ਬੈਂਕ ‘ਚ ਜ਼ਬਰਦਸਤ ਹੰਗਾਮਾ, ਵਿਅਕਤੀ ਨੇ ASI ਦੇ ਜੜੇ ਥੱਪੜ, ਮਾਮੂਲੀ ਗੱਲ ਨੂੰ ਲੈਕੇ ਭਖਿਆ ਵਿਵਾਦ
Chandigarh SBI Bank; ਚੰਡੀਗੜ੍ਹ ਦੇ ਸੈਕਟਰ-23 ਵਿੱਚ ਸਥਿਤ State Bank of India ਦੀ ਸ਼ਾਖਾ ਵਿੱਚ ਬੁੱਧਵਾਰ ਨੂੰ ਉਸ ਸਮੇਂ ਹੰਗਾਮਾ ਹੋ ਗਿਆ ਜਦੋਂ ਏਟੀਐਮ ਮਸ਼ੀਨ ਖਰਾਬ ਹੋਣ ਦੀ ਗੱਲ ਨੂੰ ਲੈ ਕੇ ਇੱਕ ਵਿਅਕਤੀ ਸਿਕਿਊਰਟੀ ਗਾਰਡ ਅਤੇ ਬੈਂਕ ਸਟਾਫ ਨਾਲ ਝਗੜ ਪਿਆ।
ਸੂਚਨਾ ਮਿਲਣ ’ਤੇ ਮੌਕੇ ’ਤੇ ਪਹੁੰਚੇ ਪੁਲਿਸ ਕਰਮਚਾਰੀ ਉਸਨੂੰ ਸਮਝਾ ਕੇ ਬਾਹਰ ਲੈ ਜਾ ਰਹੇ ਸਨ, ਪਰ ਇਸ ਦੌਰਾਨ ਉਸ ਨੇ ਏਐਸਆਈ ਨਾਲ ਹੱਥਾਪਾਈ ਕਰ ਦਿੱਤੀ ਅਤੇ ਉਨ੍ਹਾਂ ਨੂੰ ਥੱਪੜ ਮਾਰ ਦਿੱਤੇ। ਇਸ ਦੌਰਾਨ ਪੁਲਿਸ ਕਰਮਚਾਰੀ ਦੀ ਪੱਗ ਵੀ ਹੇਠਾਂ ਡਿੱਗ ਗਈ।
ਬਾਅਦ ਵਿੱਚ ਮੌਕੇ ’ਤੇ ਮੌਜੂਦ ਲੋਕਾਂ ਅਤੇ ਪੁਲਿਸ ਕਰਮਚਾਰੀਆਂ ਨੇ ਮਿਲ ਕੇ ਦੋਸ਼ੀ ਨੂੰ ਕਾਬੂ ਕਰ ਲਿਆ। ਦੋਸ਼ੀ ਦੀ ਪਹਿਚਾਣ ਸੈਕਟਰ-24 ਦੇ ਰਹਿਣ ਵਾਲੇ ਅਵਤਾਰ ਸਿੰਘ ਵਜੋਂ ਹੋਈ ਹੈ, ਜੋ ਮਾਨਸਿਕ (ਸਾਇਕਿਆਟ੍ਰਿਕ) ਸਮੱਸਿਆ ਨਾਲ ਪੀੜਤ ਹੈ ਅਤੇ ਉਸ ਦਾ ਇਲਾਜ ਚੱਲ ਰਿਹਾ ਹੈ। ਦੋਸ਼ੀ ਦੇ ਭਰਾ ਵੱਲੋਂ ਮਾਫ਼ੀ ਮੰਗਣ ਤੋਂ ਬਾਅਦ ਪੁਲਿਸ ਨੇ ਕੋਈ ਮਾਮਲਾ ਦਰਜ ਨਹੀਂ ਕੀਤਾ।
ਪੈਸੇ ਕਢਾਉਣ ਲਈ ਆਇਆ ਸੀ ਬੈਂਕ
ਜਾਣਕਾਰੀ ਮੁਤਾਬਕ ਅਵਤਾਰ ਸਿੰਘ ਬੁੱਧਵਾਰ ਨੂੰ ਸੈਕਟਰ-23 ਸਥਿਤ State Bank of India ਦੇ ਏਟੀਐਮ ਵਿੱਚ ਪੈਸੇ ਕਢਾਉਣ ਆਇਆ ਸੀ। ਉੱਥੇ ਮੌਜੂਦ ਸਿਕਿਊਰਟੀ ਗਾਰਡ ਨੇ ਉਸਨੂੰ ਦੱਸਿਆ ਕਿ ਏਟੀਐਮ ਮਸ਼ੀਨ ਖਰਾਬ ਹੈ ਅਤੇ ਉਹ ਨੇੜਲੇ ਕਿਸੇ ਹੋਰ ਏਟੀਐਮ ਤੋਂ ਪੈਸੇ ਕੱਢ ਸਕਦਾ ਹੈ।
