ਕੰਨ ‘ਚ ਵੜ ਜਾਵੇ ਕੀੜਾ ਤਾਂ ਘਬਰਾਓ ਨਾ, ਤੁਰੰਤ ਕਰੋ ਇਹ ਘਰੇਲੂ ਉਪਾਅ; ਭੁੱਲ ਕੇ ਵੀ ਨਾ ਕਰੋ ਇਹ ਗਲਤੀ

ਸਿਹਤ ਡੈਸਕ:

ਕੰਨ ਵਿੱਚ ਅਚਾਨਕ ਕੋਈ ਕੀੜਾ ਜਾਂ ਮੱਛਰ ਚਲੇ ਜਾਣਾ ਇੱਕ ਬੇਹੱਦ ਪਰੇਸ਼ਾਨ ਕਰਨ ਵਾਲਾ ਅਤੇ ਡਰਾਉਣਾ ਅਨੁਭਵ ਹੋ ਸਕਦਾ ਹੈ। ਇਸ ਕਾਰਨ ਕੰਨ ਵਿੱਚ ਗੁਦਗੁਦੀ, ਦਰਦ, ਭਣਭਣਾਹਟ, ਤੇਜ਼ ਆਵਾਜ਼ ਸੁਣਾਈ ਦੇਣਾ ਜਾਂ ਕੁਝ ਰੇਂਗਣ (ਤੁਰਨ) ਵਰਗਾ ਮਹਿਸੂਸ ਹੋ ਸਕਦਾ ਹੈ। ਅਜਿਹੀ ਸਥਿਤੀ ਵਿੱਚ ਲੋਕ ਅਕਸਰ ਘਬਰਾ ਕੇ ਕੰਨ ਵਿੱਚ ਉਂਗਲ, ਪਿੰਨ, ਮਾਚਿਸ ਦੀ ਤੀਲੀ ਜਾਂ ਕੋਈ ਹੋਰ ਨੁਕੀਲੀ ਚੀਜ਼ ਪਾਉਣ ਲੱਗਦੇ ਹਨ, ਜਿਸ ਨਾਲ ਸਮੱਸਿਆ ਘਟਣ ਦੀ ਬਜਾਏ ਹੋਰ ਵੱਧ ਜਾਂਦੀ ਹੈ।

ਅਜਿਹੀ ਸਥਿਤੀ ਵਿੱਚ ਸਭ ਤੋਂ ਪਹਿਲਾਂ ਸ਼ਾਂਤ ਰਹੋ ਅਤੇ ਜਲਦਬਾਜ਼ੀ ਵਿੱਚ ਕੋਈ ਅਜਿਹਾ ਕਦਮ ਨਾ ਚੁੱਕੋ ਜਿਸ ਨਾਲ ਕੰਨ ਦੇ ਪਰਦੇ ਨੂੰ ਨੁਕਸਾਨ ਪਹੁੰਚੇ। ਕੰਨ ਵਿੱਚੋਂ ਕੀੜਾ ਸੁਰੱਖਿਅਤ ਬਾਹਰ ਕੱਢਣ ਲਈ ਤੁਸੀਂ ਹੇਠਾਂ ਦਿੱਤੇ ਤਰੀਕੇ ਅਪਣਾ ਸਕਦੇ ਹੋ:

1. ਕੰਨ ਨੂੰ ਇੱਕ ਪਾਸੇ ਝੁਕਾਓ

ਜਿਸ ਕੰਨ ਵਿੱਚ ਕੀੜਾ ਗਿਆ ਹੈ, ਆਪਣੇ ਸਿਰ ਨੂੰ ਉਸੀ ਪਾਸੇ ਹੇਠਾਂ ਵੱਲ ਝੁਕਾਓ। ਕਈ ਵਾਰ ਸਿਰ ਨੂੰ ਹੌਲੀ-ਹੌਲੀ ਹਿਲਾਉਣ ਨਾਲ ਕੀੜਾ ਆਪਣੇ ਆਪ ਬਾਹਰ ਨਿਕਲ ਆਉਂਦਾ ਹੈ। ਇਸ ਪ੍ਰਕਿਰਿਆ ਨੂੰ ਥੋੜ੍ਹੀ ਦੇਰ ਤੱਕ ਕਰ ਕੇ ਦੇਖੋ।

