ਸਕੂਲ ਦਾ ਮਿਡ-ਡੇਅ ਮੀਲ ਬਣਿਆ ਜ਼ਹਿਰ! 150 ਬੱਚੇ ਬਿਮਾਰ, ਖਾਣੇ ‘ਚ ਸਪੋਲੀਆ ਮਿਲਣ ਦਾ ਦਾਅਵਾ

Bihar Mid Day Meal News: ਬਿਹਾਰ ਦੇ ਸਹਰਸਾ ਜ਼ਿਲ੍ਹੇ ਦੇ ਬਲੂਹਾ ਪਿੰਡ ਵਿੱਚ ਇੱਕ ਸਰਕਾਰੀ ਸੈਕੰਡਰੀ ਸਕੂਲ ਵਿੱਚ ਦੁਪਹਿਰ ਦਾ ਖਾਣਾ (Mid-Day Meal) ਖਾਣ ਤੋਂ ਬਾਅਦ ਲਗਭਗ 150 ਬੱਚਿਆਂ ਦੇ ਬਿਮਾਰ ਹੋਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਇਸ ਘਟਨਾ ਤੋਂ ਬਾਅਦ ਇਲਾਕੇ ਵਿੱਚ ਹੜਕੰਪ ਮਚ ਗਿਆ ਅਤੇ ਬੱਚਿਆਂ ਨੂੰ ਤੁਰੰਤ ਨਜ਼ਦੀਕੀ ਹਸਪਤਾਲਾਂ ਵਿੱਚ ਦਾਖਲ ਕਰਵਾਇਆ ਗਿਆ।

ਸੱਪ ਮਿਲਣ ਦੇ ਦਾਅਵੇ ਨਾਲ ਦਹਿਸ਼ਤ

ਘਟਨਾ ਦੀ ਸਭ ਤੋਂ ਹੈਰਾਨ ਕਰਨ ਵਾਲੀ ਗੱਲ ਇਹ ਹੈ ਕਿ ਕੁਝ ਬੱਚਿਆਂ ਦੇ ਰਿਸ਼ਤੇਦਾਰਾਂ ਨੇ ਦਾਅਵਾ ਕੀਤਾ ਹੈ ਕਿ ਜਿਸ ਭਾਂਡੇ ਵਿੱਚ ਦਾਲ ਪਕਾਈ ਗਈ ਸੀ, ਉਸ ਵਿੱਚੋਂ ਇੱਕ ਮਰਿਆ ਹੋਇਆ ਸਪੋਲੀਆ ਮਿਲਿਆ ਹੈ। ਸਕੂਲ ਵਿੱਚ ਮੌਜੂਦ 545 ਵਿਦਿਆਰਥੀਆਂ ਵਿੱਚੋਂ ਲਗਭਗ 200 ਬੱਚੇ ਖਾਣਾ ਖਾ ਚੁੱਕੇ ਸਨ, ਜਿਨ੍ਹਾਂ ਵਿੱਚੋਂ 150 ਦੀ ਹਾਲਤ ਖਰਾਬ ਹੋ ਗਈ।

ਹਸਪਤਾਲਾਂ ਦੀ ਸਥਿਤੀ ਅਤੇ DM ਦਾ ਬਿਆਨ

ਜ਼ਿਲ੍ਹਾ ਮੈਜਿਸਟ੍ਰੇਟ (DM) ਦੀਪੇਸ਼ ਕੁਮਾਰ ਨੇ ਦੱਸਿਆ ਕਿ 115 ਬੱਚਿਆਂ ਦਾ ਇਲਾਜ ਸਦਰ ਹਸਪਤਾਲ ਵਿੱਚ ਚੱਲ ਰਿਹਾ ਹੈ, ਜਦੋਂ ਕਿ 50 ਦੇ ਕਰੀਬ ਬੱਚੇ ਮਹਿਸ਼ੀ ਸਿਹਤ ਕੇਂਦਰ ਵਿੱਚ ਦਾਖਲ ਹਨ। ਉਨ੍ਹਾਂ ਕਿਹਾ, “ਡਾਕਟਰਾਂ ਅਨੁਸਾਰ ਬੱਚਿਆਂ ਦੀ ਹਾਲਤ ਹੁਣ ਸਥਿਰ ਹੈ ਅਤੇ ਸੁਧਾਰ ਹੋ ਰਿਹਾ ਹੈ। ਕੁਝ ਬੱਚਿਆਂ ਨੂੰ ਹਲਕਾ ਬੁਖਾਰ ਹੈ, ਜਿਸ ਕਾਰਨ ਉਨ੍ਹਾਂ ਨੂੰ ਨਿਗਰਾਨੀ ਹੇਠ ਰੱਖਿਆ ਗਿਆ ਹੈ।”

ਏਜੰਸੀ ‘ਤੇ ਉੱਠੇ ਸਵਾਲ

ਸਥਾਨਕ ਲੋਕਾਂ ਅਨੁਸਾਰ, ਦਿੱਲੀ ਦੀ ਇੱਕ ਨਿੱਜੀ ਏਜੰਸੀ ਆਊਟਸੋਰਸਿੰਗ ਰਾਹੀਂ ਮਹਿਸ਼ੀ ਅਤੇ ਨੌਹੱਟਾ ਬਲਾਕ ਦੇ ਸਕੂਲਾਂ ਵਿੱਚ ਪਕਾਇਆ ਹੋਇਆ ਭੋਜਨ ਸਪਲਾਈ ਕਰਦੀ ਹੈ। ਇਸ ਲਾਪਰਵਾਹੀ ਤੋਂ ਬਾਅਦ ਏਜੰਸੀ ਦੀ ਕਾਰਜਪ੍ਰਣਾਲੀ ਸਵਾਲਾਂ ਦੇ ਘੇਰੇ ਵਿੱਚ ਹੈ।

ਜਾਂਚ ਜਾਰੀ

ਡੀਐਮ ਨੇ ਦੱਸਿਆ ਕਿ ਐਫਐਸਐਲ (FSL) ਟੀਮ ਅਤੇ ਡਰੱਗ ਇੰਸਪੈਕਟਰ ਨੇ ਮੌਕੇ ‘ਤੇ ਪਹੁੰਚ ਕੇ ਖਾਣੇ ਦੇ ਨਮੂਨੇ ਇਕੱਠੇ ਕਰ ਲਏ ਹਨ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਜਾਂਚ ਰਿਪੋਰਟ ਆਉਣ ਤੋਂ ਬਾਅਦ ਹੀ ਸਪੋਲੀਆ ਮਿਲਣ ਦੇ ਦਾਅਵੇ ਦੀ ਪੁਸ਼ਟੀ ਹੋ ਸਕੇਗੀ ਅਤੇ ਦੋਸ਼ੀਆਂ ਖਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।