ਪੰਜਾਬ ‘ਚ ਵੋਟਰ ਸੂਚੀਆਂ ਦੀ ਸੋਧ ਲਈ ‘ਘਰ-ਘਰ’ ਮੁਹਿੰਮ: 24 ਹਜ਼ਾਰ ਤੋਂ ਵੱਧ BLO ਕਰਨਗੇ 2.14 ਕਰੋੜ ਵੋਟਰਾਂ ਦੀ ਜਾਂਚ

ਪੰਜਾਬ ਵਿੱਚ ਵੋਟਰ ਸੂਚੀ ਨੂੰ ਬਿਲਕੁਲ ਸਹੀ ਅਤੇ ਨਵੀਨਤਮ (Updated) ਬਣਾਉਣ ਲਈ 25 ਜੂਨ ਤੋਂ ਇੱਕ ਵਿਸ਼ੇਸ਼ ਤੀਬਰ ਸੋਧ (Special Intensive Revision – SIR) ਮੁਹਿੰਮ ਸ਼ੁਰੂ ਹੋਣ ਜਾ ਰਹੀ ਹੈ। ਇਸ ਵੱਡੀ ਪ੍ਰਕਿਰਿਆ ਤਹਿਤ ਸੂਬੇ ਭਰ ਦੇ 24,453 ਬੂਥ ਲੈਵਲ ਅਫ਼ਸਰ (BLO) ਵੋਟਰਾਂ ਦੇ ਘਰ-ਘਰ ਜਾ ਕੇ ਡਾਟਾ ਦੀ ਵੈਰੀਫਿਕੇਸ਼ਨ ਕਰਨਗੇ। ਇਹ ਮੁਹਿੰਮ 24 ਜੁਲਾਈ ਤੱਕ ਨਿਰੰਤਰ ਜਾਰੀ ਰਹੇਗੀ ਅਤੇ ਸਾਰੀ ਪ੍ਰਕਿਰਿਆ ਮੁਕੰਮਲ ਹੋਣ ਤੋਂ ਬਾਅਦ 1 ਅਕਤੂਬਰ 2026 ਨੂੰ ਅੰਤਿਮ ਵੋਟਰ ਸੂਚੀ ਜਨਤਕ ਕੀਤੀ ਜਾਵੇਗੀ।

ਪੰਜਾਬ ਦੀ ਮੁੱਖ ਚੋਣ ਅਧਿਕਾਰੀ (CEO) ਅਨਿੰਦਿਤਾ ਮਿੱਤਰਾ ਨੇ ਪੰਜਾਬ ਭਵਨ ਵਿਖੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਇਸ ਮੁਹਿੰਮ ਦਾ ਪੂਰਾ ਖਾਕਾ ਸਾਂਝਾ ਕੀਤਾ। ਉਨ੍ਹਾਂ ਭਰੋਸਾ ਦਿੱਤਾ ਕਿ ਭਾਰਤੀ ਚੋਣ ਕਮਿਸ਼ਨ (ECI) ਦੀਆਂ ਹਦਾਇਤਾਂ ਮੁਤਾਬਕ ਇਸ ਪੂਰੇ ਕਾਰਜ ਨੂੰ ਪਾਰਦਰਸ਼ੀ, ਯੋਜਨਾਬੱਧ ਅਤੇ ਨਿਰਪੱਖ ਤਰੀਕੇ ਨਾਲ ਨੇਪਰੇ ਚਾੜ੍ਹਿਆ ਜਾਵੇਗਾ।

ਮੁਹਿੰਮ ਦੀ ਟਾਈਮਲਾਈਨ: ਫਾਰਮ ਭਰਨ ਤੋਂ ਲੈ ਕੇ ਅੰਤਿਮ ਪ੍ਰਕਾਸ਼ਨ ਤੱਕ

ਵੋਟਰ ਸੂਚੀ ਦੀ ਸੋਧ ਦੇ ਕੰਮ ਨੂੰ ਸਮੇਂ ਸਿਰ ਪੂਰਾ ਕਰਨ ਲਈ ਚੋਣ ਕਮਿਸ਼ਨ ਨੇ ਹੇਠ ਲਿਖੇ ਅਨੁਸਾਰ ਸ਼ੈਡਿਊਲ ਤੈਅ ਕੀਤਾ ਹੈ:

