ਪੰਜਾਬ ‘ਚ ਬਿਜਲੀ ਸੰਕਟ ਜਾਰੀ: ਮੰਗ 12,000 ਮੈਗਾਵਾਟ ਤੋਂ ਪਾਰ; ਅੱਜ ਇਨ੍ਹਾਂ ਸ਼ਹਿਰਾਂ ‘ਚ ਲੱਗਣਗੇ ਲੰਬੇ ਕੱਟ

Punjab Power Cut Today: ਪੰਜਾਬ ਭਰ ਦੇ ਵਸਨੀਕ ਅਣਮਿੱਥੇ ਸਮੇਂ ਲਈ ਲੱਗ ਰਹੇ ਬਿਜਲੀ ਕੱਟਾਂ ਕਾਰਨ ਬੇਹਾਲ ਹਨ। ਸੂਬੇ ਵਿੱਚ ਬਿਜਲੀ ਦੀ ਮੰਗ 12,130 ਮੈਗਾਵਾਟ ਦੇ ਅੰਕੜੇ ਨੂੰ ਪਾਰ ਕਰ ਗਈ ਹੈ, ਜਦੋਂ ਕਿ ਕੁੱਲ ਉਤਪਾਦਨ ਅਤੇ ਕੇਂਦਰੀ ਪੂਲ ਦੀ ਸਪਲਾਈ ਮਿਲ ਕੇ ਵੀ ਇਸ ਮੰਗ ਨੂੰ ਪੂਰਾ ਕਰਨ ਵਿੱਚ ਅਸਮਰੱਥ ਰਹੀ ਹੈ। ਪੰਜਾਬ ਦੀ ਆਪਣੀ ਪੈਦਾਵਾਰ ਸਿਰਫ਼ 5,100 ਮੈਗਾਵਾਟ ਦੇ ਕਰੀਬ ਹੈ।

ਹੜਤਾਲ ਕਾਰਨ ਬਹਾਲੀ ਵਿੱਚ ਦੇਰੀ

ਬਿਜਲੀ ਕੱਟਾਂ ਦਾ ਦੂਜਾ ਵੱਡਾ ਕਾਰਨ PSPCL ਦੇ ਤਕਨੀਕੀ ਸਟਾਫ਼ ਦੀ “ਵਰਕ-ਟੂ-ਰੂਲ” ਹੜਤਾਲ ਹੈ। ਕਰਮਚਾਰੀ ਸਿਰਫ਼ 8 ਘੰਟੇ ਦੀ ਡਿਊਟੀ ਕਰ ਰਹੇ ਹਨ ਅਤੇ ਆਪਣੇ ਨਿਰਧਾਰਤ ਪ੍ਰੋਫਾਈਲ ਤੋਂ ਬਾਹਰ ਜਾ ਕੇ ਕਿਸੇ ਵੀ ਨੁਕਸ ਦੀ ਮੁਰੰਮਤ ਨਹੀਂ ਕਰ ਰਹੇ। ਇਹ ਹੜਤਾਲ 25 ਮਈ ਤੱਕ ਜਾਰੀ ਰਹਿਣ ਦੀ ਸੰਭਾਵਨਾ ਹੈ, ਜਿਸ ਕਾਰਨ ਫੀਡਰ ਟ੍ਰਿਪ ਹੋਣ ਤੋਂ ਬਾਅਦ ਬਿਜਲੀ ਬਹਾਲ ਕਰਨ ਵਿੱਚ ਕਈ ਘੰਟੇ ਲੱਗ ਰਹੇ ਹਨ।

ਅੱਜ ਇਨ੍ਹਾਂ ਸ਼ਹਿਰਾਂ ਵਿੱਚ ਲੱਗਣਗੇ ਮੁੱਖ ਕੱਟ:

• ਲੁਧਿਆਣਾ (4 ਘੰਟੇ): ਜਮਾਲਪੁਰ, ਮੋਤੀ ਨਗਰ, ਸੁੰਦਰ ਨਗਰ, ਮੁੰਡੀਆਂ ਕਲਾਂ, ਸ਼ੇਰਪੁਰ ਅਤੇ ਆਲੇ-ਦੁਆਲੇ ਦੇ ਇਲਾਕਿਆਂ ਵਿੱਚ ਸਵੇਰੇ 10 ਵਜੇ ਤੋਂ ਦੁਪਹਿਰ 2 ਵਜੇ ਤੱਕ ਸਪਲਾਈ ਬੰਦ ਰਹੇਗੀ।
• ਅੰਮ੍ਰਿਤਸਰ (4 ਤੋਂ 5 ਘੰਟੇ): ਵ੍ਹਾਈਟ ਐਵੇਨਿਊ, ਪੁਲਿਸ ਲਾਈਨ, ਲਾਹੌਰੀ ਗੇਟ ਅਤੇ ਰਾਮ ਮੰਦਰ ਖੇਤਰ ਵਿੱਚ ਸਵੇਰੇ 10 ਵਜੇ ਤੋਂ ਦੁਪਹਿਰ 2 ਵਜੇ ਤੱਕ ਕੱਟ ਰਹੇਗਾ।
• ਪਟਿਆਲਾ (8 ਘੰਟੇ):ਮਾਡਲ ਟਾਊਨ, ਮੋਤੀ ਬਾਗ, ਗੋਵਿੰਦ ਮਾਰਗ ਅਤੇ ਲੋਅਰ ਮਾਲ ਰੋਡ ਵਰਗੇ ਇਲਾਕਿਆਂ ਵਿੱਚ ਸਵੇਰੇ 10 ਵਜੇ ਤੋਂ ਸ਼ਾਮ 6 ਵਜੇ ਤੱਕ ਬਿਜਲੀ ਗੁੱਲ ਰਹੇਗੀ।
• ਜਲੰਧਰ (4 ਘੰਟੇ): ਸੈਨਿਕ ਵਿਹਾਰ, ਲਾਂਬੜਾ, ਅਜੀਤ ਨਗਰ ਅਤੇ ਦੀਨਦਿਆਲ ਉਪਾਧਿਆਏ ਨਗਰ ਵਿੱਚ ਸਵੇਰੇ 10 ਵਜੇ ਤੋਂ ਦੁਪਹਿਰ 2 ਵਜੇ ਤੱਕ ਸਪਲਾਈ ਪ੍ਰਭਾਵਿਤ ਹੋਵੇਗੀ।
• ਬਠਿੰਡਾ (5 ਘੰਟੇ):ਅਜੀਤ ਰੋਡ, ਪਾਵਰ ਹਾਊਸ ਰੋਡ, 100 ਫੁੱਟ ਰੋਡ ਅਤੇ ਬਾਦਲ ਰੋਡ ਖੇਤਰ ਵਿੱਚ ਸਵੇਰੇ 9 ਵਜੇ ਤੋਂ ਦੁਪਹਿਰ 2 ਵਜੇ ਤੱਕ ਬਿਜਲੀ ਨਹੀਂ ਹੋਵੇਗੀ।
• ਮੁਹਾਲੀ:ਜੀ-ਬਲਾਕ ਵਿੱਚ ਸਵੇਰੇ 10 ਵਜੇ ਤੋਂ ਦੁਪਹਿਰ 2 ਵਜੇ ਤੱਕ ਕੱਟ ਲੱਗੇਗਾ।
• ਖੰਨਾ ਤੇ ਅਮਲੋਹ: ਪਿੰਡ ਰਸੂਲੜਾ, ਦੋਰਾਹਾ ਇੰਡਸਟਰੀਅਲ ਏਰੀਆ ਅਤੇ ਐਮਕੇ ਰੋਡ ‘ਤੇ ਸਵੇਰੇ 10 ਵਜੇ ਤੋਂ ਸ਼ਾਮ 5 ਵਜੇ ਤੱਕ ਕੱਟ ਲੱਗੇਗਾ।

ਖਪਤਕਾਰਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਬਿਜਲੀ ਕੱਟਾਂ ਦੇ ਸਮੇਂ ਅਨੁਸਾਰ ਆਪਣੇ ਜ਼ਰੂਰੀ ਕੰਮ ਨਿਪਟਾ ਲੈਣ।