ਪੰਜਾਬ ਵਿੱਚ ਮੀਂਹ ਤੋਂ ਬਾਅਦ ਬਿਜਲੀ ਦੀ ਮੰਗ 25 ਫ਼ੀਸਦੀ ਘਟੀ
Electricity demand drops in Punjab: ਚੰਡੀਗੜ੍ਹ: ਪੰਜਾਬ ਵਿੱਚ ਪਿਛਲੇ 2-3 ਦਿਨਾਂ ਤੋਂ ਪੈ ਰਹੇ ਮੀਂਹ ਕਾਰਨ ਮੌਸਮ ਸੁਹਾਵਣਾ ਹੋ ਗਿਆ ਹੈ ਅਤੇ ਤਾਪਮਾਨ ਵਿੱਚ ਵੀ 4 ਤੋਂ 5 ਡਿਗਰੀ ਸੈਲਸੀਅਸ ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਇਸ ਦਾ ਸਿੱਧਾ ਅਸਰ ਸੂਬੇ ਦੀ ਬਿਜਲੀ ਦੀ ਮੰਗ ’ਤੇ ਪਿਆ ਹੈ। ਪੰਜਾਬ ਵਿੱਚ ਜਿੱਥੇ ਪਿਛਲੇ ਕਈ ਦਿਨਾਂ ਤੋਂ ਬਿਜਲੀ ਦੀ ਮੰਗ 16 ਹਜ਼ਾਰ ਮੈਗਾਵਾਟ ਤੋਂ ਵੱਧ ਚੱਲ ਰਹੀ ਸੀ, ਉੱਥੇ ਮੀਂਹ ਤੋਂ ਬਾਅਦ ਅੱਜ ਵੱਧ ਤੋਂ ਵੱਧ ਮੰਗ ਲਗਭਗ 12 ਹਜ਼ਾਰ ਮੈਗਾਵਾਟ ਦਰਜ ਕੀਤੀ ਗਈ। ਇਸ ਤਰ੍ਹਾਂ ਬਿਜਲੀ ਦੀ ਮੰਗ ਵਿੱਚ ਕਰੀਬ 25 ਫ਼ੀਸਦੀ ਦੀ ਕਮੀ ਆਈ ਹੈ। ਮੰਗ ਘਟਣ ਨਾਲ ਪਾਵਰਕੌਮ ਦੇ ਅਧਿਕਾਰੀਆਂ ਨੂੰ ਵੀ ਰਾਹਤ ਮਿਲੀ ਹੈ।
6 ਅਤੇ 7 ਅਗਸਤ ਨੂੰ ਬਿਜਲੀ ਦੀ ਮੰਗ ਕਰੀਬ 14 ਹਜ਼ਾਰ ਮੈਗਾਵਾਟ, ਜਦਕਿ 4 ਅਤੇ 5 ਅਗਸਤ ਨੂੰ ਲਗਭਗ 15 ਹਜ਼ਾਰ ਮੈਗਾਵਾਟ ਰਹੀ ਸੀ। ਪਾਵਰਕੌਮ ਮੁਤਾਬਕ 8 ਅਗਸਤ 2025 ਨੂੰ ਮੰਗ 16,461 ਮੈਗਾਵਾਟ ਅਤੇ 8 ਅਗਸਤ 2024 ਨੂੰ 15,442 ਮੈਗਾਵਾਟ ਦਰਜ ਕੀਤੀ ਗਈ ਸੀ।
ਦਰਜਨ ਤੋਂ ਵੱਧ ਸ਼ਹਿਰਾਂ ਵਿੱਚ ਮੀਂਹ
ਅੱਜ ਵੀ ਤੜਕੇ ਤੋਂ ਪੰਜਾਬ ਦੇ ਕਈ ਸ਼ਹਿਰਾਂ ਵਿੱਚ ਮੀਂਹ ਅਤੇ ਕਿਣ-ਮਿਣ ਜਾਰੀ ਰਹੀ। ਦਰਜ ਕੀਤੇ ਗਏ ਮੀਂਹ ਵਿੱਚ ਲੁਧਿਆਣਾ 6 ਐੱਮਐੱਮ, ਪਟਿਆਲਾ 3 ਐੱਮਐੱਮ, ਬਠਿੰਡਾ 7 ਐੱਮਐੱਮ, ਬਰਨਾਲਾ 5 ਐੱਮਐੱਮ, ਫਰੀਦਕੋਟ 3 ਐੱਮਐੱਮ ਅਤੇ ਸੰਗਰੂਰ 4 ਐੱਮਐੱਮ ਸ਼ਾਮਲ ਹਨ। ਫਤਹਿਗੜ੍ਹ ਸਾਹਿਬ, ਫਿਰੋਜ਼ਪੁਰ, ਪਠਾਨਕੋਟ ਅਤੇ ਹੁਸ਼ਿਆਰਪੁਰ ਵਿੱਚ ਵੀ ਕਿਣ-ਮਿਣ ਦਰਜ ਕੀਤੀ ਗਈ। ਸੂਬੇ ਵਿੱਚ ਬਠਿੰਡਾ ਸਭ ਤੋਂ ਗਰਮ ਰਿਹਾ, ਜਿੱਥੇ ਵੱਧ ਤੋਂ ਵੱਧ ਤਾਪਮਾਨ 34 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ।
ਮੁੱਖ ਸ਼ਹਿਰਾਂ ਦਾ ਤਾਪਮਾਨ:
ਚੰਡੀਗੜ੍ਹ: 33.4°C, ਅੰਮ੍ਰਿਤਸਰ: 28.3°C, ਲੁਧਿਆਣਾ: 29°C, ਪਟਿਆਲਾ: 33.2°C, ਪਠਾਨਕੋਟ: 31.5°C, ਫਰੀਦਕੋਟ: 29°C, ਗੁਰਦਾਸਪੁਰ: 30°C, ਨਵਾਂਸ਼ਹਿਰ: 30.1°C, ਬਰਨਾਲਾ: 30.4°C, ਫਤਹਿਗੜ੍ਹ ਸਾਹਿਬ: 31.2°C, ਫਿਰੋਜ਼ਪੁਰ: 29°C, ਹੁਸ਼ਿਆਰਪੁਰ: 28.2°C, ਮੁਹਾਲੀ: 33.9°C, ਸੰਗਰੂਰ: 28.2°C, ਰੂਪਨਗਰ: 31.3°C
ਮੌਸਮ ਵਿਭਾਗ ਵੱਲੋਂ 9 ਅਗਸਤ ਨੂੰ ਪੰਜਾਬ ਵਿੱਚ ਮੀਂਹ ਲਈ ਯੈਲੋ ਅਲਰਟ ਵੀ ਜਾਰੀ ਕੀਤਾ ਗਿਆ ਹੈ।