• 25 ਜੂਨ ਤੋਂ 24 ਜੁਲਾਈ: ਬੀਐਲਓਜ਼ ਵੱਲੋਂ ਘਰ-ਘਰ ਜਾ ਕੇ ਗਣਨਾ ਫਾਰਮ ਵੰਡਣਾ, ਤਸਦੀਕ ਕਰਨਾ ਅਤੇ ਇਕੱਠੇ ਕਰਨਾ। ਇਸ ਦੌਰਾਨ ਸੂਬੇ ਦੇ 2,14,61,043 ਵੋਟਰਾਂ ਦਾ ਰਿਕਾਰਡ ਚੈੱਕ ਹੋਵੇਗਾ ਅਤੇ ਪੋਲਿੰਗ ਸਟੇਸ਼ਨਾਂ ਦੀ ਰੈਸ਼ਨੇਲਾਈਜੇਸ਼ਨ (ਸਮੀਖਿਆ) ਵੀ 24 ਜੁਲਾਈ ਤੱਕ ਮੁਕੰਮਲ ਕੀਤੀ ਜਾਵੇਗੀ।
• 3 ਅਗਸਤ: ਵੋਟਰ ਸੂਚੀ ਦਾ ਖਰੜਾ (Draft Voter List) ਜਾਰੀ ਕੀਤਾ ਜਾਵੇਗਾ।
• 3 ਅਗਸਤ ਤੋਂ 2 सਤੰਬਰ: ਵੋਟਰ ਆਪਣੇ ਨਾਮ ਜੋੜਨ, ਕਟਵਾਉਣ ਜਾਂ ਕਿਸੇ ਵੀ ਤਰ੍ਹਾਂ ਦੀ ਸੋਧ ਲਈ ਆਪਣੇ ਦਾਅਵੇ ਅਤੇ ਇਤਰਾਜ਼ ਦਰਜ ਕਰਵਾ ਸਕਣਗੇ।
• 28 ਸਤੰਬਰ: ਲੋਕਾਂ ਵੱਲੋਂ ਆਏ ਸਾਰੇ ਦਾਅਵਿਆਂ ਅਤੇ ਇਤਰਾਜ਼ਾਂ ਦਾ ਨਿਪਟਾਰਾ ਕਰ ਦਿੱਤਾ ਜਾਵੇਗਾ।
• 1 ਅਕਤੂਬਰ: ਅੰਤਿਮ ਵੋਟਰ ਸੂਚੀ (Final Electoral Roll) ਪ੍ਰਕਾਸ਼ਿਤ ਕੀਤੀ ਜਾਵੇਗੀ।

ਮੈਪਿੰਗ ਅਤੇ ਵੈਰੀਫਿਕੇਸ਼ਨ ਦੀ ਪ੍ਰਕਿਰਿਆ: ਇਸ ਵਾਰ ਕੀ ਹੋਵੇਗਾ ਖ਼ਾਸ?

86 ਫ਼ੀਸਦੀ ਮੈਪਿੰਗ ਮੁਕੰਮਲ: ਮੀਟਿੰਗ ਵਿੱਚ ਦੱਸਿਆ ਗਿਆ ਕਿ ਸੂਬੇ ਦੇ 86.02% ਵੋਟਰਾਂ ਦੀ ਮੈਪਿੰਗ ਦਾ ਕੰਮ ਪਹਿਲਾਂ ਹੀ ਪੂਰਾ ਹੋ ਚੁੱਕਾ ਹੈ। ਜਿਨ੍ਹਾਂ ਵੋਟਰਾਂ ਦੀ ਮੈਪਿੰਗ ਹਾਲੇ ਬਾਕੀ ਹੈ, ਉਨ੍ਹਾਂ ਦੀ ਸੂਚੀ ਸਾਰੀਆਂ ਸਿਆਸੀ ਪਾਰਟੀਆਂ ਨੂੰ ਸੌਂਪ ਦਿੱਤੀ ਗਈ ਹੈ ਤਾਂ ਜੋ ਉਹ ਵੀ ਇਸ ਮੁਹਿੰਮ ਵਿੱਚ ਸਹਿਯੋਗ ਕਰ ਸਕਣ।

ਸਵੈ-ਘੋਸ਼ਣਾ ਅਤੇ ਨਿਯਮ: ਫਾਰਮ ਭਰਨ ਵੇਲੇ ਮੈਪਿੰਗ ਲਈ ਦੋ ਵੱਖਰੇ ਖਾਨੇ ਬਣਾਏ ਗਏ ਹਨ—ਇੱਕ ਵੋਟਰ ਦੇ ਆਪਣੇ ਵੇਰਵਿਆਂ ਲਈ ਅਤੇ ਦੂਜਾ ਉਨ੍ਹਾਂ ਦੇ ਮਾਪਿਆਂ/ਦਾਦਾ-ਦਾਦੀ ਦੇ ਰਿਕਾਰਡ ਦੇ ਆਧਾਰ ‘ਤੇ। ਵੋਟਰ ਨੂੰ ਇਹ ਲਿਖਤੀ ਘੋਸ਼ਣਾ ਵੀ ਦੇਣੀ ਪਵੇਗੀ ਕਿ ਉਸ ਕੋਲ ਭਾਰਤ ਤੋਂ ਇਲਾਵਾ ਕਿਸੇ ਹੋਰ ਦੇਸ਼ ਦੀ ਨਾਗਰਿਕਤਾ ਨਹੀਂ ਹੈ ਅਤੇ ਉਸ ਦੀ ਵੋਟ ਕਿਸੇ ਹੋਰ ਥਾਂ ‘ਤੇ ਨਹੀਂ ਬਣੀ ਹੋਈ।

