IPL 2026: ਲਖਨਊ ਨੇ ਵਿਗਾੜਿਆ ਚੇਨਈ ਸੁਪਰ ਕਿੰਗਜ਼ ਦਾ ਖੇਡ, ਇਕਾਨਾ ‘ਚ 7 ਵਿਕਟਾਂ ਨਾਲ ਦਿੱਤੀ ਕਰਾਰੀ ਮਾਤ
LSG vs CSK IPL 2026: ਆਈਪੀਐਲ 2026 ਦੇ 59ਵੇਂ ਮੈਚ ਵਿੱਚ ਲਖਨਊ ਸੁਪਰ ਜਾਇੰਟਸ ਨੇ ਚੇਨਈ ਸੁਪਰ ਕਿੰਗਜ਼ ਨੂੰ ਸ਼ਾਨਦਾਰ ਜਿੱਤ ਦੇ ਨਾਲ ਧੂੜ ਚੱਟਾ ਦਿੱਤੀ ਹੈ। ਇਸ ਮੈਚ ਵਿੱਚ ਲਖਨਊ ਸੁਪਰ ਜਾਇੰਟਸ ਨੇ 7 ਵਿਕਟਾਂ ਨਾਲ ਬਾਜ਼ੀ ਮਾਰੀ ਅਤੇ ਸੀਜ਼ਨ ਦੀ ਚੌਥੀ ਜਿੱਤ ਹਾਸਲ ਕੀਤੀ। ਉੱਥੇ ਹੀ, ਚੇਨਈ ਸੁਪਰ ਕਿੰਗਜ਼ ਨੂੰ ਇਹ ਹਾਰ ਕਾਫ਼ੀ ਭਾਰੀ ਪਈ ਹੈ, ਉਹ ਹੁਣ ਪਲੇਆਫ ਦੀ ਰੇਸ ਵਿੱਚ ਪਛੜ ਗਈ ਹੈ। ਚੇਨਈ ਸੁਪਰ ਕਿੰਗਜ਼ ਦੀ ਗੇਂਦਬਾਜ਼ੀ ਇਸ ਮੁਕਾਬਲੇ ਵਿੱਚ ਪੂਰੀ ਤਰ੍ਹਾਂ ਫ਼ਲਾਪ ਰਹੀ।
CSK ਨੇ ਬੋਰਡ ‘ਤੇ ਲਗਾਏ 187 ਰਨ
ਲਖਨਊ ਦੇ ਇਕਾਨਾ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਵਿੱਚ ਰਿਸ਼ਭ ਪੰਤ ਦੀ ਟੀਮ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਦਾ ਫ਼ੈਸਲਾ ਕੀਤਾ। ਪਰ ਚੇਨਈ ਦੀ ਸ਼ੁਰੂਆਤ ਖ਼ਰਾਬ ਰਹੀ। ਕਪਤਾਨ ਰਿਤੂਰਾਜ ਗਾਇਕਵਾੜ 13 ਰਨ ਬਣਾ ਕੇ ਆਕਾਸ਼ ਸਿੰਘ ਦੀ ਗੇਂਦ ‘ਤੇ ਆਊਟ ਹੋ ਗਏ। ਸੰਜੂ ਸੈਮਸਨ ਨੇ 20 ਰਨ ਬਣਾਏ ਪਰ ਉਹ ਵੀ ਆਕਾਸ਼ ਸਿੰਘ ਦਾ ਦੂਜਾ ਸ਼ਿਕਾਰ ਬਣੇ। ਪਾਵਰਪਲੇ ਵਿੱਚ ਹੀ ਦੋ ਵਿਕਟਾਂ ਗੁਆਉਣ ਦੇ ਬਾਵਜੂਦ ਸੀਐਸਕੇ ਨੇ ਅੱਛੀ ਵਾਪਸੀ ਕੀਤੀ।
ਕਾਰਤਿਕ ਸ਼ਰਮਾ, ਦੇਵਾਲਡ ਬ੍ਰੇਵਿਸ ਅਤੇ ਸ਼ਿਵਮ ਦੁਬੇ ਨੇ ਆਕ੍ਰਾਮਕ ਬੱਲੇਬਾਜ਼ੀ ਕੀਤੀ, ਜਿਸ ਦੇ ਚਲਦੇ ਸੀਐਸਕੇ ਨੇ 20 ਓਵਰਾਂ ਵਿੱਚ 5 ਵਿਕਟਾਂ ਖੋਹ ਕੇ 187 ਰਨ ਬਣਾਏ। ਕਾਰਤਿਕ ਸ਼ਰਮਾ ਨੇ ਸਭ ਤੋਂ ਜ਼ਿਆਦਾ 71 ਰਨ ਬਣਾਏ। ਉੱਥੇ ਹੀ, ਦੁਬੇ 16 ਗੇਂਦਾਂ ‘ਤੇ 32 