ਰਣਬੀਰ ਕਪੂਰ ਦੀ ‘ਰਾਮਾਇਣ’ ਨੇ 8 ਦਿਨਾਂ ’ਚ ਤੂਫ਼ਾਨੀ ਕਮਾਈ, ਦੁਨੀਆ ਭਰ ’ਚ 1,000 ਕਰੋੜ ਦਾ ਅੰਕੜਾ ਪਾਰ….

ਦੁਨੀਆ ਭਰ ’ਚ 1,000 ਕਰੋੜ ਦਾ ਅੰਕੜਾ ਪਾਰ ਕਰਨ ਵਾਲੀ ਤੀਜੀ ਸਭ ਤੋਂ ਤੇਜ਼ ਭਾਰਤੀ ਫ਼ਿਲਮ ਬਣੀ; ਸ਼ਾਹਰੁਖ ਖ਼ਾਨ ਦੀ ‘ਪਠਾਨ’ ਦਾ ਰਿਕਾਰਡ ਤੋੜਨ ਦੇ ਕਰੀਬ

Ramayan box office; ਰਣਬੀਰ ਕਪੂਰ ਸਟਾਰਰ ਫ਼ਿਲਮ ‘ਰਾਮਾਇਣ: ਪਾਰਟ-1’ ਨੇ ਬਾਕਸ ਆਫ਼ਿਸ ’ਤੇ ਇਤਿਹਾਸ ਰਚ ਦਿੱਤਾ ਹੈ। ਨਿਤੇਸ਼ ਤਿਵਾੜੀ ਦੇ ਨਿਰਦੇਸ਼ਨ ਹੇਠ ਬਣੀ ਇਸ ਫ਼ਿਲਮ ਨੇ ਰਿਲੀਜ਼ ਦੇ ਮਹਿਜ਼ 8 ਦਿਨਾਂ ਵਿੱਚ ਦੁਨੀਆ ਭਰ ’ਚ 1,033.55 ਕਰੋੜ ਰੁਪਏ ਦੀ ਗ੍ਰਾਸ ਕਮਾਈ ਕਰ ਲਈ ਹੈ। ਇਸ ਦੇ ਨਾਲ ਹੀ ਫ਼ਿਲਮ ਸਭ ਤੋਂ ਤੇਜ਼ 1,000 ਕਰੋੜ ਰੁਪਏ ਦੇ ਕਲੱਬ ਵਿੱਚ ਸ਼ਾਮਲ ਹੋਣ ਵਾਲੀਆਂ ਭਾਰਤੀ ਫ਼ਿਲਮਾਂ ਦੀ ਸੂਚੀ ਵਿੱਚ ਤੀਜੇ ਸਥਾਨ ’ਤੇ ਪਹੁੰਚ ਗਈ ਹੈ।

ਇਸ ਤੋਂ ਪਹਿਲਾਂ ਰਣਵੀਰ ਸਿੰਘ ਦੀ ‘ਧੁਰੰਧਰ-2’ ਅਤੇ ਅੱਲੂ ਅਰਜੁਨ ਦੀ ‘ਪੁਸ਼ਪਾ-2’ ਨੇ ਸਿਰਫ਼ 7 ਦਿਨਾਂ ਵਿੱਚ 1,000 ਕਰੋੜ ਰੁਪਏ ਦੀ ਕਮਾਈ ਦਾ ਅੰਕੜਾ ਪਾਰ ਕੀਤਾ ਸੀ।

‘ਰਾਮਾਇਣ: ਪਾਰਟ-1’ ਹੁਣ ਸਭ ਤੋਂ ਵੱਧ ਕਮਾਈ ਕਰਨ ਵਾਲੀਆਂ ਫ਼ਿਲਮਾਂ ਦੀ ਸੂਚੀ ਵਿੱਚ ਸ਼ਾਹਰੁਖ ਖ਼ਾਨ ਦੀ ਫ਼ਿਲਮ ‘ਪਠਾਨ’ ਨੂੰ ਵੀ ਪਿੱਛੇ ਛੱਡਣ ਦੇ ਕਰੀਬ ਹੈ। ‘ਪਠਾਨ’ ਦਾ ਵਿਸ਼ਵਵਿਆਪੀ ਕਲੈਕਸ਼ਨ 1,050 ਕਰੋੜ ਰੁਪਏ ਦੱਸਿਆ ਗਿਆ ਹੈ।