ਇਸ ਗੱਲ ਨੂੰ ਲੈ ਕੇ ਅਵਤਾਰ ਸਿੰਘ ਪਹਿਲਾਂ ਸਿਕਿਊਰਟੀ ਗਾਰਡ ਨਾਲ ਉਲਝ ਗਿਆ ਅਤੇ ਫਿਰ ਬੈਂਕ ਦੇ ਅੰਦਰ ਜਾ ਕੇ ਸਟਾਫ ਨਾਲ ਵੀ ਬਹਿਸ ਕਰਨ ਲੱਗ ਪਿਆ। ਹਾਲਾਤ ਵਿਗੜਦੇ ਦੇਖ ਬੈਂਕ ਮੈਨੇਜਰ ਨੇ ਪੁਲਿਸ ਕੰਟਰੋਲ ਰੂਮ ਨੂੰ ਸੂਚਿਤ ਕਰ ਦਿੱਤਾ।
ਬੈਂਕ ਤੋਂ ਬਾਹਰ ਆਉਂਦੇ ਹੀ ਮਾਰਕੁੱਟ
ਸੂਚਨਾ ਮਿਲਣ ’ਤੇ ਏਰੀਆ ਬੀਟ ਇੰਚਾਰਜ ਏਐਸਆਈ ਲਖਬੀਰ ਸਿੰਘ ਮੌਕੇ ’ਤੇ ਪਹੁੰਚੇ। ਉਹ ਅਵਤਾਰ ਸਿੰਘ ਨੂੰ ਸਮਝਾ ਕੇ ਬੈਂਕ ਤੋਂ ਬਾਹਰ ਲੈ ਜਾ ਰਹੇ ਸਨ ਕਿ ਅਚਾਨਕ ਦੋਸ਼ੀ ਨੇ ਗਾਲਾਂ ਕੱਢਣੀਆਂ ਸ਼ੁਰੂ ਕਰ ਦਿੱਤੀਆਂ ਅਤੇ ਏਐਸਆਈ ਨੂੰ ਥੱਪੜ ਮਾਰ ਦਿੱਤੇ। ਇਸ ਦੌਰਾਨ ਉਨ੍ਹਾਂ ਦੀ ਪੱਗ ਵੀ ਹੇਠਾਂ ਡਿੱਗ ਗਈ।
ਘਟਨਾ ਦੇਖ ਕੇ ਮੌਕੇ ’ਤੇ ਮੌਜੂਦ ਲੋਕਾਂ ਨੇ ਦੋਸ਼ੀ ਨੂੰ ਫੜ ਲਿਆ। ਕੁਝ ਸਮੇਂ ਬਾਅਦ ਹੋਰ ਪੁਲਿਸ ਕਰਮਚਾਰੀ ਵੀ ਮੌਕੇ ’ਤੇ ਪਹੁੰਚ ਗਏ ਅਤੇ ਦੋਸ਼ੀ ਨੂੰ ਕਾਬੂ ਕਰਕੇ ਪੁਲਿਸ ਵਾਹਨ ਵਿੱਚ ਬਿਠਾ ਦਿੱਤਾ। ਇਸ ਦੌਰਾਨ ਦੋਸ਼ੀ ਜ਼ਿੱਦ ਕਰਨ ਲੱਗ ਪਿਆ ਕਿ ਉਹ ਗੱਡੀ ਦੀ ਅੱਗੇ ਵਾਲੀ ਸੀਟ ’ਤੇ ਬੈਠੇਗਾ ਅਤੇ ਗੱਡੀ ਵੀ ਖੁਦ ਚਲਾਏਗਾ, ਪਰ ਪੁਲਿਸ ਕਰਮਚਾਰੀਆਂ ਨੇ ਉਸਨੂੰ ਸਮਝਾ ਕੇ ਪਿੱਛੇ ਵਾਲੀ ਸੀਟ ’ਤੇ ਬਿਠਾ ਦਿੱਤਾ।
ਭਰਾ ਨੇ ਮਾਫ਼ੀ ਮੰਗੀ, ਮਾਮਲਾ ਦਰਜ ਨਹੀਂ
ਥਾਣਾ-17 ਪੁਲਿਸ ਦੇ ਮੁਤਾਬਕ ਇਸ ਮਾਮਲੇ ਵਿੱਚ ਕੋਈ ਕਾਨੂੰਨੀ ਕਾਰਵਾਈ ਨਹੀਂ ਕੀਤੀ ਗਈ, ਕਿਉਂਕਿ ਅਵਤਾਰ ਸਿੰਘ ਮਾਨਸਿਕ ਬਿਮਾਰੀ ਨਾਲ ਪੀੜਤ ਹੈ ਅਤੇ ਉਹ ਆਪਣੀ ਦਵਾ ਲੈਣਾ ਭੁੱਲ ਗਿਆ ਸੀ। ਬੈਂਕ ਮੈਨੇਜਰ ਵੱਲੋਂ ਵੀ ਕੋਈ ਸ਼ਿਕਾਇਤ ਨਹੀਂ ਦਿੱਤੀ ਗਈ। ਦੋਸ਼ੀ ਦੇ ਭਰਾ ਗੁਰਮੀਤ ਸਿੰਘ ਵੱਲੋਂ ਮੌਕੇ ’ਤੇ ਪਹੁੰਚ ਕੇ ਮਾਫ਼ੀ ਮੰਗਣ ਤੋਂ ਬਾਅਦ ਪੁਲਿਸ ਨੇ ਵੀ ਕੋਈ ਕੇਸ ਦਰਜ ਨਹੀਂ ਕੀਤਾ।
