ਪ੍ਰਤੀਕ ਯਾਦਵ ਦੀ ਪੋਸਟਮਾਰਟਮ ਰਿਪੋਰਟ ਆਈ ਸਾਹਮਣੇ: ਸਰੀਰ ‘ਤੇ ਮਿਲੇ ਸੱਟਾਂ ਦੇ 6 ਨਿਸ਼ਾਨ
Postmortem Report Prateek Yadav: ਸਮਾਜਵਾਦੀ ਪਾਰਟੀ ਦੇ ਸੰਸਥਾਪਕ ਸਵਰਗੀ ਮੁਲਾਇਮ ਸਿੰਘ ਯਾਦਵ ਦੇ ਛੋਟੇ ਪੁੱਤਰ ਅਤੇ ਅਖਿਲੇਸ਼ ਯਾਦਵ ਦੇ ਭਰਾ ਪ੍ਰਤੀਕ ਯਾਦਵ (38) ਦੀ ਮੌਤ ਦੇ ਮਾਮਲੇ ਵਿੱਚ ਅਹਿਮ ਖੁਲਾਸੇ ਹੋਏ ਹਨ। ਬੁੱਧਵਾਰ ਸਵੇਰੇ ਸ਼ੱਕੀ ਹਾਲਾਤਾਂ ਵਿੱਚ ਹੋਈ ਮੌਤ ਤੋਂ ਬਾਅਦ ਜਾਰੀ ਹੋਈ ਪੋਸਟਮਾਰਟਮ ਰਿਪੋਰਟ ਵਿੱਚ ਮੌਤ ਦਾ ਮੁੱਖ ਕਾਰਨ ‘ਮਾਸਿਵ ਪਲਮੋਨਰੀ ਥ੍ਰੋਮਬੋਐਂਬੋਲਿਜ਼ਮ’ (Massive Pulmonary Thromboembolism) ਦੱਸਿਆ ਗਿਆ ਹੈ।
ਸਰੀਰ ‘ਤੇ ਗੰਭੀਰ ਸੱਟਾਂ ਦੇ ਨਿਸ਼ਾਨ:
ਰਿਪੋਰਟ ਮੁਤਾਬਕ ਪ੍ਰਤੀਕ ਯਾਦਵ ਦੇ ਸਰੀਰ ‘ਤੇ ਕੁੱਲ ਛੇ ਸੱਟਾਂ ਦੇ ਨਿਸ਼ਾਨ ਪਾਏ ਗਏ ਹਨ। ਇਹ ਸੱਟਾਂ ਛਾਤੀ ਦੇ ਸੱਜੇ ਪਾਸੇ, ਸੱਜੀ ਬਾਂਹ, ਕੂਹਣੀ ਅਤੇ ਖੱਬੇ ਗੁੱਟ ‘ਤੇ ਮੌਜੂਦ ਸਨ। ਸਾਰੀਆਂ ਸੱਟਾਂ ਦੇ ਹੇਠਾਂ ਖੂਨ ਜੰਮਿਆ ਹੋਇਆ (Internal bleeding) ਪਾਇਆ ਗਿਆ ਹੈ। ਛਾਤੀ ‘ਤੇ ਮਿਲੀ ਸੱਟ ਦਾ ਆਕਾਰ 14×7 ਸੈਂਟੀਮੀਟਰ ਸੀ, ਜਦਕਿ ਸੱਜੀ ਬਾਂਹ ‘ਤੇ ਮਿਲੀ ਸੱਟ 24×8 ਸੈਂਟੀਮੀਟਰ ਤੱਕ ਫੈਲੀ ਹੋਈ ਸੀ।
ਬਲੱਡ ਕਲੋਟ ਨੇ ਲਈ ਜਾਨ:
ਡਾਕਟਰਾਂ ਅਨੁਸਾਰ, ਪ੍ਰਤੀਕ ਦੇ ਸਰੀਰ ਦੇ ਹੇਠਲੇ ਹਿੱਸੇ ਵਿੱਚ ਬਲੱਡ ਕਲੋਟ (Blood Clot) ਬਣ ਗਿਆ ਸੀ, ਜੋ ਹੌਲੀ-ਹੌਲੀ ਫੇਫੜਿਆਂ ਅਤੇ ਧਮਨੀਆਂ ਤੱਕ ਪਹੁੰਚ ਗਿਆ। ਇਸ ਕਾਰਨ ਸਰੀਰ ਦੀਆਂ ਧਮਨੀਆਂ ਵਿੱਚ ਰੁਕਾਵਟ ਪੈਦਾ ਹੋ ਗਈ, ਜਿਸ ਕਾਰਨ ਦਿਲ ਦਾ ਦੌਰਾ ਪਿਆ ਅਤੇ ਸਾਹ ਰੁਕਣ (Cardiorespiratory Collapse) ਕਾਰਨ ਉਨ੍ਹਾਂ ਦੀ ਮੌਤ ਹੋ ਗਈ।
ਵਿਸੇਰਾ ਕੀਤਾ ਗਿਆ ਸੁਰੱਖਿਅਤ:
ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕਰਨ ਲਈ ਡਾਕਟਰਾਂ ਨੇ ਵਿਸੇਰਾ (Viscera) ਅਤੇ ਦਿਲ ਦੇ ਸੈਂਪਲ ਨੂੰ ਰਸਾਇਣਕ ਵਿਸ਼ਲੇਸ਼ਣ ਅਤੇ ਹਿਸਟੋਪੈਥੋਲੋਜੀਕਲ ਜਾਂਚ ਲਈ ਸੁਰੱਖਿਅਤ ਰੱਖ ਲਿਆ ਹੈ। ਇਹ ਨਮੂਨੇ ਸਬੰਧਤ ਪੁਲਿਸ ਅਧਿਕਾਰੀਆਂ ਨੂੰ ਸੌਂਪ ਦਿੱਤੇ ਗਏ ਹਨ ਤਾਂ ਜੋ ਮੌਤ ਦੇ ਅਸਲ ਕਾਰਨਾਂ ਦੀ ਪੂਰੀ ਸਪੱਸ਼ਟਤਾ ਹੋ ਸਕੇ।