ਕਿਵੇਂ ਰਿਹਾ ਫ਼ਿਲਮ ਦਾ ਬਾਕਸ ਆਫ਼ਿਸ ਕਲੈਕਸ਼ਨ?

‘ਰਾਮਾਇਣ: ਪਾਰਟ-1’ ਨੇ ਭਾਰਤ ਵਿੱਚ 564.60 ਕਰੋੜ ਰੁਪਏ ਦਾ ਨੈੱਟ ਅਤੇ 675.05 ਕਰੋੜ ਰੁਪਏ ਦਾ ਗ੍ਰਾਸ ਕਲੈਕਸ਼ਨ ਕੀਤਾ ਹੈ। ਜਦਕਿ ਵਿਦੇਸ਼ੀ ਬਾਜ਼ਾਰਾਂ ਤੋਂ ਫ਼ਿਲਮ ਨੇ 358.50 ਕਰੋੜ ਰੁਪਏ ਦੀ ਕਮਾਈ ਕੀਤੀ ਹੈ। ਇਸ ਤਰ੍ਹਾਂ ਭਾਰਤ ਅਤੇ ਵਿਦੇਸ਼ਾਂ ਦੀ ਕਮਾਈ ਨੂੰ ਮਿਲਾ ਕੇ ਫ਼ਿਲਮ ਦਾ ਕੁੱਲ ਵਿਸ਼ਵਵਿਆਪੀ ਗ੍ਰਾਸ ਕਲੈਕਸ਼ਨ 1,033.55 ਕਰੋੜ ਰੁਪਏ ਹੋ ਗਿਆ ਹੈ।

ਫ਼ਿਲਮ ਦੀ ਕੁੱਲ ਵਿਸ਼ਵਵਿਆਪੀ ਕਮਾਈ ਵਿੱਚ ਕਰੀਬ 65 ਫ਼ੀਸਦੀ ਹਿੱਸਾ ਭਾਰਤੀ ਬਾਜ਼ਾਰ ਅਤੇ 35 ਫ਼ੀਸਦੀ ਹਿੱਸਾ ਵਿਦੇਸ਼ੀ ਬਾਜ਼ਾਰਾਂ ਦਾ ਹੈ।

ਭਾਰਤ ਵਿੱਚ ਫ਼ਿਲਮ ਦੇ ਨੈੱਟ ਕਲੈਕਸ਼ਨ ਵਿੱਚ ਸਭ ਤੋਂ ਵੱਡਾ ਯੋਗਦਾਨ ਹਿੰਦੀ ਵਰਜ਼ਨ ਦਾ ਰਿਹਾ। 8 ਦਿਨਾਂ ਵਿੱਚ ਹਿੰਦੀ ਵਰਜ਼ਨ ਨੇ 437 ਕਰੋੜ ਰੁਪਏ ਦੀ ਕਮਾਈ ਕੀਤੀ। ਇਸ ਤੋਂ ਇਲਾਵਾ ਕੰਨੜ ਵਰਜ਼ਨ ਨੇ 48.95 ਕਰੋੜ ਅਤੇ ਤੇਲਗੂ ਵਰਜ਼ਨ ਨੇ 38.05 ਕਰੋੜ ਰੁਪਏ ਕਮਾਏ।

