ਜੋਮਾਟੋ ਦੇ ਸਾਬਕਾ ਕਰਮਚਾਰੀਆਂ ਲਈ Deepinder Goyal ਦਾ ਭਾਵੁਕ ਸੰਦੇਸ਼, ਮੁੜ ਵਾਪਸੀ ਦਾ ਨਿਓਤਾ
Zomato Founder Deepinder Goyal Emotional Post: ਕੋਈ ਵੀ ਕੰਪਨੀ ਜਦੋਂ ਆਪਣੇ ਕਰਮਚਾਰੀਆਂ ਨੂੰ ਹਟਾਉਂਦੀ ਹੈ, ਤਾਂ ਉਸ ਸਮੇਂ ਭਾਵੇਂ ਜੋ ਵੀ ਕਾਰਨ ਦੱਸਿਆ ਜਾਵੇ, ਪਰ ਪੁਰਾਣੇ ਕਰਮਚਾਰੀਆਂ ਨਾਲ ਇੱਕ ਭਾਵਨਾਤਮਕ ਨਾਤਾ ਬਣਿਆ ਰਹਿੰਦਾ ਹੈ। ਏਟਰਲ (ਪਹਿਲਾਂ ਜੋਮਾਟੋ) ਦੇ ਫਾਊਂਡਰ ਅਤੇ ਵਾਈਸ ਚੇਅਰਮੈਨ ਦੀਪੇਂਦਰ ਗੋਇਲ ਨੇ ਵੀ ਆਪਣੇ ਪੂਰਵ ਕਰਮਚਾਰੀਆਂ ਲਈ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ ‘ਤੇ ਇੱਕ ਭਾਵੁਕ ਪੋਸਟ ਸਾਂਝੀ ਕਰਦੇ ਹੋਏ ਉਨ੍ਹਾਂ ਨੂੰ ਮੁੜ ਵਾਪਸ ਆਉਣ ਦਾ ਨਿਓਤਾ ਦਿੱਤਾ ਹੈ।
ਦੀਪੇਂਦਰ ਗੋਇਲ ਦੀ ਭਾਵੁਕ ਪੋਸਟ
ਦੀਪੇਂਦਰ ਗੋਇਲ ਨੇ ਲਿਖਿਆ ਕਿ ਕੰਪਨੀ ਨੇ ਆਪਣੇ ਅਤੀਤ ਤੋਂ ਬਹੁਤ ਕੁਝ ਸਿੱਖਿਆ ਹੈ ਅਤੇ ਜੋ ਲੋਕ ਪਹਿਲਾਂ ਇੱਥੇ ਕੰਮ ਕਰ ਚੁੱਕੇ ਹਨ, ਉਨ੍ਹਾਂ ਦੀ ਵਾਪਸੀ ਦਾ ਖੁੱਲ੍ਹੇ ਦਿਲ ਨਾਲ ਸਵਾਗਤ ਕਰਨ ਲਈ ਉਹ ਤਿਆਰ ਹਨ। ਉਨ੍ਹਾਂ ਉਹਨਾਂ ਲੋਕਾਂ ਨੂੰ ਸੰਬੋਧਨ ਕੀਤਾ ਜੋ ਆਪਣੀ ਮਰਜ਼ੀ ਨਾਲ ਜੋਮਾਟੋ ਛੱਡ ਕੇ ਗਏ ਸਨ ਜਾਂ ਜਿਨ੍ਹਾਂ ਨੂੰ ਅੱਗੇ ਵੱਧਣ ਲਈ ਕਿਹਾ ਗਿਆ ਸੀ।
ਗੋਇਲ ਨੇ ਕਿਹਾ ਕਿ ਉਸ ਸਮੇਂ ਜੋਮਾਟੋ ਹਰ ਕਿਸੇ ਲਈ ਸਹੀ ਜਗ੍ਹਾ ਨਹੀਂ ਹੋ ਸਕਦੀ ਸੀ। ਕਈ ਕਰਮਚਾਰੀਆਂ ਨੂੰ ਨਾ ਤਾਂ ਉਹੋ ਜਿਹਾ ਕੰਮਕਾਜ ਦਾ ਮਾਹੌਲ ਮਿਲਿਆ ਹੋਵੇਗਾ ਅਤੇ ਨਾ ਹੀ ਉਹੋ ਜਿਹੀ ਲੀਡਰਸ਼ਿਪ, ਜਿਸਦੀ ਉਨ੍ਹਾਂ ਨੂੰ ਲੋੜ ਸੀ।
ਇਸ ਦੇ ਬਾਵਜੂਦ, ਉਨ੍ਹਾਂ ਮੰਨਿਆ ਕਿ ਬਹੁਤ ਸਾਰੇ ਕਰਮਚਾਰੀਆਂ ਦਾ ਕੰਪਨੀ ਨਾਲ ਗਹਿਰਾ ਭਾਵਨਾਤਮਕ ਰਿਸ਼ਤਾ ਰਿਹਾ ਹੈ। ਜੋ ਆਪਣੇਪਨ, ਪਿਆਰ ਅਤੇ ਘਰ ਵਰਗਾ ਅਹਿਸਾਸ ਉਨ੍ਹਾਂ ਨੂੰ ਜੋਮਾਟੋ ਵਿੱਚ ਮਿਲਿਆ, ਉਹ ਅਨੁਭਵ ਸ਼ਾਇਦ ਉਨ੍ਹਾਂ ਨੂੰ ਹੋਰ ਕਿਤੇ ਨਹੀਂ ਮਿਲਿਆ ਹੋਵੇਗਾ। ਇਸ ਪੂਰੇ ਸੁਨੇਹੇ ਦਾ ਲਹਜਾ ਬਹੁਤ ਨਿੱਜੀ ਸੀ, ਜਿਸ ਤੋਂ ਇਹ ਸਪਸ਼ਟ ਹੁੰਦਾ ਹੈ ਕਿ ਕੰਪਨੀ ਛੱਡਣ ਨਾਲ ਸਾਂਝਾ ਸਫਰ ਅਤੇ ਇਕੱਠੇ ਕੀਤੇ ਕੰਮ ਦੀ ਮਹੱਤਤਾ ਕਦੇ ਖਤਮ ਨਹੀਂ ਹੁੰਦੀ।
