ਲੁਧਿਆਣਾ ਸਕੂਲ ਵਿਦਿਆਰਥਣ ਛੇੜਛਾੜ ਮਾਮਲਾ: ਆਰੋਪੀ ਦੀ ਹਰਕਤ ਵਾਲੀ CCTV ਫੁਟੇਜ ਆਈ ਸਾਹਮਣੇ

Ludhiana School Student Harassment; ਲੁਧਿਆਣਾ ਦੇ ਇੱਕ ਨਿੱਜੀ ਸਕੂਲ ਵਿੱਚ 16 ਸਾਲਾ ਵਿਦਿਆਰਥਣ ਨਾਲ ਕਥਿਤ ਛੇੜਛਾੜ ਦਾ ਸੀਸੀਟੀਵੀ ਫੁਟੇਜ ਸਾਹਮਣੇ ਆਇਆ ਹੈ। ਫੁਟੇਜ ਵਿੱਚ ਇੱਕ ਨੌਜਵਾਨ ਵਿਦਿਆਰਥਣ ਨੂੰ ਜ਼ਬਰਦਸਤੀ ਚੁੰਮਦਾ ਦਿਖਾਈ ਦੇ ਰਿਹਾ ਹੈ। ਵਿਦਿਆਰਥਣ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੋਸ਼ ਲਾਇਆ ਹੈ ਕਿ ਸਕੂਲ ਦੇ ਪਿਊਨ ਨੇ ਉਸ ਨੂੰ ਜ਼ਬਰਦਸਤੀ ਚੁੰਮਿਆ ਅਤੇ ਗ਼ਲਤ ਤਰੀਕੇ ਨਾਲ ਛੂਹਿਆ।

ਵਿਦਿਆਰਥਣ ਨੇ ਇਹ ਵੀ ਦੋਸ਼ ਲਾਇਆ ਕਿ ਪਿਊਨ ਨੇ ਛੇੜਛਾੜ ਦੀ ਸੀਸੀਟੀਵੀ ਫੁਟੇਜ ਸਕੂਲ ਤੋਂ ਹਾਸਲ ਕਰ ਲਈ ਸੀ। ਇਸ ਤੋਂ ਬਾਅਦ ਉਹ ਇਹ ਫੁਟੇਜ ਆਪਣੇ ਦੋਸਤਾਂ ਨੂੰ ਦਿਖਾ ਕੇ ਵਿਦਿਆਰਥਣ ਨੂੰ ਬਦਨਾਮ ਕਰ ਰਿਹਾ ਸੀ।

ਪੀੜਤਾ ਮੁਤਾਬਕ, ਉਹ ਕਲਾਸ ਟੀਚਰ ਦੇ ਦਫ਼ਤਰ ਵਿੱਚ ਕਿਤਾਬ ਲੈਣ ਗਈ ਸੀ। ਇਸ ਦੌਰਾਨ ਇਕੱਲੀ ਦੇਖ ਕੇ ਪਿਊਨ ਨੇ ਉਸ ਨਾਲ ਕਥਿਤ ਤੌਰ ’ਤੇ ਇਹ ਹਰਕਤ ਕੀਤੀ। ਵਿਦਿਆਰਥਣ ਦੀ ਸ਼ਿਕਾਇਤ ਦੇ ਆਧਾਰ ’ਤੇ ਥਾਣਾ ਟਿੱਬਾ ਦੀ ਪੁਲਿਸ ਨੇ ਮੁਲਜ਼ਮ ਵਿਰੁੱਧ ਪੋਕਸੋ ਐਕਟ ਤਹਿਤ ਮਾਮਲਾ ਦਰਜ ਕਰਕੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ।

ਐਤਵਾਰ ਨੂੰ ਮੁਲਜ਼ਮ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿਸ ਤੋਂ ਬਾਅਦ ਉਸ ਨੂੰ ਜੇਲ੍ਹ ਭੇਜ ਦਿੱਤਾ ਗਿਆ। ਮੁਲਜ਼ਮ ਦੀ ਪਛਾਣ ਪ੍ਰਿੰਸ ਪਾਲ ਵਜੋਂ ਹੋਈ ਹੈ, ਜੋ ਸਰਦਾਰ ਨਗਰ ਦੇ ਬਸਤੀ ਜੋਧੇਵਾਲ ਇਲਾਕੇ ਦੀ ਗਲੀ ਨੰਬਰ-1 ਦਾ ਰਹਿਣ ਵਾਲਾ ਹੈ।