2026 ਦੀ ਦੂਜੀ ਸਭ ਤੋਂ ਵੱਧ ਕਮਾਈ ਕਰਨ ਵਾਲੀ ਹਿੰਦੀ ਫ਼ਿਲਮ ਬਣੀ

‘ਰਾਮਾਇਣ: ਪਾਰਟ-1’ ਸਿਰਫ਼ 8 ਦਿਨਾਂ ਵਿੱਚ ਹੀ ਸਾਲ 2026 ਦੀ ਦੂਜੀ ਸਭ ਤੋਂ ਵੱਧ ਕਮਾਈ ਕਰਨ ਵਾਲੀ ਫ਼ਿਲਮ ਬਣ ਗਈ ਹੈ। ਫ਼ਿਲਮ ਨੇ ‘ਦ੍ਰਿਸ਼ਯਮ-3’, ‘ਜੇਲਰ-2’ ਅਤੇ ‘ਹਨੂਮਾਨ ਅੰਸ਼’ ਦੇ ਆਲ ਟਾਈਮ ਕਲੈਕਸ਼ਨ ਨੂੰ ਵੀ ਪਿੱਛੇ ਛੱਡ ਦਿੱਤਾ ਹੈ।

ਹਿੰਦੀ ਸਿਨੇਮਾ ਦੇ ਇਤਿਹਾਸ ਵਿੱਚ ਛੇਵੇਂ ਨੰਬਰ ’ਤੇ

8 ਦਿਨਾਂ ਦੀ ਕਮਾਈ ਨਾਲ ‘ਰਾਮਾਇਣ: ਪਾਰਟ-1’ ਹਿੰਦੀ ਸਿਨੇਮਾ ਦੇ ਇਤਿਹਾਸ ਦੀ ਛੇਵੀਂ ਸਭ ਤੋਂ ਵੱਧ ਕਮਾਈ ਕਰਨ ਵਾਲੀ ਫ਼ਿਲਮ ਬਣ ਗਈ ਹੈ। ਇਸ ਸੂਚੀ ਵਿੱਚ ਪਹਿਲੇ ਸਥਾਨ ’ਤੇ ਆਮਿਰ ਖ਼ਾਨ ਦੀ ਫ਼ਿਲਮ ‘ਦੰਗਲ’ ਹੈ, ਜਿਸ ਨੇ ਕੁੱਲ 2,054 ਕਰੋੜ ਰੁਪਏ ਦੀ ਕਮਾਈ ਕੀਤੀ ਸੀ।

ਭਾਰਤੀ ਸਿਨੇਮਾ ਦੀਆਂ ਸਭ ਤੋਂ ਵੱਧ ਕਮਾਈ ਵਾਲੀਆਂ ਫ਼ਿਲਮਾਂ ’ਚ 11ਵੇਂ ਨੰਬਰ ’ਤੇ

ਭਾਰਤੀ ਸਿਨੇਮਾ ਦੇ ਇਤਿਹਾਸ ਵਿੱਚ ਕੁੱਲ ਕਮਾਈ ਦੇ ਮਾਮਲੇ ਵਿੱਚ ‘ਰਾਮਾਇਣ: ਪਾਰਟ-1’ 11ਵੇਂ ਸਥਾਨ ’ਤੇ ਪਹੁੰਚ ਗਈ ਹੈ। ਮੌਜੂਦਾ ਕਲੈਕਸ਼ਨ ਨੂੰ ਦੇਖਦੇ ਹੋਏ ਇਸ ਦੇ ਜਲਦ ਹੀ ਟੌਪ-10 ਫ਼ਿਲਮਾਂ ਦੀ ਸੂਚੀ ਵਿੱਚ ਸ਼ਾਮਲ ਹੋਣ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ। ਇਸ ਤੋਂ ਇਲਾਵਾ ਫ਼ਿਲਮ ਦੀ ਕਮਾਈ ‘ਧੁਰੰਧਰ’ ਦੇ ਆਲ ਟਾਈਮ ਕਲੈਕਸ਼ਨ ਨੂੰ ਵੀ ਚੁਣੌਤੀ ਦੇ ਸਕਦੀ ਹੈ।