ਘਰ ਤਾਲਾ ਹੋਣ ‘ਤੇ ਲੱਗੇਗਾ ਸਟਿੱਕਰ: ਜੇਕਰ ਬੀਐਲਓ ਦੇ ਦੌਰੇ ਸਮੇਂ ਕੋਈ ਨਾਗਰਿਕ ਘਰ ਵਿੱਚ ਮੌਜੂਦ ਨਹੀਂ ਮਿਲਦਾ ਜਾਂ ਘਰ ਨੂੰ ਤਾਲਾ ਲੱਗਿਆ ਹੁੰਦਾ ਹੈ, ਤਾਂ ਬੀਐਲਓ ਉੱਥੇ ਫਾਰਮ ਛੱਡ ਕੇ ਇੱਕ ਵਿਸ਼ੇਸ਼ ਸਟਿੱਕਰ ਲਗਾਵੇਗਾ। ਇਸ ਸਟਿੱਕਰ ‘ਤੇ ਅਗਲੀ ਫੇਰੀ ਦੀਆਂ ਸੰਭਾਵਿਤ ਤਾਰੀਖਾਂ ਲਿਖੀਆਂ ਹੋਣਗੀਆਂ ਤਾਂ ਜੋ ਵੋਟਰ ਬਾਅਦ ਵਿੱਚ ਫਾਰਮ ਜਮ੍ਹਾ ਕਰਵਾ ਸਕੇ।

ਸਿਆਸੀ ਪਾਰਟੀਆਂ ਦੇ ਪ੍ਰਮੁੱਖ ਆਗੂਆਂ ਦੀ ਮੌਜੂਦਗੀ

ਇਸ ਅਹਿਮ ਪ੍ਰਸ਼ਾਸਨਿਕ ਬੈਠਕ ਵਿੱਚ ਵਧੀਕ ਮੁੱਖ ਚੋਣ ਅਧਿਕਾਰੀ ਅਮਨਦੀਪ ਗਰਗ ਅਤੇ ਸੰਯੁਕਤ ਮੁੱਖ ਚੋਣ ਅਧਿਕਾਰੀ ਨਵਨੀਤ ਕੌਰ ਬੱਲ ਸਮੇਤ ਪੰਜਾਬ ਦੀਆਂ ਪ੍ਰਮੁੱਖ ਸਿਆਸੀ ਪਾਰਟੀਆਂ ਦੇ ਨੁਮਾਇੰਦੇ ਸ਼ਾਮਲ ਹੋਏ, ਜਿਨ੍ਹਾਂ ਵਿੱਚ:

• ਆਮ ਆਦਮੀ ਪਾਰਟੀ: ਫੈਰੀ ਸਾਫਟ
• ਕਾਂਗਰਸ: ਹਰਦੀਪ ਸਿੰਘ ਕਿੰਗਰਾ ਅਤੇ ਹੈਪੀ ਖੇੜਾ
• ਭਾਜਪਾ: ਪਰਮਪਾਲ ਕੌਰ
• ਸ਼੍ਰੋਮਣੀ ਅਕਾਲੀ ਦਲ: ਐਡਵੋਕੇਟ ਅਰਸ਼ਦੀਪ ਸਿੰਘ ਕਲੇਅਰ ਅਤੇ ਨਛੱਤਰ ਸਿੰਘ ਗਿੱਲ
• ਬਸਪਾ: ਜਸਵੰਤ ਰਾਏ ਅਤੇ ਹਰਭਜਨ ਸਿੰਘ

ਇਸ ਪੂਰੀ ਮੁਹਿੰਮ ਦਾ ਮੁੱਖ ਮਨੋਰਥ ਆਉਣ ਵਾਲੀਆਂ ਚੋਣਾਂ ਤੋਂ ਪਹਿਲਾਂ ਹਰ ਇੱਕ ਯੋਗ ਨਾਗਰਿਕ ਦਾ ਨਾਮ ਵੋਟਰ ਸੂਚੀ ਵਿੱਚ ਸ਼ਾਮਲ ਕਰਨਾ ਅਤੇ ਕਿਸੇ ਵੀ ਤਰ੍ਹਾਂ ਦੀਆਂ ਤਰੁੱਟੀਆਂ ਨੂੰ ਦੂਰ ਕਰਨਾ ਹੈ।