ਸਾਬਕਾ ਭਾਰਤੀ ਹਾਕੀ ਕਪਤਾਨ MM ਸੋਮਾਇਆ ਦੇ ਘਰ ਹੋਈ ਚੋਰੀ: ਚੋਰਾਂ ਨੇ ‘ਓਲੰਪਿਕ ਦਾ ਸੋਨ ਤਮਗਾ’ ਵੀ ਕੀਤਾ ਚੋਰੀ
ਬੈਂਗਲੁਰੂ: ਭਾਰਤੀ ਹਾਕੀ ਟੀਮ ਦੇ ਸਾਬਕਾ ਕਪਤਾਨ ਅਤੇ ਓਲੰਪੀਅਨ ਐੱਮ.ਐੱਮ. ਸੋਮਾਇਆ ਦੇ ਬੈਂਗਲੁਰੂ ਸਥਿਤ ਘਰ ਵਿੱਚ ਚੋਰੀ ਦੀ ਵੱਡੀ ਵਾਰਦਾਤ ਸਾਹਮਣੇ ਆਈ ਹੈ। ਚੋਰ ਉਨ੍ਹਾਂ ਦਾ 1980 ਦੀਆਂ ਮਾਸਕੋ ਓਲੰਪਿਕ ਖੇਡਾਂ ਵਿੱਚ ਜਿੱਤਿਆ ਸੋਨ ਤਮਗਾ, ਕੌਮਾਂਤਰੀ ਖੇਡ ਮੁਕਾਬਲਿਆਂ ਦੇ ਹੋਰ ਤਮਗੇ ਅਤੇ ਤਿੰਨ ਲੱਖ ਰੁਪਏ ਤੋਂ ਵੱਧ ਕੀਮਤ ਦਾ ਕੀਮਤੀ ਸਾਮਾਨ ਚੋਰੀ ਕਰਕੇ ਲੈ ਗਏ। ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਇਹ ਘਟਨਾ 28 ਅਕਤੂਬਰ ਦੀ ਰਾਤ ਨੂੰ ਵਾਪਰੀ। 67 ਸਾਲਾ ਸੋਮਾਇਆ ਆਪਣੇ ਪਰਿਵਾਰ ਨਾਲ ਕਰਨਾਟਕ ਦੇ ਕੋਡਾਗੂ ਜਾਣ ਲਈ ਘਰੋਂ ਨਿਕਲੇ ਹੋਏ ਸਨ। ਇਸ ਤੋਂ ਦੋ ਦਿਨ ਬਾਅਦ ਸਵੇਰੇ ਕਰੀਬ 7:15 ਵਜੇ ਉਨ੍ਹਾਂ ਦੇ ਗੁਆਂਢੀ ਨਾਰਾਇਣ ਨੇ ਘਰ ਦਾ ਦਰਵਾਜ਼ਾ ਖੁੱਲ੍ਹਾ ਦੇਖਿਆ। ਉਨ੍ਹਾਂ ਨੂੰ ਚੋਰੀ ਹੋਣ ਦਾ ਸ਼ੱਕ ਹੋਇਆ ਅਤੇ ਇਸ ਬਾਰੇ ਸੋਮਾਇਆ ਨੂੰ ਸੂਚਿਤ ਕੀਤਾ।
ਗੁਆਂਢੀ ਦੇ ਘਰ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਵਿੱਚ ਦੋ ਅਣਪਛਾਤੇ ਵਿਅਕਤੀ ਸਵੇਰੇ ਕਰੀਬ 2:34 ਵਜੇ ਸੋਮਾਇਆ ਦੇ ਘਰ ਵਿੱਚ ਦਾਖ਼ਲ ਹੁੰਦੇ ਦਿਖਾਈ ਦਿੱਤੇ। ਫੁਟੇਜ ਮੁਤਾਬਕ, ਇੱਕ ਮੁਲਜ਼ਮ ਨੇ ਨੀਲੇ ਰੰਗ ਦੀ ਅਤੇ ਦੂਜੇ ਨੇ ਲਾਲ ਰੰਗ ਦੀ ਕਮੀਜ਼ ਪਾਈ ਹੋਈ ਸੀ। ਦੋਵਾਂ ਨੇ ਕਥਿਤ ਤੌਰ ’ਤੇ ਦਰਵਾਜ਼ਾ ਤੋੜ ਕੇ ਘਰ ਵਿੱਚ ਦਾਖ਼ਲ ਹੋਣ ਤੋਂ ਬਾਅਦ ਕੀਮਤੀ ਸਾਮਾਨ ਚੋਰੀ ਕੀਤਾ।
ਓਲੰਪਿਕ, ਏਸ਼ਿਆਈ ਖੇਡਾਂ ਅਤੇ ਚੈਂਪੀਅਨਜ਼ ਟਰਾਫੀ ਦੇ ਤਮਗੇ ਵੀ ਲੈ ਗਏ ਚੋਰ
