ਨੇਪਾਲ ਹੜ੍ਹ: ਲਾਪਤਾ ਲੋਕਾਂ ਦੀ ਗਿਣਤੀ 2,500 ਦੇ ਨੇੜੇ, 586 ਲਾਸ਼ਾਂ ਬਰਾਮਦ; ਤਿੱਬਤ ‘ਚ 400 ਭਾਰਤੀ ਫਸੇ
Nepal floods: more than 2500 people missing: ਕਾਠਮੰਡੂ: ਨੇਪਾਲ-ਤਿੱਬਤ ਵਿੱਚ 26 ਅਗਸਤ ਨੂੰ ਆਏ ਭਿਆਨਕ ਹੜ੍ਹਾਂ ਤੋਂ ਬਾਅਦ ਤਬਾਹੀ ਦਾ ਮੰਜ਼ਰ ਅਜੇ ਵੀ ਜਾਰੀ ਹੈ। ਹੜ੍ਹ ਕਾਰਨ ਲਾਪਤਾ ਲੋਕਾਂ ਦੀ ਗਿਣਤੀ ਲਗਭਗ 2,500 ਤੱਕ ਪਹੁੰਚ ਗਈ ਹੈ, ਜਦਕਿ ਹੁਣ ਤੱਕ 586 ਲਾਸ਼ਾਂ ਬਰਾਮਦ ਕੀਤੀਆਂ ਜਾ ਚੁੱਕੀਆਂ ਹਨ।
ਨੇਪਾਲ ‘ਚ 320 ਭਾਰਤੀਆਂ ਨਾਲ ਸੰਪਰਕ ਨਹੀਂ
ਭਾਰਤੀ ਵਿਦੇਸ਼ ਮੰਤਰਾਲੇ (MEA) ਮੁਤਾਬਕ ਨੇਪਾਲ ਵਿੱਚ ਅਜੇ ਵੀ 320 ਭਾਰਤੀ ਨਾਗਰਿਕਾਂ ਨਾਲ ਸੰਪਰਕ ਨਹੀਂ ਹੋ ਸਕਿਆ। ਇਸ ਤੋਂ ਇਲਾਵਾ ਕਰੀਬ 400 ਭਾਰਤੀ ਨਾਗਰਿਕ ਤਿੱਬਤ ਵਿੱਚ ਫਸੇ ਹੋਏ ਹਨ। ਚੀਨ ਵਾਲੇ ਪਾਸੇ ਫਸੇ 153 ਭਾਰਤੀ ਨਾਗਰਿਕ ਸੁਰੱਖਿਅਤ ਤਰੀਕੇ ਨਾਲ ਨੇਪਾਲ ਪਹੁੰਚ ਚੁੱਕੇ ਹਨ। ਇਸ ਦੌਰਾਨ ਵਿਦੇਸ਼ ਮੰਤਰੀ ਐੱਸ. ਜੈਸ਼ੰਕਰ ਨੇ ਸੀਨੀਅਰ ਅਧਿਕਾਰੀਆਂ ਨਾਲ ਉੱਚ ਪੱਧਰੀ ਮੀਟਿੰਗ ਕਰਕੇ ਨੇਪਾਲ ਵਿੱਚ ਹੜ੍ਹਾਂ ਦੀ ਸਥਿਤੀ ਦਾ ਜਾਇਜ਼ਾ ਲਿਆ। ਉਨ੍ਹਾਂ ਦੱਸਿਆ ਕਿ ਇੱਕ ਹਾਈਡ੍ਰੋਪਾਵਰ ਪ੍ਰੋਜੈਕਟ ਵਾਲੀ ਥਾਂ ‘ਤੇ ਕੁਝ ਲੋਕਾਂ ਦੇ ਸੁਰੰਗ ਵਿੱਚ ਫਸੇ ਹੋਣ ਦਾ ਖ਼ਦਸ਼ਾ ਹੈ। ਇਨ੍ਹਾਂ ਲੋਕਾਂ ਦੀ ਮਦਦ ਲਈ ਭਾਰਤ ਵੱਲੋਂ ਇੱਕ ਟੀਮ ਭੇਜੀ ਜਾ ਰਹੀ ਹੈ।
ਨੇਪਾਲ ਨੇ ਭਾਰਤ-ਚੀਨ ਤੋਂ ਮੰਗੇ 42 ਬੇਲੀ ਬ੍ਰਿਜ
