ਲੁਧਿਆਣਾ ‘ਚ ‘ਨਸ਼ਿਆਂ ਵਿਰੁੱਧ ਜੰਗ’ Fail! ਗੁਰਪ੍ਰੀਤ ਨਗਰ ‘ਚ ਘਰਾਂ ਦੀਆਂ ਖਿੜਕੀਆਂ ਰਾਹੀਂ ਵਿਕ ਰਿਹੈ ਨਸ਼ਾ
ਪੰਜਾਬ ਸਰਕਾਰ ਅਤੇ ਪੁਲਿਸ ਪ੍ਰਸ਼ਾਸਨ ਵੱਲੋਂ ਸੂਬੇ ਨੂੰ ਨਸ਼ਾਮੁਕਤ ਕਰਨ ਲਈ ਚਲਾਈ ਜਾ ਰਹੀ ‘ਨਸ਼ਿਆਂ ਵਿਰੁੱਧ ਜੰਗ’ ਮੁਹਿੰਮ ਲੁਧਿਆਣਾ ਦੇ ਥਾਣਾ ਡਾਬਾ ਅਧੀਨ ਆਉਂਦੇ ਖੇਤਰ ਵਿੱਚ ਪੂਰੀ ਤਰ੍ਹਾਂ ਨਾਕਾਮ ਸਾਬਤ ਹੁੰਦੀ ਦਿਖਾਈ ਦੇ ਰਹੀ ਹੈ। ਤਾਜ਼ਾ ਮਾਮਲਾ ਗੁਰਪ੍ਰੀਤ ਨਗਰ ਦੀ ਗਲੀ ਨੰਬਰ 0 ਤੋਂ ਸਾਹਮਣੇ ਆਇਆ ਹੈ, ਜਿੱਥੇ ਨਸ਼ਾ ਤਸਕਰਾਂ ਅਤੇ ਸਮਾਜ ਵਿਰੋਧੀ ਅੰਸਰਾਂ ਦੇ ਹੌਸਲੇ ਇੰਨੇ ਬੁਲੰਦ ਹੋ ਚੁੱਕੇ ਹਨ ਕਿ ਸਥਾਨਕ ਵਸਨੀਕਾਂ ਦਾ ਜਿਊਣਾ ਮੁਹਾਲ ਹੋ ਗਿਆ ਹੈ।
ਇਲਾਕਾ ਨਿਵਾਸੀਆਂ ਦਾ ਦੋਸ਼ ਹੈ ਕਿ ਗਲੀ ਵਿੱਚ ਸਰਗਰਮ ਮਹਿਲਾ ਨਸ਼ਾ ਤਸਕਰ ਬੇਖ਼ੌਫ਼ ਹੋ ਕੇ ਆਪਣੇ ਘਰਾਂ ਦੀਆਂ ਖਿੜਕੀਆਂ ਰਾਹੀਂ ਚਿੱਟੇ, ਗਾਂਜੇ ਅਤੇ ਹੋਰ ਨਸ਼ੀਲੇ ਪਦਾਰਥਾਂ ਦੀਆਂ ਪੁੜੀਆਂ ਸਿੱਧੀਆਂ ਸਪਲਾਈ ਕਰ ਰਹੀਆਂ ਹਨ। ਤਿੰਨ ਵਾਰ ਲਿਖਤੀ ਸ਼ਿਕਾਇਤਾਂ ਦੇਣ ਦੇ ਬਾਵਜੂਦ ਡਾਬਾ ਪੁਲਿਸ ਵੱਲੋਂ ਕੋਈ ਕਾਰਵਾਈ ਨਾ ਕੀਤੇ ਜਾਣ ਕਾਰਨ ਹੁਣ ਪੁਲਿਸ ਦੀ ਕਾਰਜਪ੍ਰਣਾਲੀ ‘ਤੇ ਵੀ ਗੰਭੀਰ ਸਵਾਲ ਖੜ੍ਹੇ ਹੋ ਰਹੇ ਹਨ।
