੰਤ ਕਾਨੂੰਨੀ ਪ੍ਰਕਿਰਿਆ ਤਹਿਤ ਜਬਤ ਕੀਤਾ ਜਾਵੇਗਾ ਤਾਂ ਜੋ ਪੰਜਾਬ ਪੁਲਿਸ ਦੇ ਉਨ੍ਹਾਂ ‘ਵੱਡੇ ਸਾਹਿਬ’ ਦੇ ਚਿਹਰੇ ਤੋਂ ਨਕਾਬ ਉਤਾਰਿਆ ਜਾ ਸਕੇ, ਜਿਨ੍ਹਾਂ ਦੇ ਇਸ਼ਾਰੇ ‘ਤੇ ਇਹ ਸਾਰਾ ਖੇਡ ਖੇਡਿਆ ਗਿਆ।