ਹੜ੍ਹ ਪ੍ਰਭਾਵਿਤ ਇਲਾਕਿਆਂ ਵਿੱਚ ਸੜਕ ਅਤੇ ਆਵਾਜਾਈ ਪ੍ਰਬੰਧ ਮੁੜ ਬਹਾਲ ਕਰਨ ਲਈ ਨੇਪਾਲ ਸਰਕਾਰ ਨੇ ਭਾਰਤ ਅਤੇ ਚੀਨ ਤੋਂ 42 ਬੇਲੀ ਬ੍ਰਿਜ ਬਣਾਉਣ ਵਿੱਚ ਮਦਦ ਮੰਗੀ ਹੈ। ਹੜ੍ਹਾਂ ਕਾਰਨ ਰਸੂਵਾ, ਨੁਵਾਕੋਟ ਅਤੇ ਧਾਦਿੰਗ ਜ਼ਿਲ੍ਹਿਆਂ ਦੇ ਜ਼ਿਆਦਾਤਰ ਪੁਲ ਰੁੜ੍ਹ ਗਏ ਹਨ। ਇਸ ਕਾਰਨ ਇਨ੍ਹਾਂ ਇਲਾਕਿਆਂ ਵਿੱਚ ਲੋਕਾਂ ਅਤੇ ਵਾਹਨਾਂ ਦੀ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈ ਹੈ। ਭਾਰਤੀ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਰਣਧੀਰ ਜੈਸਵਾਲ ਵੀ ਕਹਿ ਚੁੱਕੇ ਹਨ ਕਿ ਨੇਪਾਲ ਨੂੰ ਲੋੜ ਪੈਣ ‘ਤੇ ਬੇਲੀ ਬ੍ਰਿਜ ਸਮੇਤ ਹਰ ਸੰਭਵ ਸਹਾਇਤਾ ਦਿੱਤੀ ਜਾਵੇਗੀ।
ਭੂ-ਸਖਲਨ ਨਾਲ ਬਣੀਆਂ ਦੋ ਝੀਲਾਂ ਨੇ ਵਧਾਇਆ ਖ਼ਤਰਾ
ਇਸ ਦੌਰਾਨ ਨੇਪਾਲ ਦੇ ਹੜ੍ਹ ਪ੍ਰਭਾਵਿਤ ਖੇਤਰ ਵਿੱਚ ਹਵਾਈ ਤਸਵੀਰਾਂ ਰਾਹੀਂ ਭੂ-ਸਖਲਨ ਕਾਰਨ ਬਣੀਆਂ ਦੋ ਝੀਲਾਂ ਦਾ ਪਤਾ ਲੱਗਿਆ ਹੈ। ਇਸ ਕਾਰਨ ਇਲਾਕੇ ਵਿੱਚ ਮੁੜ ਹੜ੍ਹ ਆਉਣ ਦਾ ਖ਼ਤਰਾ ਵਧ ਗਿਆ ਹੈ। ਰਿਪੋਰਟਾਂ ਮੁਤਾਬਕ ਨੇਪਾਲੀ ਅਧਿਕਾਰੀ ਦੋਵਾਂ ਝੀਲਾਂ ਦੀ ਲਗਾਤਾਰ ਨਿਗਰਾਨੀ ਕਰ ਰਹੇ ਹਨ। ਇਨ੍ਹਾਂ ਵਿੱਚੋਂ ਇੱਕ ਝੀਲ ਵਿੱਚੋਂ ਪਾਣੀ ਬਾਹਰ ਵਹਿ ਰਿਹਾ ਹੈ, ਜਦਕਿ ਦੂਜੀ ਝੀਲ ਵਿੱਚ ਪਾਣੀ ਲਗਾਤਾਰ ਵੱਧ ਰਿਹਾ ਹੈ ਅਤੇ ਇਸ ਦਾ ਆਕਾਰ ਪਹਿਲੀ ਝੀਲ ਨਾਲੋਂ ਵੀ ਵੱਡਾ ਹੁੰਦਾ ਜਾ ਰਿਹਾ ਹੈ।
ਦੋਵੇਂ ਝੀਲਾਂ ਨੇਪਾਲ-ਚੀਨ ਸਰਹੱਦ ਨੇੜੇ ਉਸੇ ਖੇਤਰ ਵਿੱਚ ਬਣੀਆਂ ਹਨ, ਜਿੱਥੇ ਬੁੱਧਵਾਰ ਨੂੰ ਭਿਆਨਕ ਹੜ੍ਹ ਆਇਆ ਸੀ। ਤੇਜ਼ ਪਾਣੀ ਦੇ ਨਾਲ ਚਿੱਕੜ, ਰੇਤ, ਬਜਰੀ ਅਤੇ ਵੱਡੀਆਂ ਚੱਟਾਨਾਂ ਹੇਠਲੇ ਇਲਾਕਿਆਂ ਵੱਲ ਵਹਿ ਗਈਆਂ ਸਨ।
ਨੇਪਾਲ ਵਿੱਚ ਰਾਹਤ ਅਤੇ ਬਚਾਅ ਕਾਰਜ ਜਾਰੀ ਹਨ, ਪਰ ਨਵੇਂ ਹੜ੍ਹ ਦੇ ਖ਼ਤਰੇ ਨੇ ਪ੍ਰਸ਼ਾਸਨ ਦੀ ਚਿੰਤਾ ਹੋਰ ਵਧਾ ਦਿੱਤੀ ਹੈ।
