ਯਾਤਰੀਆਂ ਲਈ ਵੱਡੀ ਖ਼ਬਰ, ਅੰਮ੍ਰਿਤਸਰ ਏਅਰਪੋਰਟ ਦਾ ਵਿੰਟਰ ਸ਼ਡਿਊਲ-2026 ਜਾਰੀ
Amritsar Airport Winter Schedule 2026; ਅੰਮ੍ਰਿਤਸਰ ਸਥਿਤ ਸ੍ਰੀ ਗੁਰੂ ਰਾਮਦਾਸ ਜੀ ਇੰਟਰਨੈਸ਼ਨਲ ਏਅਰਪੋਰਟ ਦਾ ਵਿੰਟਰ ਸ਼ਡਿਊਲ-2026 ਜਾਰੀ ਕਰ ਦਿੱਤਾ ਗਿਆ ਹੈ। ਨਵੇਂ ਸ਼ਡਿਊਲ ਵਿੱਚ ਘਰੇਲੂ ਅਤੇ ਕੌਮਾਂਤਰੀ ਉਡਾਣਾਂ ਦੇ ਆਉਣ ਅਤੇ ਜਾਣ ਦੀਆਂ ਕੁੱਲ 84 ਐਂਟਰੀਆਂ ਸ਼ਾਮਲ ਕੀਤੀਆਂ ਗਈਆਂ ਹਨ। ਯਾਤਰੀਆਂ ਨੂੰ ਦਿੱਲੀ, ਮੁੰਬਈ, ਪੁਣੇ, ਬੈਂਗਲੁਰੂ, ਅਹਿਮਦਾਬਾਦ, ਸ੍ਰੀਨਗਰ ਅਤੇ ਨੋਇਡਾ ਲਈ ਘਰੇਲੂ ਉਡਾਣਾਂ ਦੀ ਸਹੂਲਤ ਮਿਲੇਗੀ। ਇਨ੍ਹਾਂ ਵਿੱਚ ਦਿੱਲੀ ਲਈ ਸਭ ਤੋਂ ਵੱਧ ਉਡਾਣਾਂ ਤੈਅ ਕੀਤੀਆਂ ਗਈਆਂ ਹਨ।
ਕੌਮਾਂਤਰੀ ਉਡਾਣਾਂ ਰਾਹੀਂ ਯਾਤਰੀ ਕੁਆਲਾਲੰਪੁਰ, ਦੁਬਈ, ਸ਼ਾਰਜਾਹ, ਅਬੂ ਧਾਬੀ, ਦੋਹਾ, ਸਿੰਗਾਪੁਰ, ਬਰਮਿੰਘਮ ਅਤੇ ਬੈਂਕਾਕ ਲਈ ਸਫ਼ਰ ਕਰ ਸਕਣਗੇ। ਜਾਰੀ ਸ਼ਡਿਊਲ ਮੁਤਾਬਕ ਘਰੇਲੂ ਉਡਾਣਾਂ ਦੇ ਆਉਣ ਅਤੇ ਜਾਣ ਦੀਆਂ 21-21 ਐਂਟਰੀਆਂ ਹਨ। ਇਸੇ ਤਰ੍ਹਾਂ ਕੌਮਾਂਤਰੀ ਉਡਾਣਾਂ ਦੇ ਆਉਣ ਅਤੇ ਜਾਣ ਦੀਆਂ ਵੀ 21-21 ਐਂਟਰੀਆਂ ਰੱਖੀਆਂ ਗਈਆਂ ਹਨ।