2. ਕੋਸੇ ਤੇਲ ਦੀ ਵਰਤੋਂ ਕਰੋ

ਜੇਕਰ ਤੁਹਾਨੂੰ ਪੂਰਾ ਯਕੀਨ ਹੈ ਕਿ ਕੰਨ ਦੇ ਅੰਦਰ ਕੋਈ ਕੀੜਾ ਹੀ ਗਿਆ ਹੈ ਅਤੇ ਕੰਨ ਦਾ ਪਰਦਾ ਫਟਿਆ ਹੋਇਆ (ਜਾਂ ਖ਼ਰਾਬ) ਨਹੀਂ ਹੈ, ਤਾਂ ਤੁਸੀਂ ਕੋਸੇ ਨਾਰੀਅਲ ਤੇਲ, ਬੇਬੀ ਆਇਲ ਜਾਂ ਜੈਤੂਨ ਦੇ ਤੇਲ (Olive Oil) ਦੀਆਂ 2 ਬੂੰਦਾਂ ਕੰਨ ਵਿੱਚ ਪਾ ਸਕਦੇ ਹੋ। ਤੇਲ ਪਾਉਣ ਨਾਲ ਕੀੜਾ ਜਾਂ ਤਾਂ ਮਰ ਜਾਂਦਾ ਹੈ ਜਾਂ ਫਿਰ ਤਰ ਕੇ ਉੱਪਰ ਆ ਜਾਂਦਾ ਹੈ, ਜਿਸ ਨੂੰ ਆਸਾਨੀ ਨਾਲ ਕੱਢਿਆ ਜਾ ਸਕਦਾ ਹੈ।

3. ਨੁਕੀਲੀਆਂ ਚੀਜ਼ਾਂ ਦੀ ਵਰਤੋਂ ਤੋਂ ਬਚੋ

ਕੰਨ ਵਿੱਚ Cotton Bud, ਹੇਅਰਪਿਨ, ਚਿਮਟੀ, ਮਾਚਿਸ ਦੀ ਤੀਲੀ ਜਾਂ ਕੋਈ ਵੀ ਹੋਰ ਨੁਕੀਲੀ ਚੀਜ਼ ਪਾਉਣ ਤੋਂ ਪੂਰੀ ਤਰ੍ਹਾਂ ਬਚੋ। ਅਜਿਹਾ ਕਰਨ ਨਾਲ ਕੀੜਾ ਕੰਨ ਦੇ ਹੋਰ ਅੰਦਰ ਜਾ ਸਕਦਾ ਹੈ, ਕੰਨ ਦੀ ਅੰਦਰੂਨੀ ਚਮੜੀ ਛਿੱਲੀ ਜਾ ਸਕਦੀ ਹੈ ਅਤੇ ਇਨਫੈਕਸ਼ਨ (ਸੰਕਰਮਣ) ਦਾ ਖ਼ਤਰਾ ਵੱਧ ਜਾਂਦਾ ਹੈ।

ਕਦੋਂ ਤੁਰੰਤ ਡਾਕਟਰੀ ਸਹਾਇਤਾ ਲੈਣੀ ਚਾਹੀਦੀ ਹੈ?

ਜੇਕਰ ਤੇਲ ਪਾਉਣ ਜਾਂ ਸਿਰ ਝੁਕਾਉਣ ਤੋਂ ਬਾਅਦ ਵੀ ਕੀੜਾ ਬਾਹਰ ਨਹੀਂ ਨਿਕਲ ਰਿਹਾ, ਤਾਂ ਦੇਰੀ ਕੀਤੇ ਬਿਨਾਂ ਤੁਰੰਤ ਡਾਕਟਰ (ENT Specialist) ਕੋਲ ਜਾਓ। ਇਸ ਤੋਂ ਇਲਾਵਾ, ਜੇਕਰ ਕੰਨ ਵਿੱਚੋਂ ਖੂਨ ਜਾਂ ਪਸ (ਰੇਸ਼ਾ) ਨਿਕਲ ਰਹੀ ਹੋਵੇ ਜਾਂ ਸੁਣਨ ਦੀ ਸਮੱਰਥਾ ਅਚਾਨਕ ਘੱਟ ਗਈ ਹੋਵੇ, ਤਾਂ ਬਿਨਾਂ ਕੋਈ ਘਰੇਲੂ ਨੁਸਖਾ ਅਪਣਾਏ ਸਿੱਧਾ ਹਸਪਤਾਲ ਜਾਣਾ ਚਾਹੀਦੀ ਹੈ।