ਅੰਤਰਰਾਸ਼ਟਰੀ ਕਬੱਡੀ ਖਿਡਾਰੀ ਸ਼ੀਲੂ ਬਲਹਾਰਾ ‘ਤੇ ਟੁੱਟਿਆ ਦੁੱਖਾਂ ਦਾ ਪਹਾੜ, ਪਤਨੀ ਨੇ ਕੀਤੀ ਖੁਦਕੁਸ਼ੀ
Sheelu Balhara WifeSuicide Case; ਰੋਹਤਕ ਦੇ ਅੰਤਰਰਾਸ਼ਟਰੀ ਕਬੱਡੀ ਖਿਡਾਰੀ ਸ਼ੀਲੂ ਬਲਹਾਰਾ ਦੀ ਪਤਨੀ ਮੁਸਕਾਨ ਬਲਹਾਰਾ (23) ਨੇ ਸ਼ੁੱਕਰਵਾਰ ਦੁਪਹਿਰ ਖੁਦਕੁਸ਼ੀ ਕਰ ਲਈ। ਜਾਣਕਾਰੀ ਮੁਤਾਬਕ ਮੁਸਕਾਨ ਨੇ ਆਪਣੇ ਘਰ ਵਿੱਚ ਫਾਹਾ ਲਗਾ ਕੇ ਜਾਨ ਦੇ ਦਿੱਤੀ। ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਬਹੁ ਅਕਬਰਪੁਰ ਥਾਣਾ ਪੁਲਿਸ ਮੌਕੇ ‘ਤੇ ਪਹੁੰਚੀ ਅਤੇ ਫੋਰੈਂਸਿਕ ਟੀਮ ਨੂੰ ਵੀ ਜਾਂਚ ਲਈ ਬੁਲਾਇਆ ਗਿਆ।
ਫਿਲਹਾਲ ਖੁਦਕੁਸ਼ੀ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ ਹੈ। ਪੁਲਿਸ ਵੱਲੋਂ ਮਾਮਲੇ ਦੀ ਹਰ ਪੱਖ ਤੋਂ ਜਾਂਚ ਕੀਤੀ ਜਾ ਰਹੀ ਹੈ। ਮੁਸਕਾਨ ਮਹਮ ਦੇ ਪਿੰਡ ਫਰਮਾਨਾ ਦੀ ਰਹਿਣ ਵਾਲੀ ਸੀ। ਉਸ ਦਾ ਵਿਆਹ ਦਸੰਬਰ 2023 ਵਿੱਚ ਕਬੱਡੀ ਖਿਡਾਰੀ ਸ਼ੀਲੂ ਬਲਹਾਰਾ ਨਾਲ ਹੋਇਆ ਸੀ। ਪਿਛਲੇ ਸਾਲ ਨਵੰਬਰ ਵਿੱਚ ਦੋਵਾਂ ਦੇ ਘਰ ਪੁੱਤਰ ਹਾਰਦਿਕ ਦਾ ਜਨਮ ਹੋਇਆ ਸੀ।
ਮੌਤ ਤੋਂ ਇੱਕ ਦਿਨ ਪਹਿਲਾਂ ਮੁਸਕਾਨ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਗਾਇਕ ਦਿਲਜੀਤ ਦੋਸਾਂਝ ਦੇ ਗੀਤ “ਓ ਘੁੰਮੇਆ ਤੂੰ ਕਰ ਨੀ ਪਟੋਲਾ ਬਣਕੇ, ਰਹਿਆ ਕਰ ਬਿੱਲੋ ਥੋੜ੍ਹਾ ਬਣ-ਠਣ ਕੇ” ‘ਤੇ ਇੱਕ ਰੀਲ ਵੀ ਸਾਂਝੀ ਕੀਤੀ ਸੀ।
ਸ਼ੀਲੂ ਨੇ ਪੌਡਕਾਸਟ ‘ਚ ਵਿਆਹ ਬਾਰੇ ਕੀ ਕਿਹਾ ਸੀ?