ਰਨ ਬਣਾ ਕੇ ਅਜੇਤੂ ਰਹੇ। ਬ੍ਰੇਵਿਸ ਨੇ ਵੀ 25 ਰਨ ਠੋਕੇ। ਲਖਨਊ ਵੱਲੋਂ ਆਕਾਸ਼ ਸਿੰਘ ਨੇ ਸਭ ਤੋਂ ਜ਼ਿਆਦਾ 3 ਵਿਕਟਾਂ ਲਈਆਂ, ਜੋ ਇਸ ਸੀਜ਼ਨ ਵਿੱਚ ਪਹਿਲੀ ਵਾਰ ਮੁਕਾਬਲਾ ਖੇਡਣ ਉੱਤਰੇ ਸਨ। ਉੱਥੇ ਹੀ, ਮੁਹੰਮਦ ਸ਼ਮੀ ਅਤੇ ਸ਼ਾਹਬਾਜ਼ ਅਹਿਮਦ ਨੇ 1-1 ਸਫ਼ਲਤਾ ਆਪਣੇ ਨਾਮ ਕੀਤੀ, ਜਿਸ ਦੇ ਚਲਦੇ ਲਖਨਊ ਦੀ ਟੀਮ ਸੀਐਸਕੇ ਨੂੰ ਇਸ ਸਕੋਰ ‘ਤੇ ਰੋਕਣ ਵਿੱਚ ਕਾਮਯਾਬ ਰਹੀ।
ਮਿਚੇਲ ਮਾਰਸ਼-ਜੌਸ਼ ਇੰਗਲਿਸ ਦਾ ਤੂਫ਼ਾਨ
188 ਰਨਾਂ ਦੇ ਟਾਰਗੇਟ ਦਾ ਪਿੱਛਾ ਕਰਦੇ ਹੋਏ ਲਖਨਊ ਦੀ ਓਪਨਿੰਗ ਜੋੜੀ ਮਿਚੇਲ ਮਾਰਸ਼ ਅਤੇ ਜੌਸ਼ ਇੰਗਲਿਸ ਨੇ ਆਕ੍ਰਾਮਕ ਸ਼ੁਰੂਆਤ ਦਿੱਤੀ। ਟੀਮ ਨੇ ਸ਼ੁਰੂਆਤੀ ਓਵਰਾਂ ਵਿੱਚ ਤੇਜ਼ ਰਨ ਬਣਾਏ ਅਤੇ ਵਿਕਟ ਵੀ ਨਹੀਂ ਗੁਆਈ। ਦੋਵਾਂ ਖਿਡਾਰੀਆਂ ਨੇ ਪਹਿਲੀ ਵਿਕਟ ਲਈ 135 ਰਨ ਜੋੜੇ, ਜਿਸ ਨੇ ਮੁਕਾਬਲੇ ਨੂੰ ਇੱਕਤਰਫ਼ਾ ਕਰ ਦਿੱਤਾ। ਮਿਚੇਲ ਮਾਰਸ਼ ਨੇ 38 ਗੇਂਦਾਂ ‘ਤੇ 236.84 ਦੇ ਸਟ੍ਰਾਈਕ ਰੇਟ ਨਾਲ 90 ਰਨ ਠੋਕੇ, ਜਿਸ ਵਿੱਚ 9 ਚੌਕੇ ਅਤੇ 7 ਛੱਕੇ ਸ਼ਾਮਲ ਰਹੇ। ਉੱਥੇ ਹੀ, ਇੰਗਲਿਸ ਨੇ 36 ਰਨਾਂ ਦਾ ਯੋਗਦਾਨ ਦਿੱਤਾ।
ਇਸ ਤੋਂ ਬਾਅਦ ਨਿਕੋਲਸ ਪੂਰਨ ਨੇ 17 ਗੇਂਦਾਂ ‘ਤੇ ਅਜੇਤੂ 32 ਰਨ ਬਣਾਏ, ਜਿਸ ਦੇ ਚਲਦੇ ਲਖਨਊ ਨੇ 16.4 ਓਵਰਾਂ ਵਿੱਚ ਹੀ 3 ਵਿਕਟਾਂ ਦੇ ਨੁਕਸਾਨ ‘ਤੇ ਟਾਰਗੇਟ ਹਾਸਲ ਕਰ ਲਿਆ। ਪਲੇਆਫ ਦੀ ਰੇਸ ਨੂੰ ਦੇਖਦੇ ਹੋਏ ਚੇਨਈ ਸੁਪਰ ਕਿੰਗਜ਼ ਲਈ ਇਹ ਇੱਕ ਵੱਡਾ ਝਟਕਾ ਹੈ। ਹੁਣ ਉਸ ਦੇ 2 ਮੁਕਾਬਲੇ ਹੀ ਬਾਕੀ ਬਚੇ ਹਨ, ਜੋ ‘ਕਰੋ ਜਾਂ ਮਰੋ’ ਵਰਗੇ ਰਹਿਣ ਵਾਲੇ ਹਨ। ਉਸ ਦੇ ਫਿਲਹਾਲ 12 ਮੈਚਾਂ ਵਿੱਚ 12 ਪੁਆਇੰਟਸ ਹਨ ਅਤੇ ਨੈੱਟ ਰਨ ਰੇਟ ਡਿੱਗ ਕੇ 0.027 ਤੱਕ ਪਹੁੰਚ ਗਿਆ ਹੈ।
