ਅਮਰੀਕਾ ਦਾ ਲਗਾਤਾਰ 8ਵੀਂ ਰਾਤ ਈਰਾਨ ‘ਤੇ ਹਮਲਾ: ਟਰੰਪ ਬੋਲੇ- ਜਾਰਡਨ ‘ਚ 2 ਸੈਨਿਕਾਂ ਦੀ ਮੌਤ ਦੇ ਜਵਾਬ ‘ਚ ਕੀਤੀ ਕਾਰਵਾਈ
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਖ਼ੁਦ ਦਿੱਤੀ ਹਮਲਿਆਂ ਨੂੰ ਮਨਜ਼ੂਰੀ; ਜੰਗ ਵਿੱਚ ਹੁਣ ਤੱਕ 16 ਅਮਰੀਕੀ ਸੈਨਿਕਾਂ ਦੀ ਮੌਤ
CENTCOM ਦਾ ਦਾਅਵਾ- ਹੋਰਮੁਜ਼ ਸਟ੍ਰੇਟ ‘ਚ ਜਹਾਜ਼ਾਂ ਨੂੰ ਖ਼ਤਰਾ ਪੈਦਾ ਕਰਨ ਵਾਲੇ ਈਰਾਨੀ ਫ਼ੌਜੀ ਟਿਕਾਣੇ ਤੇ ਹਥਿਆਰਾਂ ਦੇ ਭੰਡਾਰ ਕੀਤੇ ਤਬਾਹ
ਪਿਛਲੇ 24 ਘੰਟਿਆਂ ਦੇ 5 ਵੱਡੇ ਅਪਡੇਟਸ: ਈਰਾਨ ਅਮਰੀਕਾ ਨਾਲ ਹੋਏ ਸਮਝੌਤੇ ਤੋਂ ਪਿੱਛੇ ਹਟਿਆ, ਹਮਲਿਆਂ ‘ਚ 50 ਲੋਕਾਂ ਦੀ ਮੌਤ
ਵਾਸ਼ਿੰਗਟਨ/ਤੇਹਰਾਨ:
ਅਮਰੀਕਾ ਅਤੇ ਈਰਾਨ ਵਿਚਾਲੇ ਚੱਲ ਰਹੀ ਜੰਗ ਰੁਕਣ ਦਾ ਨਾਮ ਨਹੀਂ ਲੈ ਰਹੀ ਹੈ। ਅਮਰੀਕੀ ਫ਼ੌਜ ਨੇ ਲਗਾਤਾਰ ਅੱਠਵੀਂ ਰਾਤ ਵੀ ਈਰਾਨ ਦੇ ਕਈ ਟਿਕਾਣਿਆਂ ‘ਤੇ ਭਾਰੀ ਹਵਾਈ ਹਮਲੇ (Airstrikes) ਕੀਤੇ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਬਿਆਨ ਜਾਰੀ ਕਰਦਿਆਂ ਕਿਹਾ ਹੈ ਕਿ ਉਨ੍ਹਾਂ ਨੇ ਖ਼ੁਦ ਇਹਨਾਂ ਹਮਲਿਆਂ ਨੂੰ ਮਨਜ਼ੂਰੀ ਦਿੱਤੀ ਸੀ। ਟਰੰਪ ਮੁਤਾਬਕ ਇਹ ਕਾਰਵਾਈ ਜਾਰਡਨ (Jordan) ਵਿੱਚ ਦੋ ਅਮਰੀਕੀ ਸੈਨਿਕਾਂ ਦੀ ਮੌਤ ਦੇ ਜਵਾਬ ਵਿੱਚ ਕੀਤੀ ਗਈ ਹੈ। ਇਸ ਤਾਜ਼ਾ ਝੜਪ ਤੋਂ ਬਾਅਦ ਜੰਗ ਵਿੱਚ ਜਾਨ ਗਵਾਉਣ ਵਾਲੇ ਅਮਰੀਕੀ ਸੈਨਿਕਾਂ ਦੀ ਕੁੱਲ ਗਿਣਤੀ ਵਧ ਕੇ 16 ਹੋ ਗਈ ਹੈ।