ਗੁਰਪ੍ਰੀਤ ਨਗਰ ਵਿੱਚ ਬਣੇ ਬਦਤਰ ਹਾਲਾਤ ਦੀ ਪੂਰੀ ਰਿਪੋਰਟ:
- ਖਿੜਕੀ ਰਾਹੀਂ ਹੁੰਦੀ ਹੈ ‘ਸੇਫ਼ ਡਿਲੀਵਰੀ’: ਸਥਾਨਕ ਨਿਵਾਸੀ ਸਤਿੰਦਰ ਕੁਮਾਰ ਨੇ ਦੱਸਿਆ ਕਿ ਤਸਕਰਾਂ ਨੇ ਪੁਲਿਸ ਦੀ ਰੇਡ ਤੋਂ ਬਚਣ ਲਈ ਨਵਾਂ ਤਰੀਕਾ ਲੱਭਿਆ ਹੈ। ਉਹ ਆਪਣੇ ਮੁੱਖ ਦਰਵਾਜ਼ੇ ਅੰਦਰੋਂ ਬੰਦ ਰੱਖਦੇ ਹਨ ਅਤੇ ਗਾਹਕ ਦੇ ਆਉਂਦਿਆਂ ਹੀ ਖਿੜਕੀ ਰਾਹੀਂ ਨਸ਼ੇ ਦੇ ਪੈਕੇਟ ਫੜਾ ਦਿੰਦੇ ਹਨ। ਇਸ ‘ਵਿੰਡੋ ਸਪਲਾਈ’ ਕਾਰਨ ਪੁਲਿਸ ਲਈ ਉਨ੍ਹਾਂ ਨੂੰ ਰੰਗੇ ਹੱਥੀਂ ਫੜਨਾ ਚੁਣੌਤੀ ਬਣਿਆ ਹੋਇਆ ਹੈ।
- ਸਵੇਰੇ 6 ਵਜੇ ਤੋਂ ਲੱਗਦੀਆਂ ਹਨ ਰੌਣਕਾਂ: ਇਲਾਕੇ ਦੇ ਨਿਵਾਸੀਆਂ (ਦਲਜੀਤ, ਮਨਜਿੰਦਰ, ਨੀਰਜ ਅਤੇ ਸ਼ਿਵਮ) ਮੁਤਾਬਕ ਰੋਜ਼ਾਨਾ ਸਵੇਰੇ 6 ਵਜੇ ਤੋਂ ਹੀ ਇੱਥੇ ਨਸ਼ੇੜੀਆਂ ਦਾ ਆਉਣਾ-ਜਾਣਾ ਸ਼ੁਰੂ ਹੋ ਜਾਂਦਾ ਹੈ ਜੋ ਦੁਪਹਿਰ 1 ਵਜੇ ਤੱਕ ਨਿਰੰਤਰ ਜਾਰੀ ਰਹਿੰਦਾ ਹੈ। ਬਾਹਰਲੇ ਇਲਾਕਿਆਂ ਤੋਂ ਆਉਣ ਵਾਲੇ ਨੌਜਵਾਨ ਇੱਥੇ ਸ਼ਰੇਆਮ ਨਸ਼ਾ ਕਰਦੇ ਹਨ।
- ਸੜਕਾਂ ਜਾਮ ਤੇ ਗਾਲੀ-ਗਲੋਚ: ਸਥਾਨਕ ਵਸਨੀਕ ਯਾਦਵਿੰਦਰ ਅਨੁਸਾਰ ਨਸ਼ਾ ਖ਼ਰੀਦਣ ਆਉਣ ਵਾਲੇ ਨੌਜਵਾਨ ਆਪਣੇ ਮੋਟਰਸਾਈਕਲ ਗਲੀ ਦੇ ਵਿਚਕਾਰ ਹੀ ਬੇਤਰਤੀਬੇ ਢੰਗ ਨਾਲ ਖੜ੍ਹੇ ਕਰ ਦਿੰਦੇ ਹਨ। ਜੇਕਰ ਕੋਈ ਰਾਹਗੀਰ ਜਾਂ ਗੁਆਂਢੀ ਗੱਡੀ ਹਟਾਉਣ ਲਈ ਕਹਿੰਦਾ ਹੈ, ਤਾਂ ਇਹ ਨਸ਼ੇੜੀ ਕੁੱਟਮਾਰ ‘ਤੇ ਉਤਾਰੂ ਹੋ ਜਾਂਦੇ ਹਨ ਅਤੇ ਗੰਦੀਆਂ ਗਾਲ੍ਹਾਂ ਕੱਢਦੇ ਹਨ।
