ਚੰਡੀਗੜ੍ਹ ‘ਚ 19 ਤੋਂ 21 ਤੱਕ ਸੁਪੀਰੀਅਰ ਜੁਡੀਸ਼ੀਅਲ ਪ੍ਰੀਖਿਆ; MCM ਕਾਲਜ ਦੇ ਆਸਪਾਸ ਸੁਰੱਖਿਆ ਆਦੇਸ਼
Superior Judicial Service Examination; ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵੱਲੋਂ ਲਈ ਜਾਣ ਵਾਲੀ ਸੁਪੀਰੀਅਰ ਜੁਡੀਸ਼ੀਅਲ ਸਰਵਿਸ ਮੇਨ ਲਿਖਤੀ ਪ੍ਰੀਖਿਆ 19 ਤੋਂ 21 ਸਤੰਬਰ ਤੱਕ ਚੰਡੀਗੜ੍ਹ ਵਿੱਚ ਹੋਵੇਗੀ। ਜਿਸ ਸਬੰਧੀ ਜ਼ਿਲ੍ਹਾ ਮੈਜਿਸਟ੍ਰੇਟ ਨਿਸ਼ਾਂਤ ਕੁਮਾਰ ਯਾਦਵ ਨੇ ਦੱਸਿਆ ਕਿ ਇਹ ਪ੍ਰੀਖਿਆ 19 ਸਤੰਬਰ (ਸ਼ੁੱਕਰਵਾਰ) ਤੋਂ 21 ਸਤੰਬਰ (ਐਤਵਾਰ) ਤੱਕ ਸੈਕਟਰ-36 ਦੇ ਐਮਸੀਐਮ ਡੀਏਵੀ ਕਾਲਜ ਵਿਖੇ ਹੋਵੇਗੀ।
ਜਿਸ ਲਈ ਪ੍ਰੀਖਿਆ ਕੇਂਦਰ ਦੇ ਆਲੇ-ਦੁਆਲੇ ਕਾਨੂੰਨ ਵਿਵਸਥਾ ਬਣਾਈ ਰੱਖਣ ਅਤੇ ਨਕਲ ਰੋਕਣ ਲਈ ਕਈ ਪਾਬੰਦੀਆਂ ਲਗਾਈਆਂ ਗਈਆਂ ਹਨ। ਚੰਡੀਗੜ੍ਹ ਵਿੱਚ 19 ਤੋਂ 21 ਸਤੰਬਰ ਤੱਕ ਜ਼ਿਲ੍ਹਾ ਮੈਜਿਸਟ੍ਰੇਟ ਵੱਲੋਂ ਜਾਰੀ ਹੁਕਮਾਂ ਦੀ ਪਾਲਣਾ ਕਰਨਾ ਲਾਜ਼ਮੀ ਹੋਵੇਗਾ।
ਇਨ੍ਹਾਂ ਹੁਕਮਾਂ ਦੀ ਪਾਲਣਾ ਕਰਨੀ ਪਵੇਗੀ
ਜ਼ਿਲ੍ਹਾ ਮੈਜਿਸਟ੍ਰੇਟ ਦੇ ਹੁਕਮਾਂ ਅਨੁਸਾਰ 100 ਮੀਟਰ ਦੇ ਖੇਤਰ ਵਿੱਚ ਚਾਰ ਜਾਂ ਵੱਧ ਲੋਕਾਂ ਦੇ ਇਕੱਠੇ ਹੋਣ ‘ਤੇ ਪੂਰੀ ਤਰ੍ਹਾਂ ਪਾਬੰਦੀ ਹੋਵੇਗੀ। ਨਾਲ ਹੀ ਹਥਿਆਰ, ਤਿੱਖੇ ਔਜ਼ਾਰ, ਨਾਅਰੇਬਾਜ਼ੀ ਅਤੇ ਪੋਸਟਰ-ਬੈਨਰ ਲਿਆਉਣ ‘ਤੇ ਵੀ ਪਾਬੰਦੀ ਹੋਵੇਗੀ। ਇਸ ਤੋਂ ਇਲਾਵਾ, 200 ਮੀਟਰ ਦੇ ਘੇਰੇ ਵਿੱਚ ਫੋਟੋਕਾਪੀ ਮਸ਼ੀਨਾਂ, ਮੋਬਾਈਲ, ਲੈਪਟਾਪ, ਵਾਈ-ਫਾਈ, ਨਿੱਜੀ ਹੌਟਸਪੌਟ ਅਤੇ ਕਾਨੂੰਨ ਕੋਚਿੰਗ ਸੈਂਟਰ ਬੰਦ ਰਹਿਣਗੇ।
ਉਲੰਘਣਾ ਕਰਨ ‘ਤੇ ਕਾਰਵਾਈ ਕੀਤੀ ਜਾਵੇਗੀ
ਆਦੇਸ਼ ਅਨੁਸਾਰ, ਇਹ ਪਾਬੰਦੀਆਂ ਸਿਰਫ਼ ਆਮ ਜਨਤਾ ‘ਤੇ ਲਾਗੂ ਹੋਣਗੀਆਂ। ਇਹ ਹੁਕਮ ਪ੍ਰੀਖਿਆ ਦੇਣ ਵਾਲੇ ਉਮੀਦਵਾਰਾਂ, ਪੁਲਿਸ, ਅਰਧ ਸੈਨਿਕ ਬਲਾਂ, ਫੌਜ ਜਾਂ ਕਿਸੇ ਹੋਰ ਸਰਕਾਰੀ ਕਰਮਚਾਰੀ ‘ਤੇ ਲਾਗੂ ਨਹੀਂ ਹੋਣਗੇ। ਜ਼ਿਲ੍ਹਾ ਮੈਜਿਸਟਰੇਟ ਨੇ ਸਪੱਸ਼ਟ ਤੌਰ ‘ਤੇ ਕਿਹਾ ਹੈ ਕਿ ਜੇਕਰ ਕੋਈ ਇਨ੍ਹਾਂ ਹੁਕਮਾਂ ਦੀ ਉਲੰਘਣਾ ਕਰਦਾ ਹੈ, ਤਾਂ ਉਸ ਵਿਰੁੱਧ ਭਾਰਤੀ ਨਿਆਂ ਸੰਹਿਤਾ 2023 ਦੀ ਧਾਰਾ 223 ਅਤੇ ਹੋਰ ਨਿਯਮਾਂ ਤਹਿਤ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।