ਅਮਰੀਕੀ ਸੈਂਟਰਲ ਕਮਾਂਡ (CENTCOM) ਨੇ ਦਾਅਵਾ ਕੀਤਾ ਹੈ ਕਿ ਇਹਨਾਂ ਹਮਲਿਆਂ ਦਾ ਮੁੱਖ ਨਿਸ਼ਾਨਾ ਈਰਾਨ ਦੇ ਫ਼ੌਜੀ ਟਿਕਾਣੇ, ਹਥਿਆਰਾਂ ਦੇ ਭੰਡਾਰ ਅਤੇ ਲੌਜਿਸਟਿਕਸ ਸੈਂਟਰ ਸਨ। ਇਸ ਕਾਰਵਾਈ ਦਾ ਮਕਸਦ ਹੋਰਮੁਜ਼ ਸਟ੍ਰੇਟ (Strait of Hormuz) ਵਿੱਚ ਸਮੁੰਦਰੀ ਜਹਾਜ਼ਾਂ ਦੀ ਆਵਾਜਾਈ ਨੂੰ ਖ਼ਤਰਾ ਪੈਦਾ ਕਰਨ ਦੀ ਈਰਾਨ ਦੀ ਸਮੱਰਥਾ ਨੂੰ ਕਮਜ਼ੋਰ ਕਰਨਾ ਹੈ। ਹਾਲਾਂਕਿ, ਕੁਝ ਮੀਡੀਆ ਰਿਪੋਰਟਾਂ ਵਿੱਚ ਪੁਲਾਂ ਅਤੇ ਪਾਣੀ ਸਾਫ਼ ਕਰਨ ਵਾਲੇ ਡਿਸੈਲੀਨੇਸ਼ਨ ਪਲਾਂਟਾਂ (Desalination Plants) ‘ਤੇ ਵੀ ਹਮਲੇ ਦੀ ਗੱਲ ਕਹੀ ਗਈ ਹੈ, ਪਰ ਸੈਂਟਰਲ ਕਮਾਂਡ ਨੇ ਅਜੇ ਤੱਕ ਇਸ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ।
ਪਿਛਲੇ 24 ਘੰਟਿਆਂ ਦੇ 5 ਵੱਡੇ ਅਪਡੇਟਸ
- ਸਮਝੌਤੇ ਤੋਂ ਪਿੱਛੇ ਹਟਿਆ ਈਰਾਨ: ਈਰਾਨ ਨੇ ਅਮਰੀਕਾ ਨਾਲ ਇੱਕ ਮਹੀਨਾ ਪਹਿਲਾਂ ਹੋਏ ਅਹਿਮ ਸਮਝੌਤੇ ਨੂੰ ਰੱਦ ਕਰਦਿਆਂ ਉਸ ਤੋਂ ਪਿੱਛੇ ਹਟਣ ਦਾ ਐਲਾਨ ਕੀਤਾ ਹੈ। ਈਰਾਨ ਦੇ ਉਪ ਵਿਦੇਸ਼ ਮੰਤਰੀ ਨੇ ਦੋਸ਼ ਲਾਇਆ ਕਿ ਅਮਰੀਕਾ ਨੇ ਖ਼ੁਦ ਸਮਝੌਤੇ ਦੀਆਂ ਸ਼ਰਤਾਂ ਦੀ ਉਲੰਘਣਾ ਕੀਤੀ ਹੈ, ਇਸ ਲਈ ਉਹ ਵੀ ਹੁਣ ਇਸ ਦਾ ਪਾਲਣ ਨਹੀਂ ਕਰਨਗੇ।