ਸੀਸੀਟੀਵੀ ਫੁਟੇਜ ਵਿੱਚ ਦਿਖੀ ਕਥਿਤ ਹਰਕਤ

ਸਾਹਮਣੇ ਆਏ ਲਗਭਗ 55 ਸਕਿੰਟ ਦੇ ਸੀਸੀਟੀਵੀ ਫੁਟੇਜ ਵਿੱਚ ਵਿਦਿਆਰਥਣ ਸਕੂਲ ਦੇ ਦਫ਼ਤਰ ਵਿੱਚ ਕੰਧ ਨਾਲ ਲੱਗੀ ਡੈਕ ਵਿੱਚੋਂ ਕਿਤਾਬ ਕੱਢਦੀ ਦਿਖਾਈ ਦਿੰਦੀ ਹੈ। ਇਸੇ ਦੌਰਾਨ ਪਿਊਨ ਵੀ ਦਫ਼ਤਰ ਵਿੱਚ ਦਾਖ਼ਲ ਹੁੰਦਾ ਹੈ ਅਤੇ ਵਿਦਿਆਰਥਣ ਨਾਲ ਕੁਝ ਗੱਲ ਕਰਦਾ ਹੈ।

ਫੁਟੇਜ ਮੁਤਾਬਕ, ਵਿਦਿਆਰਥਣ ਇੱਕ ਕਿਤਾਬ ਡੈਕ ਵਿੱਚ ਰੱਖਦੀ ਹੈ ਅਤੇ ਪਿਊਨ ਨੂੰ ਵੀ ਉੱਥੇ ਕੁਝ ਰੱਖਣ ਲਈ ਦਿੰਦੀ ਹੈ। ਇਸ ਤੋਂ ਬਾਅਦ ਜਦੋਂ ਉਹ ਆਪਣੀਆਂ ਕਿਤਾਬਾਂ ਲੈ ਕੇ ਜਾਣ ਲੱਗਦੀ ਹੈ, ਤਾਂ ਪਿਊਨ ਕਥਿਤ ਤੌਰ ’ਤੇ ਪਿੱਛਿਓਂ ਉਸ ਨੂੰ ਫੜ ਲੈਂਦਾ ਹੈ ਅਤੇ ਕੰਧ ਤੇ ਅਲਮਾਰੀ ਵਿਚਕਾਰ ਦਬਾ ਕੇ ਚੁੰਮਦਾ ਹੈ।

ਵਿਦਿਆਰਥਣ ਉਸ ਨੂੰ ਆਪਣੇ ਤੋਂ ਦੂਰ ਧੱਕਦੀ ਹੈ ਅਤੇ ਬਾਹਰ ਜਾਣ ਦੀ ਕੋਸ਼ਿਸ਼ ਕਰਦੀ ਹੈ। ਫੁਟੇਜ ਵਿੱਚ ਪਿਊਨ ਉਸ ਦੇ ਪਿੱਛੇ ਜਾਂਦਾ ਅਤੇ ਉਸ ਦਾ ਹੱਥ ਫੜਨ ਦੀ ਕੋਸ਼ਿਸ਼ ਕਰਦਾ ਦਿਖਾਈ ਦਿੰਦਾ ਹੈ। ਇਸ ਤੋਂ ਬਾਅਦ ਵਿਦਿਆਰਥਣ ਤੇਜ਼ੀ ਨਾਲ ਦਫ਼ਤਰ ਵਿੱਚੋਂ ਬਾਹਰ ਨਿਕਲ ਜਾਂਦੀ ਹੈ।

ਪੁਲਿਸ ਨੇ ਵਿਦਿਆਰਥਣ ਦੀ ਸ਼ਿਕਾਇਤ ਦੇ ਆਧਾਰ ’ਤੇ ਮਾਮਲਾ ਦਰਜ ਕਰਕੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਮਾਮਲੇ ਦੀ ਜਾਂਚ ਜਾਰੀ ਹੈ।