ਦਿੱਲੀ ਸਰਕਾਰ ਦਾ ਵੱਡਾ ਫੈਸਲਾ: ਖੰਡਿਤ ਮੂਰਤੀਆਂ ਨੂੰ ਰੁੱਖਾਂ ਹੇਠਾਂ ਰੱਖਣ ਦੀ ਬਜਾਏ ਹੁਣ ਸਤਿਕਾਰ ਨਾਲ ਕੀਤਾ ਜਾਵੇਗਾ Recycle; CM ਰੇਖਾ ਗੁਪਤਾ ਨੇ ਜਨਤਾ ਤੋਂ ਮੰਗੇ ਸੁਝਾਅ
ਦਿੱਲੀ ਵਿੱਚ ਰਹਿਣ ਵਾਲੇ ਸ਼ਰਧਾਲੂਆਂ ਅਤੇ ਆਮ ਲੋਕਾਂ ਲਈ ਇੱਕ ਬੇਹੱਦ ਅਹਿਮ ਖ਼ਬਰ ਹੈ।ਅਕਸਰ ਦੇਖਿਆ ਜਾਂਦਾ ਹੈ ਕਿ ਸਾਲਾਂਬੱਧੀ ਘਰਾਂ ਵਿੱਚ ਪੂਜੀਆਂ ਜਾਣ ਵਾਲੀਆਂ ਦੇਵੀ-ਦੇਵਤਿਆਣ ਦੀਆਂ ਮੂਰਤੀਆਂ ਜਦੋਂ ਖ਼ਰਾਬ ਜਾਂ ਟੁੱਟ ਜਾਂਦੀਆਂ ਹਨ, ਤਾਂ ਲੋਕ ਉਨ੍ਹਾਂ ਨੂੰ ਮਜਬੂਰੀ ਵੱਸ ਰੁੱਖਾਂ ਹੇਠਾਂ, ਪਾਰਕਾਂ ਵਿੱਚ, ਸੜਕਾਂ ਦੇ ਕਿਨਾਰੇ ਛੱਡ ਦਿੰਦੇ ਹਨ ਜਾਂ ਫਿਰ ਨਦੀਆਂ ਵਿੱਚ ਪ੍ਰਵਾਹਿਤ ਕਰ ਦਿੰਦੇ ਹਨ। ਇਸ ਨਾਲ ਧਾਰਮਿਕ ਆਸਥਾ ਨੂੰ ਤਾਂ ਠੇਸ ਪਹੁੰਚਦੀ ਹੀ ਹੈ, ਨਾਲ ਹੀ ਵਾਤਾਵਰਣ ਨੂੰ ਵੀ ਨੁਕਸਾਨ ਹੁੰਦਾ ਹੈ।
ਇਸ ਗੰਭੀਰ ਮੁੱਦੇ ਦੇ ਹੱਲ ਲਈ ਦਿੱਲੀ ਸਰਕਾਰ ਇੱਕ ਇਤਿਹਾਸਕ ਅਤੇ ਸੰਵੇਦਨਸ਼ੀਲ ਕਦਮ ਚੁੱਕਣ ਜਾ ਰਹੀ ਹੈ। ਪੂਰੀ ਰਾਜਧਾਨੀ ਵਿੱਚ ਖ਼ਰਾਬ ਅਤੇ ਖੰਡਿਤ ਹੋਈਆਂ ਮੂਰਤੀਆਂ ਲਈ ਵਿਸ਼ੇਸ਼ ਸੰਗ੍ਰਹਿ ਕੇਂਦਰ (Collection Centers) ਸਥਾਪਿਤ ਕੀਤੇ ਜਾਣਗੇ। ਇਨ੍ਹਾਂ ਕੇਂਦਰਾਂ ਵਿੱਚ ਲੋਕ ਆਪਣੀਆਂ ਪੁਰਾਣੀਆਂ ਮੂਰਤੀਆਂ ਨੂੰ ਪੂਰੇ ਸਨਮਾਨ ਅਤੇ ਮਰਯਾਦਾ ਨਾਲ ਜਮ੍ਹਾ ਕਰਵਾ ਸਕਣਗੇ, ਜਿੱਥੋਂ ਉਨ੍ਹਾਂ ਨੂੰ ਸਹੀ ਤਰੀਕੇ ਨਾਲ ਰੀਸਾਈਕਲ (Recycle) ਕੀਤਾ ਜਾਵੇਗਾ। ਦਿੱਲੀ ਦੀ ਮੁੱਖ ਮੰਤਰੀ ਰੇਖਾ ਗੁਪਤਾ ਨੇ ਆਪਣੇ ਅਧਿਕਾਰਤ ਸੋਸ਼ਲ ਮੀਡੀਆ ਐਕਸ (X) ਹੈਂਡਲ ‘ਤੇ ਇੱਕ ਵੀਡੀਓ ਪੋਸਟ ਸਾਂਝੀ ਕਰਕੇ ਇਸ ਮੁਹਿੰਮ ਦਾ ਐਲਾਨ ਕੀਤਾ ਹੈ।