- 50 ਲੋਕਾਂ ਦੀ ਮੌਤ, 500 ਜ਼ਖਮੀ: ਈਰਾਨ ਦੇ ਸਿਹਤ ਮੰਤਰਾਲੇ ਨੇ ਦਾਅਵਾ ਕੀਤਾ ਹੈ ਕਿ 27 ਜੂਨ ਤੋਂ 18 ਜੁਲਾਈ ਦੇ ਵਿਚਕਾਰ ਹੋਏ ਅਮਰੀਕੀ ਹਵਾਈ ਹਮਲਿਆਂ ਵਿੱਚ ਹੁਣ ਤੱਕ 50 ਨਾਗਰਿਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਦਕਿ 500 ਤੋਂ ਵੱਧ ਲੋਕ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋਏ ਹਨ।
- ਡਿਸੈਲੀਨੇਸ਼ਨ ਪਲਾਂਟ ਬਣੇ ਨਿਸ਼ਾਨਾ: ਕੁਵੈਤ ਨੇ ਦਾਅਵਾ ਕੀਤਾ ਹੈ ਕਿ ਈਰਾਨ ਨੇ ਉਸ ਦੇ ਇੱਕ ਡਿਸੈਲੀਨੇਸ਼ਨ ਪਲਾਂਟ ‘ਤੇ ਹਮਲਾ ਕੀਤਾ ਹੈ। ਦੂਜੇ ਪਾਸੇ, ਈਰਾਨ ਨੇ ਵੀ ਦੋਸ਼ ਲਾਇਆ ਹੈ ਕਿ ਅਮਰੀਕਾ ਨੇ ਈਰਾਨ ਦੇ ਹੋਰਮੋਜ਼ਗਾਨ ਸਥਿਤ ਪਾਣੀ ਸਾਫ਼ ਕਰਨ ਵਾਲੇ ਪਲਾਂਟ ਨੂੰ ਨਿਸ਼ਾਨਾ ਬਣਾਇਆ ਹੈ।
- ਦੋ ਅਹਿਮ ਪੁਲ ਤਬਾਹ: ਅਮਰੀਕੀ ਬੰਬਾਰੀ ਕਾਰਨ ਈਰਾਨ ਦੇ ਬੰਦਰ ਅੱਬਾਸ-ਰੂਦਾਨ ਮਾਰਗ ‘ਤੇ ਸਥਿਤ ਦੋ ਮੁੱਖ ਪੁਲ ਬੁਰੀ ਤਰ੍ਹਾਂ ਨੁਕਸਾਨੇ ਗਏ ਹਨ। ਇਸ ਤੋਂ ਇਲਾਵਾ ਜਸਕ (Jask) ਦੇ ਨੇੜਲੇ ਇਲਾਕੇ ‘ਤੇ ਵੀ ਵੱਡਾ ਫ਼ੌਜੀ ਹਮਲਾ ਹੋਣ ਦੀ ਖ਼ਬਰ ਹੈ।
- ਹੋਰਮੁਜ਼ ਸਟ੍ਰੇਟ ‘ਚ ਆਵਾਜਾਈ ਠੱਪ: ਜੰਗ ਦੇ ਚਲਦਿਆਂ ਹੋਰਮੁਜ਼ ਸਟ੍ਰੇਟ ਤੋਂ ਲੰਘਣ ਵਾਲੇ ਵਪਾਰਕ ਜਹਾਜ਼ਾਂ ਦੀ ਗਿਣਤੀ ਪਿਛਲੇ ਤਿੰਨ ਹਫ਼ਤਿਆਂ ਦੇ ਸਭ ਤੋਂ ਹੇਠਲੇ ਪੱਧਰ ‘ਤੇ ਪਹੁੰਚ ਗਈ ਹੈ। ਸ਼ਿਪ ਟ੍ਰੈਕਿੰਗ ਵੈੱਬਸਾਈਟ ‘ਮਰੀਨ ਟ੍ਰੈਫਿਕ’ ਮੁਤਾਬਕ ਵੀਰਵਾਰ ਨੂੰ ਇਸ ਮਹੱਤਵਪੂਰਨ ਸਮੁੰਦਰੀ ਰਸਤੇ ਤੋਂ ਸਿਰਫ਼ 8 ਜਹਾਜ਼ ਹੀ ਲੰਘ ਸਕੇ।
