ਭਾਰਤੀ ਫ਼ੌਜ ਦੇ ਦਿੱਗਜ ਅਧਿਕਾਰੀ ਲੈਫਟੀਨੈਂਟ ਜਨਰਲ ਦੀਪਿੰਦਰ ਸਿੰਘ ਦਾ ਦੇਹਾਂਤ: 1971 ਦੀ ਜੰਗ ਅਤੇ ਸ੍ਰੀਲੰਕਾ ਅਪਰੇਸ਼ਨ ‘ਚ ਨਿਭਾਈ ਸੀ ਅਹਿਮ ਭੂਮਿਕਾ
Lt Gen Depinder Singh Death: ਭਾਰਤੀ ਫ਼ੌਜ ਦੀ ਦੱਖਣੀ ਕਮਾਂਡ ਦੇ ਸਾਬਕਾ ਜਨਰਲ ਆਫੀਸਰ ਕਮਾਂਡਿੰਗ-ਇਨ-ਚੀਫ (GOC-in-C) ਲੈਫਟੀਨੈਂਟ ਜਨਰਲ ਦੀਪਿੰਦਰ ਸਿੰਘ ਦਾ ਮੰਗਲਵਾਰ ਨੂੰ ਪੰਚਕੂਲਾ ਵਿਖੇ ਦੇਹਾਂਤ ਹੋ ਗਿਆ। ਉਹ 96 ਸਾਲਾਂ ਦੇ ਸਨ। ਉਹ ਨਾ ਸਿਰਫ਼ ਇੱਕ ਬਹਾਦਰ ਫ਼ੌਜੀ ਸਨ, ਸਗੋਂ ਭਾਰਤੀ ਫ਼ੌਜ ਦੇ ਇਤਿਹਾਸਕ ਫ਼ੈਸਲਿਆਂ ਦੇ ਗਵਾਹ ਵੀ ਰਹੇ।
ਫੀਲਡ ਮਾਰਸ਼ਲ ਮਾਨਿਕਸ਼ਾਅ ਦੇ ਰਹੇ ਮਿਲਟਰੀ ਅਸਿਸਟੈਂਟ
ਦਸੰਬਰ 1950 ਵਿੱਚ ‘8th Gorkha Rifles’ ਵਿੱਚ ਕਮਿਸ਼ਨ ਪ੍ਰਾਪਤ ਕਰਨ ਵਾਲੇ ਲੈਫਟੀਨੈਂਟ ਜਨਰਲ ਦੀਪਿੰਦਰ ਸਿੰਘ ਨੇ 1969 ਤੋਂ 1973 ਤੱਕ ਤਤਕਾਲੀ ਥਲ ਸੈਨਾ ਮੁਖੀ ਫੀਲਡ ਮਾਰਸ਼ਲ ਸੈਮ ਮਾਨਿਕਸ਼ਾਅ ਦੇ ਮਿਲਟਰੀ ਅਸਿਸਟੈਂਟ ਵਜੋਂ ਸੇਵਾ ਨਿਭਾਈ। ਉਹ 1971 ਦੀ ਬੰਗਲਾਦੇਸ਼ ਮੁਕਤੀ ਜੰਗ ਦੌਰਾਨ ਰਣਨੀਤਕ ਫ਼ੈਸਲੇ ਲੈਣ ਵਾਲੀ ਟੀਮ ਦਾ ਅਹਿਮ ਹਿੱਸਾ ਸਨ।
ਮਹੱਤਵਪੂਰਨ ਫ਼ੌਜੀ ਸੇਵਾਵਾਂ:
- 1965 ਦੀ ਜੰਗ: ’41 ਮਾਊਂਟੇਨ ਬ੍ਰਿਗੇਡ’ ਦੇ ਬ੍ਰਿਗੇਡ ਮੇਜਰ ਵਜੋਂ ਅਖਨੂਰ ਸੈਕਟਰ ਵਿੱਚ ਪਾਕਿਸਤਾਨੀ ਫ਼ੌਜ ਨੂੰ ਅੱਗੇ ਵਧਣ ਤੋਂ ਰੋਕਿਆ।
- ਸਿੱਕਮ ਦਾ ਰਲੇਵਾਂ: ਸਿੱਕਮ ਦੇ ਭਾਰਤ ਵਿੱਚ ਰਲੇਵੇਂ ਦੌਰਾਨ ‘ਸਿੱਕਮ ਗਾਰਡਜ਼’ ਨੂੰ ਨਿਹੱਥੇ ਕਰਨ ਦੇ ਬੇਹੱਦ ਸੰਵੇਦਨਸ਼ੀਲ ਅਪਰੇਸ਼ਨ ਦੀ ਅਗਵਾਈ ਕੀਤੀ।
- ਅਪਰੇਸ਼ਨ ਪਵਨ (ਸ੍ਰੀਲੰਕਾ): 1987 ਵਿੱਚ ਸ੍ਰੀਲੰਕਾ ਭੇਜੀ ਗਈ ਭਾਰਤੀ ਸ਼ਾਂਤੀ ਸੈਨਾ (IPKF) ਦੇ ਮੁੱਖ ਫੋਰਸ ਕਮਾਂਡਰ ਵਜੋਂ ਸੇਵਾਵਾਂ ਨਿਭਾਈਆਂ ਅਤੇ ਲਿੱਟੇ (LTTE) ਵਿਰੁੱਧ ਮੁਹਿੰਮ ਦੀ ਕਮਾਨ ਸੰਭਾਲੀ।
ਇੱਕ ਕੁਸ਼ਲ ਕਮਾਂਡਰ
ਉਨ੍ਹਾਂ ਨੇ ਆਪਣੇ ਕਰੀਅਰ ਦੌਰਾਨ ਭੂਟਾਨ ਵਿੱਚ ਭਾਰਤੀ ਫ਼ੌਜੀ ਸਿਖਲਾਈ ਟੀਮ (IMTRAT) ਦੀ ਕਮਾਂਡ ਵੀ ਸੰਭਾਲੀ ਅਤੇ ਬਾਅਦ ਵਿੱਚ 36ਵੀਂ ਇਨਫੈਂਟਰੀ ਡਿਵੀਜ਼ਨ ਦੇ ਮੇਜਰ ਜਨਰਲ ਵਜੋਂ ਸੇਵਾ ਨਿਭਾਈ। ਉਨ੍ਹਾਂ ਦੇ ਅਕਾਲ ਚਲਾਣੇ ਨਾਲ ਭਾਰਤੀ ਫ਼ੌਜ ਨੇ ਇੱਕ ਅਜਿਹਾ ਅਧਿਕਾਰੀ ਗੁਆ ਦਿੱਤਾ ਹੈ ਜਿਸ ਕੋਲ ਜੰਗੀ ਰਣਨੀਤੀ ਅਤੇ ਫ਼ੌਜੀ ਇਤਿਹਾਸ ਦਾ ਅਥਾਹ ਖ਼ਜ਼ਾਨਾ ਸੀ।