ਮੁੱਖ ਮੰਤਰੀ ਰੇਖਾ ਗੁਪਤਾ ਦੀ ਜਨਤਾ ਨੂੰ ਅਪੀਲ
ਮੁੱਖ ਮੰਤਰੀ ਰੇਖਾ ਗੁਪਤਾ ਨੇ ਟਵਿੱਟਰ (X) ‘ਤੇ ਪੋਸਟ ਪਾਉਂਦਿਆਂ ਲਿਖਿਆ:
“ਅਸੀਂ ਆਪਣੀਆਂ ਸਤਿਕਾਰਯੋਗ ਮੂਰਤੀਆਂ ਨੂੰ ਸਤਿਕਾਰ ਨਾਲ ਰੀਸਾਈਕਲ ਕਰਨ ਲਈ ਵਿਸ਼ੇਸ਼ ਕੇਂਦਰ ਸ਼ੁਰੂ ਕਰ ਰਹੇ ਹਾਂ। ਇਹ ਇੱਕ ਸਾਫ਼, ਸੱਭਿਆਚਾਰਕ ਤੌਰ ‘ਤੇ ਚੇਤੰਨ ਅਤੇ ਵਿਕਸਤ ਦਿੱਲੀ ਵੱਲ ਇੱਕ ਦਿਲੋਂ ਕਦਮ ਦਰਸਾਉਂਦਾ ਹੈ।”
ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਜਨਤਕ ਭਾਗੀਦਾਰੀ ਹਰ ਨੇਕ ਯਤਨ ਨੂੰ ਮਜ਼ਬੂਤ ਬਣਾਉਂਦੀ ਹੈ। ਇਸ ਲਈ ਉਨ੍ਹਾਂ ਨੇ ਦਿੱਲੀ ਵਾਸਿਆਂ ਨੂੰ ਇਸ ਮੁਹਿੰਮ ਵਿੱਚ ਵੱਧ-ਚੜ੍ਹ ਕੇ ਹਿੱਸਾ ਲੈਣ ਦੀ ਅਪੀਲ ਕੀਤੀ ਹੈ ਅਤੇ ਇਨ੍ਹਾਂ ਮੂਰਤੀ ਸੰਗ੍ਰਹਿ ਕੇਂਦਰਾਂ ਨੂੰ ਬਣਾਉਣ ਲਈ ਢੁਕਵੀਆਂ ਥਾਵਾਂ ਬਾਰੇ ਜਨਤਾ ਤੋਂ ਸੁਝਾਅ (Suggestions) ਮੰਗੇ ਹਨ।
ਯਮੁਨਾ ਨਦੀ ਨੂੰ ਪ੍ਰਦੂਸ਼ਣ ਤੋਂ ਬਚਾਉਣ ਲਈ ਵੱਡਾ ਬਦਲ
ਇਸ ਸਰਕਾਰੀ ਪਹਿਲਕਦਮੀ ਦਾ ਇੱਕ ਵੱਡਾ ਮਕਸਦ ਵਾਤਾਵਰਣ ਦੀ ਸੰਭਾਲ ਵੀ ਹੈ। ਖ਼ਰਾਬ ਮੂਰਤੀਆਂ ਅਤੇ ਧਾਰਮਿਕ ਸਮੱਗਰੀ ਨੂੰ ਜਲ ਸਰੋਤਾਂ — ਖ਼ਾਸ ਕਰਕੇ ਪਹਿਲਾਂ ਹੀ ਬੇਹੱਦ ਪ੍ਰਦੂਸ਼ਿਤ ਹੋ ਚੁੱਕੀ ਯਮੁਨਾ ਨਦੀ — ਵਿੱਚ ਵਿਸਰਜਨ ਕਰਨ ਤੋਂ ਰੋਕਣ ਲਈ ਇਹ ਕੇਂਦਰ ਇੱਕ ਬਿਹਤਰ ਅਤੇ ਪਵਿੱਤਰ ਵਿਕਲਪ ਸਾਬਤ ਹੋਣਗੇ। ਇੱਥੇ ਜਮ੍ਹਾ ਹੋਣ ਵਾਲੀਆਂ ਮੂਰਤੀਆਂ ਨੂੰ ਵਾਤਾਵਰਣ-ਅਨੁਕੂਲ (Eco-friendly) ਤਰੀਕੇ ਨਾਲ ਰੀਸਾਈਕਲ ਕੀਤਾ ਜਾਵੇਗਾ।
