ਛੱਤਬੀੜ ਚਿੜੀਆਘਰ ਦੀ ਮਸ਼ਹੂਰ ਚਿੱਟੀ ਬਾਘਣ ‘ਦੀਆ’ ਦਾ ਦੇਹਾਂਤ
ਛੱਤਬੀੜ: ਮਹਿੰਦਰ ਚੌਧਰੀ ਜ਼ੂਲੋਜੀਕਲ ਪਾਰਕ, ਛੱਤਬੀੜ ਚਿੜੀਆਘਰ ਤੋਂ ਦੁਖਦਾਈ ਖ਼ਬਰ ਸਾਹਮਣੇ ਆਈ ਹੈ। ਚਿੜੀਆਘਰ ਦੀ ਮਸ਼ਹੂਰ ਚਿੱਟੀ ਬਾਘਣ ‘ਦੀਆ’ ਦਾ ਅੱਜ ਸਵੇਰੇ ਦੇਹਾਂਤ ਹੋ ਗਿਆ। ਦੀਆ ਦੀ ਉਮਰ 13 ਸਾਲ, 2 ਮਹੀਨੇ ਅਤੇ 21 ਦਿਨ ਸੀ। ਉਸ ਦੀ ਮੌਤ ਨਾਲ ਚਿੜੀਆਘਰ ਦੇ ਪ੍ਰਬੰਧਕਾਂ, ਦੇਖਭਾਲ ਕਰਨ ਵਾਲੇ ਕਰਮਚਾਰੀਆਂ ਅਤੇ ਜੰਗਲੀ ਜੀਵ ਪ੍ਰੇਮੀਆਂ ਵਿੱਚ ਸੋਗ ਦੀ ਲਹਿਰ ਹੈ।
ਛੱਤਬੀੜ ਚਿੜੀਆਘਰ ਵਿੱਚ ਹੀ ਹੋਇਆ ਸੀ ਜਨਮ
ਦੀਆ ਦਾ ਜਨਮ 28 ਜੁਲਾਈ 2013 ਨੂੰ ਛੱਤਬੀੜ ਚਿੜੀਆਘਰ ਵਿੱਚ ਹੋਇਆ ਸੀ। ਉਹ ਚਿੱਟੇ ਬਾਘ ‘ਲੱਕੀ’ ਅਤੇ ਬਾਘਣ ‘ਡੌਲੀ’ ਦੀ ਸੰਤਾਨ ਸੀ। ਜਾਣਕਾਰੀ ਮੁਤਾਬਕ, ਚਿੱਟੇ ਬਾਘਾਂ ਦੀ ਔਸਤ ਉਮਰ 10 ਤੋਂ 12 ਸਾਲ ਮੰਨੀ ਜਾਂਦੀ ਹੈ, ਜਦਕਿ ਦੀਆ ਨੇ 13 ਸਾਲ ਤੋਂ ਵੱਧ ਸਮਾਂ ਜੀਵਨ ਬਤੀਤ ਕੀਤਾ।
ਟਾਈਗਰ ਕੰਜਰਵੇਸ਼ਨ ਪ੍ਰੋਗਰਾਮ ਵਿੱਚ ਰਿਹਾ ਅਹਿਮ ਯੋਗਦਾਨ
ਦੀਆ ਸਿਰਫ਼ ਸੈਲਾਨੀਆਂ ਦੀ ਖਿੱਚ ਦਾ ਕੇਂਦਰ ਹੀ ਨਹੀਂ ਸੀ, ਸਗੋਂ ਚਿੜੀਆਘਰ ਦੇ ਬਾਘ ਸੰਭਾਲ ਅਤੇ ਪ੍ਰਜਨਨ ਪ੍ਰੋਗਰਾਮ ਵਿੱਚ ਵੀ ਉਸ ਦੀ ਅਹਿਮ ਭੂਮਿਕਾ ਰਹੀ। ਸਾਲ 2019 ਵਿੱਚ ਦੀਆ ਨੇ ਤਿੰਨ ਸ਼ਾਵਕਾਂ—ਅਰਜੁਨ, ਅਮਰ ਅਤੇ ਦਿਲਨੂਰ—ਨੂੰ ਜਨਮ ਦਿੱਤਾ ਸੀ।
ਇਨ੍ਹਾਂ ਵਿੱਚੋਂ ਅਰਜੁਨ ਅਜੇ ਵੀ ਛੱਤਬੀੜ ਚਿੜੀਆਘਰ ਵਿੱਚ ਮੌਜੂਦ ਹੈ, ਜਦਕਿ ਅਮਰ ਨੂੰ ਰੋਹਤਕ ਚਿੜੀਆਘਰ ਭੇਜਿਆ ਗਿਆ ਸੀ। ਅਰਜੁਨ ਨੇ ਵੀ ਪ੍ਰਜਨਨ ਪ੍ਰੋਗਰਾਮ ਨੂੰ ਅੱਗੇ ਵਧਾਇਆ। ਉਸ ਨੇ ਗੁਜਰਾਤ ਦੇ ਰਾਜਕੋਟ ਤੋਂ ਲਿਆਂਦੀ ਗਈ ਬਾਘਣ ਗੌਰੀ ਨਾਲ ਸ਼ਾਵਕਾਂ ਨੂੰ ਜਨਮ ਦਿੱਤਾ।
ਮੌਤ ਦੇ ਕਾਰਨਾਂ ਦਾ ਪੋਸਟਮਾਰਟਮ ਤੋਂ ਬਾਅਦ ਲੱਗੇਗਾ ਪਤਾ
ਚਿੜੀਆਘਰ ਪ੍ਰਬੰਧਨ ਅਨੁਸਾਰ, ਦੀਆ ਦੀ ਮੌਤ ਦੇ ਅਸਲ ਕਾਰਨਾਂ ਦਾ ਪਤਾ ਲਗਾਉਣ ਲਈ ਉਸ ਦੀ ਦੇਹ ਨੂੰ ਗੁਰੂ ਅੰਗਦ ਦੇਵ ਵੈਟਰਨਰੀ ਐਂਡ ਐਨੀਮਲ ਸਾਇੰਸਿਜ਼ ਯੂਨੀਵਰਸਿਟੀ (GADVASU), ਲੁਧਿਆਣਾ ਭੇਜਿਆ ਗਿਆ ਹੈ, ਜਿੱਥੇ ਵੈਟਰਨਰੀ ਡਾਕਟਰਾਂ ਦਾ ਪੈਨਲ ਪੋਸਟਮਾਰਟਮ ਕਰੇਗਾ।
ਦੀਆ ਦੇ ਅੰਤਿਮ ਸੰਸਕਾਰ ਸਮੇਤ ਹੋਰ ਸਾਰੀਆਂ ਪ੍ਰਕਿਰਿਆਵਾਂ ਨਿਰਧਾਰਤ ਨਿਯਮਾਂ ਅਤੇ ਪ੍ਰੋਟੋਕੋਲ ਅਨੁਸਾਰ ਕੀਤੀਆਂ ਜਾ ਰਹੀਆਂ ਹਨ। ਉਸ ਦੇ ਦੇਹਾਂਤ ਨਾਲ ਛੱਤਬੀੜ ਚਿੜੀਆਘਰ ਵਿੱਚ ਸੋਗ ਦਾ ਮਾਹੌਲ ਹੈ।
