ਪਾਣੀ ਦੀ ਟੈਂਕੀ ‘ਚੋਂ ਮਿਲੀ ਕਾਲਜ ਵਿਦਿਆਰਥਣ ਦੀ ਲਾਸ਼, ਇਲਾਕੇ ‘ਚ ਫ਼ੈਲੀ ਸਨਸਨੀ
Bathinda News; ਬਠਿੰਡਾ ਦੇ ਜੋਗਰ ਪਾਰਕ ਵਿੱਚ ਸਰਕਾਰੀ ਪਾਣੀ ਦੀ ਟੈਂਕੀ ਵਿੱਚੋਂ 19 ਸਾਲਾ ਵਿਦਿਆਰਥਣ ਦੀ ਲਾਸ਼ ਮਿਲਣ ਨਾਲ ਇਲਾਕੇ ਵਿੱਚ ਸਨਸਨੀ ਫੈਲ ਗਈ। ਲਾਸ਼ ਮਿਲਣ ਤੋਂ ਬਾਅਦ ਆਸ-ਪਾਸ ਦੇ ਲੋਕਾਂ ਨੇ ਪੁਲਿਸ ਨੂੰ ਸੂਚਨਾ ਦਿੱਤੀ। ਪੁਲਿਸ ਵੱਲੋਂ ਸ਼ੁਰੂਆਤ ਵਿੱਚ ਵਿਦਿਆਰਥਣ ਦੀ ਪਛਾਣ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਕੋਈ ਜਾਣਕਾਰੀ ਨਹੀਂ ਮਿਲ ਸਕੀ।
ਕੁਝ ਸਮੇਂ ਬਾਅਦ ਵਿਦਿਆਰਥਣ ਦੀ ਪਛਾਣ ਪਿੰਡ ਕਿਲ੍ਹੀ ਨਿਹਾਲ ਸਿੰਘ ਵਾਲਾ ਦੀ ਰਹਿਣ ਵਾਲੀ ਪਿੰਦਰ ਕੌਰ ਵਜੋਂ ਹੋਈ। ਉਹ ਬਾਬਾ ਫਰੀਦ ਕਾਲਜ ਦੀ ਵਿਦਿਆਰਥਣ ਸੀ।
ਪਰਿਵਾਰ ਮੁਤਾਬਕ ਮੌਤ ਤੋਂ ਪਹਿਲਾਂ ਵਿਦਿਆਰਥਣ ਨੇ ਫੋਨ ‘ਤੇ ਪਰਿਵਾਰ ਨਾਲ ਗੱਲ ਕੀਤੀ ਸੀ ਅਤੇ ਦੱਸਿਆ ਸੀ ਕਿ ਉਹ ਆਪਣੀ ਭੂਆ ਦੇ ਘਰੋਂ ਨਿਕਲ ਚੁੱਕੀ ਹੈ ਅਤੇ ਬਠਿੰਡਾ ਆ ਰਹੀ ਹੈ। ਇਸ ਤੋਂ ਕੁਝ ਸਮੇਂ ਬਾਅਦ ਉਸ ਦੀ ਲਾਸ਼ ਪਾਣੀ ਵਿੱਚ ਮੂੰਹ ਦੇ ਭਾਰ ਪਈ ਮਿਲੀ। ਪੁਲਿਸ ਵੱਲੋਂ ਕਤਲ ਸਮੇਤ ਵੱਖ-ਵੱਖ ਪਹਿਲੂਆਂ ਤੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਪਾਣੀ ਵਿੱਚ ਮੂੰਹ ਦੇ ਭਾਰ ਪਈ ਸੀ ਲਾਸ਼
ਬੁੱਧਵਾਰ ਦੁਪਹਿਰ ਨੂੰ ਲਾਸ਼ ਮਿਲਣ ਦੀ ਸੂਚਨਾ ਮਿਲਣ ‘ਤੇ ਨੌਜਵਾਨ ਵੈਲਫੇਅਰ ਸੋਸਾਇਟੀ ਬਠਿੰਡਾ ਦੇ ਕੁਝ ਵਲੰਟੀਅਰ ਮੌਕੇ ‘ਤੇ ਪਹੁੰਚੇ। ਉਨ੍ਹਾਂ ਨੇ ਪਾਣੀ ਵਿੱਚ ਮੂੰਹ ਦੇ ਭਾਰ ਪਈ ਲਾਸ਼ ਨੂੰ ਬਾਹਰ ਕੱਢਿਆ। ਸ਼ੁਰੂਆਤੀ ਤੌਰ ‘ਤੇ ਮ੍ਰਿਤਕਾ ਦੀ ਪਛਾਣ ਨਹੀਂ ਹੋ ਸਕੀ ਸੀ।
ਕੁਝ ਘੰਟਿਆਂ ਬਾਅਦ ਹੋਈ ਵਿਦਿਆਰਥਣ ਦੀ ਪਛਾਣ
ਥਾਣਾ ਥਰਮਲ ਪੁਲਿਸ ਨੇ ਮੁੱਢਲੀ ਕਾਰਵਾਈ ਤੋਂ ਬਾਅਦ ਸੰਸਥਾ ਦੇ ਵਲੰਟੀਅਰਾਂ ਦੀ ਮਦਦ ਨਾਲ ਲਾਸ਼ ਨੂੰ ਸਿਵਲ ਹਸਪਤਾਲ ਪਹੁੰਚਾਇਆ। ਕੁਝ ਘੰਟਿਆਂ ਬਾਅਦ ਉਸ ਦੀ ਪਛਾਣ ਪਿੰਦਰ ਕੌਰ (19) ਵਾਸੀ ਪਿੰਡ ਕਿਲ੍ਹੀ ਨਿਹਾਲ ਸਿੰਘ ਵਾਲਾ ਵਜੋਂ ਹੋਈ।
ਭੂਆ ਦੇ ਘਰੋਂ ਬੱਸ ਰਾਹੀਂ ਬਠਿੰਡਾ ਲਈ ਨਿਕਲੀ ਸੀ
ਪਰਿਵਾਰ ਮੁਤਾਬਕ ਪਿੰਦਰ ਕੌਰ ਬਾਬਾ ਫਰੀਦ ਕਾਲਜ ਵਿੱਚ ਪੜ੍ਹਦੀ ਸੀ ਅਤੇ ਪਿੰਡ ਭਾਗੂ ਵਿੱਚ ਆਪਣੀ ਭੂਆ ਕੋਲ ਰਹਿ ਰਹੀ ਸੀ। ਸੋਮਵਾਰ ਸਵੇਰੇ ਉਹ ਬੱਸ ਰਾਹੀਂ ਬਠਿੰਡਾ ਲਈ ਰਵਾਨਾ ਹੋਈ ਸੀ। ਉਸ ਨੇ ਫੋਨ ਕਰਕੇ ਪਰਿਵਾਰ ਨੂੰ ਭੂਆ ਦੇ ਘਰੋਂ ਨਿਕਲਣ ਅਤੇ ਬਠਿੰਡਾ ਆਉਣ ਬਾਰੇ ਵੀ ਦੱਸਿਆ ਸੀ।
