ਤਾਮਿਲਨਾਡੂ ਦੀ ਜੇਲ੍ਹ ’ਚੋਂ 17 ਕੈਦੀ ਫ਼ਰਾਰ
- ਇੱਕ ਕੈਦੀ ਗ੍ਰਿਫ਼ਤਾਰ, ਬਾਕੀ 16 ਦੀ ਭਾਲ ਜਾਰੀ
- ਮੁਲਜ਼ਮਾਂ ਨੂੰ ਫੜਨ ਲਈ ਪੁਲਿਸ ਦੀਆਂ 17 ਵਿਸ਼ੇਸ਼ ਟੀਮਾਂ ਬਣਾਈਆਂ
ਥੇਨੀ: ਤਾਮਿਲਨਾਡੂ ਦੇ ਥੇਨੀ ਜ਼ਿਲ੍ਹੇ ਦੀ ਸਬ-ਜੇਲ੍ਹ ਵਿੱਚੋਂ ਸੋਮਵਾਰ ਦੇਰ ਰਾਤ 17 ਕੈਦੀ ਇੱਕ ਪੁਲਿਸ ਮੁਲਾਜ਼ਮ ’ਤੇ ਕਥਿਤ ਹਮਲਾ ਕਰਕੇ ਫ਼ਰਾਰ ਹੋ ਗਏ। ਅਧਿਕਾਰੀਆਂ ਮੁਤਾਬਕ, ਫ਼ਰਾਰ ਕੈਦੀਆਂ ਵਿੱਚੋਂ ਇੱਕ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ, ਜਦਕਿ ਬਾਕੀ 16 ਦੀ ਭਾਲ ਲਈ ਪੁਲਿਸ ਵੱਲੋਂ ਵੱਡੇ ਪੱਧਰ ’ਤੇ ਤਲਾਸ਼ੀ ਮੁਹਿੰਮ ਚਲਾਈ ਜਾ ਰਹੀ ਹੈ। ਮੁਲਜ਼ਮਾਂ ਨੂੰ ਕਾਬੂ ਕਰਨ ਲਈ 17 ਵਿਸ਼ੇਸ਼ ਪੁਲਿਸ ਟੀਮਾਂ ਬਣਾਈਆਂ ਗਈਆਂ ਹਨ।
ਦੱਖਣੀ ਖੇਤਰ ਦੇ ਆਈਜੀਪੀ ਵਿਜਯੇਂਦਰ ਬਿਦਾਰੀ ਨੇ ਦੱਸਿਆ ਕਿ ਤਲਾਸ਼ੀ ਮੁਹਿੰਮ ਦੌਰਾਨ ਇੱਕ ਫ਼ਰਾਰ ਕੈਦੀ ਨੂੰ ਕਾਬੂ ਕੀਤਾ ਗਿਆ ਹੈ। ਘਟਨਾ ਤੋਂ ਬਾਅਦ ਸੁਰੱਖਿਆ ਟੀਮਾਂ ਵਾਹਨਾਂ ਦੀ ਸਖ਼ਤੀ ਨਾਲ ਜਾਂਚ ਕਰ ਰਹੀਆਂ ਹਨ। ਡਿੰਡੀਗੁਲ ਦੇ ਪੁਲਿਸ ਸੁਪਰਡੈਂਟ ਐੱਸ. ਜੈਕੁਮਾਰ ਮੁਤਾਬਕ, ਸਾਵਧਾਨੀ ਵਜੋਂ ਗੁਆਂਢੀ ਡਿੰਡੀਗੁਲ ਜ਼ਿਲ੍ਹੇ ਵਿੱਚ 16 ਥਾਵਾਂ ’ਤੇ ਨਾਕੇ ਲਗਾਏ ਗਏ ਹਨ।
ਬਿਮਾਰ ਕੈਦੀ ਨੂੰ ਦੇਖਣ ਗਏ ਮੁਲਾਜ਼ਮ ’ਤੇ ਹਮਲਾ
ਪੁਲਿਸ ਅਨੁਸਾਰ, ਸਾਰੇ 17 ਕੈਦੀ ਜੇਲ੍ਹ ਦੇ ਇੱਕੋ ਸੈੱਲ ਵਿੱਚ ਬੰਦ ਸਨ। ਜਦੋਂ ਜੇਲ੍ਹ ਦਾ ਇੱਕ ਮੁਲਾਜ਼ਮ ਕੈਦੀ ਦੇ ਬਿਮਾਰ ਹੋਣ ਦੀ ਸੂਚਨਾ ਮਿਲਣ ’ਤੇ ਉਸ ਨੂੰ ਦੇਖਣ ਲਈ ਸੈੱਲ ਅੰਦਰ ਗਿਆ ਤਾਂ ਕੈਦੀਆਂ ਨੇ ਉਸ ’ਤੇ ਹਮਲਾ ਕਰ ਦਿੱਤਾ ਅਤੇ ਮੌਕਾ ਪਾ ਕੇ ਫ਼ਰਾਰ ਹੋ ਗਏ। ਇਸ ਹਮਲੇ ਵਿੱਚ ਥੇਨੀ ਜ਼ਿਲ੍ਹਾ ਜੇਲ੍ਹ ਨਾਲ ਸਬੰਧਤ ਗ੍ਰੇਡ-2 ਪੁਲਿਸ ਮੁਲਾਜ਼ਮ ਥੰਗਾਪਾਂਡੀ ਦੇ ਸਿਰ ’ਤੇ ਸੱਟ ਲੱਗੀ। ਉਸ ਨੂੰ ਇਲਾਜ ਲਈ ਵਿਲੱਕੂ ਦੇ ਸਰਕਾਰੀ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ। ਪੁਲਿਸ ਰਿਪੋਰਟ ਮੁਤਾਬਕ, ਜੇਲ੍ਹ ਦੇ ਦੋ ਹੋਰ ਮੁਲਾਜ਼ਮਾਂ ਨੂੰ ਵੀ ਮਾਮੂਲੀ ਸੱਟਾਂ ਲੱਗੀਆਂ ਹਨ।
ਗੁਆਂਢੀ ਜ਼ਿਲ੍ਹਿਆਂ ਵਿੱਚ ਵੀ ਅਲਰਟ
ਕੈਦੀਆਂ ਦੇ ਫ਼ਰਾਰ ਹੋਣ ਮਗਰੋਂ ਗੁਆਂਢੀ ਜ਼ਿਲ੍ਹਿਆਂ ਦੀ ਪੁਲਿਸ ਨੂੰ ਅਲਰਟ ਕਰ ਦਿੱਤਾ ਗਿਆ ਹੈ। ਇਡੁੱਕੀ, ਮਦੁਰੈ ਅਤੇ ਡਿੰਡੀਗੁਲ ਪੁਲਿਸ ਨਾਲ ਫ਼ਰਾਰ ਕੈਦੀਆਂ ਦੀਆਂ ਤਸਵੀਰਾਂ ਸਾਂਝੀਆਂ ਕੀਤੀਆਂ ਗਈਆਂ ਹਨ, ਤਾਂ ਜੋ ਉਨ੍ਹਾਂ ਦੀ ਪਛਾਣ ਕਰਕੇ ਗ੍ਰਿਫ਼ਤਾਰ ਕੀਤਾ ਜਾ ਸਕੇ। ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਬਾਕੀ ਫ਼ਰਾਰ ਕੈਦੀਆਂ ਨੂੰ ਫੜਨ ਲਈ ਛਾਪੇਮਾਰੀ ਤੇ ਤਲਾਸ਼ੀ ਮੁਹਿੰਮ ਜਾਰੀ ਹੈ।