ਇੱਕ ਪੌਡਕਾਸਟ ਦੌਰਾਨ ਸ਼ੀਲੂ ਬਲਹਾਰਾ ਨੇ ਦੱਸਿਆ ਸੀ ਕਿ ਉਸ ਦਾ ਜਨਮ ਸਾਲ 2003 ਵਿੱਚ ਹੋਇਆ ਸੀ। ਉਸ ਦੀ ਮਾਂ ਲੰਬੇ ਸਮੇਂ ਤੋਂ ਬਿਮਾਰ ਰਹਿੰਦੀ ਹੈ ਅਤੇ ਪੈਰਾਂ ਤੇ ਕਮਰ ਦੀ ਸਮੱਸਿਆ ਨਾਲ ਜੂਝ ਰਹੀ ਹੈ। ਇਸੇ ਕਾਰਨ ਪਰਿਵਾਰ ਨੇ ਛੋਟੀ ਉਮਰ ਵਿੱਚ ਹੀ ਉਸ ਦਾ ਵਿਆਹ ਕਰਵਾ ਦਿੱਤਾ। ਸ਼ੀਲੂ ਨੇ ਕਿਹਾ ਸੀ ਕਿ ਉਹ ਆਪਣੇ ਵਿਆਹਸ਼ੁਦਾ ਜੀਵਨ ਤੋਂ ਖੁਸ਼ ਹਨ।
‘ਹਰਿਆਣਾ ਆਲਾ ਚੀਤਾ’ ਦੇ ਨਾਂ ਨਾਲ ਮਸ਼ਹੂਰ ਹੈ ਸ਼ੀਲੂ
ਰੋਹਤਕ ਦੇ ਬਹੁ ਅਕਬਰਪੁਰ ਪਿੰਡ ਦਾ ਰਹਿਣ ਵਾਲਾ ਸ਼ੀਲੂ ਬਲਹਾਰਾ ਅੰਤਰਰਾਸ਼ਟਰੀ ਪੱਧਰ ਦਾ ਕਬੱਡੀ ਖਿਡਾਰੀ ਹੈ। ਉਸ ਦੇ ਪਰਿਵਾਰ ਵਿੱਚ ਪਿਤਾ ਸੁਰਿੰਦਰ ਬਲਹਾਰਾ, ਮਾਤਾ ਨਿਸ਼ਾ ਦੇਵੀ, ਦਾਦੀ, ਇੱਕ ਭੈਣ ਅਤੇ ਭਰਾ ਮਨੀਸ਼ ਹਨ। ਪਿਤਾ ਕਿਸਾਨ ਹਨ, ਜਦਕਿ ਭਰਾ ਮਨੀਸ਼ ਵੀ ਕਬੱਡੀ ਖੇਡਦਾ ਹੈ।
ਸ਼ੀਲੂ ਨੇ ਪਹਿਲਾਂ ਜੂਡੋ ਅਤੇ ਫਿਰ ਪਹਿਲਵਾਨੀ ਕੀਤੀ, ਪਰ ਛੇ ਸਾਲ ਦੀ ਉਮਰ ਤੋਂ ਕਬੱਡੀ ਖੇਡਣੀ ਸ਼ੁਰੂ ਕਰ ਦਿੱਤੀ। ਪੰਜਾਬ ਸਮੇਤ ਦੇਸ਼-ਵਿਦੇਸ਼ ਵਿੱਚ ਉਹ “ਹਰਿਆਣਾ ਆਲਾ ਚੀਤਾ” ਦੇ ਨਾਂ ਨਾਲ ਜਾਣਿਆ ਜਾਂਦਾ ਹੈ। ਉਹ ਕਬੱਡੀ ਵਿੱਚ ਕੈਚਰ ਵਜੋਂ ਖੇਡਦਾ ਹੈ ਅਤੇ ਪਿਛਲੇ ਸਾਲ ਅਮਰੀਕਾ ਵਿੱਚ ਹੋਏ ਕਬੱਡੀ ਟੂਰਨਾਮੈਂਟ ਵਿੱਚ ਬੈਸਟ ਕੈਚਰ ਦਾ ਖਿਤਾਬ ਵੀ ਜਿੱਤ ਚੁੱਕਾ ਹੈ।
ਕਈ ਟ੍ਰੈਕਟਰ ਅਤੇ ਬੁਲੇਟ ਜਿੱਤ ਚੁੱਕਾ ਹੈ
ਸ਼ੀਲੂ ਬਲਹਾਰਾ ਕਬੱਡੀ ਮੁਕਾਬਲਿਆਂ ਵਿੱਚ ਹੁਣ ਤੱਕ 24 ਟ੍ਰੈਕਟਰ, 50 ਤੋਂ ਵੱਧ ਬੁਲੇਟ ਮੋਟਰਸਾਈਕਲ ਅਤੇ ਇੱਕ ਕੰਬਾਈਨ ਜਿੱਤ ਚੁੱਕਾ ਹੈ। ਉਹ ਜਿੱਤੀਆਂ ਹੋਈਆਂ ਬੁਲੇਟਾਂ ਨੂੰ ਵੇਚਣ ਦੀ ਬਜਾਏ ਆਪਣੇ ਜਾਂ ਦੋਸਤਾਂ ਦੀ ਵਰਤੋਂ ਲਈ ਰੱਖਦਾ ਹੈ, ਜਦਕਿ ਟ੍ਰੈਕਟਰ ਅਤੇ ਹੋਰ ਖੇਤੀਬਾੜੀ ਸਾਜ਼ੋ-ਸਾਮਾਨ ਵੇਚ ਦਿੰਦਾ ਹੈ।
