ਓਡੀਸ਼ਾ ਤੱਟ ਨੇੜੇ ਕਾਰਗੋ ਜਹਾਜ਼ ਡੁੱਬਿਆ, 22 ਕਰੂ ਮੈਂਬਰ ਲਾਪਤਾ
Cargo ship sinks off at Odisha coast: ਬੰਗਾਲ: ਓਡੀਸ਼ਾ ਤੱਟ ਨੇੜੇ ਬੰਗਾਲ ਦੀ ਖਾੜੀ ਵਿੱਚ ਪਨਾਮਾ ਦੇ ਝੰਡੇ ਵਾਲਾ ਮਾਲਵਾਹਕ ਜਹਾਜ਼ MV ਓਸ਼ਨ ਵਿਨਰ ਸ਼ਨੀਵਾਰ ਨੂੰ ਸੰਪਰਕ ਟੁੱਟਣ ਤੋਂ ਬਾਅਦ ਡੁੱਬ ਗਿਆ। ਜਹਾਜ਼ ਵਿੱਚ ਕੁੱਲ 24 ਕਰੂ ਮੈਂਬਰ ਸਵਾਰ ਸਨ, ਜਿਨ੍ਹਾਂ ਵਿੱਚੋਂ ਦੋ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ ਹੈ, ਜਦਕਿ 22 ਮੈਂਬਰ ਅਜੇ ਵੀ ਲਾਪਤਾ ਹਨ। ਲਾਪਤਾ ਲੋਕਾਂ ਦੀ ਭਾਲ ਲਈ ਭਾਰਤੀ ਤੱਟ ਰੱਖਿਅਕ ਬਲ ਅਤੇ ਭਾਰਤੀ ਨੇਵੀ ਨੇ ਸਾਂਝਾ ਖੋਜ ਅਤੇ ਬਚਾਅ ਅਭਿਆਨ ਸ਼ੁਰੂ ਕਰ ਦਿੱਤਾ ਹੈ।
ਤੱਟ ਰੱਖਿਅਕ ਬਲ ਮੁਤਾਬਕ, ਜਹਾਜ਼ ਡੁੱਬਣ ਤੋਂ ਪਹਿਲਾਂ ਇਸ ਨਾਲ ਸੰਪਰਕ ਟੁੱਟ ਗਿਆ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ MV ਓਸ਼ਨ ਵਿਨਰ ਓਡੀਸ਼ਾ ਦੇ ਪਾਰਾਦੀਪ ਤੱਟ ਤੋਂ ਕਰੀਬ 240 ਸਮੁੰਦਰੀ ਮੀਲ ਦੂਰ ਡੁੱਬਿਆ। ਜਹਾਜ਼ ਵਿੱਚ ਸਵਾਰ 24 ਕਰੂ ਮੈਂਬਰਾਂ ਵਿੱਚ 20 ਚੀਨੀ ਨਾਗਰਿਕ, ਮਿਆਂਮਾਰ ਦੇ 3 ਨਾਗਰਿਕ ਅਤੇ ਬੰਗਲਾਦੇਸ਼ ਦਾ ਇੱਕ ਨਾਗਰਿਕ ਸ਼ਾਮਲ ਸੀ। ਜਾਣਕਾਰੀ ਅਨੁਸਾਰ, ਇਹ ਜਹਾਜ਼ 20 ਅਗਸਤ ਦੀ ਰਾਤ ਪਾਰਾਦੀਪ ਤੋਂ ਸਿੰਗਾਪੁਰ ਲਈ ਰਵਾਨਾ ਹੋਇਆ ਸੀ। ਸ਼ੁਰੂਆਤੀ ਦੌਰ ਵਿੱਚ ਬਚਾਏ ਗਏ ਕਰੂ ਮੈਂਬਰਾਂ ਦੀ ਗਿਣਤੀ ਨੂੰ ਲੈ ਕੇ ਸਥਿਤੀ ਸਪੱਸ਼ਟ ਨਹੀਂ ਸੀ, ਪਰ ਬਾਅਦ ਵਿੱਚ ਤੱਟ ਰੱਖਿਅਕ ਬਲ ਨੇ ਦੋ ਲੋਕਾਂ ਨੂੰ ਸੁਰੱਖਿਅਤ ਬਚਾਉਣ ਦੀ ਪੁਸ਼ਟੀ ਕੀਤੀ।
ਬਚਾਅ ਅਭਿਆਨ ਜਾਰੀ
ਜਹਾਜ਼ ਨਾਲ ਸੰਪਰਕ ਟੁੱਟਣ ਅਤੇ ਇਸ ਦੇ ਡੁੱਬਣ ਤੋਂ ਬਾਅਦ ਭਾਰਤੀ ਤੱਟ ਰੱਖਿਅਕ ਬਲ ਅਤੇ ਭਾਰਤੀ ਨੇਵੀ ਵੱਲੋਂ ਵੱਡੇ ਪੱਧਰ ‘ਤੇ ਖੋਜ ਅਤੇ ਬਚਾਅ ਅਭਿਆਨ ਚਲਾਇਆ ਜਾ ਰਿਹਾ ਹੈ। ਇਲਾਕੇ ਵਿੱਚ ਮੌਜੂਦ ਹੋਰ ਜਹਾਜ਼ਾਂ ਨੂੰ ਵੀ ਅਲਰਟ ਕੀਤਾ ਗਿਆ ਹੈ ਅਤੇ ਲਾਪਤਾ ਕਰੂ ਮੈਂਬਰਾਂ ਦੀ ਭਾਲ ਵਿੱਚ ਸਹਿਯੋਗ ਕਰਨ ਲਈ ਕਿਹਾ ਗਿਆ ਹੈ। ਫਿਲਹਾਲ ਜਹਾਜ਼ ਦੇ ਡੁੱਬਣ ਦੇ ਅਸਲ ਕਾਰਨਾਂ ਬਾਰੇ ਕੋਈ ਸਪੱਸ਼ਟ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ।