- ਘਰਾਂ ਵਿੱਚ ਕੈਦ ਹੋਏ ਮਾਸੂਮ ਬੱਚੇ: ਸਥਾਨਕ ਮਹਿਲਾਵਾਂ ਸੋਨਾ ਅਤੇ ਰਜਨੀ ਨੇ ਦੱਸਿਆ ਕਿ ਗਲੀ ਦੇ ਇਸ ਖ਼ੌਫ਼ਨਾਕ ਮਾਹੌਲ ਕਾਰਨ ਮਾਪੇ ਆਪਣੇ ਬੱਚਿਆਂ ਦੀ ਸੁਰੱਖਿਆ ਨੂੰ ਲੈ ਕੇ ਲਗਾਤਾਰ ਚਿੰਤਤ ਹਨ। ਨਸ਼ੇੜੀਆਂ ਦੀ ਗੰਦੀ ਭਾਸ਼ਾ ਅਤੇ ਰੋਜ਼ਾਨਾ ਦੇ ਝਗੜਿਆਂ ਕਾਰਨ ਬੱਚਿਆਂ ਨੂੰ ਘਰਾਂ ਦੇ ਅੰਦਰ ਹੀ ਤਾੜ ਕੇ ਰੱਖਣ ਲਈ ਮਜਬੂਰ ਹੋਣਾ ਪੈ ਰਿਹਾ ਹੈ।
ਪੁਲਿਸ ਪ੍ਰਸ਼ਾਸਨ ਨੂੰ ਅਲਟੀਮੇਟਮ: ਲੋਕ ਉਤਰਨਗੇ ਸੜਕਾਂ ‘ਤੇ
ਧਰਨੇ ਦੀ ਚੇਤਾਵਨੀ: ਡਾਬਾ ਪੁਲਿਸ ਦੇ ਢਿੱਲੇ ਅਤੇ ਉਦਾਸੀਨ ਰਵੱਈਏ ਤੋਂ ਤੰਗ ਆ ਚੁੱਕੇ ਗੁਰਪ੍ਰੀਤ ਨਗਰ ਦੇ ਵਸਨੀਕਾਂ ਨੇ ਹੁਣ ਆਰ-ਪਾਰ ਦੀ ਲੜਾਈ ਦਾ ਐਲਾਨ ਕੀਤਾ ਹੈ। ਉਨ੍ਹਾਂ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਪੁਲਿਸ ਨੇ ਤੁਰੰਤ ਇਸ ਗਲੀ ਵਿੱਚ ਛਾਪੇਮਾਰੀ ਕਰਕੇ ਨਸ਼ਾ ਤਸਕਰਾਂ ਨੂੰ ਜੇਲ੍ਹ ਨਾ ਭੇਜਿਆ ਅਤੇ ਇਲਾਕੇ ਵਿੱਚ ਪੀ.ਸੀ.ਆਰ (PCR) ਦੀ ਗਸ਼ਤ ਨਾ ਵਧਾਈ, ਤਾਂ ਉਹ ਡਾਬਾ ਥਾਣੇ ਦੇ ਬਾਹਰ ਅਤੇ ਮੁੱਖ ਸੜਕਾਂ ‘ਤੇ ਉਤਰ ਕੇ ਜ਼ੋਰਦਾਰ ਰੋਸ ਪ੍ਰਦਰਸ਼ਨ ਕਰਨਗੇ।