ਹਾਲਾਂਕਿ, ਸ਼ਡਿਊਲ ਵਿੱਚ ਸ਼ਾਮਲ ਕੁਝ ਉਡਾਣਾਂ ਦਾ ਫਿਲਹਾਲ ਸੰਚਾਲਨ ਨਹੀਂ ਹੋ ਰਿਹਾ। ਇਨ੍ਹਾਂ ਵਿੱਚ ਅਕਾਸਾ ਏਅਰ ਦੀ ਅਬੂ ਧਾਬੀ, ਬਾਟਿਕ ਏਅਰ ਅਤੇ ਏਅਰ ਏਸ਼ੀਆ ਦੀ ਕੁਆਲਾਲੰਪੁਰ ਅਤੇ ਥਾਈ ਲਾਇਨ ਏਅਰ ਦੀ ਬੈਂਕਾਕ ਉਡਾਣ ਸ਼ਾਮਲ ਹੈ। ਇਸ ਤੋਂ ਇਲਾਵਾ ਮਲੇਸ਼ੀਆ ਏਅਰਲਾਈਨਜ਼ ਦੀਆਂ ਕੁਆਲਾਲੰਪੁਰ ਜਾਣ ਅਤੇ ਉੱਥੋਂ ਆਉਣ ਵਾਲੀਆਂ ਕੁਝ ਉਡਾਣਾਂ ਦੇ ਸਮੇਂ ਅਤੇ ਦਿਨਾਂ ਵਿੱਚ ਨਵੰਬਰ ਤੋਂ ਮਾਰਚ ਤੱਕ ਵੱਖ-ਵੱਖ ਤਰੀਕਾਂ ਮੁਤਾਬਕ ਬਦਲਾਅ ਕੀਤਾ ਗਿਆ ਹੈ।
ਘਰੇਲੂ ਉਡਾਣਾਂ ਵਿੱਚ ਏਅਰ ਇੰਡੀਆ, ਏਅਰ ਇੰਡੀਆ ਐਕਸਪ੍ਰੈੱਸ ਅਤੇ ਇੰਡੀਗੋ ਦੀਆਂ ਸੇਵਾਵਾਂ ਸ਼ਾਮਲ ਹਨ। ਦਿੱਲੀ ਲਈ ਦਿਨ ਭਰ ਕਈ ਉਡਾਣਾਂ ਉਪਲਬਧ ਰਹਿਣਗੀਆਂ, ਜਦਕਿ ਮੁੰਬਈ ਅਤੇ ਪੁਣੇ ਲਈ ਵੀ ਨਿਯਮਤ ਸੇਵਾਵਾਂ ਰੱਖੀਆਂ ਗਈਆਂ ਹਨ। ਬੈਂਗਲੁਰੂ, ਅਹਿਮਦਾਬਾਦ, ਸ੍ਰੀਨਗਰ ਅਤੇ ਨੋਇਡਾ ਲਈ ਵੀ ਉਡਾਣਾਂ ਦਾ ਸ਼ਡਿਊਲ ਜਾਰੀ ਕੀਤਾ ਗਿਆ ਹੈ।
ਕੌਮਾਂਤਰੀ ਉਡਾਣਾਂ ਵਿੱਚ ਕੁਆਲਾਲੰਪੁਰ ਲਈ ਮਲੇਸ਼ੀਆ ਏਅਰਲਾਈਨਜ਼ ਦੀਆਂ ਕਈ ਸੇਵਾਵਾਂ ਸ਼ਾਮਲ ਹਨ। ਦੁਬਈ ਅਤੇ ਸ਼ਾਰਜਾਹ ਤੋਂ ਇਲਾਵਾ ਦੋਹਾ, ਅਬੂ ਧਾਬੀ, ਸਿੰਗਾਪੁਰ ਅਤੇ ਬਰਮਿੰਘਮ ਲਈ ਵੀ ਉਡਾਣਾਂ ਤੈਅ ਕੀਤੀਆਂ ਗਈਆਂ ਹਨ। ਬੈਂਕਾਕ ਦੀ ਉਡਾਣ ਵੀ ਸ਼ਡਿਊਲ ਵਿੱਚ ਸ਼ਾਮਲ ਹੈ, ਪਰ ਫਿਲਹਾਲ ਇਸ ਦਾ ਸੰਚਾਲਨ ਨਹੀਂ ਹੋ ਰਿਹਾ।