ਐੱਫਆਈਆਰ ਅਨੁਸਾਰ, ਚੋਰੀ ਹੋਏ ਤਮਗਿਆਂ ਵਿੱਚ 1980 ਦੀਆਂ ਮਾਸਕੋ ਓਲੰਪਿਕ ਖੇਡਾਂ ਦਾ ਸੋਨ ਤਮਗਾ ਸ਼ਾਮਲ ਹੈ, ਜੋ ਸੋਮਾਇਆ ਨੇ ਭਾਰਤੀ ਹਾਕੀ ਟੀਮ ਦੇ ਮੈਂਬਰ ਵਜੋਂ ਜਿੱਤਿਆ ਸੀ। ਇਸ ਤੋਂ ਇਲਾਵਾ 1982 ਦੀਆਂ ਨਵੀਂ ਦਿੱਲੀ ਏਸ਼ਿਆਈ ਖੇਡਾਂ ਦਾ ਚਾਂਦੀ ਦਾ ਤਮਗਾ, 1986 ਦੀਆਂ ਸਿਓਲ ਏਸ਼ਿਆਈ ਖੇਡਾਂ ਦਾ ਕਾਂਸੀ ਦਾ ਤਮਗਾ ਅਤੇ 1982 ਵਿੱਚ ਐਮਸਟਰਡਮ ਵਿਖੇ ਹੋਈ ਚੈਂਪੀਅਨਜ਼ ਟਰਾਫੀ ਦਾ ਕਾਂਸੀ ਦਾ ਤਮਗਾ ਵੀ ਚੋਰੀ ਹੋ ਗਿਆ।
ਸੋਨੇ-ਚਾਂਦੀ ਦੇ ਗਹਿਣੇ ਅਤੇ ਨਕਦੀ ਵੀ ਚੋਰੀ
ਤਮਗਿਆਂ ਤੋਂ ਇਲਾਵਾ ਚੋਰ ਦੋ ਚਾਂਦੀ ਦੇ ਕੱਪ (ਕੁੱਲ ਵਜ਼ਨ 144 ਗ੍ਰਾਮ), 10 ਗ੍ਰਾਮ ਦਾ ਸੋਨੇ ਦਾ ਕੜਾ, ਛੇ ਚਾਂਦੀ ਦੇ ਚਮਚੇ (ਕੁੱਲ ਵਜ਼ਨ 200 ਗ੍ਰਾਮ), 80 ਗ੍ਰਾਮ ਦਾ ਚਾਂਦੀ ਦਾ ਬਰਤਨ, 8 ਗ੍ਰਾਮ ਦਾ ਸੋਨੇ ਦਾ ਸਿੱਕਾ ਅਤੇ 30 ਹਜ਼ਾਰ ਰੁਪਏ ਦੀ ਨਕਦੀ ਵੀ ਲੈ ਗਏ। ਪੁਲਿਸ ਸ਼ਿਕਾਇਤ ਵਿੱਚ ਖੇਡਾਂ ਦੇ ਤਮਗਿਆਂ ਨੂੰ ਛੱਡ ਕੇ ਚੋਰੀ ਹੋਏ ਹੋਰ ਸਾਮਾਨ ਦੀ ਕੁੱਲ ਅੰਦਾਜ਼ਨ ਕੀਮਤ 3.53 ਲੱਖ ਰੁਪਏ ਦੱਸੀ ਗਈ ਹੈ। ਸੋਮਾਇਆ ਨੇ ਪੁਲਿਸ ਕੋਲ ਮੁਲਜ਼ਮਾਂ ਦੀ ਪਛਾਣ ਕਰਕੇ ਉਨ੍ਹਾਂ ਨੂੰ ਗ੍ਰਿਫ਼ਤਾਰ ਕਰਨ, ਚੋਰੀ ਹੋਇਆ ਸਾਰਾ ਸਾਮਾਨ ਬਰਾਮਦ ਕਰਨ ਅਤੇ ਕਾਨੂੰਨੀ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ।
ਦੋ ਵਿਸ਼ੇਸ਼ ਪੁਲਿਸ ਟੀਮਾਂ ਬਣਾਈਆਂ
ਇੰਦਿਰਾਨਗਰ ਪੁਲਿਸ ਥਾਣੇ ਵਿੱਚ ਭਾਰਤੀ ਨਿਆ ਸੰਹਿਤਾ (ਬੀਐੱਨਐੱਸ) ਦੀਆਂ ਧਾਰਾਵਾਂ 331(4) ਅਤੇ 305 ਤਹਿਤ ਕੇਸ ਦਰਜ ਕੀਤਾ ਗਿਆ ਹੈ। ਪੁਲਿਸ ਅਧਿਕਾਰੀਆਂ ਮੁਤਾਬਕ, ਮੁਲਜ਼ਮਾਂ ਦੀ ਪਛਾਣ ਅਤੇ ਗ੍ਰਿਫ਼ਤਾਰੀ ਲਈ ਦੋ ਵਿਸ਼ੇਸ਼ ਟੀਮਾਂ ਬਣਾਈਆਂ ਗਈਆਂ ਹਨ। ਪੁਲਿਸ ਸੀਸੀਟੀਵੀ ਫੁਟੇਜ ਅਤੇ ਹੋਰ ਸਬੂਤਾਂ ਦੇ ਆਧਾਰ ’ਤੇ ਜਾਂਚ ਕਰ ਰਹੀ ਹੈ।
